News

POST TYPE

POPULAR POST

သမီးအရင်း နှစ်ဦးကို အကြိမ်ကြိမ် အဓမ္မပြုကျင့်ခဲ့သည့် ဖခင်အား အမှုဖွင့်
10-Mar-2019
ရန်ကုန်၊ မတ် ၁၀

လှိုင်သာယာမြို့နယ်၊ (၄) ရပ်ကွက်တွင် နေထိုင်သည့် အသက် ၂၃ နှစ်နှင့် ၁၄ နှစ်အရွယ် မိန်းကလေးနှစ်ဦးမှာ ၎င်းတို့ဖခင်အရင်းဖြစ်သူက အကြိမ်ကြိမ် အဓမ္မပြုကျင့်ဆက်ဆံခဲ့သောကြောင့် မတ်လ ၉ ရက်နေ့က ရဲစခန်းသို့ လာရောက်ခဲ့ပြီး ဖခင်ဖြစ်သူအား အရေးယူပေးပါရန် တိုင်ကြားခဲ့ကြောင်း ရဲတပ်ဖွဲ့ထံမှ စုံစမ်းသိရှိရသည်။

မုဒိမ်းမှုပုဒ်မ ၃၇၆ ဖြင့် ဖခင်ဖြစ်သူ အသက် ၄၇ နှစ် ကျော်စွာငြိမ်းကို အမှုဖွင့် အရေးယူပေးရန် တရားလိုပြု တိုင်ကြားခဲ့သည့် အသက် ၂၃ နှစ် မိန်းကလေးမှာ ၎င်း ၁၄ နှစ်အရွယ်ခန့်ကတည်းက ဖခင်ဖြစ်သူမှ အလိုမတူဘဲ သားမယားအဖြစ် အကြိမ်ကြိမ် ပြုကျင့်ခဲ့ကြောင်းနှင့် ငြင်းဆန်သည့်အခါ ရိုက်နှက်ခြင်းကိုခံခဲ့ရကြောင်း အမှုဖွင့်တိုင်ကြားချက်အရ သိရသည်။

ကျော်စွာငြိမ်း၏ အဓမ္မပြုကျင့်မှုကို ခံခဲ့ရသည့် မိန်းကလေးမှာ ကိုယ်ဝန်တစ်ကြိမ် ပျက်ကျခဲ့ပြီး သမီးမိန်းကလေး တစ်ယောက်ကို မွေးဖွားခဲ့ကြောင်းနှင့် ယင်းကလေးမှာ ၅၄ ရက်အကြာတွင် သေဆုံးခဲ့ကြောင်း၊ ယခုအချိန်တွင် ဖခင်ဖြစ်သူနှင့် ရရှိထားသော အသက် ၄ နှစ်အရွယ် သမီးတစ်ဦး အသက်ရှင်လျက်ရှိနေသည်။

ယင်းအပြင် လွန်ခဲ့သည့် တစ်နှစ်ကျော်က မိခင်ဖြစ်သူမှာ အင်းစိန်ဆေးရုံတွင် ကလေးမီးဖွားနေချိန် ၎င်းက ဆေးရုံလူနာစောင့်ရသဖြင့် နေအိမ်တွင် အသက် ၁၄ နှစ်အရွယ်ရှိ ညီမဖြစ်သူမှာ ကျန်နေခဲ့ချိန် ကျော်စွာငြိမ်းက သားမယားအဖြစ် ပြုကျင့်ရန် ကြံစည်သဖြင့် လက်မခံသောကြောင့် ရိုက်နှက်ခံရပြီး ယခုနှစ် မတ်လ ၇ ရက်နေ့အထိ ညီအစ်မနှစ်ဦးမှာ ဖခင်ဖြစ်သူ ကျော်စွာငြိမ်း၏ အကြိမ်ကြိမ် အဓမ္မပြုကျင့်မှုကို ခံခဲ့ရကြောင်း အမှုဖွင့် တိုင်ကြားချက်တွင် ပါဝင်ခဲ့သည်။

သားမယားအဖြစ် သမီးအရင်းနှစ်ဦးကိုရိုက်နှက်ပြီး ဆက်ဆံခဲ့သည့် ကျော်စွာငြိမ်းက ယင်းဖြစ်စဉ်ကို ရဲစခန်းသို့ သွားရောက်တိုင်ကြားပါက တစ်မိသားစုလုံးကို သတ်ပစ်မည်ဟု ခြိမ်းခြောက်ပြောဆိုခဲ့ပြီး မတ်လ ၉ ရက်နေ့တွင် ညီအစ်မနှစ်ဦးမှာ လှိုင်သာယာမြို့မ ရဲစခန်းသို့ လာရောက်ပြီး ဖြစ်စဉ်ကိုပြောပြ၍ ဖခင်အရင်းဖြစ်သူ ကျော်စွာငြိမ်းကို အရေးယူပေးပါရန် သမီးကြီးဖြစ်သူက တရားလိုပြု တိုင်ကြားလာသဖြင့် ရာဇသတ်ကြီးပုဒ်မ ၃၇၆ ဖြင့် အမှုဖွင့်ပြီး ကျော်စွာငြိမ်းကို ဖမ်းဆီးအရေးယူနိုင်ရန် စုံစမ်းဆောင်ရွက်နေကြောင်း ရဲတပ်ဖွဲ့ထံမှ သိရသည်။

S-03