News

POST TYPE

PERSPECTIVE

အမိုးလုံသော ဘဝများဆီသို့
19-Jun-2019
ယိုပေါက်များစွာအောက်တွင် ခိုလှုံနေရပါသော အမိုးမလုံသော အိမ်လေးထဲမှဘဝများကို ကျွန်တော်တို့တစ်တွေ မြင်ဖူးကြပါ၏လော။ လုံခြုံမှုများကို ဆာလောင်နေတတ်ကြပါသော ဘဝများကိုရော ကျွန်တော်တို့တစ်တွေ သတိထားမိကြပါ၏လော။

ပြည့်စုံခြင်းများကို လက်လှမ်းမမီသေးသောအချိန်များတွင် မပြည့်စုံခြင်းများကိုပင် ပျော်စရာတစ်ခုဖြစ်အောင် ပြုလုပ်နိုင်ကြဖို့ရန် လိုအပ်လှပါသည်။ ကျွန်တော်တို့သည် တွေ့ကြုံခံစားခဲ့ရပါသော ဒုက္ခတရားများကို ရယ်စရာဟာသတွေအဖြစ် ပြောင်းလဲဖန်တီးကြိုးစားသင့်ပေသည်။ ဒုက္ခတရားများ၏ ဆင်းရဲခြင်းများကို တစ်နည်းနည်းဖြင့် သက်သာရာသက်သာကြောင်း ရှာဖွေကြံဆသင့်သည် မဟုတ်ပါလော။

ဒုက္ခဆိုသည်မှာ ဆင်းရဲခြင်းဖြစ်ပေသည်။ ဆင်းရဲသောသူများအဖို့မှာကား ပင်ပန်းခြင်းကို ကြောက်ရွံ့နေ၍မရနိုင်ပါပေ။ ဆင်းရဲခြင်းနှင့်ညီမျှသော ပင်ပန်းခြင်းများကိုအနိုင်ယူ၍ ချမ်းသာခြင်းများဆီသို့ သွားရောက်နိုင်ရန် ကျွန်တော်တို့တစ်တွေ ကြိုးစားရပေမည်။ ဒုက္ခတရားများကို ကြံ့ကြံ့ခံ ဖြတ်သန်းနိုင်ဖို့ရန်နှင့် ဆင်းရဲခြင်းများကို ဟာသတွေအဖြစ် ပြန်ပြောနိုင်ကြဖို့ရန် အထူးကြိုးစားကြရပေမည်။

ဒုက္ခများကြားတွင် ရှင်သန်ခဲ့ရသည့်ဘဝများဆိုသည်မှာ ပြန်ပြောပြန်လွမ်းကြသည့်အခါ ဟာသတွေအဖြစ် ရှိနေမည်မှာ အမှန်ပင်ဖြစ်သည်။ ဒုက္ခများကြားတွင် တွေ့ရှိခံစားခဲ့ရပါသော နွေးထွေးမှုများသည်ကား နှလုံးသားပေါ်တွင် ကမ္ပည်းထိုးခဲ့ရသည့် မေတ္တာအက္ခရာများပင် ဖြစ်ပေသည်။ လူသားတိုင်းတွင် မေ့မရနိုင်သော ဒုက္ခတစ်မျိုးမျိုးတော့ ရှိခဲ့ကြပေမည်။ ဒုက္ခများစွာထဲတွင် အမိုးမလုံစွာနေထိုင်ခဲ့ရသော ဒုက္ခသည်ကား အဆိုးဆုံးဖြစ်မည်ဟု ထင်ပါသည်။

မေ့ပစ်လို့မရပါသော ကျွန်တော့်ဘဝ၏ အတိတ်အကြောင်းအရာများထဲတွင်လည်း အမိုးမလုံစွာနေခဲ့ရပါသောအချိန်များ ရှိခဲ့ပေသည်။ ကျွန်တော်တို့၏နေအိမ်လေးသည် အိမ်ဟုခေါ်ဆိုနိုင်ရုံကလွဲလျှင် ခေါင်းမိုး လုံးဝ မရှိခဲ့ပါပေ။ သို့သော် ကျွန်တော်တို့၏နေအိမ်လေးသည် နွေးထွေးအေးမြသော လုံခြုံမှုများရှိခဲ့ပေသည်။ နွေးထွေးမှုတွေ ပြည့်လျှံနေသော တစ်မိုးအောက်ဘဝများသည် သွေးသောက်အိမ်ဟု ဆိုချင်မိပေသည်။ ရန်သူမရှိသောဘဝများနှင့် ပြည့်စုံပျော်ရွှင်မိကြသော မိသားစုများသည်ကား အမိုးလုံသောဘဝများဟု တစ်မျိုးအားဖြင့် ဆိုချင်မိပေသည်။

အမိုးမလုံသော အိမ်လေးတစ်လုံးထဲတွင် အမေရယ်၊ ကျွန်တော်ရယ်၊ ညီမလေးသုံးယောက်နှင့် ညီလေးတစ်ယောက်တို့ အတူတကွ နေထိုင်ခဲ့ရပေသည်။ ကျွန်တော်တို့၏နေအိမ်လေးသည် ခေါင်မိုးလုံးဝမရှိတော့သောအိမ်သာ ဖြစ်ပါသည်။ ခေါင်မိုးမရှိသော ကျွန်တော်တို့၏အိမ်လေးသည် ထူးခြားစွာပဲ တံစက်မြိတ်မှာက အမိုးနည်းနည်းလုံလေသည်။ တံစက်မြိတ်သာ အမိုးနည်းနည်းမျှလုံနေသော ကျွန်တော်တို့၏အိမ်လေးသည် မေတ္တာတရားတို့ဖြင့် နွေးထွေးလုံခြုံခြင်းများနှင့် ပြည့်စုံ၍နေပေသည်။ သို့သော် အမိုးလုံသောအိမ်လေးတစ်လုံးကိုမူ ကျွန်တော်တို့ လိုချင်တောင့်တမိပေသည်။ ခေါင်မိုးရှိသော အိမ်လေးတစ်လုံးကို ပိုင်ဆိုင်ချင်မိပါသည်။

ခေါင်မိုးမရှိသော အိမ်လေးထဲမှာနေ၍ ကျွန်တော်တို့မိသားစုသည် ကြယ်တွေကို အတူတကွ ရေတွက်ဖူးခဲ့ကြပါသည်။ လမင်းကြီးဆီက ထမင်းဆီဆမ်းကို ရွှေလင်ပန်းနှင့်ထည့်ကျွေးဖို့ ပူဆာဖူးခဲ့ပေသည်။ ကြယ် တွေကြွေကျသည်ကို မြင်ရသောအချိန်တိုင်း လိုသောဆုများတောင်းခဲ့ကြပါသည်။

ကျွန်တော်တို့သည် ခေါင်မိုးမရှိသောအိမ်လေးထဲတွင် ပျော်ရွှင်မှုများဖြင့် ည၏အေးချမ်းဆိတ်ငြိမ်မှု အလှတရားများကို ခံစားခွင့်ရခဲ့ပေသည်။ မပြည့်စုံသော်လည်း မေတ္တာတရားတို့ထုံမွှမ်းထားပါသော အိမ်လေးထဲမှာပင် နေထိုင်ကြရင်း ခေါင်မိုးမရှိသောအဖြစ်ကို တစ်ခါတစ်ရံ မေ့နေခဲ့ကြပေသည်။ ခေါင်မိုးမရှိသော ဝမ်းနည်းမှုများကို တစ်ခါတလေ မေ့ပစ်နိုင်ခဲ့ကြပေသည်။ သို့သော် လုံးဝမေ့ထားနိုင်သည်တော့ မဟုတ်ခဲ့ကြပါပေ။

နွေရာသီမျိုးတွင် အမိုးမလုံသော ကျွန်တော်တို့၏အိမ်လေးထဲသို့ လေနုအေးအေးလေးများလည်း တိုးဝှေ့တတ်ပါသည်။ နေခြည်နွေးနွေးလေးများလည်း ဖြန့်ကြက်နေရာယူတတ်ပေသည်။ ရောင့်ရဲမှုနှင့် မပြည့်စုံခြင်းကြားတွင် ကြီးထွားရှင်သန်ခဲ့ရသော ကျွန်တော်တို့၏ အမိုးမလုံသော အိမ်လေးသည် ပျော်ရွှင်မှုအချို့ကိုလည်း ပေးတတ်ပေသည်။

“မိုးရွာတုန်း ရေခံ”ဟူသော ရှေးပညာရှိများ၏ ဆိုရိုးစကားများလည်း ကြားဖူးကြပေမည်။ သို့သော် အမိုးမလုံသောအိမ်လေးထဲတွင် နေခဲ့ရပါသော ကျွန်တော်တို့၏ဘဝသည်ကား ထိုဆိုရိုးစကားနှင့် ခြားနားချက်ပင်ဖြစ်ပေလိမ့်မည်။

မိုးရွာသောအချိန်အခါမျိုးတွင် အမေ့လက်ထဲ၌ ဇလုံလေးများကို ကိုင်ထားတတ်ပေသည်။ ညီမလေးများနှင့် ညီလေး၏လက်ထဲတွင်လည်း ဇလုံလေးများကို ကိုင်ထားရပေသည်။ မိုးယို၍မိုးစက်ကျသောနေရာများတွင် လက်လှမ်းမီရာကြည့်ပြီး ဇလုံလေးများကို ထိုးခံကြရင်း မိုးလင်းခဲ့ရပေါင်းများစွာ ရှိခဲ့ပါသည်။ အမိုးနည်းနည်းမျှလုံပါသော တံစက်မြိတ်သည်လည်း လေအဝေ့နှင့်အတူပါတတ်သော မိုးရေစက်များကိုတော့ အကာအကွယ်မပေးနိုင်ပါချေ။

တစ်နည်းအားဖြင့် မိုးရွာတုန်း ရေခံခဲ့ကြပေသည်။ သို့သော် သောက်သုံးရန်နှင့်သုံးစွဲရန်ကား မဖြစ်နိုင်ခဲ့ပါပေ။ စိုရွှဲမှုကို အထိုက်အလျောက် ကာကွယ်နိုင်ရန်သာဖြစ်ပေသည်။ အမိုးမလုံသောအိမ်လေးထဲသို့ ယိုကျလာသော မိုးစက်လေးများကို ဇလုံလေးများဖြင့် ထိုးခံရသည်ကိုပင် ပျော်စရာတစ်ခုအဖြစ် ထင်မြင်မိခဲ့ကြပေသည်။ တစ်ခါတလေ ကျွန်တော်တို့သည် မှားယွင်းသော ရင်ခုန်မှုမျိုးကိုပင် နှစ်သက်သလို ဖြစ်ခဲ့ရပေသည်။ အမိုးမလုံသောအိမ်လေးထဲတွင် ကြုံရာကြည့်၍ ပျော်ရွှင်ရသောနေ့ရက်များသည် အတိတ်၌ နာကျင်ရသော်လည်း ပစ္စုပ္ပန်ဘဝတွင် ဟာသများအဖြစ်သာ ရှိတော့ပေသည်။ ကျွန်တော်တို့မိသားစုသည် အမိုးမလုံသော အိမ်လေးထဲမှတစ်ဆင့် ဆောင်းရာသီမျိုးတွင်လည်း နှင်းဖွဲဖွဲကျလာသည်ကို ကြည့်ရသည်မှာ ကြည်နူးဖွယ်ရာကောင်းလှပေသည်။

ငွေနှင်းမှုန်တို့၏ လတ်ဆတ်အေးမြသော အထိအတွေ့များကြောင့် မပြည့်စုံသောအမိုးများကိုပင် တစ်ခါတစ်ရံ ကျေးဇူးတင်တတ်ခဲ့ကြပါသည်။ စောင်ထူထူမရှိသော်လည်း နှင်းစက်များနှင့် ထိတွေ့အိပ်စက်ရသည်ကို ကျွန်တော်တို့မိသားစု နှစ်သက်ခဲ့ကြပါသည်။ နှင်းစက်များနှင့် များများ ထိတွေ့မိလေ မိသားစု၏ နွေးထွေးမှုကိုယ်ငွေ့ကို ခံစားသိရှိရလေဖြစ်သည်။ ဖျင်ကြမ်းစောင်နှင့် ဂုံနီအိတ်တို့ဖြင့် ရောပြွမ်းချုပ်စပ်ထားသော အနွေးထည်စောင်အောက်တွင် ရှူသွင်းခဲ့ရသောလေထုသည်ကား မိသားစုရနံ့များဖြင့် ဖုံးလွှမ်းလို့ထားပေသည်။ ကျွန်တော်တို့၏ မပြည့်စုံသော ဘဝအတွက်လည်း ရောင့်ရဲမှုဖြင့်နေတတ်ခဲ့ရခြင်းသည်ပင် ပျော်စရာဖြစ်ခဲ့ရပေသည်။

ငွေတွင်းနက်သောဘဝများကို ဖြတ်သန်းရှင်သန်ရသောအချိန်မျိုးတွင် အမိုးလုံသောဘဝကို ပို၍မက်မောမိပေသည်။ ကျွန်တော်တို့မိသားစုသည်လည်း အမိုးလုံသော အိမ်လေးတစ်လုံးကို တကယ် လိုချင်မိခဲ့ကြပါသည်။ အမိုးလုံသောအိမ်လေးထဲတွင် ပြည့်စုံမှုများဖြင့် နေလိုကြပေသည်။

ကျွန်တော်တို့တစ်တွေသည် နေပူပူထဲကို သွားရသည့်အချိန်အခါ မျိုးများတွင် ထီးတစ်လက်ကို တောင့်တတတ်ပေသည်။ မိုးရွာထဲကို လမ်းလျှောက်ရသောအချိန်မျိုးများတွင်လည်း ထီးတစ်လက်ကို မျှော်လင့်မိခဲ့ကြပေသည်။ ကျွန်တော်တို့ တောင့်တမျှော်လင့်မိပါသော ထီးတစ်လက်သည် ကျွန်တော်တို့၏ဘဝနှင့် ထိုက်တန်မှုဟုဆိုရသည်ထက် လိုအပ်မှုတစ်ခုအနေနှင့်သာဖြစ်ပေသည်။

နေပူပူထဲမှာဖြစ်ဖြစ်၊ မိုးသဲသဲထဲမှာဖြစ်ဖြစ် ထီးတစ်လက်ထက်သာ လွန်ကောင်းမွန်သော အမိုးအကာအရံတစ်ခုကို ပို၍လိုချင်မိကြပါသည်။ သို့သော် ကျွန်တော်တို့၏လက်ရှိဘဝသည် စိတ်ကူးယဉ်သောမျှော်လင့်မှုထက် လက်တွေ့ကျသော အမိုးသည်သာ အကောင်းဆုံးဖြစ်ပေလိမ့်မည်။

ကျွန်တော်တို့တစ်တွေသည် ရောင့်ရဲ၍လည်း ချမ်းသာမှုဖြစ်အောင် နေထိုင်တတ်ရပေမည်။ ပြည့်စုံခြင်းဖြင့်လည်း ချမ်းသာမှုရရှိနိုင်အောင် ရှာဖွေကြရပေမည်။ အမိုးမလုံသောအိမ်လေးထဲတွင် နေခဲ့ရပါသော ကျွန်တော်တို့၏ စိတ်ဓာတ်များသည် ခိုင်မာသင့်သည်ထက် ခိုင်မာခဲ့ကြပေသည်။ အမိုးမလုံသောအိမ်လေးထဲမှ လှမ်းမြင်ခဲ့ရပါသော အလင်းတန်းများသည် ကျွန်တော်တို့၏ ပျော်ရွှင်မှုရသများသာဖြစ်သည်။ အမိုးမလုံသောအိမ်လေးထဲမှာ ကျခဲ့ရသော မျက်ရည်စက်များကိုကား ဇလုံလေးများဖြင့် ထိုးခံထားလို့ မရနိုင်ခဲ့ကြပါပေ။

အမိုးမလုံသောအိမ်လေးထဲတွင် ကျခဲ့ကြပါသော မျက်ရည်များသည်ကား ဘဝ၏ မျက်ရည်စစ်စစ်များသာဖြစ်ကြောင်းနှင့် ဘဝ၏နားခိုရာစစ်စစ် ဖြစ်နိုင်ပါသော အမိုးလုံသောဘဝများကို လူသားတိုင်းရရှိနိုင်ပါစေလို့ မျှော်လင့်ရင်း ရေးသားလိုက်ရပါသည်။

ခိုင်မြင့်ဝေ