News

POST TYPE

PERSPECTIVE

အသိတရား သတိတရားနှင့်အညီ
20-Jun-2019

အကဲဆတ်ကိစ္စရပ်

ယခုတစ်လော စိတ်မချမ်းမြေ့ဖွယ် သတင်းများကတော့ ဘာသာရေးဆိုင်ရာ သတင်းများပဲဖြစ်ပါတယ်။ ဘာသာရေးသတင်းများဖြစ်လို့လည်း ကြားရ၊ ဖတ်ရ၊ ပြောရ၊ ရေးရတာ သိပ်တော့စိတ်မပါလှပါဘူး။ ဘာသာရေးဆိုတာက အကဲဆတ်တတ်လို့ပါ။ ဒီလိုပြောလို့ ဘာသာရေးကို မတို့ရ၊ မထိရလို့ ဆိုလိုခြင်းမဟုတ်ပါဘူး။ အပြောအဆိုမတတ်၊ အရေးမတတ်လို့ ဦးတည်ချက်လွဲသွားရင်၊ အဓိပ္ပာယ်ကောက်လွဲသွားရင်၊ နားလည်မှုလွဲသွားရင်၊ သဘောထားတင်းမာသူနဲ့တွေ့ရင် ပြောင်းပြန်အကျိုးသက်ရောက်မှာ စိုးရိမ်လို့ဖြစ်ပါတယ်။

ဘာသာရေးနဲ့ပတ်သက်လာရင် မြန်မာနိုင်ငံမှမဟုတ်ပါဘူး၊ အခြားနိုင်ငံတွေမှာလည်း အကဲဆတ်တတ်ကြပါတယ်။ အခြားနိုင်ငံတွေ အကဲ ဆတ်တာ၊ မဆတ်တာထက် မိမိတို့နိုင်ငံရဲ့အခြေအနေနဲ့ ဘာသာရေးကို ချိန်ထိုးစဉ်းစားမယ်ဆိုရင် အကဲဆတ်နေဆဲဆိုတာ မျက်မြင်လို့ ဆိုနိုင်ပါလိမ့်မယ်။ မြန်မာနိုင်ငံမှာ ဘာသာရေးနဲ့ပတ်သက်လို့ အကဲဆတ်တယ်ဆိုလို့ အခြားကိစ္စရပ်တွေမှာရော အကဲမဆတ်ဘူးလားလို့မေးရင် အကဲဆတ်တယ်လို့ ယေဘုယျအားဖြင့် ဖြေရပါလိမ့်မယ်။ ဒီတော့ ကိစ္စရပ်အပေါ် မူတည်ပြီး အကဲဆတ်တယ်လို့မဆိုနိုင်ဘဲ မိမိတို့လူအဖွဲ့အစည်းကိုယ်တိုင်ရဲ့ ခံစားမှုတွေက အကဲဆတ်နေတယ်လို့ ကောက်ချက်ချရမယ့် အခြေအနေပါပဲ။

ယုံကြည်မှု၊ ကိုးကွယ်မှုဆိုရာမှာ အစွန်းရောက်လွန်းရင် အမှားများတတ်တာ သဘာဝဖြစ်ပါတယ်။ အသိနှင့်ယှဉ်သော၊ သတိနှင့်ယှဉ်သော ယုံကြည်မှု၊ ကိုးကွယ်မှု၊ အလယ်အလတ်လမ်းစဉ်တို့သည် အစွန်းတရားများကို ရှောင်ရှားနိုင်မယ်လို့ ယုံကြည်ထားပါတယ်။ မိမိကိုယ်တိုင်က အသိနှင့်ယှဉ်သော၊ သတိနှင့်ယှဉ်သော၊ မယုတ်မလွန်ကျင့်ကြံသော ယုံကြည်မှု၊ ကိုးကွယ်မှုတို့ဖြင့်သာ မျှတသောအမြင်၊ မျှတသောယုံကြည်မှုတို့ကို ရရှိစေနိုင်မှာလည်း ဖြစ်ပါတယ်။ ဗုဒ္ဓတရားဟာ စဉ်းစားတွေးခေါ်မှု၊ ကိုယ်တိုင်ကျင့်ကြံအားထုတ်မှု၊ အလယ်အလတ်လမ်းစဉ်၊ ကျိုးကြောင်းတရားတို့အပေါ် အခြေခံထားပေမယ့် ဗုဒ္ဓဘာသာဝင် မိမိတို့ကိုယ်တိုင်က ထိုအခြေခံတရားများနဲ့ သွေဖည်နေခြင်းဟာ သင့်၊ မသင့် စဉ်းစားသုံးသပ်ဖို့ လိုအပ်နေတယ်လို့ မြင်မိပါတယ်။ ဒါမှလည်း အစွန်းတရားတစ်ခုဖြစ်တဲ့ အကဲဆတ်နေတာတွေကို လျော့နည်းစေနိုင်မှာပါ။

နိုင်ငံရေးအတွက် အသုံးချခြင်း

မဖြစ်သင့်ဘူးလို့ယူဆမိတာတစ်ခုကတော့ ဘာသာရေးကို နိုင်ငံရေးမှာ အသုံးချလာခြင်းနဲ့ ဘာသာရေးဟာ နိုင်ငံရေးကြားညပ်လာခြင်း ဖြစ်ပါတယ်။ နိုင်ငံရေးရဲ့သဘောသဘာဝအရ ယှဉ်ပြိုင်မှုတွေရှိနေမှာ ဖြစ်ပါတယ်။ ဒါပေမဲ့ နိုင်ငံရေး အနိုင်ရလိုဇောနဲ့ အစိမ်း၊ အကျက်မရွေး၊ နတ်နေ ကိုင်းပင်မချန် နိုင်ငံရေးအတွက် အသုံးချနေခြင်းကို သန့်ရှင်းတဲ့နိုင်ငံရေးလို့ ဆိုနိုင်မည်မထင်။ နိုင်ငံရေးပါတီများ ဆက်လက်ရပ်တည်ပိုင်ခွင့် မရှိခြင်းနဲ့ပတ်သက်ပြီး ဖွဲ့စည်းပုံအခြေခံဥပဒေ အခန်း ( ၁၀ )၊ ပုဒ်မ ၄၀၇၊ ပုဒ်မခွဲ (ဃ) ဘာသာရေးကို နိုင်ငံရေးအတွက် အလွဲသုံးစားပြုခြင်းလို့ ပြဋ္ဌာန်းထားပါတယ်။ ယင်းပြဋ္ဌာန်းချက်ဟာ နိုင်ငံရေးပါတီတိုင်းအတွက် ရည်ညွန်းထားခြင်းဖြစ်ပါတယ်။ မည်သည့်ပါတီကိုမျှ ခြွင်းချက်အနေနဲ့ သတ်မှတ်မထားပါဘူး။ မြန်မာနိုင်ငံမှာ ပထမမြန်မာနိုင်ငံတော်၊ ဒုတိယမြန်မာနိုင်ငံတော်၊ တတိယမြန်မာနိုင်ငံတော်၊ နယ်ချဲ့အုပ်ချုပ်တဲ့ခေတ်၊ လွတ်လပ်ရေးရပြီး ခေတ်စတဲ့ ခေတ်စနစ်တွေ ဘယ်လိုပြောင်းပြောင်း ကိုးကွယ်ရာဘာသာကတော့ မပြောင်းလဲခဲ့ပါဘူး။ အစဉ်အဆက် ထိန်းသိမ်းစောင့်ရှောက်လာခဲ့ကြတာပါ။ ဒီနေ့ဖြစ်နေတဲ့ အခြေအနေနဲ့ ချိန်ထိုးကြည့်မိပါတယ်။ အသုံးချသင့် မချသင့်ပါ။

ကိုးကွယ်ရာဘာသာတရားကို မိရိုးဖလာကိုးကွယ်ယုံကြည်သူ၊ အသိနှင့်ယှဉ်ပြီး ယုံကြည်ကိုးကွယ်သူ၊ ဝေဖန်ပိုင်းခြားမှုနှင့်ယှဉ်ပြီး ကိုးကွယ်ယုံကြည်သူစသဖြင့် ယုံကြည်ကိုးကွယ်မှု ပုံစံအမျိုးမျိုး ကွဲပြားနိုင်ပါတယ်။ မိမိကိုယ်တိုင်က မည်သည့်ပုံစံနဲ့ ကိုးကွယ်ယုံကြည်သည်ဖြစ်စေ မိမိဟာ အထောက်အပံ့ပြုသူမဖြစ်စေကာမူ အပျက်အစီးပြုသူတော့ မဖြစ်သင့်။

ရေရှည်ကောင်းကျိုး၊ ဆိုးကျိုး

မြန်မာ့နိုင်ငံရေးမှာ ဘာသာရေးနှင့်ပတ်သက်သည့် သမိုင်းကြောင်းများ ရှိခဲ့ပါတယ်။ ပုဂံခေတ်မှစပြီး မြန်မာနိုင်ငံအတွင်း ဗုဒ္ဓဘာသာ ထွန်းကားလာခဲ့ပြီး ဘာသာရေးနှင့် နိုင်ငံရေးဆက်နွှယ်ခဲ့တာ တွေ့ရပါတယ်။ နောင် ခေတ်အဆက်ဆက်တွေမှာလည်း ဘာသာရေးဟာ နိုင်ငံရေးရဲ့အရေးပါတဲ့ အစိတ်အပိုင်းတစ်ခုအဖြစ် ပါဝင်နေခဲ့ပါတယ်။ မြန်မာ့လွတ်လပ်ရေး ကြိုးပမ်းမှုသမိုင်းမှာလည်း ဗုဒ္ဓဘာသာ ကလျာဏယုဝအသင်း၊ ဆရာတော် ဦးဥတ္တမတို့လို ဘာသာရေးနဲ့ နိုင်ငံရေးဆက်စပ်မှုတွေအဖြစ် မြင်တွေ့ရပါတယ်။ ယနေ့ခေတ်မှာလည်း ၈၈ လူထုအုံကြွမှုမှာ သံဃာတော်များပါဝင်ခဲ့တာ၊ ရွှေဝါရောင်တော်လှန်ရေးတို့ကို တွေ့ရပါတယ်။ ဒါကြောင့် မြန်မာ့နိုင်ငံရေးသမိုင်းကြောင်းတစ်လျှောက်လုံးမှာ နိုင်ငံရေးနဲ့ ဘာသာရေး ဆက်စပ်မှုဟာ ယနေ့အထိတည်ရှိနေဆဲအခြေအနေအဖြစ် တွေ့မြင်ရပါတယ်။ ဒါပေမဲ့ လွတ်လပ်ရေးကြိုးပမ်းမှုကာလအတွင်းက နိုင်ငံရေးနဲ့ ဘာသာရေး ဆက်စပ်ပတ်သက်ခြင်းဟာ နိုင်ငံရေး သက်သက်အတွက်လို့ဆိုလို့ မရပါဘူး။ နိုင်ငံ၊ လူမျိုး၊ ဘာသာအတွက် ဖြစ်ပါတယ်။

သို့သော် ယနေ့ဖြစ်ပွားနေတဲ့ ဘာသာရေးဆိုင်ရာဖြစ်စဉ်များနဲ့ လွတ်လပ်ရေးကြိုးပမ်းမှုကာလဖြစ်စဉ်များနဲ့ နှိုင်းယှဉ်ကြည့်မယ်ဆိုရင် တူညီတယ်လို့မဆိုသာ။ မတူညီသည့်အတွက် ကောင်းကျိုး ဆိုးကျိုးလည်း တူညီနိုင်မည်မဟုတ်။ လတ်တလောဖြစ်နေတဲ့ ဘာသာရေး၊ အမျိုးသားရေးနဲ့ နိုင်ငံရေးအမြင်အယူအဆများအပေါ် အမြင်အမျိုးမျိုး၊ အယူအဆအမျိုးမျိုးနဲ့ သဘောထားတွေကွဲနေကြ၊ အုပ်စုတွေကွဲနေကြခြင်းဟာ မည်သူ့ကို ဦးဆုံးထိခိုက်မလဲဆိုတာ မေးလိုပါတယ်။ နိုင်ငံရေးရဲ့ မူလရည်မှန်းချက်က နိုင်ငံနဲ့ပြည်သူရဲ့  အကျိုးစီးပွားပဲဖြစ်ပါတယ်။ အမျိုးဘာသာ သာသနာဆိုတာလည်း နိုင်ငံနဲ့ ပြည်သူအတွက်ပါပဲ။ ထို့အတူ အမျိုးသားရေးဆိုတာကလည်း နိုင်ငံနဲ့ပြည်သူအတွက်ပါပဲ။ သို့သော်လည်း ရည်မှန်းချက်တူသော်လည်း သူ့ဘက်ကိုယ့်ဘက်၊ သူ့လူကိုယ့်လူ၊ အရောင်အသွေး၊ အုပ်စုတွေ တစ်ဖက်သတ်ကွဲပြားနေခြင်းဟာ ကိုယ့်နိုင်ငံကို၊ ကိုယ့်ပြည်သူကို၊ ကိုယ့်ဘာသာကို ကောင်းကျိုးများစေမလား၊ ဆိုးကျိုးများစေမလားဆိုတာ ခန့်မှန်းနိုင်ပါတယ်။

ဗုဒ္ဓဘာသာဆိုတာ မြန်မာနိုင်ငံသားအများစုရဲ့  နှလုံးသည်းပွတ်ဖြစ်ပါတယ်။ ကိုးကွယ်ရာဘာသာရေးနဲ့ ဆက်စပ်ပတ်သက်နေတဲ့ ပြဿနာတစ်ရပ်ဖြေရှင်းရာမှာ ထိပ်တိုက်ရင်ဆိုင်ဖြေရှင်းခြင်း၊ အမြစ်ပြတ်ဖယ်ရှားခြင်းတွေကြောင့် ဖြစ်နေဆဲပြဿနာတစ်ကို ပြေလည်သွားစေဖို့ထက် အထင်အမြင်လွဲမှုတွေ၊ ပြဿနာ ပိုမိုကြီးမားမှုတွေအပြင် ပတ်ဝန်းကျင်က မိမိတို့ကိုးကွယ်ရာဘာသာအပေါ် နားလည်မှု ပိုမိုလွဲမှားစေပါလိမ့်မယ်။ သွေးထိုးလိုသူများအတွက်လည်း အခွင့်ကောင်းရသွားစေမှာ အမှန်ပဲဖြစ်ပါတယ်။ ပြဿနာတစ်ရပ်ဆိုသည်မှာလည်း တစ်ဦးတစ်ယောက်နဲ့သာ ဆိုင်တဲ့ကိစ္စရပ်များရှိနိုင်သလို အများနဲ့ဆိုင်တဲ့၊ အဖွဲ့အစည်းနဲ့ဆိုင်တဲ့ ကိစ္စရပ်များလည်း ဖြစ်နိုင်ပါတယ်။ တစ်ဦးတစ်ယောက်တည်းကိစ္စကို ဖြေရှင်းရာမှာလွယ်ကူပြီး ကောင်းကျိုး ဆိုးကျိုး သက်ရောက်မှုနည်းနိုင်ပေမယ့် အများနဲ့ဆိုင်တဲ့၊ လူ့အဖွဲ့အစည်းနဲ့ဆိုင်တဲ့ ကိစ္စရပ်တွေမှာတော့ ဖြေရှင်းဖို့ ခက်ခဲနိုင်ပါတယ်။ ရေရှည်အကျိုးသက်ရောက်မှုတွေ၊ အကျိုးဆက်တွေလည်း ကြီးမားနိုင်ပါတယ်။ လတ်တလော အကျိုးစီးပွားထက် ရေရှည်အတွက် ကြည့်ကြရမှာ ဖြစ်ပါတယ်။

လျော့နည်းစေဖို့လို

ဘာသာရေးနဲ့ပတ်သက်တဲ့ တင်းမာမှုအရှိန်ဟာ ပိုမိုမြင့်တက်လာမယ့် အခြေအနေမှာ တွေ့မြင်နေရပါတယ်။ ၂၀၂၀ ရွေးကောက်ပွဲအတွက် ယှဉ်ပြိုင်ရာမှာ ဥပဒေအရပေးအပ်ထားတဲ့ လွတ်လပ်မှု၊ တရားမျှတမှုတွေနဲ့ ယှဉ်ပြိုင်ကြပါ။ နိုင်ငံနဲ့ပြည်သူ့အကျိုးဆောင်ရွက်မှုတွေကို ပြည်သူတွေက ထောက်ခံကြမှာပါ။ ရေရှည်လည်း ယုံကြည်ကြမှာပါ။ နိုင်ငံရေးရေ ရှည်ရပ်တည်ဖို့ဆိုရင် ဘာသာရေးကို နိုင်ငံရေးအတွက် အသုံးမချသင့်ပါဘူး။ ဒါ့အပြင် လတ်တလောဖြစ်ပွားနေတဲ့ ဘာသာရေးဆိုင်ရာတင်းမာမှုတွေ အမြန်ဆုံးလျော့နည်းအောင် ဆောင်ရွက်ကြဖို့လည်း လိုအပ်နေပါတယ်။ ဒါမှလည်း လူထုအတွင်း ဘာသာရေးနဲ့ ပတ်သက်တဲ့ အုပ်စုကွဲနေတာတွေ၊ ဆဲဆိုပုတ်ခတ်နေတာတွေကို လျော့နည်းစေမှာပါ။

မြန်မာနိုင်ငံရဲ့စနစ်အပြောင်းအလဲမှာ စိန်ခေါ်မှုတွေများပြားနေဆဲ အခြေအနေဖြစ်ပါတယ်။ ဖြေရှင်းရမယ့်ကိစ္စတွေ၊ တိုးတက်အောင်လုပ်ရမယ့်ကိစ္စတွေ၊ ခိုင်မာအောင်တည်ဆောက်ရမယ့်ကိစ္စတွေ ရှိနေပါတယ်။ ဒီလိုအချိန်မှာ ပြဿနာလျော့နည်းလေလေ တိုးတက်အောင်လုပ်ရမယ့်ကိစ္စတွေကို အချိန်ပေး ပိုမိုလုပ်ဆောင်နိုင်လေ ဖြစ်ပါလိမ့်မယ်။ ပြောင်းပြန်အားဖြင့် ဖြေရှင်းရမယ့်ပြဿနာတွေ ပိုမိုများပြားလာလေ တိုးတက်အောင် လုပ်ရမယ့်ကိစ္စရပ်တွေမှာ အားနည်းလာလေဖြစ်မှာ သေချာပါတယ်။ ဒါဆိုရင်တော့ ဘုတ်ကောင်များသွားသလို နောက်ကိုပဲ သွားနေပါလိမ့်မယ်။ ရှေ့ကိုမရောက်တော့ပါဘူး။ အထူးသဖြင့် အကဲဆတ်လွန်းတဲ့ ကိုးကွယ်ရာဘာသာကို နိုင်ငံရေးအတွက်အသုံးမပြုကြဖို့ အထူးမေတ္တာရပ်ခံလိုပါတယ်။

နောင်အနှစ် ၂၀ လောက်ကြာတဲ့အခါ ယနေ့ မိမိတို့ရဲ့သမိုင်းကို ပြန်လည်ဖတ်ရှုချင်ပါတယ်။ အဲဒီအချိန်မှာ ယနေ့ လုပ်ရပ်များဟာ မှန်ခဲ့သလား မှားခဲ့သလားဆိုတဲ့ အကျိုးဆက်များကို သိရှိချင်လို့ပါပဲ။ လုပ်သင့်၏ မလုပ်သင့်၏ဆိုတာ ကိုယ်ပိုင်စဉ်းစားတွေးခေါ်နိုင်စွမ်း၊ ဝေဖန်သုံးသပ်နိုင်စွမ်း၊ ဆုံးဖြတ်နိုင်စွမ်းတို့နဲ့သာ သက်ဆိုင်နေပါလိမ့်မယ်။

သိန်းထွန်း (IR)