News

POST TYPE

LATEST NEWS POST

မွန်တွင် တရုတ်ကြက်သွန်နီ ရောင်းအားကောင်း
10-Jan-2018



မော်လမြိုင်၊ ဇန်နဝါရီ ၉

မွန်ပြည်နယ်တွင် တရုတ်ကဝင်လာသည့် ကြက်သွန်နီ လူသုံးပိုများလာပြီး ရောင်းအားကောင်းနေသည်ဟု မော်လမြိုင်ဈေးကြိုပွဲရုံတန်းရှိ ကြက်သွန်နီပွဲရုံ လုပ်ငန်းရှင်များထံမှ သိရသည်။

လက်ရှိတွင် မော်လမြိုင်ပွဲရုံ၌ မြန်မာကြက်သွန်နီ တစ်ပိဿာ ကျပ် ၃၅၀၀ ပေါက်ဈေးရှိနေပြီး တရုတ်ကြက်သွန်နီ တစ်ပိဿာ ၉၅၀ ကျပ်ဝန်းကျင် ရှိနေသည်။

“ဒီနှစ် ကြက်သွန်အထွက်နည်းတော့ ဈေးနှုန်းတက်တယ်၊ သုံးတဲ့သူတွေက ဈေးသက်သာတဲ့ တရုတ်ကြက်သွန်တွေကို သုံးလာကြတယ်၊ မြန်မာကြက်သွန်က ဈေးကြီးတော့ တရုတ်ကြက်သွန်ကိုပဲ ဝယ်သုံးလာတယ်”ဟု မော်လမြိုင် ဈေးကြိုပွဲရုံတန်းရှိ ရွှေနဒီကြက်သွန်ပွဲရုံမှ ဒေါ်သင်ဇာအောင်က ပြောကြားသည်။

ကြက်သွန်နီ အသစ်ထွက်ချိန်ဖြစ်သည့် ဒီဇင်ဘာလတွင် အချိန်အခါမဟုတ် မိုးရွာသွန်းမှုကြောင့် ကြက်သွန်နီစိုက်ခင်းများ ပျက်စီးကာ ကြက်သွန်နီ အထွက်နည်းသည့်အတွက် ကြက်သွန်နီဈေးသည် အမြင့်ဆုံး တစ်ပိဿာ ကျပ် ၃၅၀၀ ထိ တက်သွားသည်ဟု ကြက်သွန်နီ ပွဲရုံလုပ်ငန်းရှင်တို့က ဆိုသည်။

ယခင်နှစ်များက ကြက်သွန်နီ အသစ်ပေါ်ချိန်တွင် မြန်မာကြက်သွန်နီ တစ်ပိဿာ ကျပ် ၁၀၀၀ အောက်သာရှိသည်ဟုလည်း ပွဲရုံလုပ်ငန်းရှင်များထံမှ သိရသည်။

“မြန်မာကြက်သွန်နဲ့ တရုတ်ကြက်သွန်က ဈေးလည်းကွာတော့ တရုတ်ကြက်သွန်ပဲ အရောင်းတွင်လာတယ်၊ လူတွေ အသုံးပြုမှုများလာတဲ့ သဘောပါ”ဟု မော်လမြိုင်မှ ကြက်သွန်နီပွဲရုံ လုပ်ငန်းရှင်တစ်ဦးက ပြောသည်။

တရုတ်ကြက်သွန်နီသည် မြန်မာကြက်သွန်နီကဲ့သို့ ချက်ပြုတ်အသုံးပြု၍ မကောင်းသော်လည်း ဈေးနှုန်းကွာဟသည့်အတွက် ဝယ်ယူအသုံးပြုနေရသည်ဟု မော်လမြိုင်မြို့မှ ဒေါ်မေသန်းက ဆိုသည်။

မော်လမြိုင် ဈေးကြိုပွဲရုံတန်းရှိ ကြက်သွန်ပွဲရုံတစ်ရုံလျှင် တစ်နေ့ တရုတ်ကြက်သွန်နီ အချိန်တစ်သောင်းထိ အရောင်းအဝယ်ဖြစ်နေသည်ဟု ဒေါ်သင်ဇာအောင်က ပြောသည်။

မွန်ပြည်နယ် ကြက်သွန်ဈေးကွက်တွင် မြန်မာကြက်သွန်နီ၊ တရုတ်ကြက်သွန်နီနှင့် အိန္ဒိယမှတင်သွင်းသည့် ကြက်သွန်နီများအပြင် ထိုင်းကြက်သွန်နီများလည်း ရှိသည်။     

Dawei Watch

  • VIA