News

POST TYPE

YOUTH

အားကျစေချင် နည်းပညာရှင်များ (၁၃)
11-Aug-2018 tagged as



လေ့ ကက်သရင်း ဘွန်းနား (Leigh-Kathryn Bonner)

မနက်တိုင်းလိုလို လေ့ကက်သရင်းဘွန်းနား တစ်ယောက်ကို အိမ်ခေါင်မိုးပေါ်တွင် တွေ့ရမည်။ ပန်းနုရောင်လက်အိတ်တွေကို ဝတ်ထားပြီး ပျားအုံတွေနှင့် အလုပ်ရှုပ်နေတတ်သည်။ နေ့လယ်ခင်းတွင် သူက Fortune 500 ကုမ္ပဏီ ညီလာခံကို လာတက်သည်။ သူ့အသက်က ၂၅ နှစ်သာရှိသေးသော်လည်း ကုမ္ပဏီတွင် CEO တစ်ဦးအဖြစ် တာဝန်ယူထားရသူဖြစ်သောကြောင့် ညီလာခံကို လာတက်ခြင်းဖြစ်သည်။ သူက ပျားမွေးမြူရေးလုပ်ငန်းနှင့် ပျားကောင်ရေ တိုးပွားလာရေးတို့ကို ဦးဆောင်ပြီး လှုပ်ရှားနေသူတစ်ဦးဖြစ်သည်။ 

ကမ္ဘာပေါ်တွင် ပျားကောင်ရေက ဆယ်စုနှစ်အတွင်း သိသာစွာထိုးကျလာသည်။ ပျားမျိုးစိတ်ပေါင်း ၇၀၀ ခန့်မှာ မျိုးသုဉ်းကွယ်ပျောက်လုနီးပါးဖြစ်နေပြီဟု ပညာရှင်တွေက သတိပေးထားသည်။ လယ်ယာစိုက်ပျိုးရေး နည်းစနစ်များ ပြောင်းလဲကုန်သည့်အပြင်၊ ပျားတွေ ပျော်မွေ့ရာ ပန်းခင်းတွေ၊ သဘာဝအရိုင်းမြေတွေပျက်စီးကုန်ပြီ။ ထို့ပြင် လူသားတို့၏ နေရာအနှံ့ ပိုးသတ်ဆေးများကို သုံးစွဲနေခြင်းများမှာ ကမ္ဘာလောကကြီးပေါ်မှ အကျိုးပြု ပျားတွေကို မောင်းထုတ်နေသလိုဖြစ်စေခဲ့သည်။ ပျားမျိုးစိတ်များ ပျက်သုဉ်းကုန်ခြင်းမှာ အစားအစာ ထုတ်လုပ်ရေးနှင့် သဘာဝပတ်ဝန်းကျင်ထိန်းသိမ်းမှုများကို မည်မျှဖျက်ဆီးရာရောက်ကြောင်း သိသူတွေ နည်းပါးလှသည်။ 

အလွန်သေးငယ်သည့် ပျားကောင်လေးတွေက အမေရိက၏ သီးနှံထုတ်လုပ်ရေးကို ဒေါ်လာ ဘီလီယံ ၂၀ ခန့်အထိ အကျိုးပြုနေကြောင်း အမေရိကန် ပျားအဖွဲ့ချုပ် (American Bee Federation) က ထုတ်ပြန်ထားသည်။ 

ဘွန်းနားသည် ပျားကောင်ရေလျော့ကျလာမှုနှင့် ပျက်သုဉ်းလာမှုကို သတိထားမိသူတစ်ဦးဖြစ်သည်။ ထို့ကြောင့် ၂၀၁၄ ခုနှစ်ကတည်းက မြောက်ကာရိုလိုင်းနားရှိ ဒါဟမ်းအရပ်တွင် ပျားမွေးမြူရေးလုပ်ငန်းကို စတင်ခဲ့သည်။ သူ့ပျားမွေးမြူရေးလုပ်ငန်းကို Bee Downtown ဟု အမည်ပေးထားသည်။ ပျားမြို့တော်ထဲတွင် မြို့ပြမှထွက်ပြေးလာသည့် ပျားများ ခိုနားရန် နေရာတစ်နေရာဖြစ်ရန်သာမက၊ ပျားများအတွက် မှီခိုရာပန်းပင်များကိုလည်း စိုက်ပျိုးပေးပြီး ဖိတ်ခေါ်ရန် အားထုတ်ထားသည်။ ဘွန်းနား၏ လုပ်ငန်းအပေါ် နာမည်ကျော်လုပ်ငန်းရှင်ကြီးတွေက အားပေးသည်။ ထို့ကြောင့် သူမလုပ်ဆောင်နေသည့် ပျားမွေးမြူစောင့် ရှောက်ရေးလုပ်ငန်းတွင်  Burt's Bees, Delta, Chick-fil-A, Intercontinental Exchange, IBM စသည့် ကုမ္ပဏီကြီးများ ပူးပေါင်းပါဝင်လာကြသည်။ 

ကုမ္ပဏီအများစုသည် ပျားထိန်းသိမ်းမွေးမြူရေးလုပ်ငန်းရှင်ကြီးများ ဖြစ်လာစေရန်အတွက် ဘွန်းနားက ကြိုးပမ်းဆောင်ရွက်ခဲ့နိုင်သည်။ ပျားမွေးမြူရေးအပြင် ပျားရည်ထုတ်လုပ်ရေး လုပ်ငန်းကြီးကိုလည်း နောက်ဆက်တွဲအနေနှင့် သူလုပ်ဆောင်နိုင်ခဲ့သည်။ ပျားများအတွက် ဥယျာဉ်ကြီးတစ်ခုကို ထူထောင်ပေးခြင်းသည် သဘာဝပတ်ဝန်းကျင်ထိန်းသိမ်းရေး လုပ်ငန်းတစ်ရပ်သာမက၊ လူမှုရေးလုပ်ငန်းကြီးတစ်ရပ်အဖြစ် လူသားအကျိုးပြုမှုအတွက် လုပ်ဆောင်နေခြင်းဖြစ်ကြောင်းလည်း အားလုံးလက်ခံနိုင်စေရန် ဘွန်းနားက လုပ်ဆောင်ပေးနိုင်ခဲ့သူဖြစ်သည်။ 

Bee Downtown တွင် ဝန်ထမ်းများ ခန့်ထားသည်။ ပျားဘုရင်မကို ရှာဖွေကြရသည်။ ပျားအုံတစ်အုံက ပျားရည် မည်မျှ ထုတ်ယူနိုင်သည်ကို တွက်ဆကြသည်။ သူတို့က ပျားတွေကို ထိန်းသိမ်းစောင့်ရှောက်နေခြင်းသည် လယ်ယာလုပ်ငန်းကိုပါ ဖွံ့ဖြိုးတိုးတက်စေရန်ဖြစ်ကြောင်း ကောင်းစွာ သဘောပေါက်နားလည်ထားကြသည်။ 

“ကျွန်မတို့က လယ်ယာလုပ်ငန်းအပေါ် လူတွေ စိတ်ဝင်စားလာစေချင်တယ်။ ပြီးတော့ ကျွန်မတို့ စားနေတဲ့ အစားအစာတွေ ဘယ်ကလာတယ်ဆိုတာလည်း သိစေချင်တယ်။ ကျွန်မတို့က လယ်ယာစိုက်ပျိုးရေးလုပ်ငန်းကြီးကို ပြုပြင်ပြောင်းလဲမှုတွေ ပြန်လုပ်နေတာပါ။ ကမ္ဘာကြီးကို ဘေးသင့်စေနိုင်တဲ့အနေအထားကို ပြန်လည်ကယ်တင်နေကြတာပါ”ဟု ဘွန်းနားက ဆိုသည်။

ဘွန်းနားသည် ပျားမွေးမြူရေးလုပ်ငန်းကို လုပ်ဆောင်နေသည့် စတုတ္ထမြောက် မျိုးဆက်ဖြစ်သည်။ သူတို့ မိသားစုသည် မြောက်ကာရိုလိုင်းနားရှိ Releigh တွင် ခြံတစ်ခြံရှိသည်။ မြို့က တစ်နာရီခန့် ကားမောင်းလျှင် ရောက်နိုင်သည့် နေရာတွင်ဖြစ်သည်။ ထိုခြံထဲတွင် ဘိုးစဉ်ဘောင်ဆက် ပျားမွေးခဲ့ကြသူများဖြစ်ပြီး သူက စတုတ္ထမြောက် အမွေဆက်ခံသူဖြစ်သည်။ ကောလိပ်တက်နေစဉ်အထိ ဘွန်းနားသည် ပျားကောင် လေးတွေအပေါ် စိတ်ဝင်စားခဲ့သူတစ်ဦးတော့ မဟုတ်ပေ။ သူက သတင်းစာများတွင် ပျားမျိုးစိတ်တွေ ပျက်သုဉ်းလာပြီဆိုသည့် သတင်းတွေကို ဖတ်ရပြီးမှ ပျားလေးတွေအပေါ် စိတ်ဝင်စားလာခြင်းဖြစ်သည်။ သူငယ်စဉ်က ပျားတွေကြားထဲတွင် နေခဲ့ရသူဖြစ်သည်။ ထို့ကြောင့် ပျားကောင်လေးတွေ ရင်ဆိုင်နေရသည့် ပြဿနာများကို သူ တစ်ဖက်တစ်လမ်းက ဖြေရှင်းပေးနိုင်လိမ့်မည်ဟု ယူဆသည်။

ဘွန်းနားသည် American Tobacco Campus ဝင်းအတွင်းရှိ အဆောင်ခေါင်မိုးများပေါ်တွင် ပျားမွေးမြူရေးတွေလိုက်လုပ်သည်။ ဒါဟမ်းတွင် စီးပွားရေး ဖွံ့ဖြိုးတိုးတက်လာသဖြင့် မြို့ပြ၌ မြေလွတ်မြေရိုင်းတွေ ရှားလာသည်။ ထို့ကြောင့် ဘွန်းနားက အဆောက်အအုံများပေါ်တွင် ပျားမွေးမြူခြင်းကို စတင်စိတ်ကူးမိသည်။ သူ့စိတ်ကူးကို Burt’s Bees လုပ်ငန်းကထောက်ခံပြီး အကူအညီများပေးသည်။ Burt’s Bees ကလည်း ဒါဟမ်းတွင် ပထမဆုံး ပျားရည်လုပ်ငန်းကို လာရောက်ထူထောင်ထားသည့် လုပ်ငန်းတစ်ခုဖြစ်သည်။

လုပ်ငန်းကို စတင်နေစဉ်က ဘွန်းနား ကျောင်းမပြီးသေးပေ။ ထို့ကြောင့် သူက ကျောင်းတစ်ဖက် ပျားမွေးမြူရေး လုပ်ငန်းတစ်ဖက် အတော်လေး လှုပ်ရှားခဲ့ရသည်။ ၂၀၁၅ ခုနှစ် မေလတွင် သူဘွဲ့ရသည်။ သူကမ်းလှမ်းထားသည့် အလုပ်က ခေါ်သည်ကို ငြင်းပယ်လိုက်ပြီး Bee Downtown ကို ထူထောင်ရန် ဆုံးဖြတ်သည်။ ပျားမွေးမြူရေးလုပ်ငန်းတွင် အချိန်ပြည့် မြှုပ်နှံရန် ဆုံးဖြတ်လိုက်ခြင်းဖြစ်သည်။ မိဘတွေကို သူလုပ်ချင်သည့် လုပ်ငန်းအကြောင်း ပြောပြသည်။ သူ့ကို မိဘတွေက ဒေါ်လာ ၁၅၀၀၀ ထုတ်ပေးသည်။ တစ်နှစ်အတွင်း လုပ်ငန်းက အောင်မြင်လာပြီး ရင်းနှီးမြှုပ်နှံထားသမျှ အကျိုးအမြတ်ပြန်ရလာသည်။ ပျားမွေးမြူရေးလုပ်ငန်းတွင် သူ့ဘဝကို ပုံထားလိုက်သည်။

အစပိုင်းတွင် သူက ကုမ္ပဏီများထံချဉ်းကပ်ပြီး သူ့လုပ်ငန်းအကြောင်း ရှင်းပြသော်လည်း သူ့ကို နားမလည်ကြပေ။ သူက ပျားမွေးမြူရေးလုပ်ငန်းကို NGO အနေနှင့် အကျိုးအမြတ်မယူဘဲ သဘာဝပတ်ဝန်းကျင်ကြီး ငြိမ်းချမ်းသာယာမှုရှိစေရန် လုပ်ငန်းကြီးတစ်ခုအဖြစ် ထူထောင်လိုသည်။ နေရာအနှံ့ ပျားအုံတွေကို လိုက်လံတည်ဆောက်ပေးပြီး ပျားကောင်ရေ တိုးပွားလာစေရန် ဦးတည်လုပ်ဆောင်လိုသဖြင့် သူ့လုပ်ငန်းအတွင်း လုပ်ငန်းရှင်ကြီးများ ပါဝင်လာစေရန် လိုက်လံစည်းရုံးနေခြင်းဖြစ်သည်။ သူ့လုပ်ငန်းကို လူတွေက ချစ်စရာကောင်းသည့် လုပ်ငန်းတစ်ခုအနေဖြင့်သာ မြင်ကြသည်။ သို့သော် စီးပွားရေးသမားများဘက်က အကျိုးအမြတ်ကိုသာ ကြည့်တတ်သောကြောင့် သူ့စည်းရုံးမှုထဲကို ဝင်မလာကြသည်ကများသည်။

ထို့ကြောင့် ဘွန်းနားတစ်ယောက် ကိုယ့်လမ်းကိုယ်ဖောက်ရတော့သည်။ သူက လူတွေကို သူနှင့် ပူးပေါင်းပြီး လုပ်ဆောင်ရန် စည်းရုံးနေခြင်းအစား လုပ်ငန်းတွေကို ကိုယ်နိုင်သလောက် စတင်လှုပ်ရှားပြသည်။ Bee Downtown ကို ထူထောင်လိုက်ပြီး သူနှင့်အတူ လုပ်ဆောင်ရန် ဝန်ထမ်းများကို ရှာဖွေရသည်မှာပင် မယုံကြည်မှုများကို ရင်ဆိုင်ခဲ့ရသည်။ ဝန်ထမ်းတွေက ပျားမွေးမြူခြင်းလုပ်ငန်းကို ကိုယ်ထိလက်ရောက်ပါဝင်ခွင့်ရလာမှ လုပ်ငန်းအပေါ် နားလည်လာကြသည်။ ပျားတွေက သဘာဝပတ်ဝန်းကျင်ကို မည်မျှအထိ အထောက်အကူပြုနေသည်ဆိုခြင်းကိုလည်း နားလည်လာကြသည်။ နောက်ပိုင်း သူ့ဝန်ထမ်းတွေ အားလုံးကိုသူက ပျားရည်များ အိမ်သို့ အခမဲ့စားသောက်ရန် ယူခွင့်ပြုခြင်းဖြင့် စည်းရုံးထားသည်။ 

ကုမ္ပဏီတွေက သဘာဝပတ်ဝန်းကျင်ကို ထိန်းသိမ်းရာရောက်သည့် ပျားမွေးမြူရေးလုပ်ငန်းအပေါ် စိတ်ဝင်စားစပြုလာကြသည်။ ပျားအုံတစ်အုံသည် ဝတ်မှုန်ပေါင်း ၂၇ သန်းကျော်ကို နေ့စဉ်စုဆောင်းနိုင်ရန် လိုအပ်သည်။ သူတို့တွင် ၅၆ မိုင်ဝန်းကျင် ဝတ်မှုန်များရနိုင်သည့် ပတ်ဝန်းကျင်ရှိသည်။ ရလေးနှင့် ဒါဟမ်းမြို့ ဝန်းကျင်တွင် အရေးကြီးသည်မှာ ပျားများအတွက် ပန်းစိုက်ခင်းများ ပျောက်ပျက်မသွားရန်ဖြစ်သည်။ ဘွန်းနားနှင့် ပူးပေါင်းလုပ်ဆောင်နေကြသူဝန်ထမ်း ၈၃ ရာခိုင်နှုန်းက သူလုပ်ဆောင်နေသည့် လုပ်ငန်းအပေါ် ကောင်းစွာ နားလည်လာကြသည်။ မြို့သူ မြို့သားတွေကလည်း ပူးပေါင်းပါဝင်လာကြသည်။ 

Invesco ကုမ္ပဏီမှ CEO ဖြစ်သူ Marty Flanagan က သူ့အနေနှင့် ဘွန်းနား၏ လုပ်ငန်းကို အထင်ကြီးလေးစားမိကြောင်း ထုတ်ဖော်ပြောကြားသည်။ သို့သော် သူက လုပ်ငန်းနှင့် ပတ်သက်ပြီး အကျိုးအမြတ်ကို ထည့်သွင်းစဉ်းစားသည်။ 

“ကုမ္ပဏီတွေလိုပဲ ကျွန်တော်ကလည်း အကျိုးအမြတ်ကိုစဉ်းစားမိတယ်။ ဒါပေမဲ့ လူ့အဖွဲ့အစည်း ကောင်းကျိုးအတွက်ဆိုတာလည်း ထည့်တွက်မိတယ်”ဟု သူကဆိုသည်။ ထို့ကြောင့် Invesco ကုမ္ပဏီအနေနှင့် သူတို့၏ ဌာနချုပ်အနီးတွင် ပျားမွေးမြူရေးများကို လာလုပ်ရန်အတွက် စပွန်ဆာပေးလိုက်သည်။ 

ဘွန်းနားအနေနှင့် ပထမဆုံး Bee Downtown ကို ထူထောင်သည့်နှစ်မှာပင် လုပ်ငန်းအပေါ် အချိန်ပြည့် မြှုပ်နှံရတော့သည်။ သူခြံက ပျားအုံပေါင်း ၅၀ ကို ရောင်းချခဲ့ရသည်။ ထိုရောင်းချရငွေများဖြင့် ဝန်ထမ်းတွေ ထပ်ခေါ်ရသည်။ ပျားထိန်းသိမ်းစောင့်ရှောက်သူများကို မွေးရသည်။ ထိုမှတစ်ဆင့်တက်ပြီး မြောက် ကာရိုလိုင်းနားတွင် ပျားအုံ ၁၂၀ ကို ရောင်းချလာခဲ့ရသည်။ သုံးနှစ်အတွင်း သူ၏ ပျားမွေးမြူရေးနှင့် ပျားမွေးရန် စည်းရုံးရေးလုပ်ငန်းများကို အောင်မြင်စွာ ဆောင် ရွက်နိုင်ခဲ့သည်။ ၂၀၁၇ ခုနှစ်တွင် သူ့ထံ၌ ဝန်ထမ်းလေးဦးရှိလာပြီး ရင်းနှီးမြှုပ်နှံငွေကလည်း ဒေါ်လာ ၃၅၀၀၀၀ အထိ တိုးတက်လာခဲ့သည်။ ယခု ၂၀၁၈ ခုနှစ်တွင် ဘွန်းနား၏ ရင်းနှီးမြှုပ်နှံငွေမှာ ဒေါ်လာ ၁ သန်းခန့်ဖြစ်လာပြီ။

ဘွန်းနားက ပျားအုံတွေထုတ်လုပ်သည်။ လူတိုင်း အိမ်တိုင်း ပျားမွေးရန် တိုက်တွန်းသည်။ ပျားကောင်ရေများလာရေးကို ဦးတည်ပြီး လုပ်ဆောင်နေခြင်းဖြစ်သည်။ သူ့လုပ်ငန်းက အလျင်အမြန်ဖွံ့ဖြိုးတိုးတက်လာနိုင်သည့်လုပ်ငန်းတစ်ခု မဖြစ်နိုင်ကြောင်း သူကောင်းစွာ သိပြီးဖြစ်သည်။ 

“ကျွန်မတို့လုပ်ငန်းက ဆော့ဖ်ဝဲထုတ်နေသလိုမျိုး မဟုတ်ဘူး။ ချက်ချင်းကြီး အောင်မြင်သွားဖို့ဆိုတာ မဖြစ်နိုင်ဘူး။ ဒါကြောင့် စည်းရုံးရင်းတစ်ဆင့်ပြီး တစ်ဆင့်တက်သွားရမှာ။ အများကြီး ကြိုးပမ်းလုပ်ဆောင်ဖို့ လိုသေးတယ်”ဟု သူကဆိုသည်။ 

ဘွန်းနားသည် မကြာမီက Engage Venture Fund ဆိုကာ ရန်ပုံငွေအဖွဲ့တစ်ဖွဲ့ကို ထူထောင်လိုက်သည်။ အတ္တလန္တာအတွက် ပျားမွေးမြူရန် သူ ဆောင်ရွက်ခြင်းဖြစ်သည်။ Bee Downtown တွင်လည်း ပျားအုံတွေကို တိုးချဲ့ထုတ်လုပ်ရဦးမည်။ ထို့ကြောင့် ပျားမွေးချင်လာအောင်လည်း စည်းရုံး၊ ဟောပြောပွဲ တွေ့ဆုံပွဲတွေလုပ်၊ ပညာပေးဟောပြောမှုတွေလည်းလုပ်ပြီး ပျားမျိုးစိတ်များ ပြန်လည်ထွန်းကားလာရေးကို သူလုပ်ဆောင်နေသည်။

ပျားကောင်လေးတွေက သေးသေးလေးတွေ ဖြစ်သည်။ သူတို့က လူတွေက ကြောက်စရာ အန္တရာယ်ပေးမည်ဟုသာ ရှုမြင်ကြသည်။ သို့သော် သူတို့၏ လူသားတို့အပေါ် အကျိုးပြုပုံကို သိမြင်သူနည်းသည်။ ဘွန်းနားသည် ၂၅ နှစ်သာရှိသေးသော်လည်း လူစိတ်မဝင်စားသည့်အလုပ်ကို စိတ်ဝင်စားအောင်လုပ်သည်။ သဘာဝပတ်ဝန်းကျင်နှင့် ပျားမျိုးစိတ်များ မပျက်သုဉ်းစေရန် သူ့ဘဝကိုမြှုပ်နှံလုပ်ကိုင်နေသူတစ်ဦးဖြစ်ပြီး စွန့်ဦးတီထွင် လုပ်ငန်းရှင်ကြီးတစ်ဦးဖြစ်စေရန် ကြိုးပမ်းဆောင်ရွက်နေပုံများမှာ အားကျစရာ ကောင်းလှသည်။ 

E-01

(Ref: Bee Downtown)

  • TAGS