News

POST TYPE

IT

နည်းပညာ လုံခြုံရေး၏ အခြေခံအကျဆုံးယိုပေါက်
06-Feb-2018

နည်းပညာ လုံခြုံရေး၏ အခြေခံအကျဆုံးယိုပေါက်

မြန်မာနိုင်ငံတွင် ငွေကြေးဆိုင်ရာဘဏ္ဍာရေး ဝန်ဆောင်မှုများ အပါအဝင် လုပ်ငန်းနယ်ပယ်များတွင် ဒစ်ဂျစ်တယ်စနစ်ကို အသွင်ကူးပြောင်းဆောင်ရွက်နိုင်ရန် အကောင်အထည်ဖော် ဆောင်ရွက်နေသည်။ ယင်းအချိန်တွင် နည်းပညာ လုံခြုံရေးသည် မဖြစ်မနေ ထည့်သွင်းစဉ်းစားရမည့် အချက်တစ်ခုအဖြစ် ရှိလာခဲ့သည်။ ထိခိုက်နစ်နာမှုများ၊ ဆိုက်ဘာတိုက်ခိုက်ခံရခြင်းများ မဖြစ်အောင် ကြိုတင်ကာကွယ်ခြင်းသည်လည်း အရေးတကြီး လိုအပ်လာသည်။

မြန်မာနိုင်ငံသည် ဆိုက်ဘာ တိုက်ခိုက်မှုများကို ကြုံတွေ့တတ်ရလေ့ရှိပြီး ၂၀၁၇ ခုနှစ် နှစ်ကုန်ပိုင်းအတွင်း တူရကီနိုင်ငံနှင့် ဖြစ်ပွားခဲ့သည့် ဆိုက်ဘာတိုက်ခိုက်မှုများတွင် နည်းပညာ လုံခြုံရေးကို အလေးထားရန်လိုအပ်သည် ဆိုသည့်အချက်ကို ပြည်သူများ အသိအမြင်ရှိလာကြသည်။

ဆိုက်ဘာတိုက်ခိုက်မှုများ၊ Malware များဖြင့် တိုက်ခိုက်ခြင်းများ အပါအဝင် နည်းပညာ လုံခြုံရေးကို စိန်ခေါ်မှုများ မြင့်တက်လာချိန်တွင် နည်းပညာလုံခြုံရေးကို အလေးပေး ဆောင်ရွက်ကြရန် လိုအပ်ပြီး လုပ်ငန်းစုများ၊ ဘဏ္ဍာရေးဆိုင်ရာ ငွေကြေးဝန်ဆောင်မှု လုပ်ငန်းကြီးများ၊ ဆက်သွယ်ရေး လုပ်ငန်းကြီးများတွင်လည်း ကျွမ်းကျင်နည်းပညာရှင်များ လိုအပ်သည့်အပြင် လိုင်စင်မဲ့ဆော့ဖ်ဝဲ (Pirated ဗားရှင်းဆော့ဖ်ဝဲများ) အသုံးပြုမှုသည် နည်းပညာလုံခြုံရေး၏ အခြေခံ အကျဆုံး ယိုပေါက်တစ်ခု ဖြစ်လာသည်ဟု ပြည်တွင်း နည်းပညာရှင်များက အကြံပြု သုံးသပ်ထားကြသည်။

နည်းပညာလုံခြုံရေးနှင့် နည်းပညာဆိုင်ရာ ဝန်ဆောင်မှုများကို ပေးနေသည့် Cyber Wings ကုမ္ပဏီ၏ အမှုဆောင်အရာရှိချုပ် ကိုရန်နိုင်မြင့်က “Pirate ဖြစ်အောင်လုပ်ပေးထားတဲ့ (Crack ထားတဲ့) သက်ဆိုင်ရာ Program ရဲ့ .exe file လေးထဲမှာ ဘာတွေ ရေးထားသလဲဆိုတာ ရေးတဲ့သူပဲ သိပါလိမ့်မယ်။ Pirate ဖြစ်အောင် Crack ပြီးသွားပြီဆိုရင်တော့ အထဲမှာ Spamming တွေ၊ Virus တွေအပြင် အသုံးပြုသူရဲ့ အချက်အလက်တွေကို ခိုးယူနိုင်တဲ့ Program/ Script တွေ ထည့်သွင်းထားနိုင်တယ်ဆိုတာ သိဖို့လိုပါတယ်။ Pirate သုံးတာဖြစ်လို့ Anti-virus က အချက်ပြ တားမြစ်တာကိုတောင် ပိတ်ပစ်တတ်ပါတယ်။ အဲ့ဒီလိုဆိုတော့ ဆိုက်ဘာလုံခြုံရေး ယိုပေါက်ဖြစ်လာတာ မဆန်းပါဘူး”ဟု လိုင်စင်မဲ့ဆော့ဖ်ဝဲများ အသုံးပြုခြင်း၏ နည်းပညာဆိုင်ရာ လုံခြုံရေး အားနည်းချက်ကို ရှင်းပြသည်။

ယင်းအပြင် လိုင်စင်ကြေး ပေးဆောင်ရန် မလိုအပ်သည့် Open Source (OS) များကို အသုံးပြုမည်ဆိုလျှင်ပင် လိုင်စင်ဗားရှင်း ဆော့ဖ်ဝဲများကဲ့သို့ Global Team များ၏ အထောက်အပံ့များ မရှိခြင်းကြောင့် အခက်အခဲများ ရှိနိုင်သည်ဟု ကိုရန်နိုင်မြင့်ကဆိုသည်။

ကိုရန်နိုင်မြင့်က “Open Source လိုမျိုး လိုင်စင်ကြေးပေးစရာမလိုတဲ့ OS တွေ အသုံးပြုမယ်ဆိုရင်တောင် လိုင်စင်ဗားရှင်းတွေလိုမျိုး Global Team တွေရဲ့ အထောက်အပံ့ မရှိတဲ့အတွက် ကိုယ်တိုင်ထိန်းကျောင်းရမယ်။ ဒီနေရာမှာ ထိန်းကျောင်းမယ့်သူက အရည်အချင်း ပြည့်ဝနေဖို့ လိုပါတယ်။ အရည်အချင်း အပြည့်မီတဲ့သူဆိုရင် OS ကို ထိန်းကျောင်းတဲ့နေရာမှာ မနိုင်မနင်း ဖြစ်နိုင်ပါတယ်”

Microsoft ၏ စစ်တမ်းများအရ မြန်မာနိုင်ငံသည် Malware (ကွန်ပျူတာနှင့် ကွန်ပျူတာစနစ်များကို တိုက်ခိုက်သည့် ဆော့ဖ်ဝဲလ်)များဖြင့် တိုက်ခိုက်ခံရနိုင်ခြေ အများဆုံးနိုင်ငံ ၅ နိုင်ငံစာရင်းတွင် ပါဝင်နေခဲ့သည်။ ယင်းနှင့်ပတ်သက်ပြီး မြန်မာနိုင်ငံရှိ လုပ်ငန်းကြီးများအနေဖြင့် မိမိတို့၏အင်တာနက် ဆက်သွယ်မှုလုံခြုံရေးကို ထည့်သွင်းစဉ်းစားဆောင်ရွက်ရန် လိုအပ်သည်ဟုလည်း Microsoft Asia Pacific မှMarketing and Operations Lead ဖြစ်သူ Rena Chai က တိုက်တွန်း ပြောဆိုထားသည်။

မြန်မာနိုင်ငံတွင် မိုဘိုင်းလ် ငွေပေးချေစနစ်၊ မိုဘိုင်းလ်ဘဏ်စနစ်များ စတင်လာချိန်တွင် အခြားလုပ်ငန်းနယ်ပယ်များထက် ဘဏ္ဍာရေးဆိုင်ရာ ဝန်ဆောင်မှုလုပ်ငန်းများတွင် ထိခိုက်မှုများ၊ အချက်အလက်ပေါက်ကြားမှုများ ဖြစ်ပွားလာနိုင်ခြေ ပိုမိုများပြားလာပြီး ကြီးမားသည့်စိန်ခေါ်မှုတစ်ခု ဖြစ်လာနိုင်သည်ဟု မြန်မာနိုင်ငံ ကွန်ပျူတာပညာရှင်အသင်း၏ အတွင်းရေးမှူး ဦးမင်းဦးက ပြောသည်။

ဦးမင်းဦးက “အထူးသဖြင့် ဘဏ်စနစ်တွေမှာက အကြီးဆုံးလို့ ပြောရမှာပေါ့။ ဒီနိုင်ငံမှာက မိုဘိုင်းလ် ငွေပေးချေစနစ်၊ မိုဘိုင်းလ် ဘဏ်စနစ်တွေ လုပ်နေတာရှိလာပြီ။ အွန်လိုင်း ကုန်သွယ်မှု လုပ်နိုင်တာတွေ စလာပြီလေ။ အဲ့ဒီလို ကုမ္ပဏီအကြီးတွေမှာ အခုနောက်ပိုင်း ပြောင်းတော့ သုံးလာပါတယ်။ ဒါပေမဲ့ အကုန်လုံးက လိုက်ပြီး ပြောင်းကြဖို့လိုတယ်။ Pirated ဗားရှင်း ဆော့ဖ်ဝဲတွေရဲ့နောက်ကွယ်မှာ ဘယ်လို Spyware တွေ၊ Malware တွေ ထည့်ထားတယ်ဆိုတာ မှန်းလို့မရဘူးလေ။ အဲ့ဒီလိုနေရာကနေ ပေါက်နေရင် အချက်အလက်တွေက တောက်လျှောက်ထွက်နေမှာ။ ကိုယ့်စက်ထဲက အချက်အလက်တွေကို ဘယ်လိုယူနေမှန်းတောင် သိမှာမဟုတ်ဘူး”ဟုဆိုသည်။

အချက်အလက် ပေါက်ကြားမှုများ ဖြစ်ပွားခဲ့ပါက လုပ်ငန်းကြီးများ သာမက အသုံးပြုသူများအတွက်လည်း ထိခိုက်နစ်နာမှုများ ရှိလာနိုင်သည်ဟု ဦးမင်းဦးကပြောသည်။

၎င်းက “ခုနပြောတဲ့ Pirated ဆော့ဖ်ဝဲတွေ သုံးထားတဲ့စက်တွေကို တစ်နေရာရာက တစ်ယောက်ယောက်က Trigger တစ်ခုပို့လိုက်လို့ ဒီစက်ထဲကဖိုင်တွေ အကုန်ပျက်သွားပြီ ဆိုပါတော့။ အဲ့ဒီအကျိုးဆက် ဘယ်လောက်အထိ သွားမယ်ဆိုတာ စဉ်းစားကြည့် ပေါ့။ နောက်နေ့ ဘာဆက်လုပ်ကြမှာလဲ။ ဒါပေမဲ့ ခက်တာက ကိုယ်တို့ဆီမှာ မျက်ကန်းတစ္ဆေမကြောက်တွေက အများကြီးပဲ။ ကိုယ့်လုပ်ငန်းတစ်ခုလုံး ပျက်စီးသွားမှာကို မကြည့်ဘူးလေ”ဟုဆိုသည်။

မြန်မာနိုင်ငံ၏ ဘဏ္ဍာရေးဆိုင်ရာ ဝန်ဆောင်မှုလုပ်ငန်းများသည် ဖွံ့ဖြိုးဆဲဈေးကွက်တစ်ခုအဖြစ် ရှိနေပြီး ဒစ်ဂျစ်တယ်စနစ် အသွင်ကူးပြောင်းရေးတွင် အဓိကကျသည့် အခက်အခဲမှာ ဆိုက်ဘာခြိမ်းခြောက်မှုများနှင့် လုံခြုံရေးဆိုင်ရာ အခက်အခဲများဖြစ်သည်ဟု Microsoft ၏ လုံခြုံရေး ထောက်လှမ်းမှု အစီရင်ခံစာတစ်ရပ်တွင် ဖော်ပြထားသည်။

ယင်းအပြင် ကျွမ်းကျင်နည်းပညာရှင် ရှားပါးခြင်းနှင့် အခြေခံ အဆောက်အဦပိုင်း လိုအပ်ချက်များသည်လည်း ဒစ်ဂျစ်တယ်စနစ် ပြောင်းလဲရေးအတွက် အတားအဆီးတစ်ခုအဖြစ် ရှိနေသည်ဟု ယင်းအစီအရင်ခံစာတွင် ဖော်ပြထားသည်

ဘဏ္ဍာရေးဆိုင်ရာ ဝန်ဆောင်မှုလုပ်ငန်းများ အပါအဝင်၊ ဆက်သွယ်ရေး လုပ်ငန်းများ စသည့် လုပ်ငန်းကြီးများတွင် Pirated ဗားရှင်းဆော့ဖ်ဝဲများ အသုံးပြုနေခြင်းကြောင့် ထိခိုက်မှုများရှိလာနိုင်ခြေ ရှိပြီး မိမိတို့လုပ်ငန်းဆိုင်ရာ အချက်အလက်များ၏ တန်ဖိုးအပေါ်မူတည်ပြီး လုံခြုံရေးကို ထည့်သွင်း စဉ်းစားရန်လိုအပ်သည်ဟု မြန်မာနိုင်ငံကွန်ပျူတာလုပ်ငန်းရှင်အသင်း၏ ဒုတိယဥက္ကဋ္ဌ ဦးမျိုးမြင့်ထွန်းက အကြံပြုထားသည်။


လိုင်စင်ဗားရှင်းမဟုတ်သည့် ဆော့ဖ်ဝဲများ အသုံး ပြုခြင်းကြောင့် ငွေကြေးဆိုင်ရာဘဏ္ဍာရေးအဖွဲ့ အစည်းများတင်မက အခြားအဖွဲ့အစည်းလုပ်ငန်းကြီးများ တွင်ပင် ထိခိုက်မှုများစွာ ရှိလာနိုင်မည်ဖြစ်ပေသည်။

“ဘဏ်မပြောနဲ့ ရိုးရိုးအဖွဲ့အစည်းတွေတောင် Pirated တွေကို မသုံးသင့်ဘူး။ လုံခြုံရေးအပိုင်းက ကျယ်ပြန့်ပြီး တခြားအရာတွေ ရှိနေပေမယ့် ဒါကတော့ အလွယ်ကူဆုံး ပေါက်နိုင်တဲ့နေရာပဲ။ ဒီ Pirated ဗားရှင်းတွေကို အသုံးပြုတယ်ဆိုတာ လုံးဝကို မဖြစ်သင့်တာ”ဟု မြန်မာနိုင်ငံ ကွန်ပျူတာအသင်းချုပ်၏ အထွေထွေ အတွင်းရေးမှူး ဦးဇော်မင်းဦးက အကြံပြုပြောကြားထားသည်။

မြန်မာနိုင်ငံသည် နည်းပညာ အခြေပြုလုပ်ငန်းများ စတင်ဖွံ့ဖြိုးလာချိန်တွင် ဘဏ္ဍာရေး၊ ဆက်သွယ်ရေး စသည့် ကဏ္ဍနယ်ပယ် အရပ်ရပ်တွင် ဒစ်ဂျစ်တယ်စနစ်ကို ပြောင်းလဲနိုင်ရေး အကောင်အထည်ဖော်နေကြချိန်တွင် နည်းပညာဆိုင်ရာ အချက်အလက် လုံခြုံရေးကို အလေးထားဆောင်ရွက်ရန် လိုအပ်နေသည်။

ယင်းသို့ ဆောင်ရွက်ရာတွင်လည်း နည်းပညာ လုံခြုံရေး၏ အခြေခံအကျဆုံး ယိုပေါက်တစ်ခုဖြစ်သည့် Pirated ဗားရှင်းဆော့ဖ်ဝဲများ အသုံးပြုခြင်းကို ထိခိုက်ဆုံးရှုံးမှုများ ရှိမလာခင် ကာကွယ်နိုင်ကြရန် လိုအပ်ပေသည်။

မောင်မန်း