News

POST TYPE

POPULAR POST

မန္တလေးတိုင်းအတွင်း မဲပေးခွင့်ရှိသူစာရင်း နောက်ဆုံးအကြိမ် ကြေညာ
02-Oct-2018

မန္တလေး၊ အောက်တိုဘာ ၁

ကြားဖြတ်ရွေးကောက်ပွဲအတွက် ပြင်ဆင်ဖြည့်စွက်မှုများ ပြုလုပ်ထားသည့် မန္တလေးတိုင်းအတွင်း မဲပေးခွင့်ရှိသူ စာရင်းကို အောက်တိုဘာ ၁ ရက်နေ့ကစ၍ နောက်ဆုံးအကြိမ်အဖြစ် ကြေညာပေးလိုက်ပြီဖြစ်ကြောင်း မန္တလေးတိုင်းရွေးကောက်ပွဲ ကော်မရှင်အဖွဲ့ခွဲ တာဝန်ရှိသူများက ပြောကြားသည်။

“ကျွန်တော်တို့ဘက်ကတော့ ပြင်ဆင်ဖြည့်စွက် ပယ်ဖျက်တာတွေလုပ်ပြီးပါပြီ။ ဒီအချိန်မှာ လာကြည့်ပြီးတော့ လိုအပ်တာတွေ တောင်းဆိုတာ ကန့်ကွက်တာတွေ လုပ်နိုင်ပါတယ်။ ဒါကိုပြုပြင်ပြီးရင်တော့ အခွင့်အရေး မရတော့ပါဘူး။ မဲစာရင်းမှာ ကိုယ့်အမည်ပါမှ မဲပေးခွင့်ရမှာ။ ဒီတော့ အခွင့်အရေးမဆုံးရှုံးဖို့ မဲစာရင်းကြည့်ဖို့ လိုအပ်ပါတယ်။ ဒီအချိန်မှာ ပြင်လို့ရသေးတယ်”ဟု မန္တလေးတိုင်း ရွေးကောက်ပွဲကော်မရှင်အဖွဲ့ခွဲမှ ဒုတိယညွှန်ကြားရေးမှူး ဦးကျော်ကျော်စိုးက ပြောကြားသည်။

ပြည်ထောင်စုရွေးကောက်ပွဲကော်မရှင်က ပထမအကြိမ်မဲစာရင်းကို ဇူလိုင်လ ၉ ရက်နေ့မှ ၂၂ ရက်နေ့ထိ ရပ်ကွက်ကျေးရွာ ကော်မရှင်အဖွဲ့ခွဲများနှင့် ကျေးရွာအုပ်စုအတွင်းရှိ ကျေးရွာများတွင် ကပ်ထား ပေးခဲ့ပြီးနောက် ပြင်ဆင်၊ ဖြည့်စွက်ထားသော မဲစာရင်းများကို နောက်ဆုံးအကြိမ်အဖြစ် အောက်တိုဘာ ၁ ရက်နေ့မှ ၁၄ ရက်နေ့ထိ ကြေညာပေးထားမည်ဖြစ်သည်။

မန္တလေးတိုင်းတွင် မြင်းခြံမြို့နယ် မဲဆန္ဒနယ်မှ ပြည်သူ့လွှတ်တော် တစ်နေရာ၊ သပိတ်ကျင်းမြို့နယ်တွင် တိုင်းလွှတ်တော်မဲဆန္ဒနယ် အမှတ် (၁) နေရာနှင့် မန္တလေးတိုင်းလွှတ်တော်၊ ရှမ်းတိုင်းရင်းသားလူမျိုး မဲဆန္ဒနယ်နေရာ လစ်လပ်နေသည်။ 
ပထမအကြိမ်ကြေညာပေးခဲ့စဉ်က မဲဆန္ဒရှင်အမည် မပါလာခြင်း၊ မပါသင့်သူများပါဝင်နေခြင်း၊ အချက်အလက် မှားနေခြင်းတို့ရှိခဲ့ရာ မဲဆန္ဒရှင် ၆၃၀၀ ကျော်အတွက် ပြန်လည်ပြင်ဆင်ဖြည့်စွက်ပေးထားကြောင်း မန္တလေးတိုင်း ရွေးကောက်ပွဲကော်မရှင်အဖွဲ့ခွဲ၏ စာရင်းများအရ သိရသည်။

မန္တလေးတိုင်း ရွေးကောက်ပွဲ ကော်မရှင်အဖွဲ့ခွဲက ပြုစုထားသော မဲစာရင်းများအရ ရှမ်းတိုင်းရင်းသားလူမျိုး မဲဆန္ဒနယ်နေရာ မဲပေးခွင့်ရှိသူ ၄၀,၀၀၀ ကျော်၊ သပိတ်ကျင်းမြို့နယ် မဲဆန္ဒနယ် အမှတ် ၁ နေရာအတွက် မဲပေးခွင့်ရှိသူ ၄၈,၀၀၀ ကျော်နှင့် မြင်းခြံမြို့နယ်မဲဆန္ဒနယ်မှ ပြည်သူ့လွှတ်တော် တစ်နေရာအတွက် မဲပေးခွင့်ရှိသူ ၂၂၀,၀၀၀ ကျော်ရှိနေကြောင်း သိရသည်။

မြန်မာတစ်နိုင်ငံလုံးတွင် လစ်လပ်မဲဆန္ဒနယ် ၁၃ နေရာအတွက် ကြားဖြတ်ရွေးကောက်ပွဲကို လာမည့်နိုဝင်ဘာလ ၃ ရက်နေ့တွင် ကျင်းပမည်ဖြစ်၍ ကိုယ်စားလှယ်လောင်းများအနေနှင့် မဲဆွယ်စည်းရုံးမှုများ ပြုလုပ်နေပြီဖြစ်သည်။

M-05