News

POST TYPE

INTERVIEW

ဒေါက်တာသူရဇော်နှင့် တွေ့ဆုံခြင်း
11-Jul-2018

G6PD အင်ဇိုင်းဓာတ်ချို့တဲ့မှု



“မျိုးရိုးဗီဇနဲ့ ပတ်သက်တဲ့ရောဂါတစ်ခုလို့ ဆိုလို့ရတယ်။ မိခင်မှာပါလာရင် ကလေးမှာဖြစ်ဖို့များတယ်”

G6PD အင်ဇိုင်းဓာတ်ချို့တဲ့မှုသည် ကလေးငယ်များနှင့် ယောကျာ်းလေးများတွင် ပိုမိုဖြစ်ပွားတတ်ပြီး ယင်းဓာတ်ချို့တဲ့သူများအနေနှင့် ၎င်းတို့နှင့် မတည့်သည့်အရာများကို ရှောင်ကြဉ်၍နေထိုင်မည်ဆိုပါက တစ်သက်လုံး အန္တရာယ်မရှိနေနိုင်သည်။ ထို့အပြင် မွေးကင်းစကလေးများတွင် ခန္ဓာကိုယ်အစိတ်အပိုင်းများ စတင်ဖွံ့ဖြိုးသူများဖြစ်သောကြောင့် အသက်အန္တရာယ်ကိုပါ ထိခိုက်နိုင်သဖြင့် G6PD ဓာတ်ချို့တဲ့မှုနှင့် ဆက်စပ်သည်များကို ကလေးဆရာဝန် ဒေါက်တာသူရဇော်နှင့် The Voice က မေးမြန်းဖြစ်သည်များကို ဖော်ပြလိုက်ပါသည်။

Voice : G6PD ဆိုတာကို ရှင်းပြပေးပါဦး။
Dr.TYZ : G6PD ဆိုတာ လူသားတိုင်းရဲ့ သွေးထဲမှာရှိတဲ့ သွေးနီဥလေးတွေ သန်စွမ်းဖို့၊ ကြံ့ခိုင်ဖို့အတွက် မရှိမဖြစ်လိုအပ်တဲ့ ဓာတ်တစ်ခုကိုခေါ်တယ်။ G6PD ဓာတ်ရှိမှ သွေးနီဥလေးတွေက ခိုင်မာပြီးတော့ သူတို့ရဲ့ ပုံမှန်အောက်ဆီဂျင်သယ်တဲ့အလုပ်ကို လုပ်ပေးနိုင်မှာပါ။ G6PD ဓာတ်ချို့တဲ့ခဲ့မယ်ဆိုရင် သွေးနီဥတွေဟာ ရုတ်တရက်ပြိုကွဲပြီးတော့ ရုတ်တရက်သွေးအားနည်းတဲ့ရောဂါ ဖြစ်စေနိုင်ပါတယ်။ ဒါကို G6PD အင်ဇိုင်းလို့ခေါ်တယ်။ အဲဒီအင်ဇိုင်းက သွေးနီဥတွေရဲ့ ကျန်းမာသန်စွမ်းမှုအတွက် မရှိမဖြစ်လိုအပ်တဲ့ အင်ဇိုင်းလို့ ပြောလို့ရတယ်။

Voice : ဟုတ်ကဲ့။ G6PD ဓာတ်က ဘယ်လိုလူတွေမှာ ချို့တဲ့နိုင်တာပါလဲ။
Dr. TYZ : G6PD ဓာတ်က တချို့သော လူမျိုးစုတွေမှာ ချို့တဲ့တာတွေ့ရှိရတတ်တယ်။ တချို့ အာဖရိက တိုက်တွေမှာလည်း အာဖရိကန်လူမျိုးက ဒီဓာတ်ချို့တဲ့တာကို တွေ့နိုင်တယ်။ မြေထဲပင်လယ်ဒေသတွေမှာ နေထိုင်တဲ့လူတွေမှာလည်း တွေ့ရတယ်။ နောက် အီတလီတို့၊ ဂရိလူမျိုးတွေတို့၊ ဂျူးလူမျိုးတွေမှာလည်း တွေ့ရတယ်။ မြန်မာတွေမှာတောင် တချို့ မြန်မာလူမျိုးတွေနဲ့ ကရင်လူမျိုးတွေမှာ G6PD ဓာတ်ချို့တဲ့တာကို တွေ့ရတယ်။ အာဖရိကနဲ့ မြေထဲပင်လယ်ဒေသတွေမှာ အစုလိုက်အပြုံလိုက်တွေ့ရတယ်။ ဆရာတို့ မြန်မာပြည်မှာလည်း မရှားတဲ့ရောဂါတစ်ခုပေါ့။

Voice : ဒီဓာတ်ချို့တဲ့မှုက ယောကျာ်းလေးနဲ့ မိန်းကလေး၊ နောက် အသက်အရွယ်အပိုင်းအခြား ဖြစ်ပွားမှုအခြေအနေတွေကရော။
Dr. TYZ : အထူးသဖြင့်က ယောကျာ်းလေးတွေမှာ တွေ့ရများတယ်။ သို့သော်လည်း တချို့သော မိန်းကလေးတွေမှာလည်း ဖြစ်တာတွေ့ရတယ်။ တချို့မိန်းကလေးတွေမှာ လက္ခဏာမပြဘဲနဲ့ မျိုးရိုးဗီဇကို သယ်ဆောင်လာတာတွေလည်း တွေ့ရနိုင်တယ်။ ဒါက မျိုးရိုးဗီဇနဲ့ ပတ်သက်တဲ့ရောဂါတစ်ခုလို့ ဆိုလို့ရတယ်။ မိခင်မှာပါလာရင် ကလေးမှာဖြစ်ဖို့များတယ်။ အမျိုးထဲမှာ တစ်ယောက်မှာရှိခဲ့ရင် တခြားတစ်ယောက်မှာလည်း ရှိကောင်းရှိနိုင်တယ်။ မျိုးရိုးဗီဇမှာ သာမန်ကနေ အနည်းငယ်ပြောင်းလဲသွားတဲ့ရောဂါပေါ့။ အသက်အရွယ်အနေနဲ့က သူကမျိုးရိုးဗီဇနဲ့ ပတ်သက်တာကြောင့် မွေးကတည်းကပါလာတယ်။ ဒါပေမဲ့ တစ်ယောက်နဲ့ တစ်ယောက်ကတော့ ရောဂါရှိမှန်းသိတဲ့အချိန်က တူချင်မှတူမယ်။ မွေးကင်းစကာလကတည်းက ဖြစ်လိုက်လို့ သိတာတွေရှိတယ်။ တချို့က ရောဂါလက္ခဏာပြမှ သိတာတွေလည်းရှိတယ်။ တချို့ကျတော့ အသက်ကြီးတဲ့အထိတောင် အမှတ်မထင်သွေးစစ်ကြည့်တော့မှ ရောဂါရှိမှန်းသိတယ်။ နောက်တစ်ခုက မျိုးရိုးမှာမရှိဘဲနဲ့ ကိုယ့်အလှည့်ကျမှ ဖောက်ပြီးဖြစ်တာလည်း ရှိနိုင်ပါတယ်။

Voice : ဘာကြောင့် ယောကျာ်းလေးတွေမှာ ပိုဖြစ်တာပါလဲ။
Dr. TYZ : G6PD ဓာတ်ချို့တဲ့မှုကို သယ်ဆောင်တဲ့ဗီဇက ‘X’ Chromosome မှာပါတယ်။ ‘X’ ‘Y’ Chromosome ပါတဲ့ ယောကျာ်းလေးတွေက အားနည်းတဲ့ ‘X’ ပါတဲ့အတွက် ရောဂါဖြစ်ပွားလေ့ရှိပြီးတော့ ‘X’ ‘X’ Chromosome ပါတဲ့ မိန်းကလေးတွေမှာတော့ အားများပြီးကောင်းမွန်တဲ့ ‘X’ တစ်ခုက ရောဂါဗီဇပါတဲ့ ‘X’ တစ်ခုကို ဖိနှပ်ထားတဲ့အတွက် ရောဂါဖြစ်ပွားလေ့မရှိဘူး။

Voice : ဟုတ်ကဲ့။ G6PD ဓာတ်ချို့တဲ့လို့ ဖြစ်ပေါ်နိုင်တဲ့ ရောဂါလက္ခဏာတွေကို ပြောပြပေးပါဦး ဆရာ။
Dr. TYZ : ရောဂါလက္ခဏာကတော့ မွေးကင်းစကာလမှာဆိုရင် သွေးနီဥတွေ ရုတ်တရက်ပြိုကွဲပြီးတော့ ပြင်းထန်စွာ အသားဝါလာနိုင်တယ်။ အသားဝါတဲ့ဓာတ်က အလွန်တရာပြင်းထန်တယ်ဆိုရင် ကလေးငယ်ရဲ့ ဦးနှောက်ကိုတောင်ထိခိုက်ပြီး အသက်အန္တရာယ်ကိုဖြစ်ဖြစ်၊ ဉာဏ်ရည်ဉာဏ်သွေးကိုဖြစ်ဖြစ်၊ ကိုယ်ခန္ဓာအာရုံကြော ဖွံ့ဖြိုးတာကိုပဲဖြစ်ဖြစ် ထိခိုက်သွားနိုင်တယ်။ မွေးကင်းစကာလကနေ လွတ်သွားပြီးတော့ ကလေးငယ်ဘဝမှာဆိုရင်တော့ ရုတ်တရက်သွေးနီဥတွေပြိုကွဲတာကြောင့် ဖြူစွတ်ပြီး သွေးမရှိတော့သလို ဖြစ်သွားနိုင်တယ်။ သွေးက ကိုယ်ခန္ဓာရဲ့ လိုအပ်တဲ့အောက်ဆီဂျင်ကို သယ်ပေးနေတဲ့အတွက် သွေးမရှိတော့ရင် သွေးအားနည်းသွားပြီး မောပန်းလာမယ်၊ အာရုံစူးစိုက်လို့မရဘူး၊ အပင်ပန်းမခံနိုင်ဘူး၊ အလုပ်မလုပ်နိုင်ဘူး၊ စိတ်ကြည်လင်မှုမရှိဘူး။ ဒီထက်ပိုဆိုးလာရင် နှလုံးတုန်ရင်ခုန်ပြီးတော့ အမောဖောက်လာတာ၊ အသက်အန္တရာယ်ပေးတာအထိ ဖြစ်နိုင်တယ်။ နောက်ပြီး ဆီးအရောင်မည်းမည်းတွေသွားတာ ဖြစ်နိုင်တယ်။

Voice : ဒီလိုဖြစ်တာကိုမသိတဲ့ အသက်ကြီးလာ တဲ့သူတွေအနေနဲ့ သူတို့နေထိုင်မှုမှာ ဘယ်လိုပြဿနာတွေ ရှိလာနိုင်ပါသလဲ။ နောက်ပြီး ကလေးတွေတော့ ဦးနှောက်ထိတာတွေအထိဖြစ်ပြီး အသက်ကြီးတဲ့လူတွေက ဘာမှမဖြစ်ဘူးဆိုတာ ဘာကြောင့်ပါလဲ။
Dr. TYZ : ရောဂါဖြစ်ပွားချိန်က တစ်ယောက်နဲ့တစ်ယောက်က မတူဘူး။ တချို့လည်း အသက်ကြီးတဲ့အချိန်ထိ ရှိလို့ရှိမှန်းမသိဘူး။ ဒီတော့ ဒါဟာ သူ့ဘာသာသူရှိနေပေမယ့် ဒုက္ခမပေးဘူး။ G6PD ဓာတ်ချို့တဲ့တဲ့ကလေးတွေက တချို့အဖျားရောဂါဝင်ရောက်လို့ပဲဖြစ်ဖြစ်၊ ဓာတုပစ္စည်းတွေနဲ့ ထိတွေ့မိတာပဲဖြစ်ဖြစ်၊ အထူးသဖြင့် Sulphur ပါတဲ့ ပဋိပစ္စည်းတွေကို သောက်သုံးမိတာပဲဖြစ်ဖြစ်၊ ငှက်ဖျားပြတ်ဆေးတွေ သောက်မိတာတွေကြောင့် ရုတ်တရက်သွေးနီဥတွေ ကပြိုကွဲသွားပြီး ရောဂါလက္ခဏာတွေ ဖြစ်နိုင်ပါတယ်။ မြန်မာပြည်မှာ အဖြစ်များဆုံးနဲ့ တွေ့ရအများဆုံးက G6PD ဓာတ်ချို့တဲ့တဲ့ကလေးတွေကို ဒုက္ခပေးနိုင်တဲ့ တောင်ကြီးပဲလှော်စားမိတဲ့အချိန်မှာ ရုတ်တရက် သွေးနီဥတွေ ပြိုကွဲသွားတာရှိနိုင်တယ်။ နောက်ပြီး ပရုတ်လုံးနဲ့ ဆိုးဆေးတွေကို ထိတွေ့တဲ့အခါ ဖြစ်လာတာတွေ့နိုင်တယ်။ ဒီဓာတ်ချို့တဲ့တဲ့ကလေးတွေက သာမန်ကလေးတွေလိုပဲ အနာတရကင်းဝေးပြီးတော့ နေနိုင်တယ်။ အဓိကရှောင်ရမှာက သူတို့နဲ့မတည့်တာတွေကိုပဲ။ နောက် လူကြီးနဲ့ကလေးကွာခြားမှုက ကလေးက မွေးကင်းစမှာ အသား ဝါလေ့ဝါထရှိတယ်။ G6PD ကြောင့်ဖြစ်တဲ့ အသားဝါတာကတော့ အင်မတန်ပြင်းထန်တယ်။ အဲဒီအခါမှာ ကလေးရဲ့ နုနယ်တဲ့ဦးနှောက်ကို သွားထိနိုင်တယ်။ လူကြီးတွေကတော့ မနုနယ်တော့ဘူး။ ဖွံ့ဖြိုးနေပြီ။

Voice : တောင်ကြီးပဲလှော်နဲ့ မတည့်ဘူးဆိုတော့ တခြားပဲတွေနဲ့ကရော။
Dr. TYZ : သူကတောင်ကြီးပဲနဲ့ မတည့်ဘူးဆိုပေမယ့် ပဲအားလုံးနဲ့ မတည့်တာမဟုတ်ဘူး။ Fava Bean လို့ခေါ်တဲ့ တောင်ကြီးပဲလှော်တစ်ခုနဲ့ပဲ မတည့်တာ။ စားနေကျ ပဲနီ၊ ပဲဝါတွေနဲ့တည့်တယ်။ တချို့နှစ်ပြန်ကြော်တွေမှာပဲအစုံပါပြီး တောင်ကြီးပဲပါရင်တော့ သတိထားရမယ်။ 

Voice : ဟုတ်ကဲ့ ဆရာ။ ဒီလိုဖြစ်ပွားမှုက တစ်ခါဖြစ်ပြီးရင် နောက်တစ်ခါ ထပ်ဖြစ်နိုင်ပါသလား။
Dr. TYZ : သူနဲ့မတည့်တာနဲ့တွေ့ရင်တော့ အခါခါ ဖြစ်နိုင်တယ်။ ဒီဓာတ်ချို့တဲ့တယ်ဆိုတဲ့ ကလေးတွေဆိုရင် လက်ကမ်းစာစောင်တွေ ထုတ်ပေးလိုက်တယ်။ ဘာတွေရှောင်ရမယ် စသဖြင့်ပေါ့။ မြန်မာပြည်မှာ အဓိကပြဿနာက တွေ့ရာမှာဆေးစပ်ပြီး သောက်ကြတာပဲ။ နောက်တစ်ခုက တချို့သော မြန်မာတိုင်းရင်းဆေးနဲ့ တရုတ်တိုင်းရင်းဆေးတွေမှာပါတဲ့ဓာတ်တွေက ကလေးတွေနဲ့မတည့်တာတွေရှိတယ်။ ဒါကြောင့် ဆရာတို့က ကြုံရာဆေးဝယ်မသောက်ပါနဲ့၊ စပ်ဆေးဝယ်မသောက်ပါနဲ့၊ ဆရာဝန်ကိုပြပြီဆိုရင်လည်း ဒီဓာတ်လေးချို့တဲ့ကြောင်း ပြောတတ်အောင် သင်ပေးလိုက်တယ်။

Voice : ဒီလိုဓာတ်ချို့တဲ့တာကို ဘယ်လိုကာကွယ်လို့ရမလဲ။
Dr. TYZ : သူက မျိုးရိုးဗီဇလိုက်တဲ့ရောဂါဆိုတဲ့အတွက်ကြောင့် ကိုယ့်အမျိုးထဲမှာရှိခဲ့မယ်ဆိုရင် ကလေးမွေးမယ့် အချိန်ကနေစပြီး ရောဂါရှိ၊ မရှိ သွေးစစ်ထားသင့်တယ်။ သွေးစစ်လို့ ရောဂါရှိတာ သိထားရင် အပေါ်ကပြောခဲ့တဲ့ အကြောင်းအရာတွေ ကိုရှောင်ရင် တစ်သက်လုံး ဘာရောဂါလက္ခဏာမှ မပြဘူး။

Voice : G6PD ဓာတ်မတည့်တာကို ကြိုတင်သိရှိနိုင်ဖို့ ဆရာ့အနေနဲ့ သတိပေးစကားလေး ပြောပေးပါဦး။
Dr. TYZ : ကိုယ့်မျိုးရိုးထဲမှာ ရှိတယ်လို့သံသယရှိရင် သွေးစစ်ကြည့်ပါ။ သွေးစစ်ကြည့်ခြင်းအားဖြင့် သိရှိနိုင်ပါတယ်။

Voice : အခုလိုဖြေကြားပေးတဲ့အတွက် ကျေးဇူးတင်ပါတယ်။

သီတာဆွေ