News

POST TAGGED AS

ဆွီဒင်

အတင်းအကျပ် ခြိမ်းခြောက်မှုမပြုလျှင်လည်း မုဒိမ်းမှုသည် မုဒိမ်းမှုသာဖြစ်ကြောင်း ဆွီဒင်ဥပဒေပြဋ္ဌာန်း


စတော့ဟုမ်း၊ မေ ၂၄

ဆန္ဒမပါပဲ လိင်ပြုကျင့်မှုသည် အတင်းအကျပ် ခြိမ်းခြောက်မှုမပြုသည့်တိုင်အောင် မုဒိမ်းမှုမြောက်သည်ဟု ဖော်ပြထားသော ဥပဒေကို ဆွီဒင်လွှတ်တော်က အတည်ပြုလိုက်သည်ဟု DW သတင်းတွင် ဖော်ပြထားသည်။

ထိုသို့ပြဋ္ဌာန်းမှုကို Amnesty International အပါအဝင် လူ့အခွင့်အရေးအုပ်စုများက ထောက်ခံကြိုဆိုခဲ့ကြသည်။

ဇူလိုင်လ ၁ ရက်တွင် စတင်သက်ရောက်မည့် ဥပဒေသစ်သည် ယခင်ဥပဒေဟောင်းတွင် မုဒိမ်းမှုသေချာစေရန်အတွက် ကျူးလွန်သူက အဓမ္မအင်အားသုံးခြင်းနှင့် နစ်နာသူက အရက်သောက်ထားခြင်း ကဲ့သို့သော ဘေးသင့်နိုင်သည့် အခြေအနေတွင် ရှိနေခြင်းတို့ကို သက်သေပြရန် လိုအပ်သော သတ်မှတ်ချက်များကို ပြင်ဆင်လိုက်ခြင်းဖြစ်သည်။

ဥပဒေသစ်တွင် လိင်ပြုကျင့်ခံရသူသည် လိင်မှုကိစ္စကို သဘောတူသည့်ဆန္ဒကို စကားလုံးဖြင့်ဖြစ်စေ၊ ကိုယ်အမူအရာဖြင့်ဖြစ်စေ ပြသရမည်ဟု ဖော်ပြထားသည်။

ဥပဒေသစ်ကို ၂၅၇ မဲ၊ ၃၈ မဲဖြင့် လွှတ်တော်က အတည်ပြုခဲ့သည်။ ဥပဒေကြမ်းများရေးဆွဲရသော ဥပဒေရေးရာ အကြံပေးကောင်စီက လက်ရှိဥပဒေနှင့် လုံလောက်မှုရှိသည်ဟု ပြောကြားခဲ့သော်လည်း ဥပဒေသစ်ကို မဲခွဲဆုံးဖြတ်ရန် အစိုးရက လွှတ်တော်သို့ တင်သွင်းခဲ့ခြင်းဖြစ်သည်။

ဥပဒေသစ်တွင် သဘောဆန္ဒပါသော လိင်ပြုကျင့်မှုအနေအထားကို ရှင်းလင်းခြင်း မပြုသော်လည်း မတုန်မလှုပ်နေခြင်းသည် လိင်မှုကို သဘောတူသည့် လက္ခဏာမဟုတ်ဟု ဖော်ပြထားသည်။

“မတုန်မလှုပ် သို့မဟုတ် ဝေခွဲမရသော လက္ခဏာရှိသူတစ်ဦးနှင့် လိင်မှုဆက်ဆံလိုသူသည် ထိုသူက အလိုဆန္ဒရှိသည်ဟူသော လက္ခဏာကို ရှာဖွေရမည်” ဟု ဥပဒေသစ်ကဆိုသည်။ 

ဆွီဒင်တွင် လိင်အကြမ်းဖက်မှု မြင့်တက်လာနေပြီး မိန်းကလေးငယ်များသည် ကြီးမားသောအန္တရာယ်နှင့် ရင်ဆိုင်နေရသည်ဟု အစိုးရက ပြောကြားသည်။

ဥပဒေသစ်အရ အမှုမဲ့အမှတ်မဲ့ မုဒိမ်းကျူးလွန်မှုနှင့် အမှုမဲ့အမှတ်မဲ့ လိင်အနိုင်ကျင့်မှု နှစ်မျိုးကို ဖော်ပြထည့်သွင်းထားပြီး အမြင့်ဆုံးထောင်ဒဏ် လေးနှစ်အထိ ချမှတ်ခွင့်ပြုထားသည်။ ထို့အပြင် “လိုက်နာရမည့်အရာကို လျစ်လျူရှုခြင်း”ဟူသော စကားရပ်ကို ပိုမိုကြီးလေးသော လိင်ရာဇဝတ်မှုများအတွက် ထည့်သွင်းအသုံးပြုထားသည်။

အတိုက်အခံ Moderate ပါတီမှ တရားရေးဆိုင်ရာ ပြောရေးဆိုခွင့်ရှိသူ သောမတ်စ်တိုဘီက ဥပဒေသစ်ကို ၎င်းတို့ ပါတီက ထောက်ခံခဲ့ကြောင်း၊ သို့ရာတွင် နစ်နာသူက လိင်မှုကိစ္စတွင် ထိတွေ့ရန် လိုလားမှုကို ရှင်းလင်းစွာ ပြသခြင်း ရှိ၊ မရှိ ဟူသောအချက်အား အဓိကထားလွန်းခြင်းကို စိုးရိမ်မိကြောင်း ပြောကြားသည်။

မည်သို့ပင်ဖြစ်စေ ဥပဒေသစ်ကြောင့် အမျိုးသမီးများအပေါ် ခပ်ပေါ့ပေါ့ထားသည့် သဘောထားများ ပြောင်းလဲသွားလိမ့်မည်ဟု တိုဘီက မှတ်ချက်ပေးသည်။

Amnesty International မှ ဥရောပဆိုင်ရာ အမျိုးသမီးအရေး သုတေသနပြုသူ အန်နာဘလပ်စ်ကလည်း ဆွီဒင်သည် ဥရောပတွင် ဆန္ဒမပါသော လိင်မှုကို မုဒိမ်းမှုအဖြစ် သတ်မှတ်သော ဆယ်ခုမြောက်နိုင်ငံဖြစ်လာသည်ဟု ပြောကြားထားသည်။

“ဥရောပနိုင်ငံအများစုက အတင်းအကျပ်၊ ခြိမ်းခြောက်၊ ကာယအားကိုး အနိုင်ကျင့်မှုတွေကို အခြေခံပြီး မုဒိမ်းမှုကို အဓိပ္ပာယ်ဖွင့်နေကြတုန်းပါပဲ။ ဒီလိုခေတ်မမီတဲ့ ဖွင့်ဆိုမှုတွေဟာ အတိုင်းမသိ နစ်နာမှုတွေကိုဖြစ်စေနိုင်ပါတယ်” ဟု သူမက ပြောကြားသည်။

“ဒီကနေ့ ဆုံးဖြတ်ချက်ဟာ ဥရောပရဲ့ ဥပဒေပြုရေးနဲ့ ခံယူချက်တွေကို အပြောင်းအလဲဖြစ်အောင် လမ်းခင်းပေးလိမ့်မယ်လို့ မျှော်လင့်ပါတယ်” ဟု အန်နာ ဘလပ်စ်က ပြောကြားသည်။

F-04



FOLLOW US