News

POST TYPE

SPORTS

ချန်ပီယံလိဂ်အုပ်စုများ မဲခွဲထုတ်ပြန်၊ မန်စီးတီးကလွဲ၍ ကျန်သည့်အသင်းများ အုပ်စုကျပ်
31-Aug-2018 tagged as Soccer Champions League Group Stage


မိုနာကို၊ သြဂုတ် ၃၁

ဥရောပဘောလုံးအဖွဲ့ချုပ်(ယူအီးအက်ဖ်အေ)သည် ချန်ပီယံလိဂ်အုပ်စုများကို မဲခွဲထုတ်ပြန်လိုက်ပြီဖြစ်ရာ မန်စီးတီးကလွဲ၍ ကျန်ပရီးမီးယားလိဂ်အသင်းများမှာ အုပ်စုကျပ်အတွင်းသို့ ကျရောက်သွားခဲ့ကြောင်း Daily Mail က ဖော်ပြထားသည်။

ယမန်နှစ်ဘောလုံးရာသီက ချန်ပီယံလိဂ်ဗိုလ်လုပွဲအဆင့်ထိတိုင် တက်ရောက်နိုင်ခဲ့သော လီဗာပူးသည် ပြင်သစ်လီဂူးကလပ် ပီအက်စ်ဂျီ။ အီတလီစီးရီးအေကလပ် နာပိုလီ၊ ဆားဘီးယားကလပ် ရက်ဒ်စတားဘဲလ်ဂရိတ်တို့နှင့်အတူ အုပ်စု(ဂ)တွင် တစ်အုပ်စုတည်း ကျရောက်သွားခဲ့ပြီး အုပ်စုမဲခွဲထားမှုအရ နာပိုလီနည်းပြ အန်စလော့တီမှာ ၎င်း၏အသင်းဟောင်းတစ်သင်းဖြစ်သော ပီအက်စ်ဂျီကို ပြန်လည်ရင်ဆိုင်ရတော့မည်လည်းဖြစ်သည်။

ပရီးမီးယားလိဂ်အမှတ်ပေးချန်ပီယံ မန်စီးတီးသည် ယူကရိန်းကလပ် ရှက်တာဒိုးနက်၊ ပြင်သစ်လီဂူးကလပ် လိုင်ယွန်၊ ဂျာမန်ဘွန်ဒက်စ်လီဂါကလပ် ဟော့ဖ်ဖန်ဟိမ်းတို့နှင့် အုပ်စု(စ)တွင် ယှဉ်ပြိုင်ရလိမ့်မည်ဖြစ်ကာ ယင်းအုပ်စုတွင်ကျရောက်နေသောအသင်းများအားလုံးမှာ တိုက်စစ်အားသန်သည့်အသင်းများဖြစ်နေခြင်းကြောင့် လွန်စွာ စိတ်ဝင်စားဖွယ်ရာကောင်းလျက်ရှိသည်။

စပါးသည် အုပ်စု(ခ)တွင် စပိန်လာလီဂါကလပ် ဘာစီလိုနာ၊ နယ်သာလန်ကလပ် ပီအက်စ်ဗီ၊ အီတလီစီးရီးအေကလပ် အင်တာမီလန်တို့နှင့် အားပြိုင်ရလိမ့်မည်ဖြစ်ပြီး ယင်းအတွက် ၁၆ သင်းရှုံးထွက်အဆင့်သို့ တက်လှမ်းနိုင်ရန် စပါးမှာ ခက်ခဲစွာ ကြိုးပမ်းရတော့မည်ဖြစ်သည်။

မန်ယူသည် အုပ်စု(ဇ)တွင် အီတလီစီးရီးအေကလပ် ဂျူဗင်တပ်၊ စပိန်လာလီဂါကလပ် ဗလင်စီယာ၊ ဆွစ်ဇာလန်ကလပ် ယန်းဘွိုင်းစ်တို့နှင့် ကစားရမည်ဖြစ်၍ သတိကြီးစွာ ထားရဖွယ်အနေအထားရှိနေပြီး ဂျူဗင်တပ်တိုက်စစ်မှူး စီရော်နယ်ဒိုနှင့် အသင်းဟောင်း မန်ယူတို့ ထိပ်တိုက်တွေ့နေခြင်းက ယခုအုပ်စုကို ပရိသတ်စိတ်ဝင်စားမှု မြင့်တက်စေလျက်ရှိသည်။

ချန်ပီယံလိဂ်အုပ်စုအဆင့်ပွဲစဉ်များကို လာမည့် စက်တင်ဘာလ ၁၈ ရက်နေ့တွင် စတင်ကျင်းပသွားမည်ဖြစ်ပြီး အုပ်စုအဆင့်ပွဲစဉ်များပြီးဆုံးမည့်နေ့ရက်မှာ ဒီဇင်ဘာလ ၁၂ ရက်နေ့ဖြစ်သည်ဟု ယူအီးအက်ဖ်အေက သတင်းထုတ်ပြန်ထားသည်။

ချန်ပီယံလိဂ် အုပ်စုများ
---------------------------------------
အုပ်စု(က) - အက်သလက်တီကို(စပိန်)၊ ဒေါ့မွန်(ဂျာမနီ)၊ ဘရုဂေး(ဘယ်လ်ဂျီယံ)၊ မိုနာကို(ပြင်သစ်)

အုပ်စု(ခ) - ဘာစီလိုနာ(စပိန်)၊ အင်တာမီလန်(အီတလီ)၊ ပီအက်စ်ဗီ(နယ်သာလန်)၊ စပါး(အင်္ဂလန်)

အုပ်စု(ဂ) - ရက်ဒ်စတားဘဲလ်ဂရိတ်(ဆားဘီးယား)၊ လီဗာပူး(အင်္ဂလန်)၊ နာပိုလီ(အီတလီ)၊ ပီအက်စ်ဂျီ(ပြင်သစ်)

အုပ်စု(ဃ) - ဂါလာတာစာရေး(တူရကီ)၊ လိုကိုမိုးတစ်မော်စကို(ရုရှား)၊ ပေါ်တို(ပေါ်တူဂီ)၊ ရှော်ကေး(ဂျာမနီ)

အုပ်စု(င) - အေအီးကေအေသင်(ဂရိ)၊ အေဂျက်(နယ်သာလန်)၊ ဘိုင်ယန်မြူးနစ်(ဂျာမနီ)၊ ဘင်ဖီကာ(ပေါ်တူဂီ)

အုပ်စု(စ) - ဟော့ဖ်ဖန်ဟိမ်း(ဂျာမနီ)၊ မန်စီးတီး(အင်္ဂလန်)၊ လိုင်ယွန်(ပြင်သစ်)၊ ရှက်တာဒိုးနက်(ယူကရိန်း)

အုပ်စု(ဆ) - စီအက်စ်ကေအေမော်စကို(ရုရှား)၊ ရီးရဲလ်မက်ဒရစ်(စပိန်)၊ ရိုးမား(အီတလီ)၊ ပလာဇန်(ချက်)

အုပ်စု(ဇ) - ဂျူဗင်တပ်(အီတလီ)၊ မန်ယူ(အင်္ဂလန်)၊ ဗလင်စီယာ(စပိန်)၊ ယန်းဘွိုင်းစ်(ဆွစ်ဇာလန်)