News

POST TYPE

LATEST NEWS POST

၂ နှစ်အတွင်း ပြည်ပပို့ဆန်ဈေး အမြင့်ဆုံးရောက်
22-Sep-2017 tagged as ဆန်

ရန်ကုန်၊ စက်တင်ဘာ ၂၁

ဆက်တိုက်မြင့်တက်နေသော ပြည်ပပို့ ဆန်ဈေးများသည် ၂ နှစ်အတွင်း အမြင့်ဆုံးဈေးနှုန်း တစ်ရပ်သို့ ရောက်ရှိကြောင်း ဆန်ဈေးကွက်အတွင်းမှ သိရသည်။

၂၀၁၅ ခုနှစ် စက်တင်ဘာလက ဧည့်မထ (၂၅ မှတ်) ဆန်တစ်အိတ်လျှင် ကျပ် ၁၇,၀၀၀ ခန့်သာ ရှိခဲ့သော်လည်း ယခုနှစ် ယင်းကာလအတွင်း ၂၅ မှတ် ဆန်တစ်အိတ်လျှင် ကျပ် ၂၁,၀၀၀ ခန့်သို့ ရောက်ရှိလာခဲ့ပြီး ကျန်ဆန်ကြမ်းဈေးများမှာလည်း အမြင့်ဆုံးဈေးနှုန်း တစ်ရပ်သို့ ရောက်ရှိလျက်ရှိကြောင်း ဆန်ဈေးကွက်အတွင်းမှ သိရသည်။

လက်ရှိဆန်ဈေးကွက်အတွင်း ယခင် အပတ်ကထက် ဧည့်မထ ၂၅ မှတ် ဆန်နှင့် နွေသီးထပ် ရှယ်ဆန်ဈေးနှုန်းများ ဆက်လက် ဈေးတက်လာပြီး တစ်အိတ်လျှင် ကျပ် ၇၀၀ မှ ၁၀၀၀ ခန့်အထိ ဈေးတက်ကြောင်း ယင်းဈေးကွက်အတွင်းမှ သိရသည်။

ယခုနှစ်အတွင်း ပင်လယ်ရေကြောင်း ဘက်က တရုတ်နိုင်ငံသို့ ဆန်တန်ချိန် နှစ်သိန်း တရားဝင် တင်ပို့နိုင်ရန် ဆွေးနွေးနေခြင်း အပါအဝင် ဘင်္ဂလားဒေ့ရ်ှနိုင်ငံသို့ ဒီဇင်ဘာလမှစ၍ ဆန်တန်ချိန် သုံးသိန်း တင်ပို့ရန် MoU လက်မှတ်ရေးထိုးပြီးခြင်းတို့ကြောင့် ယင်းသို့ ဆန်ဈေးဆက်တိုက် မြင့်တက်လာခြင်း ဖြစ်ကြောင်း ဆန်ကုန်သည်များက ဆိုသည်။

၂၀၁၅ ခုနှစ်အတွင်းက ဧည့်မထ (ထိပ်စ) ဆန်တစ်အိတ်လျှင် ကျပ် ၁၉,၀၀၀ ခန့်၊ နွေသီးထပ်ရှယ်တစ်အိတ်လျှင် ၁၉,၀၀၀ ကျပ်ခန့်၊ ဧည့်မထ ၂၅ မှတ်ဆန်တစ်အိတ်လျှင် ၁၇,၀၀၀ ခန့်သာ ရှိခဲ့သော်လည်း လက်ရှိ ဆန်ဈေးကွက်အတွင်း ဧည့်မထ (ထိပ်စ) ဆန်တစ်အိတ်လျှင် ကျပ် ၂၂,၀၀၀ ခန့်၊ နွေသီးထပ်ရှယ်တစ်အိတ်လျှင် ၂၂,၈၀၀ ကျပ်ခန့်နှင့် ဧည့်မထ ၂၅ မှတ် ဆန်တစ်အိတ်လျှင် ၂၁,၀၀၀ ကျပ်ခန့်ဈေး ရှိကြောင်း ဘုရင့်နောင်နှင့် ဝါတန်းဆန်ဈေးကွက်များ အတွင်းမှ သိရသည်။

S-04