News

POST TYPE

INTERVIEW

မန္တလေးတိုင်း ဝန်ကြီးချုပ်၊ မြို့နယ်အုပ်ချုပ်ရေးမှူးတို့နှင့် တွေ့ဆုံခြင်း
02-Aug-2016

မန္တလေးတိုင်းဒေသကြီးတွင် ရေကြီးမှုဒဏ် အဆိုးဝါးဆုံး ခံစားနေရသည့် အခြေအနေများကို မန္တလေးတိုင်းဒေသကြီး ဝန်ကြီးချုပ် ဒေါက်တာဇော်မြင့်မောင်နှင့် အမရပူရမြို့နယ် အုပ်ချုပ်ရေးမှူး ဦးနေမြတ်သူနှင့် တွေ့ဆုံမေးမြန်းမှုများကို ဖော်ပြအပ်ပါသည်။ 

“တချို့နေရာတွေ အရင်ကထက် ရေပိုရောက်တာတွေ ရှိတယ်”
မန္တလေးတိုင်း ဝန်ကြီးချုပ် ဒေါက်တာဇော်မြင့်မောင်နှင့် တွေ့ဆုံခြင်း

Voice : လက်ရှိ ရေဘေးသင့် ပြည်သူတွေကို ကယ်ဆယ်ထောက်ပံ့ရေး ဘယ်လိုဆောင်ရွက်ပေးနေသလဲ ဆိုတာ သိချင်ပါတယ်။

Dr. ZMM : သဘာဝဘေးအန္တရာယ် စီမံခန့်ခွဲမှု ကော်မတီ အစည်းအဝေး လုပ်လိုက်တယ်။ သတင်းအချက်အလက်နဲ့ ပြန်ကြားရေးကော်မတီ ဖွဲ့တယ်။ ကယ်ဆယ်ရေးက နဂိုကတည်းက ရှိပြီးသား။ ဘယ်သူတွေလုပ်လဲ ဆိုတော့ နယ်/လုံကြီးက ဥက္ကဋ္ဌ၊ အတွင်းရေးမှူးက တိုင်းရဲတပ်ဖွဲ့မှူး။ အဖွဲ့တွေ ဖွဲ့ထားတယ်။ နောက်တစ်ခုက ပြန်လည်ထူထောင်ရေး၊ ဘဏ္ဍာရေး၊ ကျန်းမာရေး၊ ပညာရေးပေါ့ ဆောင်ရွက်ဖို့ ကော်မတီတွေ ဖွဲ့ထားပါတယ်။ ကျွန်တော်တို့ဆီမှာ အလှူခံထားတဲ့ ငွေတွေ ရှိတယ်။ အဲဒီကနေ သင့်တော်သလို စီမံခန့်ခွဲပြီးတော့ အချိန်နဲ့ တပြေးညီ ဆောင်ရွက်သွားမှာပါ။ ရေဘေးကတော့ နှစ်စဉ်ဖြစ်နေကျ၊ သည်နှစ်ကတော့ လာနီညာဆိုတော့ စိုးရိမ်ရတယ်။ စိုးရိမ်တာက ရေဘေးကို စိုးရိမ်တာ မဟုတ်ဘူး။ ရေဘေးခံစားနေရတဲ့သူတွေ ဘယ်လိုလုပ် ကယ်ထုတ်ပေးနိုင်မလဲပေါ့နော်။ ရေဘေးလွတ်တဲ့နေရာ ပို့ပေးဖို့က အရေးကြီးတယ်။ တချို့နေရာတွေက မပြောင်းတဲ့သူ မထွက်တဲ့သူတွေ အများကြီး ရှိတယ်။ သူတို့ရဲ့ အတွေ့အကြုံကလည်း နောက်ထပ် ထပ်မတက်နိုင်ဘူးဆို ကိုယ့်အိမ်ကိုယ် နေချင်ကြတယ်။ မသွားကြဘူးပေါ့နော်၊ သည်လိုလူတွေကျတော့ မတတ်နိုင်ဘူးပေါ့နော်၊ တချို့ တာပေါင်ကျိုးတဲ့ နေရာတွေကျတော့ ရေကင်းပါ ချထားတယ်။ ကျိုးသွားနိုင်တဲ့ နေရာတွေမှာ အလျင်အမြန် ကယ်ထုတ်နိုင်ဖို့ လုပ်ထားတယ်။ ဘာပဲဖြစ်ဖြစ် ဒီတစ်ပွဲက ကိုယ့်ဘက်က လက်ဦးပါတယ်။ 

သည်နေ့ လူ/ကယ်/ပြန်ကနေ ဆန်တွေပေးတယ်။ နောက်ထပ် သူတို့ ဘာတွေပေးနိုင်တယ် ဆိုတာ အကြောင်းကြားထားတာ ရှိတယ်။ ရေကတော့ ပုံမှန်ကြီးနေကျ၊ သည်နှစ်ကတော့ ပိုထူးခြားတယ်။ တချို့နေရာတွေ အရင်ကထက် ရေပိုရောက်တာတွေ ရှိတယ်။ အဲလိုနေရာမျိုးတွေ အန္တရာယ် မရှိအောင်လို့ ကျွန်တော်တို့က စောင့်ရှောက်ပေးရုံပါပဲ။ အဓိက ကျတာကတော့ ရေဘေးမှာ ရေကျသွားပြီးရင် ဖြစ်လာမယ့် အရာတွေကို ဆိုပါတော့ ဝမ်းပျက်ဝမ်းလျှောတွေ ဖြစ်မယ်ပေါ့နော်။ ရေသန့်ရဖို့ အရေးကြီးတယ်။ သည်ကြားထဲမှာ နှစ်ရက်သုံးရက်လောက် အလုပ်မလုပ်နိုင်တဲ့အချိန် သူတို့စားဖို့ ရိက္ခာခြောက်တွေ လိုတယ်။ ဒါပါပဲ။ နွားရှိတဲ့သူတွေ အတွက်လည်း နွားစာတွေ ရရှိဖို့ မွေးမြူရေးကို ပြောထားတာ ရှိတယ်။ လိုအပ်တာတွေကို အုပ်ချုပ်ရေးမှူးတွေကနေ တစ်ဆင့် အကြောင်းကြားနိုင်ပါတယ်။

Facebook ကနေ တင်တာတွေ ရှိတယ်။ ဆိုပါစို့ မနေ့ကဆို ရတနာပုံကျောင်း ပိတ်တာ တင်လိုက်တယ်။ ကောင်းတာပေါ့၊ သိသွားကြတယ်။ မိဘတွေ မြန်ုမြန်လာခေါ်လို့ ရတာပေါ့။ ကျွန်တော်တို့ ပိတ်လိုက်တာလည်း မှန်တယ်။ သည်နေ့ကျတော့ ရေတော်တော် တိုးနေပြီ။ ဆိုချင်တာက အကူအညီ မြန်မြန်တောင်းနိုင်ရင် ကျွန်တော်တို့ဘက်ကလည်း မြန်မြန်တုံ့ပြန်ပေးနိုင်အောင် စီစဉ်ထားတယ်။

အဝေးကို ကျွန်တော် မကြည့်နိုင်သေးဘူး။ လိုအပ်ရင် သပိတ်ကျင်း၊ စဥ့်ကူး၊ ညောင်ဦးပေါ့။ အခု လောလောဆယ်တော့ ခရိုင်အုပ်ချုပ်ရေးမှူးတွေကို လိုအပ်တာ ဆောင်ရွက်နိုင်တယ်လို့ ပြောထားတယ်။

Voice : အစိုးရသစ်လက်ထက် သဘာဝဘေးက နှစ်ခါရှိပြီ။ ပြန်လည်ထူထောင်တဲ့ အပိုင်းမှာဆို ရန်ပုံငွေက အရေးကြီးတယ်။ အဲဒီအတွက် ဘယ်လိုပြင်ဆင်ထားလဲ။

Dr. ZMM : ဆိုပါစို့၊ လမ်းတွေ ပျက်မယ်။ တံတားတွေ ပျက်မယ်။ ကျောင်းတွေ ပျက်မယ်။ အဲဒါတွေအတွက် ဘတ်ဂျက်ရတယ်။ သဘာဝဘေးကြောင့် ပျက်စီးသွားတာတွေကို သီးသန့်ဘတ်ဂျက်တင်လို့ ရပါတယ်။ တချို့ဟာကို ဒီနှစ်ထဲတောင်း၊ တချို့ကို တော့ နောက်နှစ်ထဲ တောင်းလို့ ရပါတယ်။ ဒါကတော့ ခေါင်းစဉ်သတ်သတ်နဲ့ သွားမှာပေါ့။ မြစ်ရေတိုက်စားလို့ ကမ်းပါးပြိုတာတွေကအစ ဒါတွေလည်း ပြင်ဆင်ထားပါတယ်။ ပြန်လည်ထူထောင်ရေးမှာ ကိုယ့်ဘတ်ဂျက်နဲ့ ကိုယ်လုပ်မယ်ပေါ့။ စေတနာရှင် ရှိရင်လည်း စေတနာရှင်ပေါ့။ အခုဟာက လမ်းတံတား တော်တော်ပျက်မယ့် အနေအထား ရှိပါတယ်။

Voice : မန္တလေးတစ်တိုင်းလုံး အနေနဲ့ အိမ်ခြေလူဦးရေ ဘယ်လောက်ထိခိုက်တယ် ဆိုတာ သိရပြီလားဗျ။

Dr. ZMM : အခုကတော့ အဲလို တိတိကျကျ မသိရသေးဘူး။ ပြန်စုနေတုန်း ရှိသေးတယ်။ အချိန်နဲ့ တစ်ပြေးညီတော့ သူတို့ ပို့နေပါတယ်။ ကျွန်တော် ဒါကို မစုစည်းနိုင်သေးတာ။ နှစ်ရက် သုံးရက်လောက် ရေပြန်ကျသွားရင်တော့ အပျက်အစီးစာရင်းက သိနိုင်ပါတယ်။ ညောင်ဦးဆို တောက်လျှောက်တင်တယ်။ သပိတ်ကျင်းတင်တယ်။ စဥ့်ကူးတင်တယ်။ တချို့ဌာနဆိုင်ရာတွေက မသိရသေးဘူး။ ကျောင်းဘယ်နှကျောင်း ပိတ်ထားတယ်။ ဆေးခန်း သေသေချာချာ မသိရဘူး။

“အခက်အခဲအမျိုးမျိုးကြောင့် နေရပ်မပြန်နိုင်တဲ့ သူတွေကို ငွေကြေးကအစ ကားဂိတ်အရောက် လက်မှတ်တွေဖြတ်ပြီး သက်ဆိုင်ရာ မိခင်မြို့နယ်တွေအရောက် ပို့ဆောင်ပေးဖို့ စီစဉ်နေပါတယ်”
အမရပူရမြို့နယ် မြို့နယ်အုပ်ချုပ်ရေးမှူး ဦးနေမြတ်သူနှင့် တွေ့ဆုံခြင်း

Voice : အမရပူရမြို့နယ်ရဲ့ ရေဝင်ရောက်မှု အခြေအနေ သိချင်ပါတယ်။ 

UNMT : အမရပူရမှာ မြစ်ရေတက်တယ်ဆိုတာ ဖြစ်ရိုးဖြစ်စဉ်ပါ။ အခုချိန်ထိတော့ စိုးရိမ်ဖွယ်ရာ မရှိဘူး။ ကျန်းမာရေးနဲ့ စားဝတ်နေရေး အခက်အခဲတော့ အနည်းငယ် ရှိပါတယ်။ ပြည်သူတွေက ဒီအချိန်မှာ ရေတက်လာမယ်ဆိုတာ သိပြီးသားမို့ ကြိုတင်ပြင်ဆင်မှုတွေ လုပ်ထားနိုင်ကြပါတယ်။ 

တစ်ဆက်တည်းမှာပဲ ထူးခြားမှုအနေနဲ့ အားလုံးသိကြတဲ့အတိုင်း အမရပူရမြို့နယ်အတွင်းမှာ ရှိတဲ့  ရတနာပုံတက္ကသိုလ် ရေဝင်နေတာ အားလုံးသိပြီး ဖြစ်မှာပါ။ အဲဒီမှာရှိနေတဲ့ အဆောင်မှာ ကျွန်တော်တို့ရဲ့ ညီငယ် ညီမငယ်တွေ ရှိနေပါတယ်။ အခက်အခဲ အမျိုးမျိုးကြောင့် နေရပ်မပြန်နိုင်တဲ့ သူတွေကို ငွေကြေးကအစ ကားဂိတ်အရောက် လက်မှတ်တွေ ဖြတ်ပြီး သက်ဆိုင်ရာ မိခင်မြို့နယ်တွေအရောက် ပို့ဆောင်ပေးဖို့ စီစဉ်နေပါတယ်။ 

Voice : လက်ရှိ ရေဝင်တဲ့နေရာတွေ ဘယ်လောက်ပါသလဲ။ 

UNMT : ရပ်ကွက်ငါးရပ်ကွက်၊ ကျေးရွာအုပ်စု ၂၈ အုပ်စုက ကျေးရွာ ၇၉ ရွာ မြုပ်တယ်။ နှစ်စဉ်နှစ်တိုင်း ဒီလိုမြုပ်နေကျ၊ မနှစ်ကထက်တော့ ဒီနှစ်နည်းနည်းဆိုးတယ်။ သို့သော် ၂၀၀၄ ခုနှစ်နဲ့ ယှဉ်မယ်ဆိုရင်တော့ ဒါက ဆိုးဝါးတဲ့အဆင့် မဟုတ်သေးပါဘူး။ 

Voice : ဦးပိန်တံတားရဲ့ အခြေအနေကိုလည်း ပြောပြပါဦး။ 

UNMT : လက်ရှိ ဦးပိန်တံတားမှာတော့ ရေဝင်နေတယ်ပေါ့နော်။ တံတားရဲ့ အလယ်ဇရပ်နားမှာ အခုလက်ရှိအချိန် ငါးနာရီထိုးအထိ ခုနစ်ခန်းလောက် ရေတစ်လက်မလောက် ကျော်နေပြီပေါ့နော်။ ကျန်တဲ့နေရာတွေတော့ တစ်ပေလောက်ထိ လိုပါသေးတယ်။ မိဘပြည်သူတွေက ရေတက်ရင် လည်ချင်ပတ်ချင်ကြတယ်။ တံတားပေါ်မှာ မလိုလားတဲ့ အသက်အန္တရာယ် ထိခိုက်မှုတွေ ဖြစ်မှာစိုးလို့ မနေ့ညကပဲ တိုင်းဒေသကြီးအစိုးရရဲ့ လမ်းညွှန်ချက်နဲ့အညီ တံတားကို ခေတ္တပိတ်ထားတာပါ။ မိဘပြည်သူတွေအတွက် စိတ်ချရတဲ့ အနေအထား၊ တံတားကြီးရဲ့ ကြံ့ခိုင်မှုတွေ ပြန်လည်စိစစ်ပြီးရင် အမြန်ဆုံး ပြန်လည်ဖွင့်လှစ်ပေးသွားမှာ ဖြစ်ပါတယ်။

မြတ် (ကလေး)

ABOUT AUTHOR

(မြတ်(ကလေး))