News

POST TYPE

LATEST NEWS POST

ပြည်သူရှော့ခ်မဖြစ်စေမည့် မီတာခသို့ တိုးကောက်မည်ဟု လျှပ်စစ်ဒုဝန်ကြီးပြော
နေပြည်တော်၊ နိုဝင်ဘာ ၁၄

လျှပ်စစ်မီတာခ နှုန်းများကို ပြောင်းလဲကောက်ခံမည် ဖြစ်သော်လည်း ပြည်သူ အတွက် ရှော့ခ် (Shock) ရသွားမည့် ကိစ္စမျိုး မဖြစ်စေရအောင် လုပ်ဆောင်မည်ဟု လျှပ်စစ်နှင့်စွမ်းအင် ဝန်ကြီးဌာန၊ ဒုတိယဝန်ကြီး ဒေါက်တာထွန်းနိုင်က ပြောကြားသည်။

“ဒါကြီးအပေါ်မှာ အရမ်းကြီး Shock ရသွားတဲ့ဟာမျိုး မဖြစ်ရပါဘူး”ဟု ၎င်းကဆိုသည်။

ယနေ့ (နိုဝင်ဘာ ၁၄) ကျင်းပသည့် အမျိုးသားလွှတ်တော် အစည်းအဝေးအပြီးတွင် မီဒီယာများနှင့် တွေ့ဆုံစဉ် ၎င်းက ပြောကြားခဲ့ခြင်း ဖြစ်သည်။

တစ်နိုင်ငံလုံးအနှံ့တွင် ဓာတ်အားသုံးစွဲမှု တူညီမှု မရှိသည့်အပြင် တစ်လနှင့် တစ်လ တိုးမြှင့်သုံးစွဲလာခြင်းများ ရှိသောကြောင့် အချိန်ယူ၍ စစ်တမ်းကောက်နေရကြောင်း၊ ပြောင်းလဲ ကောက်ခံမည့်အချိန်ကိုမူ တိတိကျကျ မပြောနိုင်သေးကြောင်း ၎င်းကဆိုသည်။

“ကိန်းဂဏန်း အချက်အလက်ပေါင်း များစွာကို စုဆောင်းရတယ်။ တိုင်းနဲ့ ပြည်နယ် တစ်ပြည်လုံးအနှံ့ပေါ့၊ အိမ်သုံးတို့၊ စက်မှုလုပ်ငန်းသုံးတို့၊ စီးပွားရေးလုပ်ငန်းသုံးတို့ အဲလိုမျိုးကတော့ အမျိုးအစား သုံးမျိုးလို့ ယေဘုယျ ပြောတာပါ။ အဲလို ယေဘုယျ ပြောပြီးခါမှ အိမ်သုံးထဲမှာမှ နည်းနည်းသုံးသူ၊ နည်းနည်းလေးသုံးသူ၊ ဒီထက် နည်းနည်းလေး ပိုသုံးသူ၊ အဲထက်ပိုပိုသုံးသူ၊ အဲပိုသုံးသူတွေက ဘယ်လောက်လောက်ရှိကျလည်းဆိုတဲ့ ပမာဏတွေ၊  ဦးရေတွေကိုလည်း စစ်တမ်းကောက်တယ်”ဟု ၎င်းကရှင်းပြသည်။

ဓာတ်အားခကို ပြင်ဆင် သတ်မှတ်သည့်အချိန် ရောက်ပါက ဝင်ငွေနည်းပါးသော မိသားစုများအတွက် ခက်ခဲသွားစေမည့် အခြေအနေ မရောက်စေရေးအတွက် ယင်းအချက်များကို စဉ်းစားနေရကြောင်း ၎င်းကဆိုသည်။

“သုံးတဲ့ပမာဏ လုပ်တယ်။ အဲဒါလေးတွေကို Data Collection လုပ်ပြီး စိတ်ရှည်လက်ရှည် Analysis လုပ်တယ်။ Analysis လုပ်နေပြီးတော့မှ တကယ်တမ်း ဝင်ငွေ သိပ်နည်းပါတယ်ဆိုတဲ့ မိသားစုတွေကို တယ်လီဖုန်း သုံးသလား၊ သူတို့ တယ်လီဖုန်းဘေလ် တစ်လကို ဘယ်လောက်လောက်သုံးသလဲ။ ဆိုလိုချင်တာ တယ်လီဖုန်းဘေလ်ကို ဘယ်လောက်လောက် ခံနိုင်ရည်ရှိသလဲ ဒါဆိုရင် တယ်လီဖုန်းဘေလ်ကို သုံးလို့ရှိရင် တစ်ယောက်စီ သပ်သပ်သုံးရတာ။ လျှပ်စစ်ဘေလ်ကျ အဲလို မဟုတ်ဘူး ဘေလ်က တစ်စောင်ထဲ လာတယ်။ တစ်မိသားစုလုံး သုံးသမျှဟာ လာတယ်။ အဲလို အနေအထားလေးမှာ သူတို့တွေအတွက်ကို ဘယ်လောက် ခံနိုင်ရည်ရှိသလဲ ဒါလေးတွေကို အနုစိတ်၊ အသေးစိတ် တွက်ချက် စဉ်းစားနေကြတယ်”ဟု ဒုတိယဝန်ကြီးက ထပ်လောင်း ပြောသည်။

ယင်းအပြင် လျှပ်စစ်ဓာတ်အားခ အရှုံးပေါ်နေသောကြောင့် ယင်းကဏ္ဍ တည်ငြိမ်မြင့်မားလာရေးအတွက် အစီအစဉ်ကောင်းများ ရှာဖွေထားမှု ရှိ မရှိကို မွန်မဲဆန္ဒနယ်အမှတ် (၆) မှ ဦးဖေတင်က လွှတ်တော်တွင် မေးမြန်းခဲ့ခြင်းဖြစ်ပြီး ၎င်းက လက်ရှိတွင် ဓာတ်အား ပျောက်ဆုံးမှုများကြောင့် လက်ရှိဆုံးရှုံးမှုများထက် လျော့ကျစေရန် ထုတ်လုပ်မှု ကုန်ကျစရိတ် ကာမိစေမည့် သင့်တင့်မျှတတဲ့ ဓာတ်အားခနှုန်းထားသစ်ကို အမြန်ဆုံး ပြင်ဆင်သတ်မှတ်ခြင်း၊ ထုတ်လုပ်မှုစရိတ် မြင့်မားသည့် သဘာဝ ဓာတ်ငွေ့အပေါ် မှီခိုမှုလျှော့ချပြီး စရိတ်သက်သာသော ရေအားလျှပ်စစ်နှင့် အခြား စွမ်းအင်အရင်းအမြစ်တို့မှ ဓာတ်အား ပိုမိုထုတ်လုပ်နိုင်ရေးတို့ကို စီစဉ်ဆောင်ရွက်သွားမည် ဖြစ်ကြောင်း ဒုဝန်ကြီးက လွှတ်တော်တွင် ဖြေကြားခဲ့သည်။

လျှပ်စစ်ဓာတ်အား တစ်ယူနစ်ကို ပျမ်းမျှ ရောင်းရငွေနှင့် ပျမ်းမျှထုတ်လုပ်မှု ကုန်ကျစရိတ်သည် ၂၀၁၄-၁၅ ခုနှစ်တွင် တစ်ယူနစ်ပျမ်းမျှ ရောင်းရ ငွေ ၇၄ ဒသမ ၁၄ ကျပ်ဖြစ်ပြီး တစ်ယူနစ် ပျမ်းမျှ ထုတ်လုပ်မှု ကုန်ကျစရိတ်မှာ ၇၄ ဒသမ ၈၅ ကျပ်ဖြစ်ကြောင်း  ၂၀၁၅-၁၆ ခုနှစ်တွင် တစ်ယူနစ် ရောင်းရငွေ ၇၀ ဒသမ ၄၂ ကျပ်ဖြစ်ပြီး တစ်ယူနစ် ထုတ်လုပ်မှု ကုန်ကျစရိတ်မှာ ၉၀ ဒသမ ၆၅ ကျပ်နှင့် ၂၀၁၆-၁၇ ခုနှစ်မှာ တစ်ယူနစ် ရောင်းရငွေမှာ ၆၉ ဒသမ ဝ၂ ကျပ်ဖြစ်ပြီး တစ်ယူနစ် ထုတ်လုပ်မှု ကုန်ကျစရိတ်မှာ ၉၆ ဒသမ ၁၂ ကျပ်ဖြစ်ကြောင်း ဒုဝန်ကြီးက ဖြေကြားခဲ့သည်။

S-01