News

POST TYPE

LATEST NEWS POST

ရွှေ့ပြောင်းဒေသ ဆရာများ အစည်းအရုံး အထွေထွေ အတွင်းရေးမှူး ဦးနိုင်နိုင်ထွန်းနှင့် တွေ့ဆုံခြင်း
ထိုင်းနိုင်ငံအတွင်း မြန်မာရွှေ့ပြောင်း ကလေးငယ်များ ပညာရေး သင်ကြားပေးရသည့် ကျောင်းများ တစ်နှစ်ထက်တစ်နှစ် အခက်အခဲပေါင်းစုံနှင့် ပိုရင်ဆိုင်လာရသည်။ သို့သော် အခက်အခဲများ ရှိလင့်ကစား ကလေးများ၏ ပညာရေး ကောင်းမွန်စွာ သင်ကြားနိုင်ရေး တစ်ထောင့်တစ်နေရာမှ ပါဝင် ဆောင်ရွက်ပေးနေသည့် မြန်မာ့ရွှေ့ပြောင်းဒေသ ဆရာ၊ ဆရာမများ အစည်းအရုံး အထွေထွေ အတွင်းရေးမှူး ဦးနိုင်နိုင်ထွန်းနှင့် The Voice တို့တွေ့ဆုံ၍ ထိုင်းနိုင်ငံအတွင်း ကျောင်းဖွင့်လှစ် ပညာသင်ကြားပေးရသည့် အခြေအနေများ မေးမြန်းထားသည်များကို ကောက်နုတ်ဖော်ပြ အပ်ပါသည်။

Voice : ထိုင်းနိုင်ငံအတွင်းမှာ မနှစ်တုန်းကတော့ ကျောင်း ၆၄ ကျောင်းလောက် ရှိတယ်လို့ ပြောခဲ့ဖူးပါတယ်။ အခု ထိုင်းနိုင်ငံအတွင်းမှာ မြန်မာရွှေ့ပြောင်း လုပ်သားတွေရဲ့ ကလေးတွေ၊ စစ်ဘေးရှောင် ဒုက္ခသည်တွေရဲ့ ကလေးတွေကို သင်ကြားပေးတဲ့ စာသင်ကျောင်း ဘယ်နှကျောင်းလောက် ရှိပါသလဲ။ ကျောင်းသား၊ ကျောင်းသူ အရေအတွက်ကရော ဘယ်လောက် လောက်ရှိပါသလဲ။
UNNH : ၂၀၁၀ ခုနှစ်မှာ ပင်မကျောင်း ၇၄ ကျောင်းနဲ့ ကျောင်းခွဲ ခုနစ်ခုလောက် ရှိခဲ့ပါတယ်။ ထိုင်းပညာရေးဌာနရဲ့ ဇူလိုင် ၂၀၁၇ ကောက်ခံထားတဲ့စာရင်းအရ ပင်မကျောင်း ၅၉ ကျောင်းနဲ့ စာသင်ခန်းခွဲအဖြစ် ဆောင်ရွက်နေတဲ့ ကျောင်း ၁၂ ကျောင်း ရှိပါတယ်။ ကျောင်းသူ၊ ကျောင်းသား ဦးရေကတော့  ၁၂,၆၄၈ ယောက်နဲ့ ဆရာ၊ ဆရာမ ၇၃၀ ယောက်ရှိပါတယ်။

Voice : ကျောင်းတွေ ဖွင့်တာလည်း တစ်လခွဲကျော်ပြီဆိုတော့ ဒီနှစ်မှာ ထိုင်းနိုင်ငံအတွင်းက ရွှေ့ပြောင်း မြန်မာကျောင်းတွေရဲ့ အခြေအနေက ဘယ်လိုရှိပါသလဲ။ အဓိက ဘာစိန်ခေါ်မှုတွေများ ရှိနေပါသလဲ။ 
UNNH : လက်ရှိ စိန်ခေါ်ချက်ကတော့ လုံခြုံရေးပေါ့။ ရှေ့ပိုင်းမှာ ဆရာတချို့ ဖမ်းဆီးခံရတာတွေရှိခဲ့ပြီး ခုဖြေလျှော့မှုတွေ လုပ်လာပေမယ့် ကျွန်တော်တို့ ဆရာ၊ ဆရာမအလုပ်က ထိုင်းအစိုးရ ခွင့်ပြုထားတဲ့ အလုပ်အကိုင်တွေနဲ့ အကျုံးမဝင်တော့ တရားဝင်ဖြစ်အောင် မလုပ်နိုင်ဘူးလေ။ သတ်မှတ်ထားတဲ့အချိန် ကျော်သွားရင် ဘာတွေဖြစ်လာမလဲ စိုးရိမ်နေကြတာပေါ့။ 

Voice : သတ်မှတ်ထားတဲ့အချိန် ကျော်သွားရင် ဘာတွေ ဖြစ်လာမလဲ စိုးရိမ်နေတယ်ဆိုတာ ဘာကို ပြောတာပါလဲ။ 
UNNH : နိုင်ငံခြားသား အလုပ်သမားများရဲ့ အလုပ်တာဝန် စီမံခန့်ခွဲရေး အက်ဥပဒေ စီမံချက်က အခု ခဏ ရပ်ဆိုင်းထားတဲ့ ထိုင်းဥပဒေ အသစ်ပါ။ ၂၀ဝ၈ ခုနှစ်လောက်က ထုတ်ပြန်ခဲ့တဲ့ ဥပဒေအဟောင်းကို ပြစ်ဒဏ်နဲ့ ဒဏ်ကြေး တိုးမြှင့်ထားတာပါ။ အခု ဥပဒေသစ်ကို ဒီနှစ် ဇူလိုင်လဆန်းက စတင် ထုတ်ပြန်ပြီး စီမံချက်နဲ့ အထောက်အထား မပြည့်စုံတဲ့ ရွှေ့ပြောင်း အလုပ်သမားတွေကို ဖမ်းဆီးတဲ့အခါ တာခ့်ခရိုင် ပညာရေးဌာနက ထောက်ခံချက် ထုတ်ပေးထားတဲ့ ဆရာလက်မှတ်နဲ့ ဆရာတစ်ဦး ကျောင်းအုပ်တစ်ဦးရောပြီး ဖမ်းခံရပါတယ်။ အခုအခါမှာ နှစ်နိုင်ငံ အစိုးရတွေ ညှိနှိုင်ပြီး အလုပ်သမားတွေ လက်မှတ် လုပ်နိုင်ဖို့ ရက်ပေါင်း ၁၈၀ ဖြေလျှော့ထားပေးပါတယ်။ ရက် ၁၈၀ ပြီးရင်တော့ အဖမ်းအဆီးတွေ ပြန်စမှာ ဖြစ်ပါတယ်။ ဆရာ၊  ဆရာမတွေကျ အထက်က ပြောတဲ့အတိုင်း လုပ်ကိုင်ခွင့်ပြုထားတဲ့ အလုပ်တွေထဲမှာ မပါတော့ လက်မှတ် အထောက်အထား လုပ်လို့မရတဲ့အတွက်ပါ အဖမ်းအဆီးတွေ ပြန်စလာရင် ဘယ်လိုအခြေအနေ ရှိမယ်မှန်း မသိနိုင်သေးပါဘူး။ 

Voice : မနှစ်ပိုင်းတွေမှာတော့ တဖြည်းဖြည်း ဘတ်ဂျက် နည်းလာတာကြောင့် ကျောင်းတွေ ဆက်ဖွင့်နိုင်ဖို့ ခက်ခဲခဲ့တယ်။ ကျောင်းအရေအတွက်လည်း တစ်နှစ်နဲ့တစ်နှစ် လျော့လျော့ လာတယ်ပေါ့။ ဒီနှစ်မှာရော ကျောင်းတွေ ဆက်ဖွင့်နိုင်တဲ့ အခြေအနေ၊ ဘတ်ဂျက်အခြေအနေ ဘယ်လိုရှိပါသလဲ။ 
UNNH : ဒီနှစ်အစမှာ ဘတ်ဂျက် အခြေအနေအရ ကျောင်းတစ်ကျောင်းတော့ ပိတ်သွားတယ်။ လယ်တောအိမ် (၁) ဆိုတဲ့ကျောင်းပါ။ အဲဒီကျောင်းက ကျောင်းသား ကလေး ၁၀ဝ ကျော်ကိုတော့ အနီးအနားက ကျောင်းတွေက မျှပြီးနီးစပ်သလို လက်ခံထားပေးရတယ်။ လက်ရှိမှာတော့ အထောက်အပံ့ လုံးဝ မရှိတဲ့ကျောင်း၊ တစ်စိတ်တစ်ပိုင်းပဲ ရတဲ့ကျောင်းတွေကတော့ ဆက်ရှိနေသေးတယ်။ အဲဒီကျောင်း အများစုက မိဘတွေ ဝိုင်းထောက်ပံ့ပြီး သွားနေကြတာဆိုတော့ အခုမိဘတွေ ရှောင်တိမ်းရ၊ ပြန်ကြရဆိုတဲ့ အခြေအနေမှာတော့ ပိုခက်ခဲတာပေါ့။ 

Voice : ရွှေ့ပြောင်းလုပ်သား မိသားစုတွေလည်း မြန်မာဘက် ပြန်လာကြရတယ်ဆိုတော့ ကလေးတွေလည်း မြန်မာဘက်ကို ပြန်ပါသွားကြမယ်။ အဲဒီတော့ ကလေးတွေပညာရေးက ကသိကအောက်ဖြစ်မယ် ထင်တယ်။ 
UNNH : တစ်ချိန် ပြန်လာဖို့ရှိတဲ့ မိဘတွေကတော့ ကလေးတွေကို ကျောင်းမှာ အပ်ခဲ့ကြတယ်။ တချို့ကျတော့လည်း ကျောင်းပြောင်း လက်မှတ်တောင် လာမယူနိုင်ဘဲ ပြေးကြရတော့ ကလေးတွေ မြန်မာပြည်မှာ ကျောင်းဆက်တက်နိုင်ဖို့ ဘယ်လိုလုပ်ကြမလဲတော့ မသိဘူး။ မိဘတွေကတော့ လွယ်လွယ်ပဲ တစ်နှစ်နားကြပေမယ့် ကလေးတွေအတွက် ခံစားချက်ကတော့ ကောင်းမှာ မဟုတ်ဘူး။ ကျောင်းနဲ့ဝေးတာ ကြာသွားရင်လည်း စိတ်မပါကြတော့ပြန်ဘူး။ 

Voice : မြန်မာအစိုးရ ပညာရေး ဝန်ကြီးဌာနနဲ့ ရွှေ့ပြောင်း မြန်မာကျောင်းတွေ ပူးပေါင်းပြီး ဒီနှစ်မှာ ဘာတွေ လုပ်ဖြစ်ပါသေးလဲ။ 
UNNH : ဒီနှစ်ထဲမှာ နယ်စပ်ချင်း ထိစပ်နေတဲ့ ကရင်ပြည်နယ်နဲ့ တနင်္သာရီတိုင်းတို့မှာ ရွှေ့ပြောင်း ပညာရေးနဲ့ မြန်မာပညာရေးက ပြည်နယ်နဲ့ တိုင်း တာဝန်ရှိသူတွေ ပူးပေါင်းပြီး ရွှေ့ပြောင်း ကလေးများအတွက် စဉ်ဆက်မပြတ် ပညာရေး ဆောင်ရွက်မှု ကော်မတီကို ဖွဲ့ပြီး ဆောင်ရွက်ဖို့ သဘော တူထားကြတယ်။ ပြီးခဲ့တဲ့ ဧပြီလကပါ။ အခုတော့ ပညာရေးဝန်ကြီးဌာနကို တင်ပြထားပါတယ်။ အဲဒီကော်မတီလေး အကောင်အထည်ပေါ်သွားရင်တော့ ပိုလုပ်နိုင်ကြမယ် ထင်ပါတယ်။ သင်ရိုး၊ သင်ကြားမှု၊ စစ်ဆေးမှုတွေနဲ့  ကျောင်းသားလွှဲပြောင်းမှုတွေ နည်းပညာ ပံ့ပိုးမှုတွေ ပူးပေါင်း လုပ်ဆောင်သွားဖို့ ပြည်နယ်၊ တိုင်းအဆင့် သဘော တူထားကြတယ်။ ဝန်ကြီးဌာနက ခွင့်ပြုရင်ပေါ့။ 

Voice : ရွှေ့ပြောင်းကလေးတွေ၊ စစ်ဘေးရှောင်ကလေးတွေရဲ့ ပညာရေးနဲ့ ပတ်သက်ပြီး ထိုင်းနိုင်ငံ ပညာရေး ဝန်ကြီးဌာနနဲ့ ရွှေ့ပြောင်းမြန်မာ ဆရာ အစည်းအရုံးနဲ့ ဘာတွေ ပူးပေါင်း လုပ်ဆောင်နေပါသလဲ။ 
UNNH : လက်ရှိ ဖြစ်ပေါ်နေတဲ့ အခြေအအနေတွေ ကို ဒီလ (ဇူလိုင်လ) ၆ ရက်က ထိုင်းပညာရေးဌာနနဲ့ ရွှေ့ပြောင်း ပညာရေးအဖွဲ့တွေ တွေ့ဆုံပြီး အခြေအနေတွေ တင်ပြခဲ့ပါတယ်။ ထိုင်းပညာရေးဌာနက ဦးဆောင်ပြီး ဒေသအာဏာပိုင်တွေ ရွှေ့ပြောင်း ပညာရေးအဖွဲ့တွေ တွေ့ဆုံပြီး အကြံပြုချက်တွေ ရယူသွားဖို့ လုပ်ဆောင်နေပါတယ်။ ပညာရေးဆိုင်ရာ အသိအမှတ်ပြုမှုတွေ ရနိုင်ဖို့အတွက် ထိုင်းကျောင်းတွေနဲ့  တွဲပြီး ဆောင်ရွက်တဲ့ School Within School Program၊ ထိုင်းကျောင်းပြင်ပ ပညာရေး အစီအစဉ်တွေကို ဦးဆောင် ဆောင်ရွက်ပေးနေသလို Out  Of School Child (OOSC) လို့ခေါ်တဲ့ ကျောင်းပြင်ပရောက် ကလေးတွေအတွက် ပူးပေါင်း ဆောင်ရွက်ပေးနေတာတွေ ရှိပါတယ်။ ဒီနှစ်မှာ ချင်းမိုင်တက္ကသိုလ်နဲ့ ထိုင်းပညာရေးဌာန၊ ရွှေ့ပြောင်း ပညာရေးအဖွဲ့တွေ ပူးပေါင်းပြီး ထိုင်းလူမျိုး မဟုတ်တဲ့ ကလေးတွေ သင်ယူနိုင်မယ့် ထိုင်းသင်ရိုးညွှန်းတမ်း (Teaching Thai as Second Language Curriculum) ရေးဆွဲနိုင်ဖို့ ပူးပေါင်း ဆောင်ရွက်နေပါတယ်။

Voice : နောက်ဆုံးအနေနဲ့ ကျွန်တော်မေးဖို့ လိုအပ်တဲ့အချက်တွေ၊ ဆရာ ထပ်ဖြည့်ပြောချင်တဲ့ အကြောင်းအရာတွေရှိရင် လွတ်လွတ်လပ်လပ်၊ ပွင့်ပွင့်လင်းလင်း ပြောနိုင်ပါတယ်ခင်ဗျ။ 
UNNH : အခုအချိန်မှာ မြန်မာ၊ ထိုင်း နှစ်နိုင်ငံ ပူးပေါင်း ဆောင်ရွက်မှု၊ နားလည်ရင်းနှီးမှုတွေ ဖော်ဆောင်ထားပြီး အထူးစီးပွားရေးဇုန်တွေ ပေါ်ထွက်လာဖို့ ဆောင်ရွက်နေတဲ့အချိန်မှာ ရွှေ့ပြောင်းအလုပ်သမားတွေရဲ့ အခန်းကဏ္ဍဟာ အရမ်း အရေးပါပါတယ်။ မိဘတွေ အလုပ် လာလုပ်နေလို့ မြန်မာကျောင်းတွေမှာ မတက်နိုင်တော့တဲ့ ကလေးတွေ၊ ထိုင်းကျောင်းတွေ တက်ဖို့လည်း ဘာသာစကား အခက်အခဲနဲ့ မိဘတွေ ပြန်တဲ့အခါ မြန်မာကျောင်းတွေကို ပြန်ကူးပြောင်းဖို့ အခက်အခဲတွေကြောင့် ထိုင်းကျောင်းတွေ မတက်နိုင်တဲ့ ကလေးတွေအတွက် ရွှေ့ပြောင်း ကျောင်းတွေက ကူညီ ဆောင်ရွက်ပေးနေကြတာဖြစ်ပါတယ်။ ဒီကလေးတွေ ဆက်လက် ပညာသင်နိုင်ရေးအတွက် နှစ်နိုင်ငံ ချစ်ကြည်ရင်းနှီးမှုအပေါ် အခြေခံပြီး ညှိနှိုင်း အဖြေရှာပေးနိုင်မယ်လို့ မျှော်လင့်ယုံကြည်ပါတယ်ခင်ဗျာ။

Voice : ဟုတ်ကဲ့။ အခုလို ဖြေပေးတာ ကျေးဇူးတင်ပါတယ်ခင်ဗျ။

နေဇာကျော်