News

POST TYPE

TIP

ကွန်ဖြူးရှပ်၏ စီးပွားရေးတန်ဖိုး
21-Jul-2018



တရုတ်ယဉ်ကျေးမှုသည် နှစ်ပေါင်း ၅၀၀၀ ကျော်ကြာလာသည့်တိုင်အောင်ပင် ခေတ်မီနေသေးကြောင်း သက်သေထူနိုင်သည့် အကြောင်းတရားများစွာရှိပါသည်။ ယင်းတို့အထဲတွင် ကွန်ဖြူးရှပ်၏ အတွေးအမြင်များမှာ တရုတ်လူမျိုးတို့အတွက် ဂုဏ်ယူစရာများဖြစ်သည်။ ကွန်ဖြူးရှပ်ပြောဆိုခဲ့သမျှမှာ ကိုယ်ကျင့်တရားဆိုင်ရာ စံများဖြစ်သော်လည်း နောက်ပိုင်းတွင် ဘာသာရေးဆုံးမစာတစ်ခုအနေနှင့် ကိုးကွယ်လိုက်နာခဲ့ကြသည်။ 

သူ၏ အတွေးအခေါ်များသည် တရုတ်တွင်သာမက နောက်ပိုင်း အရှေ့အာရှသို့ပါ ပျံ့နှံ့သွားခဲ့ပြီး တောင်ကိုရီးယား၊ ထိုင်ဝမ်၊ ဟောင်ကောင်၊ စင်ကာပူနိုင်ငံများတွင်ပါ ကိုးကွယ်ထိုက်သူအဖြစ်သတ်မှတ်ပြီး လေးစားလိုက်နာလာကြသည်မှာ အကြောင်းမဲ့မဖြစ်နိုင်ပါ။ ထိုနိုင်ငံများတွင် နှစ်ပေါင်းများစွာ ကွန်ဖြူးရှပ်ဝါဒသည် လွှမ်းမိုးအမြစ်တွယ်နိုင်ခဲ့ပါသည်။ ထိုနိုင်ငံများတွင် တူဖြင့်စားသုံးသည့် ဓလေ့များထွန်းကားသကဲ့သို့ ကွန်ဖြူးရှပ်အတွေးအခေါ်ကို မဖြစ်မနေ ကိုးကွယ်လိုက်နာကြသည့် ယဉ်ကျေးမှု ဓလေ့တစ်ခုဖြစ်သည်ဟုလည်း ဆိုကြသည်။

ကွန်ဖြူးရှပ်အတွေးအခေါ်သည် ထိုနိုင်ငံများကို စိုးမိုးအုပ်ချုပ်သည့် ခေါင်းဆောင်များ၏ စိတ်ဓာတ်အတွင်း၌လည်း ကိန်းဝပ်နေသည်ဟုဆိုရမည်။ ကွန်ဖြူးရှပ်အတွေးအခေါ်ကို ကိန်းဝပ်ခြင်းဆိုသည်မှာ တိုင်းပြည်ခေါင်းဆောင်တိုင်းသည် တိုင်းသူပြည်သူများအတွက် စံပြုလောက်သူများဖြစ်စေရန် နေထိုင်ခြင်းနှင့်လည်း သက်ဆိုင်ပါသည်။ 

ကွန်ဖြူးရှပ်က စီးပွားရေးကို ဖွံ့ဖြိုးတိုးတက်စေချင်လျှင် ပြည်သူကို အလုပ်လက်မဲ့ဖြစ်အောင်မလုပ်ရ၊ ကုန်ထုတ်စွမ်းအားကို တိုးတက်အောင်လုပ်ရမည်၊ ဒေသအတွင်း ထုတ်လုပ်မှုစွမ်းအားကို မြှင့်တင်နိုင်ရမည်၊ ကုန်ဈေးနှုန်းများ မြင့်မားခြင်းမရှိအောင် လုပ်ဆောင်နိုင်ရမည် စသည့်ဆုံးမသွန်သင်ချက်များမှာ အမှန်တော့ Macroeconomic ဆိုင်ရာ အယူအဆများဖြစ်ကြောင်း တွေ့ရမည်ဖြစ်သည်။ 

ကွန်ဖြူးရှပ်က ကုန်ထုတ်လုပ်မှုဆိုင်ရာလုပ်ငန်းများ လုပ်ဆောင်ရာတွင် သဘာဝရင်းမြစ်များ၊ လူ့လုပ်အား အရင်းအမြစ်၊ ငွေအရင်းအမြစ်နှင့် စွန့်ဦးလုပ်ဆောင်လိုသူများအရင်းအမြစ်တို့ကို အလေးအနက်ထားရန် တိုက်တွန်းခဲ့သည်။ အောင်မြင်သည့် စီးပွားရေးကို လုပ်ဆောင်လိုသူတိုင်း ထိုရင်းမြစ်လေးခုမရှိလျှင် သို့မဟုတ် ထိုလေးခုကို အလေးအနက်မထားလျှင် မအောင်မြင်နိုင်ကြောင်း ပြောဆိုထားခြင်းဖြစ်သည်။

ကွန်ဖြူးရှပ်၏ စီးပွားရေးအမြင်တွင် လေးစားစရာကောင်းသည့် အချက်တစ်ချက်မှာ “အစွန်းလွတ်တရားကို ကျင့်သုံးခြင်း” ဖြစ်သည်။ လူတိုင်းသည် ဘာလုပ်လုပ် အစွန်းမရောက်အောင်လုပ်ရမည်။ အလယ်အလတ် လမ်းစဉ်ဖြင့် မှန်အောင်တွေး၊ မှန်အောင်လုပ်မှ အောင်မြင်မည်ဟုလည်း ဆိုပါသည်။ 

စီးပွားရေးနှင့် နိုင်ငံရေးသည် ဆက်စပ်နေပါသည်။ တိုင်းပြည်တစ်ပြည်၏ စီးပွားရေးဖွံ့ဖြိုးတိုးတက်မှုသည် နိုင်ငံရေး၌ မည်မျှအထိ စွမ်းဆောင်နိုင်သနည်းဆိုခြင်းနှင့်လည်း ပတ်သက်နေသည်။ နိုင်ငံရေးဘက်တွင် ကောင်းမွန်သော အစိုးရတစ်ရပ်ကသာ တိုင်းပြည်ကောင်းအောင်လုပ်နိုင်သည်။ ကိုယ်ကျင့်တရားကောင်းမွန်သော၊ သိက္ခာသမာဓိရှိပြီး တည်ကြည်သော နိုင်ငံခေါင်းဆောင်များကသာ အကျင့်ပျက်ခြစားမှုကင်းနိုင်ပြီး လာဘ်ပေးလာဘ်ယူမှုလည်းရှင်းမည်။ ထိုသူမျိုးများကသာ တိုင်းပြည်ကိုတိုးတက်အောင် လုပ်ဆောင်နိုင်သည်။ တိုင်းပြည်ကို စေတနာထားပြီး၊ လူမျိုးကိုချစ်သည့် အစိုးရသာ တိုင်းပြည်အရေး ပထမနေရာတွင်ထားပြီး စီမံအုပ်ချုပ်တတ်သည်။ ဥပဒေကိုတန်ဖိုးထားသည့်အစိုးရသည် ဥပဒေစိုးမိုးအောင် လုပ်သည်။ ဥပဒေအတိုင်း လိုက်နာကျင့်သုံးသည်။ တရားဥပဒေ စိုးမိုးမှသာ စီးပွားရေးလည်း တိုးတက်အောင်လုပ်ဆောင်နိုင်မည်။

အလုပ်တန်ဖိုးနှင့်ပတ်သက်၍လည်း ကွန်ဖြူးရှပ်က အလုပ်ကိုကြိုးစားလုပ်ကိုင်ရမည်။ ကြိုးစားလုပ်ကိုင်ပြီးရသည့် ငွေကြေးဥစ္စာများဖြင့် ပထမဆုံး မိသားစုကို ထောက်ပံ့ရမည်။ ရှာဖွေစုဆောင်းထားသည့် ငွေကြေးများကိုလည်း ချွေတာစုဆောင်းရန် အရေးကြီးသည်။ အသုံးနှင့်အဖြုန်းကို ခွဲခြားသိမှတိုးတက်မည်။ လူတိုင်းကိုယ့်ကိုယ်ကိုယ်သာ ပြုစုပျိုးထောင်နိုင်သည်။ ကိုယ်ကျင့်တရားကို ထိန်းသိမ်းစောင့်ရှောက်နိုင်သူသာ တာဝန်ယူမှု၊ တာဝန်ခံမှုရှိသည်။ ကိုယ့်အလုပ်တွင် စိတ်ကို နှစ်မြှုပ်နိုင်သူမှ အောင်မြင်သည်။ ကိုယ့်ကျင့်တရား ကိုယ်တိုင်ရှိမှ ကိုယ့်အလုပ်သမားများကို ထိန်းကျောင်းနိုင်သည်။ တိုင်းပြည်အုပ်ချုပ်သူများကို လေးစားမှ မိမိလုပ်ငန်းလုပ်ဆောင်ရာတွင် ပြဿနာကင်းသည်။

ကွန်ဖြူးရှပ်၏အတွေးအမြင်များကို လေ့လာကြည့်လျှင် စွန့်ဦးစီးပွားရေးလုပ်ဆောင်လိုသူများကိုလည်း ဦးစားပေးထားကြောင်းတွေ့ရသည်။ ဘာလုပ်လုပ် စိတ်ပါလက်ပါလုပ်ဟူ၍လည်း သူက တိုက်တွန်းသည်။ ကိုယ့်မှာရှိသည့် ရင်းမြစ်များကို အကန့်အသတ်နှင့် သုံးတတ်ခြင်းသည် အောင်မြင်ခြင်းဖြစ်သည်။ ငွေ၊ လူ၊ လုပ်အား စသည်တို့ကို အထိန်းအဆနှင့် သုံးတတ်အောင်လုပ်နိုင်သူ ဖြစ်ရမည်။ အလုပ်ကို တစ်ဦးတည်း မတတ်နိုင်လျှင် ပူးပေါင်းလုပ်ရမည်။ ဘာလုပ်လုပ် အရနှင့်အသုံးကို ချင့်ချိန်နိုင်မှ အောင်မြင်မည်။ ကွန်ဖြူးရှပ်၏ စီးပွားရေးအမြင်တွင် အရေးအကြီးဆုံးအချက်မှာ ကိုယ်ကျင့်တရားစံသာဖြစ်သည်။ ကိုယ့်ကျင့်တရားကို ဦးထိပ်တွင် မထားနိုင်လျှင် ဘာလုပ်လုပ် အောင်မြင်မည်မဟုတ်ပေ။

သူ့အလိုကရှင်းပါသည်။ လူတိုင်း လူတိုင်း တစ်ဦးနှင့်တစ်ဦး သနားကြင်နာမှုနှင့် ဆက်ဆံမှ ဘာလုပ်လုပ် အောင်မြင်နိုင်မည်။ စီးပွားရေးလုပ်ရာတွင် လောကဝတ်သည် အရေးကြီးသည်။ လောကဝတ်သည် လုပ်ယူထားသည့် လောကဝတ်မျိုးမဟုတ်။ တစ်ဖက်သားအပေါ် ကြင်နာသနားစိတ်ဖြင့် သူ့ကောင်းမှငါကောင်းမည်ဆိုသောမူကို ကျင့်သုံးခိုင်းခြင်းဖြစ်သည်။ လူကို လူလိုမြင်ရန် အရေးကြီးသည်။ စေတနာက အရေးကြီးသည်။ စေတနာက ရောင်ပြန်ဟပ်သည်။

လူလူချင်းဆက်ဆံရာတွင် တရားနည်းလမ်းကျကျ မှန်မှန်ကန်ဖြစ်ရေးကို ဦးစားပေးရမည်။ သူ့ကိုယုံကြည်မှ ကိုယ့်ကိုယုံကြည်မည်။ လုပ်ငန်းလုပ်ကိုင်ရာတွင် ယုံကြည်မှုသည် အရေးကြီးသည်။ လူလူချင်း ဆက်ဆံရာတွင် ယုံကြည်မှုဖြင့် တည်ဆောက်မှ အောင်မြင်နိုင်သည်။

ဘာလုပ်လုပ် တစ်ဦးဆောင်သော်မရ၊ အများဆောင်မှ အောင်မြင်နိုင်ကြောင်း သတိပြုသင့်သည်။ စည်းလုံးညီညွတ်စွာဖြင့် လုပ်ဆောင်လျှင် အောင်မြင်သည်။ စုပေါင်းညီညွတ်လျှင် စိတ်ဓာတ်အင်အားခိုင်မာပြီး ယုံကြည်အားကောင်းလာသည်။ ကိုယ့်ကိုယ်ကိုယ် သို့မဟုတ် ကိုယ့်အဖွဲ့ကို ယုံကြည်မှုသည် အောင်မြင်မှု၏ လမ်းစဖြစ်သည်။