News

POST TYPE

LATEST NEWS POST

ကရင်ပြည်နယ် တိုးတက်ရေး တိုင်ပင်ဆွေးနွေးကြစေလို
မကြာမီရက်ပိုင်းအတွင်းက DVB ရုပ်သံလွှင့်ဌာနမှ ထုတ်လွှင့်သော အစီအစဉ်တစ်ခုတွင် ကရင်ပြည်နယ် အစိုးရအဖွဲ့ဝန်ကြီးချုပ် ဒေါ်နန်းခင်ထွေးမြင့်နှင့် တွေ့ဆုံမေးမြန်းခန်းကို ကြည့်ရှုလိုက်ရပါသည်။ အဆိုပါ တွေ့ဆုံမေးမြန်းခန်းတွင် အဓိကအားဖြင့် ကရင်ပြည်နယ်တွင် ကျောက်မီးသွေးအသုံးပြု လျှပ်စစ်ဓာတ်အားပေးစက်ရုံ တည်ဆောက်ရေးကိစ္စကို အလေးပေး ဆွေးနွေးမေးမြန်းသွားပါသည်။ အဆိုပါ တွေ့ဆုံမေးမြန်းခန်းတွင် ဝန်ကြီးချုပ်၏ ဖြေကြားချက်များအနက် အောက်ပါအချက်များကို ကောက်နုတ်ဖော်ပြလိုပါသည်။

ဝန်ကြီးချုပ်၏ မျှော်မှန်းချက် 

အဆိုပါတွေ့ဆုံမေးမြန်းခန်းတွင် ဝန်ကြီးချုပ်က ပြောကြားရာ၌ “ကရင်ပြည်နယ်သည် ဖွံ့ဖြိုးမှုနောက်ကျနေသော ပြည်နယ်တစ်ခုဖြစ်ကြောင်း၊ သို့သော်လည်း မိမိတို့ပြည်နယ်သည် အပစ်အခတ်ရပ်စဲရေး (ငြိမ်းချမ်းရေး)ကို စောစီးစွာရသည့် ပြည်နယ်တစ်ခုဖြစ်သည့်အတွက် ငြိမ်းချမ်းရေး၏ အသီးအပွင့်များကို ကရင်လူမျိုးတို့ စောစီးစွာ ခံစားရရှိစေလိုကြောင်း၊ ဖွံ့ဖြိုးတိုးတက်ရန်အတွက် လျှပ်စစ်ဓာတ်အား ရရှိရေးသည် အဓိကကျပါကြောင်း၊ ထို့ကြောင့် ပြည်နယ်အတွင်း လျှပ်စစ်ဓာတ်အား ထုတ်ယူရရှိမည့်နေရာများနှင့် နည်းလမ်းများကို လေ့လာခဲ့ပါကြောင်း”။

“ထိုကဲ့သို့ လေ့လာသည့်အခါ လျှပ်စစ်ဓာတ်အား ထုတ်လုပ်ရာတွင် ရေအားလျှပ်စစ်မှာ အကုန်အကျ အနည်းဆုံးဖြစ်၍ ရေအားလျှပ်စစ်ဓာတ်ပေး စက်ရုံတည်ဆောက်ရန် ဦးစွာပထမ စဉ်းစားခဲ့ပါကြောင်း၊ သို့သော်လည်း ထိုကဲ့သို့ ထုတ်လုပ်ရာတွင် အချိန်ကာလအားဖြင့် ခုနစ်နှစ်၊ ရှစ်နှစ်ခန့် ကြာမည့်အပြင် ရေဝပ်ဧရိယာအတွင်း ကျရောက်မည့် ကျေးရွာပေါင်း ခုနစ်ရွာခန့်ရှိပြီး ၎င်းကျေးရွာများကို ရွှေ့ပြောင်းရမည်ဖြစ်ရာ ရွာသူရွာသားများအတွက် အခက်အခဲများစွာ ကြုံတွေ့ရမည်ဖြစ်သလို ၎င်းတို့ အားရှင်းလင်းပြောပြ၍ အကောင်အထည်ဖော် ဆောင်ရွက်ရန်မှာလည်း အလွန် မလွယ်ကူပါကြောင်း”။

“ထို့ကြောင့် နောက်ထပ် နည်းလမ်းတစ်ခုကို စဉ်းစားရာမှာ Solar System ကို သွားတွေ့ပါကြောင်း၊ သို့ရာတွင် ထိုစနစ်မှာလည်း တစ်နှစ်တွင် ခုနစ်လခန့်သာ ရရှိမည်ဖြစ်ပြီး၊ တစ်နေ့တွင် ၅ နာရီလောက်သာ ရရှိမည်ဟု သိရှိရပါကြောင်း၊ ညပိုင်းတွင် ရရှိရန်အတွက် ဘက်ထရီအိုးကို အသုံးပြုမည်ဆိုပါကလည်း ကုန်ကျစရိတ် များပြားပြီး ပြည်သူလူထုတွင် ဝန်ပိလာမည်ဖြစ်ပါကြောင်း၊ ထို့အပြင် ၎င်းတို့တောင်းခံသော ဈေးနှုန်းမှာ များပြားပြီး ဈေးဆစ်သော်လည်း မလျှော့ပေးသဖြင့် ယခုနောက်ဆုံး နည်းလမ်းဖြစ်သည့် ကျောက်မီးသွေးမှ လျှပ်စစ်ဓာတ်အား ထုတ်ယူမည့် စက်ရုံတည်ဆောက်ရန် ရွေးချယ်လိုက်ရခြင်းဖြစ်ကြောင်း ရှင်းလင်းပြောကြားပါသည်”။

(ယခုအခါ ကမ္ဘာ့ဘဏ်နှင့် ကျေးလက်ဒေသ ဖွံ့ဖြိုးတိုးတက်ရေး ဦးစီးဌာနတို့ ပူးပေါင်း၍ မဟာဓာတ်အားလိုင်းနှင့် ၁၀ မိုင်အထက်ဝေးသော ကျေးရွာများမှ အိမ်ခြေတစ်သောင်းကျော်အား ဆိုလာပြားစနစ်ကို အရစ်ကျပေးချေစနစ်ဖြင့် တပ်ဆင်နေကြောင်း သိရှိရပါသည်)။

၎င်းကဆက်လက်ပြောကြားရာတွင် “ယခုကဲ့သို့ ကျောက်မီးသွေးမှ လျှပ်စစ်ဓာတ်အား ထုတ်လုပ်သည့်စက်ရုံ တည်ဆောက်ရေးအတွက် ပညာရှင်များစွာကို ဖိတ်ခေါ်၍ ဆွေးနွေးခဲ့ပါကြောင်း၊ ၎င်းတို့၏အကြံပြု တင်ပြချက်များအရလည်း ကမ္ဘာပေါ်တွင် သဘာဝ ပတ်ဝန်းကျင် ထိခိုက်မှု အနည်းဆုံးဖြစ်စေမည့် နည်းပညာများကိုအသုံးပြု၍ နိုင်ငံအသီးသီးတွင် ကျောက်မီးသွေးမှ စွမ်းအင်ထုတ်လုပ်သည့်စက်ရုံများ တည်ဆောက်လျက်ရှိကြောင်း သိရှိရသဖြင့် မိမိတို့ပြည်နယ် အနေနှင့်လည်း ထိုကဲ့သို့ ဆောင်ရွက်ရန် ဆုံးဖြတ်ခြင်းဖြစ်ကြောင်း၊ ယခုအခါ တစ်ဖက်နိုင်ငံတွင် သွားရောက်၍ အလုပ်လုပ်ကိုင်နေသူများအနက် မိမိတို့ ကရင်ပြည်နယ်မှ အများဆုံးဖြစ်ပါကြောင်း၊ အကယ်၍သာ ဖော်ထုတ်ပြီးဖြစ်သည့် စက်မှုဇုန်များတွင် လျှပ်စစ်ဓာတ်အားသာ အပြည့်အဝ ရရှိမည်ဆိုပါက တစ်ဖက် စက်ရုံများသည် မိမိတို့ပြည်နယ်အတွင်း လာရောက်ကြမည်ဖြစ်ပြီး အမျိုးအစားတူ စက်ရုံများဖြစ်သည့်အတွက် ပြန်လာကြသူများ အနေနှင့်လည်း အလုပ်အကိုင် ရရှိကြမည်ဖြစ်ပါကြောင်း၊ မိမိအနေနှင့် အနည်းဆုံး လူဦးရေ ထောင်ဂဏန်း၊ သောင်းဂဏန်း၊ သိန်းဂဏန်းခန့်အထိ အလုပ်အကိုင်ရရှိမည်ဟု မျှော်မှန်းပါကြောင်း”စသည်ဖြင့် ပြောကြားခဲ့သလို “ရောဂါပျောက်စေချင်တဲ့အတွက် ဆေးခါးကြီးကို တိုက်ရတာပါ၊ ရောဂါပျောက်ချင်ရင်တော့ ဆေးခါးတာကို မကြောက်ဘဲ သောက်ဖို့လိုပါတယ်။ ဒါမှလည်း ကရင်ပြည်နယ်ဟာ ဖွံ့ဖြိုးတိုးတက်တဲ့ ပြည်နယ်တစ်ခု ဖြစ်လာမှာဖြစ်ပါတယ်”ဟူ၍ ပြောကြားသွားပါသည်။

ငြိမ်းချမ်းရေးရဲ့အရသာ

ကျွန်တော့်အနေနှင့် ၂၀၁၆ ခုနှစ် ဇူလိုင်လ ၁၅ ရက်နေ့ကထုတ်ဝေသည့် DEMOCRACY Today သတင်းစာတွင် “ငြိမ်းချမ်းရေး အသီးအပွင့်များကို စတင် ခံစားနေရပြီဖြစ်တဲ့ ကရင်ပြည်နယ်”ဆိုသည့်ခေါင်းစဉ်ဖြင့် ဆောင်းပါးတစ်ပုဒ် ရေးသားဖော်ပြခဲ့ပါသည်။ အဆိုပါဆောင်းပါးတွင် ကျွန်တော်က “ယခုအခါ ထိုင်းနိုင်ငံရှိ ဒုက္ခသည်စခန်းများမှ ဒုက္ခသည်များအား ပြန်လည် ခေါ်ယူရန် စီစဉ်ဆောင်ရွက်လျက် ရှိသည့်အပြင် အမိမြန်မာနိုင်ငံသို့ ပြန်လာလိုကြသော ရွှေ့ပြောင်း အလုပ်သမားများလည်း ရှိနေကြ ပါသည်။ ဘားအံမြို့တွင် လုပ်ငန်းများ အပြည့်အဝ မလည်ပတ်နိုင်သေးသော စက်မှုဇုန်များကို ဆက်လက် အကောင်အထည်ဖော် ဆောင်ရွက်စေခြင်း၊ အေးချမ်းလာသော ကရင်ပြည်နယ်အတွင်း မြေလွတ်မြေလပ်များတွင် စိုက်ပျိုးရေး လုပ်ငန်းများ တိုးချဲ့ လုပ်ကိုင်စေခြင်းအားဖြင့် သူတစ်ပါးနိုင်ငံတွင် အောက်ကျ၊ နောက်ကျ လုပ်ကိုင်နေကြရသူများအတွက် အလုပ်အကိုင် အခွင့်အလမ်း များစွာ ပေါ်ထွက်လာမည် ဖြစ်ပါသည်”ဟူ၍ ရေးသားခဲ့ပါသည်။

ယခုအခါ ကရင်ပြည်နယ်သည် ငြိမ်းချမ်းသာယာလျက်ရှိပြီး လမ်းပန်းဆက်သွယ်ရေးများလည်း အထူး ကောင်းမွန်ကာ ပြည်တွင်း/ပြည်ပ ခရီးသွားဧည့်သည် အများအပြား ဝင်ရောက် လည်ပတ်လျက်ရှိပါသည်။ လိုအပ်နေသည်မှာ လျှပ်စစ်ဓာတ်အားသာဖြစ်ပြီး ပြည်နယ်အတွင်းရှိ မြို့နှင့်ကျေးရွာများတွင် လျှပ်စစ်ဓာတ်အားသာ ရရှိမည်ဆိုပါက ပြည်နယ်၏ဖွံ့ဖြိုးတိုးတက်မှုမှာ အချို့တိုင်းဒေသကြီးများထက်ပင် သာလွန်/ ကျော်လွန်သွားဖွယ်ရှိပါသည်။

ကျောက်မီးသွေးမှ စွမ်းအင်ထုတ်လုပ်မှု

အထက်ဖော်ပြပါ ကရင်ပြည်နယ်အတွင်း ကျောက်မီးသွေးမှ လျှပ်စစ်ဓာတ်အားပေးစက်ရုံ တည်ဆောက်ရေးကိစ္စနှင့်ပတ်သက်၍ ကန့်ကွက်မှုများ၊ ဆွေးနွေးညှိနှိုင်းမှုများ၊ ရေးသားပြောဆိုမှုများ များစွာ ထွက်ပေါ်ခဲ့ပြီး ဖြစ်ပါသည်။ ကျွန်တော့်အနေနှင့်လည်း လက်လှမ်းမီသမျှ ရှာဖွေလေ့လာ၍ ရေးသားတင်ပြလိုက်ပါသည်။

ကမ္ဘာပေါ်တွင် ကျောက်မီးသွေးမှ စွမ်းအင်ထုတ်လုပ်ခြင်းကို ၁၉ ရာစု အစောပိုင်းကပင် စတင်ခဲ့ကြောင်း သိရှိရပါသည်။ ကျောက်မီးသွေးမှ ရရှိသောစွမ်းအင်သည် လွန်စွာ ကြီးမားသဖြင့် တစ်ချိန်က လူနှင့်ကုန်ချိန် အများအပြား တင်ဆောင်ပြေးဆွဲသည့် တွဲဆိုင်းများ ပါဝင်သော မီးရထားကြီးများကို ကျောက်မီးသွေး အသုံးပြု၍ မောင်းနှင်ခဲ့ကြပါသည်။ မြန်မာနိုင်ငံတွင်လည်း ကျွန်တော်တို့လူမှန်းသိသည့်အရွယ်မှစ၍ ကျောက်မီးသွေး ခေါင်းတွဲသုံး လော်ကယ် (Local) ရထားကြီးများကို စတင် စီးနင်းခဲ့ရပါသည်။ မီးရထားစက်ခေါင်းမောင်းသံ “ဂျုံးဂျုံး ဂျက်ဂျက်”ဟူသည် ကိုပင် သီချင်း/ကဗျာ အများအပြား၌ ထည့်သွင်း စပ်ဆိုခဲ့ကြသည်ကို အမှတ်ရမိပါသည်။ သို့ရာတွင် ထိုမီးရထားခေါင်းတွဲကြီးများမှထွက်သော မီးခိုးများမှာ နက်မှောင်နေသော်လည်း (ထိုအချိန်က ဗဟုသုတလည်း ဤမျှ မရှိကြသေးသဖြင့်) မီးရထားစက်ခေါင်းမှထွက်သော မီးခိုးများ၏ ဆိုးကျိုးကို မည်သူကမျှ ရေးသားပြောဆိုခြင်း မပြုကြပါ။

Clean Coal Technology

ယခုအခါ နိုင်ငံအများအပြားတွင် ကျောက်မီးသွေးသုံး လျှပ်စစ်ဓာတ် အားပေးစက်ရုံ အမြောက်အမြား ရှိကြသော်လည်း ခေတ်ပေါ်နည်းပညာ အသစ်များကို အသုံးပြု၍ လည်ပတ်နေကြသည်ဖြစ်ရာ ယခင်ကလောက် ကာဗွန်ဒိုင်အောက်ဆိုက်ဓာတ်ငွေ့ မထွက်တော့သဖြင့် သဘာဝ ပတ်ဝန်းကျင်ထိခိုက်မှု လျော့နည်း ကျဆင်းလာပါသည်။ ကျွန်တော်တို့ငယ်စဉ်က မီးရထားခေါင်းတွဲကြီးများတွင် ရဲရဲတောက်နေသော မီးကျီမီးခဲကြီးများကို တွေ့မြင်ရသည်မှာ ကျောက်မီးသွေး အတုံးအခဲများကို အသုံးပြု၍ဖြစ်ပါသည်။ အဆိုပါ ကျောက်မီးသွေး အတုံးအခဲများမှာ ကာဗွန်ပါဝင်မှု မြင့်မားပြီး ယင်းတို့ မီးလောင်သည့်အခါ ကာဗွန်ဒိုင်အောက်ဆိုက်ဓာတ်ငွေ့ အမြောက်အမြား ထွက်ပါသည်။ သို့ရာတွင် နည်းပညာ မြင့်မားလာသော ယခုခေတ် အခါတွင်မူ ကျောက်မီးသွေးကို အခဲအတိုင်း မသုံးတော့ဘဲ အမှုန့်အဖြစ် ပြုပြင်ပြောင်းလဲ အသုံးပြုခြင်း ဖြစ်ပါသည်။

ကျောက်မီးသွေး အမှုန့်ပြုလုပ်ရာတွင် ကာဗွန်ပါဝင်မှု နည်းသောကျောက်မီးသွေးကို အသုံးပြုနိုင်သဖြင့် ကာဗွန်ဒိုင်အောက်ဆိုက်ဓာတ်ငွေ့များ ယခင်ကလောက် လေထဲသို့ ထုတ်လွှင့်မှု မရှိတော့ပါ။ ထို့အပြင် ထွက်ပေါ်လာသော ကာဗွန်ဒိုင်အောက်ဆိုက် ဓာတ်ငွေ့များကိုလည်း လေထဲသို့ မထုတ်လွှတ်မီ ဖမ်းနိုင်အောင် ကြိုးပမ်း အားထုတ်လာကြပါသည်။ ကာဗွန်ပါဝင်မှုနည်းသော ကျောက်မီးသွေးတွင် ဆာလ်ဖာနှင့် အခြား အမှုန်အမွှားများ ပါဝင်မှု များပြားသည့်အတွက်လည်း ယင်းတို့ကိုပါ ထပ်မံ၍ ဖမ်းယူရပြန်ပါသည်။ ထို့ကြောင့် Clean Coal Technology ဟုခေါ်သည့် ကျောက်မီးသွေး သန့်စင်သည့်စနစ်ကို အပြည့်အဝ အသုံးချမည်ဆိုပါက ကျောက်မီးသွေးကို အသုံးပြု၍ လျှပ်စစ်ဓာတ်အားပေးစက်ရုံ တည်ဆောက်ရာတွင် အများက စိုးရိမ်နေကြသကဲ့သို့ သဘာဝ ပတ်ဝန်းကျင်ကို ဆိုးဆိုးရွားရွား ထိခိုက်ပျက်စီးစေမည် မဟုတ်ပါ။

ကမ္ဘာပေါ်တွင် ကာဗွန်ဒိုင်အောက်ဆိုက်ဓာတ်ငွေ့ ထုတ်လွှတ်ပြီး သဘာဝပတ်ဝန်းကျင်ကို ထိခိုက်စေသော အရာများမှာ ကျောက်မီးသွေး သာမက စိုက်ပျိုးရေးနှင့် မြေယာအသုံးချမှု၊ စက်မှုလုပ်ငန်းများ၊ သယ်ယူ ပို့ဆောင်ရေး လုပ်ငန်းများနှင့် အခြားသော အပူစွမ်းအင်ထုတ်လုပ်မှု လုပ်ငန်းအမျိုးမျိုးမှလည်း ကာဗွန်ဒိုင်အောက်ဆိုက်ဓာတ်ငွေ့ ပမာဏ များစွာ ထုတ်လွှတ်ကြပါသည်။

နည်းပညာဖြင့် နိုင်ငံတည်ဆောက်ဖို့လိုပြီ

ကျွန်တော်တို့နိုင်ငံသည် ယခုအခါ အိမ်နီးချင်းနိုင်ငံများ အပါအဝင် ကမ္ဘာ့နိုင်ငံ အတော်များများ၏ နောက်ဝယ် ကျန်ရစ်ခဲ့ပြီဖြစ်ပါသည်။ ထိုကဲ့သို့ နောက်ကျ ကျန်ရစ်သည့် အကြောင်းရင်း များစွာထဲတွင် နည်းပညာ နောက်ကျမှုကြောင့် ဖွံ့ဖြိုးမှုနောက်ကျခြင်း၊ ဆင်းရဲမွဲတေခြင်းတို့သည်လည်း အဓိက အကြောင်းရင်းတစ်ခု ဖြစ်ပါသည်။ ယနေ့ ကမ္ဘာပေါ်တွင် နည်းပညာ ဖွံ့ဖြိုးတိုးတက်နေသော နိုင်ငံများသည် အလွယ်တကူ ဖြစ်လာကြခြင်း မဟုတ်ပါ။ အတိုက်အခိုက် မျိုးစုံကို ရင်ဆိုင်ကျော်လွှားပြီး အောင်မြင်လာကြခြင်းဖြစ်ပါသည်။ အချို့သော တီထွင်သူများဆိုလျှင် အများက လက်မခံရုံမျှမက သက်ဆိုင်ရာ အစိုးရများ ကိုယ်တိုင်ကပင် လက်မခံသော ဖြစ်စဉ်များ ရှိကြပါသည်။

ပြည်နယ်တစ်ခုကို အုပ်ချုပ်သောခေါင်းဆောင်သည် မည်သည့်ပါတီ၊ မည်သည့်အဖွဲ့အစည်းကပင်ဖြစ်ပါစေ မိမိနာမည်ပျက်၍ သိက္ခာကျမည့် အရေး၊ မိမိအစိုးရနှင့် ပါတီ၏ဂုဏ်သိက္ခာကို ထိခိုက်မည့်အရေး၊ မိမိပြည်နယ်သူ၊ ပြည်နယ်သားတို့၏ ကျန်းမာရေးနှင့် အကျိုးစီးပွားကို ထိခိုက်ပျက်စီးအောင် ပြုလုပ်လိမ့်မည်ဟု ထင်မြင်ယူဆစရာ အကြောင်းမရှိပါ။ အဆိုပါ ကိစ္စနှင့်ပတ်သက်၍ ပြည်တွင်းပြည်ပ ပညာရှင်များနှင့် ဆွေးနွေးညှိနှိုင်းပြီးဖြစ်သည်ဟု သိရှိရသလို ဂျပန်နိုင်ငံသို့လည်း သွားရောက် လေ့လာစေပြီးဖြစ်ကြောင်းလည်း သိရှိရပါသည်။

ကျောက်မီးသွေးမှ ဓာတ်အားထုတ်ယူသော နိုင်ငံများ

ယခုအခါ ကမ္ဘာပေါ်တွင် ကျောက်မီးသွေးလောင်စာသုံး၍ လျှပ်စစ်ဓာတ်အား မဂ္ဂါဝပ်၂၀ဝ၀ နှင့်အထက် ထုတ်လုပ်ပေးပြီး လည်ပတ်နေဆဲ စက်ရုံပေါင်း (တရုတ်၊ အမေရိကန်၊ အိန္ဒိယ၊ တောင်ကိုရီးယား၊ အင်ဒိုနီးရှား စသည့် နိုင်ငံများတွင်) ၂၀ဝ ရှိပြီး၊ မဂ္ဂါဝပ် ၂၀ဝ၀ အောက် ထုတ်လုပ်ပေးသည့်စက်ရုံများမှာ အိန္ဒိယနိုင်ငံတွင် စက်ရုံ ၄၂၉ ရုံ၊ အင်ဒိုနီးရှားနိုင်ငံတွင် စက်ရုံ ၈၀ အပါအဝင် ဗီယက်နမ်၊ ကမ္ဘောဒီးယား၊ အင်ဒိုနီးရှား စသည့်နိုင်ငံများတွင် လည်ပတ်လျက်ရှိပြီး အင်ဒိုနီးရှားတွင် နောက်ထပ်စက်ရုံ ၃၄ ရုံ တည်ဆောက်ဆဲဖြစ်ကြောင်း သိရှိရပါသည်။

ကိုယ့်နိုင်ငံမှာ လုပ်မယ်ဆိုရင်

ကျောက်မီးသွေးကိုအသုံးပြု၍ လျှပ်စစ်ဓာတ်အားပေးစက်ရုံ တည်ဆောက်မည့်ကိစ္စနှင့်ပတ်သက်၍ “အကယ်၍သာ မိမိတို့နိုင်ငံတွင် ထိုကဲ့သို့ ဆောင်ရွက်မည်ဆိုပါက ဂျပန်နည်းပညာကို အသုံးပြု၍ ဂျပန်တွင်တည်ဆောက်သည့်အတိုင်း ဆောက်ရမည်။ ဂျပန်တွင်ပြဋ္ဌာန်းထားသည့်အတိုင်း ကျောက်မီးသွေးနှင့် ပတ်သက်သည့် တင်းကျပ်သော ဥပဒေများကို ပြဋ္ဌာန်းရမည်။ တင်းကျပ်သည့်စည်းကမ်းများ သတ်မှတ်ပေးရမည်။ မည်သည့်ဓာတ်ငွေ့ကို မည်သည့်ပမာဏထက် မပိုစေရဟူသည့် သတ်မှတ်ချက်များ ထားရှိရမည်။ လိုက်နာရမည့်သူများက လိုက်နာရမည်ဖြစ်သလို CSO များ အပါအဝင် စစ်ဆေးရေး အဖွဲ့များက အချိန်မရွေး ဝင်ရောက် စစ်ဆေးနိုင်ရမည်။ ဖြစ်ပေါ်လာသည့် ပြဿနာအရပ်ရပ်ကို တာဝန်ယူစေရမည်”ဟူ၍ ကရင်ပြည်နယ် အမျိုးသားလွှတ်တော်ကိုယ်စားလှယ်၊ သတ္တုတွင်းပညာရှင် ဦးစောမိုးမြင့် ရေးသားခဲ့သည့်အတိုင်းသာ စနစ်တကျ လုပ်ကိုင်ဆောင်ရွက်မည်ဆိုလျှင် ဒေသခံပြည်သူအချို့ စိုးရိမ်နေကြသလို ဖြစ်ပေါ်လာစရာ အကြောင်းမရှိဟု ထင်မြင်ယူဆပါသည်။

နိဂုံး

အချုပ်ဆိုရလျှင် ကရင်လူမျိုးကိုချစ်သော၊ ကရင်လူမျိုးနှင့် ကရင်ပြည်နယ်၏ ဖွံ့ဖြိုးတိုးတက်မှုကို ဖြစ်စေလိုသော ကရင်ပြည်နယ် အစိုးရ/ဝန်ကြီးချုပ်နှင့် ကရင်ပြည်နယ်၏ သဘာဝ ပတ်ဝန်းကျင် ထိခိုက်မှုနှင့် ကျန်းမာရေး ထိခိုက်မည်ကို စိုးရိမ်ပူပန်နေကြသော ကရင်လူမျိုးတို့အကြား အကျေအလည် ညှိနှိုင်းတိုင်ပင် ဆွေးနွေးကြလျက် ပြည်ထောင်စုကြီး၏ အစိတ်အပိုင်းဖြစ်သည့် ကရင်ပြည်နယ်၏ အကျိုးစီးပွားကို သယ်ပိုးဆောင်ရွက်နိုင်ကြပါစေဟု ဆန္ဒပြုလိုက်ပါသည်။

သိန်းထက်အောင်