POST TAGGED AS

တနင်္သာရီ

22-Aug-2018

ကလေး အာဟာရ
အမျိုးသမီးထုအကြား သွေးအားနည်းရောဂါနှင့် ကလေးအာဟာရချို့တဲ့ရောဂါများနေတဲ့နိုင်ငံ


မြန်မာနိုင်ငံဟာ သဘာဝသယံဇာတ ပေါကြွယ်ဝပြီး တောတောင်စိမ့်စမ်းရေဝေနေတဲ့ဒေသ၊ အင်းအိုင် ချောင်းမြောင်းနဲ့ စားပင်၊ သောက်ပင်တွေ အလေ့ကျ ပေါက်ရောက်နိုင်တဲ့နိုင်ငံဖြစ်လို့ “ဘုရားပေးတဲ့မြေ” လို့ ဂုဏ်ယူရတဲ့အထိ ဖြစ်ခဲ့တယ်။ တစ်ချိန်က “ထမင်းငတ်ပြီး သေတဲ့မသာ၊ မြန်မာနိုင်ငံမှာမရှိ” လို့ ဂုဏ်ယူခဲ့ကြပေမယ့် အာဏာရှင်စနစ်နဲ့ နှစ်ပေါင်း ၅၀ ကြား အုပ်ချုပ်ခဲ့ပြီးတဲ့နောက် ယနေ့မှာ ဒေသတွင်းနှင့် အာဆီယံမှာ အချမ်းသာဆုံးမှ အဆင်းရဲဆုံး၊ ကြွေးအထူဆုံး ဖြစ်တဲ့အပြင် ထမင်းနပ်မမှန်လို့ အာဟာရချို့တဲ့မှုတွေ များလာတယ်။ မြန်မာနိုင်ငံမှာ အာဟာရချို့တဲ့မှု လေ့လာတဲ့အခါ ကလေးငါးဦးမှာ တစ်ဦးချို့တဲ့နေပြီး နွမ်းပါးတဲ့မိသားစုဝင်တွေ ဖြစ်ကြတယ်ဆိုတယ်။ ၂၀၁၃ ခုနှစ် အသက်မွေးဝမ်းကျောင်းနဲ့ စားနပ်ရိက္ခာ လူမှုဖူလုံရေးရန်ပုံငွေအဖွဲ့ (LIFT) စစ်တမ်းအရ ကလေး ၂ ဦးမှာ ၁ ဦး အာဟာရချို့တဲ့လို့ ပုညှက်ခြင်း ဖြစ်နေကြတယ်ဆိုတယ်။

အာဟာရချို့တဲ့ခြင်း မိခင်အာဟာရအခြေအနေ၊ ကလေးအာဟာရအခြေအနေ၊ အစားအစာသုံးစွဲမှုပုံစံ၊ တစ်ကိုယ်ရေသန့်ရှင်းမှုနဲ့ပတ်သက်တဲ့ အခြေအနေကိုလည်း သုတေသနလုပ်ဖို့ လိုအပ်နေတုန်းပဲ။ ဆင်းရဲမွဲတေမှုက အာဟာရချို့တဲ့မှုအတွက် အဓိကကျတယ်လို့ ကမ္ဘာ့ဘဏ် (World Bank) ရဲ့စစ်တမ်းအရ ဆိုသလို မြန်မာနိုင်ငံရဲ့ ဆင်းရဲမွဲတေမှုတွေဟာ လွန်ခဲ့တဲ့ ၁၀ စုနှစ်တွေထက် ပိုမိုမြင့်မားနေတာတွေ့ရတယ်”လို့ လန်း (Learn) အဖွဲ့ အာဟာရနဲ့ ပြည်သူ့ကျန်းမာရေးအတိုင်ပင်ခံ မစ္စဂျီနီဗာကာရှင်း  (Mis.Jenifer Cashin) က ၂၀၁၆ ခုနှစ် မေလ ၁ ရက်ကဆိုတယ်။ လက်ရှိ မြန်မာနိုင်ငံမှာ အာဟာရနဲ့ပတ်သက်ပြီး အဓိကဆောင်ရွက်ရမယ့် အရေးကြီးရောဂါမှာ သံဓာတ်ချို့တဲ့ခြင်းနဲ့ သွေးအားနည်းရောဂါတို့ဖြစ်ကြောင်း ဆိုတယ်။

“လမ်းလျှောက်ခြင်းက သံဓာတ်ချို့တဲ့မှုကြောင့် ဖြစ်ပေါ်လာတဲ့ သွေးအားနည်းရောဂါကို ကြိုတင်ကာကွယ်မှာဖြစ်လို့ တစ်နိုင်ငံလုံးအတိုင်းအတာနဲ့ အမျိုးသမီးတွေ သွေးအားနည်းရောဂါနဲ့ပတ်သက်ပြီး ကျန်းမာရေးဗဟုသုတရရှိစေဖို့ ရည်ရွယ်ကာ၊ လမ်းလျှောက်ပွဲကျင်းပခြင်းဖြစ်တယ်။ ၂၀၁၈ ဖေဖော်ဝါရီလ ၁၈ ရက်နေ့ နံနက် ၅ နာရီ ရန်ကုန်မြို့ သုဝဏ္ဏအာကစားရုံ (၁) ရှေ့မှာကျင်းပတဲ့ အမျိုးသမီးထုလမ်းလျှောက်ပွဲကြီးကို မြန်မာနိုင်ငံအနေနဲ့ ၅ ကြိမ်မြောက်ကျင်းပခြင်းဖြစ်ကာ၊ ယခုနှစ်မှာ ပါဝင်သူပိုများပြားလာဖို့ မျှော်လင့်ထားကြောင်း (Ferrovit-walking 2018) ဦးဆောင်သူ (Frrovit) တာဝန်ရှိသူတစ်ဦးက ဆိုတယ်။

အာဟာရပြည့်ဝပြီး ကြီးပြင်းလာတဲ့အခါ ပိုမို ပျော်ရွှင်ကျန်းမာတဲ့ မိသားစုတည်ဆောက်နိုင်တယ်။ အာဟာရပြည့်ဝခြင်းဟာ လူသားအရင်းအမြစ်အတွက် အခြေခံအုတ်မြစ်တစ်ခုဖြစ်ပြီး၊ စီးပွားရေး ဖွံ့ဖြိုးတိုးတက်မှုအတွက် သိသိသာသာ အထောက်အကူပြုနိုင်တဲ့ အချက်ပဲဖြစ်တယ်။ စားနပ်ရိက္ခာ ဖူလုံ ရေးရန်ပုံငွေအဖွဲ့ LIFT ရဲ့ စစ်တမ်းအရ မြန်မာနိုင်ငံမှာ ဆယ်စုနှစ်တစ်စုကြား အာဟာရချို့တဲ့ကလေးတွေ လေ့လာရာမှာ နွမ်းပါးတဲ့မိသားစုကဖြစ်ပြီး၊ မြန်မာနိုင်ငံရဲ့ လူဦးရေတစ်ဝက်မှာ နွမ်းပါးတဲ့လူဦးရေဖြစ်နေတာ တွေ့ရတယ်။ ကလေး ၂ ဦးမှာ ၁ ဦး အာဟာရချို့တဲ့နေကြောင်း ၂၀၁၃ ခုနှစ် အသက်မွေးဝမ်းကျောင်းနဲ့ စားနပ်ရိက္ခာ ဖူလုံရေးရန်ပုံငွေ စစ်တမ်းကဆိုတယ်။

မြန်မာနိုင်ငံမှာ သံဓာတ်ချို့တဲ့ပြီး သွေးအားနည်းရောဂါဟာ အမျိုးသမီးများနဲ့ ကလေးတွေမှာ အဖြစ်များနေပြီး ရာခိုင်နှုန်း ၃၀၊ ၄၅ အထိရှိကြောင်း သိရကာ အထူးသဖြင့် ကလေးမွေးဖွားနိုင်တဲ့အရွယ် ရောက်မိန်းကလေးနဲ့ ကိုယ်ဝန်ဆောင်မိခင်တို့မှာ အဖြစ်များကြောင်း သိရတယ်။ “အမျိုးသမီးထုအတွင်းမှာ သံဓာတ်ချို့တဲ့ သွေးအားနည်းရောဂါက နှုတ်ခမ်းလေး ဖြူဖပ်ဖြူရော်နဲ့ မသိရင် မသိသလိုဖြစ်နေတတ်တယ်။ အမျိုးသမီးထုတစ်ခုလုံးကို သံဓာတ်ချို့တဲ့ခြင်းကြောင့် သွေးအားနည်းရောဂါ ဖြစ်တတ်တာနဲ့ပတ်သက်ပြီး အသိပညာပေးဖို့အတွက် လှုပ်ရှားမှုတစ်ခုအနေနဲ့ အမျိုးသမီးလမ်းလျှောက်ပွဲကို ကျင်းပတာပါ။ တကယ်တော့ တစ်ရက်ကို အနည်းဆုံး မိနစ် ၃၀ လမ်းလျှောက်ရမယ်လို့ ကျန်းမာရေးက ထုတ်ပြန်ထားတယ်။ ဒီပွဲမှာဆို ၄ ဒသမ၈ ကီလိုမီတာနဲ့ ၅ ကီလိုမီတာ လျှောက်ရမှာဆိုတော့ ၂၅ မိနစ်ဝန်းကျင်လောက်လျှောက်ရမှာပါ။ အမျိုးသမီးထု အများစုက အိမ်ထောင်ကျပြီဆိုရင် အိမ်တွင်းအောင်းတွေ များကြတယ်။ ဒီစုပေါင်းလမ်း လျှောက်ပွဲလေး ကျင်းပခြင်းက အမျိုးသမီးတွေ သံဓာတ်ချို့တဲ့လို့ သွေးအားနည်းရောဂါဖြစ်တာကို အသိပညာပေးမှုအနေနဲ့ ထိရောက်မယ်လို့ မျှော်လင့်ပါတယ်လို့ ဒေါက်တာသင်းနိုင်ဦးက ရှင်းပြခဲ့ပါတယ်။ ရန်ကုန်မြို့ သုဝဏ္ဏကွင်းမှ စတင်တာထွက်ပြီး မေတ္တာလမ်းကိုဖြတ်၊ သစ္စာလမ်းမှ ဂငယ်ကွေ့ပြီး လာလမ်းအတိုင်း ပြန်လျှောက်ရမှာဖြစ်ကာ ယာဉ်လမ်းကြောင်းတစ်ဖက် ပိတ်ထားခဲ့တယ်လို့ သိရပါတယ်။

မြန်မာနိုင်ငံ ကျန်းမာရေးနှင့် အားကစားဝန်ကြီး ဌာနကလည်း ၂၀၁၆ ခုနှစ်က အစားအစာသုံးစွဲမှုပုံစံနှင့် ပတ်သက်ပြီး စစ်တမ်းများကောက်ယူဖို့ရှိရာ ပြည် နယ်နဲ့တိုင်းဒေသကြီးတွေအလိုက် အစားအစာသုံးစွဲမှု ပုံစံနဲ့ပတ်သက်ပြီး အသက်အရွယ်အလိုက် အာဟာရရရှိမှုအခြေအနေ၊ ဗီတာမင်အေ၊ ဗီတာမင်ဘီဝမ်း၊ ပရိုတိန်းဓာတ်၊ အိုင်အိုဒင်းနဲ့သံဓာတ်ရရှိမှု အခြေအနေများ ထည့်သွင်းကောက်ယူခဲ့ရာ သွေးအားနည်းရောဂါ အများအပြားတွေ့ခဲ့ရတယ်။

၂၀၁၅ ခုနှစ်ကလည်း မြန်မာနိုင်ငံ အစာအာဟာရဆိုင်ရာ တစ်ဦးတည်းကိုယ်စားလှယ် ဒေါက်တာဝင်းဝင်းမြင့် (ဝိတိုရိယဆေးရုံ) က အာဟာရ မပြည့်ဝမှုကြောင့် ကိုယ်ဝန်ဆောင်မိခင် တစ်သိန်းကျော် နှစ်စဉ်သေဆုံးနေကြောင်း၊ မစားမသောက်ရလို့ နှစ်စဉ် ကလေး ၂ ဒသမ ၆ သန်း သေဆုံးရကြောင်း ဆိုတယ်။ 

“ပြည်သူ့ကျန်းမာရေးဦးစီးဌာနကလည်း ကျေးလက်ထိသွားရောက်ကာ ကျန်းမာရေးအသိပညာပေးခြင်း၊ မိခင်နှင့် ကလေးကျန်းမာရေး သားသည်မိခင်တွေအတွက် အာဟာရပြည့်ဝအောင် စားသောက်နိုင်ရေးအတွက် ဟောပြောပွဲတွေ၊ လက်တွေ့ ချက်ပြုတ်ကျွေးမွေးခြင်းတွေ လိုအပ်နေပါတယ်” လို့ ဆိုတယ်။

၂၀၁၄ သန်းခေါင်စာရင်းအရ မြန်မာနိုင်ငံသားတစ်ဦး မျှော်မှန်းသက်တမ်းအသက် ၆၆ ဒသမ ၆၈ နှစ်သာ နေထိုင်နိုင်ပြီး အာဆီယံမှာ သက်တမ်းတိုတဲ့ အုပ်စုထဲပါဝင်နေတာ ဂျပန်အမျိုးသမီး ပျမ်းမျှသက်တမ်း ၈၆ နှစ်၊ ဟောင်ကောင်သားတစ်ဦး ပျမ်းမျှ သက်တမ်း ၈၃ နှစ်ထက် အလွန်နည်းပါးနေတာတွေ့ရပါတယ်။

၂၀၁၄ ခုနှစ်သန်းခေါင်စာရင်းအရ မြန်မာနိုင်ငံရဲ့ တစ်နှစ်အောက် ကလေးသေဆုံးနှုန်းဟာ အရှင်မွေးကလေး ၁၀၀၀ မှာ ၆၂ ဦး သို့မဟုတ် ၆ ဒသမ ၂ ရာခိုင်နှုန်းရှိတယ်။ ငါးနှစ်အောက်ကလေး သေဆုံးနှုန်းဟာ အရှင်မွေးကလေး ၁၀၀၀ မှာ ၇၂ ဦး သို့ မဟုတ် ၇ ဒသမ ၂ ရာခိုင်နှုန်းရှိရာ ထိုင်းနိုင်ငံရဲ့ ငါးနှစ်အောက်ကလေးသေဆုံးနှုန်း ၃ ဒသမ ၆ ရာခိုင်နှုန်းနဲ့ နှိုင်းယှဉ်ကြည့်နိုင်ပါတယ်။ မိခင်အတန်း တစ်တန်းပိုတတ်ရင် ကလေးအသက် ၁၀ နှစ် ပိုမိုအသက်ရှည်နိုင်တယ်ဆိုထားရာ၊ မိခင်များ၊ မြန်မာအမျိုးသမီးငယ်များ ပညာသင်ယူဖို့လိုနေပါတယ်။

မြန်မာနိုင်ငံမှာ အလုပ်အကိုင်၊ အခွင့်အလမ်း သစ်ရှားပါးလို့ နိုင်ငံခြားသွားရောက်ကာ ရွှေ့ပြောင်း လုပ်သားဘဝခံယူကြတယ်။ ၂၀၁၄ သန်းခေါင် စာရင်းအရ ရွှေ့ပြောင်းလုပ်သား ၂ ဒသမ ၁ သန်း ရှိရာ ထိုင်း ၇၀ ရာခိုင်နှုန်း၊ မလေးရှား ၁၅ ရာခိုင်နှုန်းနဲ့ အများဆုံးသွားရောက်လုပ်ကိုင်နေကြတယ်။ ရွှေ့ပြောင်းတွေက မွေးလာတဲ့ကလေးတွေ နိုင်ငံမဲ့ ဖြစ်သွားတယ်။ အချို့ ထိုင်းနိုင်ငံသား ခံယူခွင့်ရပြီး မြန်မာနိုင်ငံကို မပြန်လိုကြတော့ဘူး။ တောက ရန်ကုန်လာတဲ့သူ၊ ကြာတော့ တောမပြန်လိုသလို၊ ထိုင်းနိုင်ငံ သား ခံယူလာတာမဆန်းပါဘူး။ တကယ်တမ်း မြန်မာနိုင်ငံမှာတော့ အလုပ်အကိုင်သစ်၊ အခွင့်အလမ်း သစ်မရနိုင်လို့ နိုင်ငံခြားထွက်လာကြတယ်။ ရွှေ့ပြောင်းတွေဟာ သူ့လူမျိုးတွေ မလုပ်လိုတဲ့ အလွန်ပင်ပန်းတဲ့အလုပ်၊ ညစ်ပတ်ပေရေတဲ့အလုပ်၊ အသက်အန္တရာယ်နီးတဲ့အလုပ် လုပ်ရပြီး၊ သူ့လူမျိုးထက် အခကြေးငွေနည်းပါးရတဲ့တိုင် မြန်မာနိုင်ငံ တစ်နေ့ ၈ နာရီ အနည်းဆုံးလုပ်ခ ကျပ် ၄၈၀၀ ထက် ၄-၁၀ အထိ သာလွန်နေလို့ ယနေ့တိုင် သွားရောက်လုပ် ကိုင်နေကြဆဲ ဖြစ်တယ်။ ရွှေ့ပြောင်းလုပ်သားတွေ စုဆောင်းတဲ့ငွေတွေ၊ မိသားစုတွေထံ ပြန်ပို့နေလို့၊ မိသားစုအချို့ စားဝတ်နေရင်းပြေလည်နေလို့ နိုင်ငံအတွက် အကျိုးရှိလှတဲ့ စီးပွားရေးပဲ ဖြစ်တယ်။ 

“ရွှေ့ပြောင်း” တွေရဲ့ “ဟွန်ဒီ” ငွေလွှဲစနစ်အစား “အခမဲ့ ငွေလွှဲပြောင်းစနစ်” အစိုးရက လုပ်ပေးနိုင်ရင် နိုင်ငံခြားငွေ အသားတင်ရနိုင်မယ့် လုပ်ငန်းဖြစ်တယ်။ သက်ဆိုင်ရာ မြန်မာသံရုံးတွေက ကူညီပေးသင့်ပါတယ်။

မြန်မာနိုင်ငံအမျိုးသမီးထုအကြား သွေးအားနည်းရောဂါဟာ ရာခိုင်နှုန်း ၃၀၊ ၄၅ ထိ ဖြစ်နေတာ လမ်းလျှောက်ပွဲတစ်ရက် လုပ်ရုံနဲ့ သံဓာတ်မပြည့်ဝသွားပါဘူး။ ပေးလိုတဲ့ ကျန်းမာရေးအသိက သွေးအားနည်းတာ ကုစားဖို့ ဘာတွေစားသုံးရမယ်၊ ဘယ်လို ကျင့်ကြံနေထိုင်ရတယ်။ သံဓာတ်ကြွယ်ဝတဲ့ အစားအစာက ဘာဆိုတာ ပညာပေးသင့်ပါတယ်။ လမ်းလျှောက်ပွဲမှာ ပါဝင်သူ အမျိုးသမီးတိုင်းကို ဆရာဝန်နဲ့ ရန်ကုန်ပြည်သူ့ဆေးရုံမှ သူနာပြု ၂၀ က ဆေးစစ်မှုတွေ ပြုလုပ်ပေးကာ အသက်ကြီးဆုံးနဲ့ အငယ်ဆုံးကို ဆုပေးသွားမှာရှိပြီး၊ ဘင်ခရာ ပန်းပွားအက၊ ပျော်ပွဲရွှင်ပွဲအဖြစ် ဂိမ်းကစားခြင်းလည်းပါဝင်မယ်ဆိုတယ်။

ဘယ်လိုပဲဆိုဆို မြန်မာနိုင်ငံအပါအဝင် ကမ္ဘာ့နိုင်ငံများက နှစ်စဉ် မိမိတို့လုပ်ငန်းတွေ ပြန်လည်ဆန်းစစ်နေရာ ကျန်းမာရေး စိန်ခေါ်မှုတွေက (၁) ဆင်းရဲခြင်း၊ (၂) ဆင်းရဲစွာနေထိုင်ရတဲ့အခြေအနေ၊ (၃) ပညာရေးချို့တဲ့ခြင်း၊ (၄) စာမတတ်ခြင်း၊ (၅) ကျန်းမာရေးဆိုင်ရာ အချက်အလက်များ မရခြင်းနဲ့ (၆) ကျန်းမာရေးနဲ့ ပတ်သက်ပြီး ဆုံးဖြတ်ချက် မချနိုင်ခြင်း ပါဝင်နေတယ်။

ဒေါက်တာလွင်သန့်



FOLLOW US