News

POST TAGGED AS

မွတ်ဆလင်

ရခိုင်ပြည်နယ်ရှိ မွတ်ဆလင်များနှင့် ပတ်သက်၍ လုံခြုံရေးကောင်စီ စွပ်စွဲချက် မြန်မာအစိုးရ ပယ်ချ
ရန်ကုန်၊ ဧပြီ ၁၈

ရခိုင်ပြည်နယ်ရှိ မွတ်ဆလင်များကို နေရပ်စွန့်ခွာသွားစေရန် လိင်အကြမ်းဖက်သည့် နည်းဗျူဟာကို အသုံးပြုနေသည်ဆိုသော စွပ်စွဲချက်ကို မြန်မာအစိုးရ ကိုယ်စားလှယ်က ကုလသမဂ္ဂလုံခြုံရေး ကောင်စီအစည်းအဝေးတွင် ပြင်းထန်စွာပယ်ချခဲ့ကြောင်း နိုင်ငံခြားရေးဝန်ကြီးဌာနက ထုတ်ပြန်သည်။

ကုလသမဂ္ဂလုံခြုံရေးကောင်စီ၏ အမျိုးသမီးများ ငြိမ်းချမ်းရေးနှင့်လုံခြုံရေး ကိစ္စနှင့်စပ်လျဉ်းသည့် တံခါးဖွင့်ဆွေးနွေးပွဲတွင် နယူးယောက်မြို့ မြန်မာအမြဲတမ်း ကိုယ်စားလှယ်သံအမတ်ကြီး ဦးဟောက်ဒိုဆွမ်း တက်ရောက်ကာ အမျိုးသမီးများ အကြမ်းဖက်မှု ကာကွယ်တားဆီးရေးနှင့် အရေးယူ ဆောင်ရွက်နေမှုများနှင့်စပ်လျဉ်း၍ မြန်မာနိုင်ငံ၏ ဆောင်ရွက်ချက်များကို ရှင်းလင်းပြောကြားရာတွင် ထည့်သွင်းပြောဆိုခဲ့ခြင်းဖြစ်ကြောင်း နိုင်ငံခြားရေးဝန်ကြီးဌာနက ဧပြီလ ၁၈ ရက်က ထုတ်ပြန်ခဲ့သည်။

မူဆလင်များအား ၎င်းတို့နေအိမ်များမှ စွန့်ခွာထွက်ပြေးစေရန် လိင်အကြမ်းဖက်မှုကို နည်းဗျူဟာတစ်ရပ်အဖြစ် အသုံးပြုခဲ့သည်ဟူသော အခြေအမြစ်မရှိသည့် စွပ်စွဲချက်များကို မြန်မာ ကိုယ်စားလှယ်အဖွဲ့အနေနှင့် ပြတ်သားစွာပယ်ချခဲ့ပြီး လိင်အကြမ်းဖက်မှုများကို မြန်မာယဉ်ကျေးမှုက လက်ခံထားခြင်းမရှိဘဲ ထိရောက်သည့် အရေးယူဆောင်ရွက်မှုများကို ပြုလုပ်နေသည်ဟု မြန်မာကိုယ်စားလှယ်အဖွဲ့က ရှင်းလင်းခဲ့သည်။

ထို့ပြင် ရခိုင်ပြည်နယ်အခြေအနေနှင့်ပတ်သက်၍ “မျိုးနွယ်စုများအား သုတ်သင်ရှင်းလင်းခြင်း” သို့မဟုတ် “လူမျိုးသုဉ်းသတ်ဖြတ်ခြင်း” စသည့် အသုံးအနှုန်းများ သုံးစွဲမှုကို မြန်မာနိုင်ငံအနေနှင့် ပြင်းထန်စွာ ကန့်ကွက်ပါကြောင်း၊ အထောက်အထား မခိုင်လုံသော တစ်ဖက်သတ်စွပ်စွဲမှုများ၊ သတင်းမှားများ၊ နိုင်ငံရေးအရဆွပေးရန် ရည်ရွယ်သည့် အစီရင်ခံစာများပေါ်တွင် အခြေခံသည့် ယင်းသို့ တာဝန်မဲ့သော စွပ်စွဲချက်များသည် လက်ရှိအခြေအနေကို ပိုမိုဆိုးရွားစေပြီး၊ ဒေသတွင်းရှိ လူမှုအသိုက်အဝန်းများကို ပိုမိုဝေးကွာစေမည်ဟု ပြောကြားခဲ့ကြောင်း အစိုးရ၏ ထုတ်ပြန်ချက်တွင် ဖော်ပြထားသည်။

လက်ရှိတွင် မြန်မာအစိုးရသည် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန ပြည်ထောင်စုဝန်ကြီး ဒေါက်တာဝင်းမြတ်အေး ဦးဆောင်၍ နေရပ်စွန့်ခွာ မွတ်ဆလင် ဒုက္ခသည်များကို ပြန်လည်နေရာချထားရေး စီမံကိန်းများကို လုပ်ဆောင်လျက်ရှိနေပြီး ဘင်္ဂလားဒေ့ရ်ှအစိုးရနှင့် တွေ့ဆုံညှိနှိုင်းမှုများ ပြုလုပ်နေသည်။

J-08



FOLLOW US