News

POST TAGGED AS

ဗီယက်နမ်

ဗီယက်နမ် အသက်မွေးပညာသင်ကျောင်း


ဗီယက်နမ်နိုင်ငံအစိုးရသည် ၂၀၁၈ ခုနှစ်အတွင်း အသက်မွေးဝမ်းကျောင်း ပညာရေးကို တစ်နိုင်ငံလုံးတွင် ပြည်သူ ၂ ဒသမ ၂ သန်းအား သင်တန်းများပေးရန် စီစဉ်လျက်ရှိသည်။ လူသားရင်းမြစ်များ ဖွံ့ဖြိုးတိုးတက်လာရေးအတွက် အလုပ်သမားဝန်ကြီးဌာနက ဦးဆောင်ပြီး လုပ်ဆောင်နေခြင်းလည်း ဖြစ်ပါသည်။ 

ဗီယက်နမ်နိုင်ငံတွင် လွန်ခဲ့သော နှစ်များကတည်းက အသက်မွေးဝမ်းကျောင်း ပညာသင်တန်းများကို စတင်ခဲ့သည်။ ထိုသင်တန်းဆင်း ၇၀ ရာခိုင်နှုန်းခန့်ကို အလုပ်များပေးနိုင်ခဲ့ကြောင်း အလုပ်သမားဝန်ကြီးဌာနက ထုတ်ပြန်ခဲ့သည်။ ထိုသင်တန်းဆင်းများမှာလည်း ဗီယက်နမ်ဒေါင် ၁၀ သန်း (အမေရိကန်ဒေါ်လာ ၃၁၀ မှ ၄၀၀ ကြား) လစားအဖြစ် ရရှိခံစားနေကြရပြီဖြစ်သည်။ 

လက်ရှိပညာရေးစနစ်တွင် ဘွဲ့ရသည်အထိ ကျောင်းဆက်တက်ရန် ဦးစားပေးနေကြခြင်းထက် အသက်မွေးဝမ်းကျောင်း ပညာရပ်သင်ကျောင်းများကို တက်ရောက်ပြီး လက်တွေ့ အကျိုးပြုကျွမ်းကျင်မှုများကို ရယူကြရန် အစိုးရကလည်း ပြည်သူများကို ပညာပေးလှုံ့ဆော်မှုများ ပြုလုပ်နေရသည်။ အသက်မွေးပညာ သင်ကျောင်းဆင်းများက လက်တွေ့လုပ်ငန်းခွင်များတွင် မည်မျှအထိ အကျိုးသက်ရောက်မှုများ ရှိနေသည်ကို သက်သေပြနိုင်ရန် ကြိုးစားနေသည်။

ဟိုင်ဘန်ထရန်ဒေသမှ ငုယင်ငေါ်လင်းသည် တက္ကသိုလ်မှ အင်္ဂလိပ်စာဖြင့် ဘွဲ့ရခဲ့သူဖြစ်သည်။ သို့သော်သူသည် အသက်မွေးပညာသင်ကျောင်းကို ခြောက်လပြန်တက်နေသည်။ 

“ကျွန်မကတော့ အလုပ်အကိုင်ရဖို့အတွက် အသက်မွေးပညာသင်ကျောင်းတွေကို ထပ်တက်သင့်တယ်လို့ ထင်ပါတယ်။ ခုဆိုရင် ကျွန်မ ဟိုတယ်စီမံခန့်ခွဲရေး ပညာရပ်တွေကို ထပ်တက်နေတယ်။ ပိုပြီးတော့ ကျွမ်းကျင်သွားအောင်ဆိုပါတော့။ ကျွန်မအတွက်တော့ ဒီသင်တန်းပြီးရင် အလုပ်ကို လွယ်လွယ်ရမယ် ထင်ပါတယ်”ဟု ငေါ်လင်းက ဆိုသည်။

သို့သော် အသက်မွေးပညာ သင်ကျောင်းတွေကလည်း ဗီယက်နမ်တွင် အားနည်းချက်များစွာ ရှိနေသေးသည်။ အချို့ကျောင်းများမှာ သင်သာသင်နေသည် အရည်အသွေးပြည့်မီစွာ သင်ကြားနိုင်သည့် ကျောင်းများဟု မဆိုနိုင်သေးပေ။ ဗီယက်နမ်စီးပွားရေး ပြန်လည်ပြုပြင် ပြောင်းလဲနေမှုနှင့် အံဝင်ခွင်ကျဖြစ်၊ မဖြစ် ဆိုသည်ကလည်း သံသယရှိစရာဖြစ်သည်။ ဗီယက်နမ် အသက်မွေးပညာ သင်ကျောင်းများတွင် အင်္ဂလိပ်လို ကောင်းစွာသင်ကြားနိုင်ခြင်း မရှိသေး။ နိုင်ငံကို ခေတ်မီစေရန် ပြုပြင်ပြောင်းလဲနေချိန်တွင် ကမ္ဘာ့အဆင့်ဖြင့် ပညာမပေးနိုင်သေးခြင်းကလည်း လုပ်ငန်းခွင်အရောက်တွင် အခက်အခဲများကို ရင်ဆိုင်ရပါလိမ့်မည်။

အလုပ်သမားဝန်ကြီး ဒေါင်ငေါ့ဒန်ကလည်း အသက်မွေးပညာ သင်ကျောင်းများတွင် သင်ပေးနေသည့် ပညာရပ်များမှာ အရည်အသွေးအားဖြင့် အားနည်းနေသေးကြောင်း ဝန်ခံထားသည်။ လက်ရှိ ဈေးကွက်စီးပွားရေးစနစ်နှင့် အံဝင်မည့် ပညာရပ်များ မဖြစ်သေးကြောင်းလည်း ပြောကြားသည်။

ခေတ်သစ် အသက်မွေးပညာသင်ကျောင်းများသည် လူသားရင်းမြစ်၏ အရည်အသွေးများကို ခေတ်စနစ်နှင့်လျော်ညီအောင် သင်ကြားပေးနိုင်ရမည်ဖြစ်သည်။ ခေတ်စနစ်က စတုတ္ထ စက်မှုခေတ်ပြောင်း တော်လှန်ရေးဆိုသည့် ကွန်ပျူတာနှင့်ဉာဏ်ရည်တု (AI) လမ်းကြောင်းကို သွားနေသည်။ ထို့ကြောင့် ဇာထိုး ပန်းထိုးထက် ခေတ်က ဘာကို လိုအပ်နေသနည်းဆိုသည့် လက်နက်ကောင်းကို တပ်ဆင်ပေးမှသာ အကျိုးရှိနိုင်ပါသည်။ ဈေးကွက်၏တောင်းဆိုချက်နှင့် လိုအပ်ချက်ကို မဖြည့်ဆည်းပေးနိုင်သည့် ပညာပေးမှုသည် ပေးကားပေး၏ မရ ပညာရေးသာဖြစ်ပေလိမ့်မည်။ 

နည်းပညာခေတ် ဖြစ်လာသောကြောင့် ကွန်ပျူတာနှင့်ဆော့ဖ်ဝဲများကို သင်တန်းပေးရန် လိုအပ်သည်။ လာမည့်မေလကစတင်ပြီး ဝန်ကြီးဌာနကလည်း မိုဘိုင်းလ်ဖုန်းများထုတ်ပေးပြီး ဖုန်းဖြင့် ပရိုဂရမ်ကို လေ့ကျင့်ပေးနိုင်ရန် စီစဉ်နေသည်။ ရှေ့ပြေးအစီအစဉ်အနေနှင့် အသက်မွေးပညာသင်ကျောင်းများတွင် ကွန်ပျူတာပရိုဂရမ်မင်း ဘာသာရပ်များကို သင်ကြားရန်လိုနေသည်။ 

အစိုးရက မည်မျှ ရင်းနှီးမြှုပ်နှံမည်နည်းဆိုသည့် အပေါ်တွင် တည်သည်။ ဗီယက်နမ်နိုင်ငံသည် လက်ရှိအနေအထားတွင် ဗြိတိန်နိုင်ငံနှင့်ပူးပေါင်းပြီး သင်တန်းများပေးနိုင်ရန် စီစဉ်နေသည်။ စတုတ္ထ စက်မှုခေတ်ပြောင်း တော်လှန်ရေးကို အထောက်အကူပြုစေနိုင်မည့် သင်တန်းများဖြစ်သည်ဟု အလုပ်သမားဝန်ကြီးက ဆိုသည်။

ပညာရေးစနစ်ကို ပြုပြင်ပြောင်းလဲမှသာ ခေတ်စနစ်နှင့်လည်းကောင်း၊ ဈေးကွက်စီးပွားနှင့်လည်းကောင်း အဆင်ပြေလိမ့်မည်။ လက်ရှိ ပညာရေးစနစ်ကလည်း ဗီယက်နမ်နိုင်ငံဘွဲ့ရများကို နိုင်ငံခြားကုမ္ပဏီများက အထင်ကြီးပြီး ခေါ်ခန့်နိုင်သည့် အနေအထားမရောက်သေး။ အသက်မွေးပညာသင် ကျောင်းများဖြင့် ကုစားရန် နည်းလမ်းတစ်လမ်းသာ ရှိသော်လည်း၊ ထိုကျောင်းများက အားရကျေနပ်စရာ ကောင်းလောက်အောင် မစွမ်းဆောင်နိုင်သေးပေ။ 

လက်ရှိ ဗီယက်နမ်နိုင်ငံတွင် အသက်မွေးပညာသင် ကျောင်းပေါင်း ၁၉၀၀ ကျော်ရှိသည်။ ယင်းတို့ အထဲတွင် ကောလိပ်ပေါင်း ၃၉၅ ကျောင်းနှင့် အသက်မွေးပညာသင် ကျောင်း ၅၄၅ ကျောင်းပါသည်။ အသက်မွေးပညာ သင်ကျောင်းများတွင် ပရိုဂရမ်တွေ တိုးချဲ့သင်ရန် လိုနေပါသေးသည်။ ခရီးသွားဧည့်ကြို လုပ်ငန်း၊ အလှပြင်လုပ်ငန်း၊ အိုင်တီလုပ်ငန်း၊ ဆောက်လုပ်ရေးလုပ်ငန်း၊ ဖက်ရှင်ဒီဇိုင်း၊ အထည်ချုပ်လုပ်ငန်း၊ ဆေးဝါးကျွမ်းကျင်၊ စက်ပြင်၊ ဟိုတယ်စီမံခန့်ခွဲရေး စသည့် ခေတ်နှင့်လျော်ညီသော သင်တန်းများကို အရည်အသွေးပြည့်မီအောင် ဖွင့်လှစ်သင်ကြားပေးဖြင့်သာ စတုတ္ထ ခေတ်ပြောင်းတော်လှန်ရေးကို အမြန်ဆုံး ပါဝင်ဆင်နွှဲနိုင်မည်ဖြစ်သည်။

E-01
(Ref: Vietnam News)




FOLLOW US