News

POST TYPE

OPINION

YBS အရေးတော်ပုံအလွန် ယူနီကုဒ်တော်လှန်ရေး
03-Oct-2019

YBS ပြီးရင် ယူနီကုဒ်အပြောင်းအလဲဟာ နေ့စဉ်လူမှုဘဝထဲက အသားကျပြီးသလိုဖြစ်နေတဲ့ အခြေခံစနစ်တစ်ခု အလေ့အထတစ်ခုကို သတ်မှတ်စံတစ်ခုနဲ့ လုံးဝပြောင်းလဲပစ်ဖို့ ကြိုးစားတဲ့ NLD အစိုးရရဲ့ သိသာထင်ရှားတဲ့ ဒုတိယမြောက် ကြိုးပမ်းမှုတစ်ရပ်ပါပဲ။ မြန်မာနိုင်ငံကို နိုင်ငံတကာရဲ့အဆင့်အတန်းနဲ့ လိုက်မီပြီး လက်ရှိ အဆင့်အတန်းကနေ ရုန်းထဖို့ ကြိုးပမ်းလုပ်ဆောင်ရမယ့်အလုပ်တွေ အများကြီးထဲမှာ အခုလို စံချိန်၊ စံညွှန်းတွေသတ်မှတ်ပြီး အခြေခံစနစ်တွေ ပြောင်းလဲရာမှာလည်း မဖြစ်မနေလုပ်ကြရမယ့်လုပ်ငန်းပဲဖြစ်ပါတယ်။ သို့သော်လည်း လူ့အဖွဲ့အစည်းတစ်ခုမှာ နေ့စဉ်နဲ့အမျှ ထိတွေ့ကျင့်သုံးလျက်ရှိလို့ ယဉ်ပါးနေပြီးသား အမြစ်တွယ်နေတဲ့ အလေ့အထတစ်ခု စံတစ်ခုကို လုံးဝဖယ်ရှားပစ်ပြီး လုံးဝအသစ်စနစ်တစ်ခုနဲ့ အစားထိုးခြင်း သို့မဟုတ် ယခင်ရွေးချယ် စရာတွေထဲက တစ်ခုတည်းကို စံသတ်မှတ်ပြီး ပုံသေအသုံးပြုစေခြင်းဟာ အစိုးရအတွက် လွန်စွာခက်ခဲပြီး စိန်ခေါ်မှုကြီးတဲ့လုပ်ငန်းပဲဖြစ်ပါတယ်။

YBS တုန်းကတော့ ဒါမှမစီးရင် အခြားစီးစရာလည်းမရှိတာကြောင့် လူ့အဖွဲ့အစည်းက မဖြစ်မနေအားထုတ်ပြီး စနစ်နဲ့ အဆင်ပြေအောင်ကြိုးစား ပြင်ဆင်ကြပါတယ်။ အခုတော့ အသားကျနေပြီဖြစ်ပါတယ်။ အခုလို အစိုးရက မြန်မာတစ်နိုင်ငံလုံး ယူနီကုဒ်သုံးစွဲဖို့ စတင်လိုက်ချိန်မှာတော့ ယခင် YBS တုန်းကလို အခြေအနေမျိုးနဲ့မတူတာကြောင့် မြန်မာစာရေး သားကြရာမှာ မူလသုံးစွဲလက်စ ဇော်ဂျီဖောင့်ကို ကိုင်စွဲ ခုခံရေး ဇော်ဂျီ တော်လှန်ရေးလှုံ့ဆော်သံတွေ “ယူနီကုဒ်ပြောင်းလဲမည့်အကြံ ဒို့လက်မခံ” စတဲ့ အသံဗလံတွေ လူ့အသိုင်းအဝိုင်းမှာ ကြားနေရပါတယ်။ ဒီတစ်ချီမှာတော့ အစိုးရအနေနဲ့ YBS လို ယူနီကုဒ်စာလုံးစနစ်ကို လူတွေနဲ့ အသားကျသွားအောင် ဘယ်လိုလုပ်နိုင်မလဲဆိုတာ စောင့်ကြည့်ရပါမယ်။ ရှေ့ဆက် ယူနီကုဒ်စနစ်ကို တွင်ကျယ်ပြီး အသားကျအောင် လုပ်နိုင်၊ မလုပ်နိုင် အခုခန့်မှန်းနိုင်ခြင်း မရှိသေးပေမယ့် YBS တုန်းကလိုပဲ ယူနီကုဒ်ပြောင်းလဲသုံးစွဲရေးအတွက် လိုအပ်တဲ့ ကြိုတင်ပြင်ဆင်မှုတွေ၊ ထိရောက်တဲ့ လှုံ့ဆော်မှုတွေ အားနည်းလွန်းတာကတော့ အထင်အရှားတွေ့မြင်နေကြရပါတယ်။ 

ယူနီကုဒ်စာလုံးစနစ်ကို နိုင်ငံရဲ့ ရုံးသုံး၊ အများသုံးအဖြစ် မဖြစ်မနေ ပြောင်းလဲသုံးစွဲကြဖို့ ကြိုတင်အသိပေးကြေညာ တိုက်တွန်းမှုတွေ ရှိခဲ့ပေမယ့် အခုလို တစ်တိုင်းတစ်ပြည်လုံး တစ်ချိန်တည်း တစ်ပြိုင်တည်း စတင်သုံးစွဲဖို့ သတ်မှတ်ထားတဲ့နေ့ရက်ကို ရောက်လာတဲ့တိုင်အောင် အစိုးရရဲ့ အသိပေးကြေညာချက်ဟာ လူထုအတွက် အသိတရားတစ်ရပ်အဖြစ် ထိရောက်စွာ ပြောင်းလဲပေးလာနိုင်တာ မတွေ့ရသလို ယူနီကုဒ်ပြောင်းလဲသုံးစွဲဖို့ ပြုလုပ်နေတဲ့တိုက်တွန်းမှုဟာလည်း ထိရောက်တဲ့လှုံ့ဆော်မှုတစ်ရပ် ဖြစ်မလာသေးတာ တွေ့ရပါတယ်။ တကယ်တော့ အထက်မှာ ကျွန်တော်တင်ပြခဲ့သလို နေ့စဉ်နဲ့အမျှ ယဉ်ပါးနေပြီဖြစ်တဲ့ နေ့စဉ်ဘဝထဲမှာ အမြစ်တွယ်သလိုဖြစ်နေတဲ့ လူတွေရဲ့ အလေ့အထ အစွဲအလမ်းတစ်ခုကို ပြောင်းလဲပစ်ဖို့ဆိုတာ သာမန်သီချင်းတစ်ပုဒ်ရေးဖွဲ့ပြီး ရုပ်သံကနေ ထုတ်လွှင့်လှုံ့ဆော်နေရုံနဲ့ တော့ အောင်မြင်နိုင်တဲ့ လှုံ့ဆော်မှုမဖြစ်နိုင်တာ အသေအချာပဲဖြစ်ပါတယ်။ ဒီနေရာမှာ သတိထားမိတဲ့အချက်ကတော့ အစိုးရဟာ ကြိုတင်ပြင်ဆင်မှု အားနည်းသလို ဖြစ်ပေါ်လာနိုင်တဲ့ ရုန်းကန်ဆန့်ကျင်မှု တစ်နည်းပြောရရင် ဒီအပြောင်းအလဲကို လက်တွေ့အကောင်အထည်ဖော်ရာမှာ ကြုံတွေ့လာရနိုင်တဲ့ အတားအဆီး အခက်အခဲတွေကို ကြိုတင်တွက်ချက် မှန်းဆထားပြီး ဖြေရှင်းပေးနိုင်မယ့်ပြင်ဆင်မှုတွေ လုပ်ဆောင်ထားနိုင်ခြင်းမရှိတာပဲ ဖြစ်ပါတယ်။ ဒီနေရာမှာ အပြောင်းအလဲ လုပ်ဆောင်မှုအတွက် အခက်အခဲဆိုတာ အစိုးရအတွက်ကိုပဲ ပြောတာမဟုတ်ပါဘူး။ လက်တွေ့လိုက်ပါပြောင်းလဲရမယ့် ပြည်သူတွေအနေနဲ့ ကြုံတွေ့ရနိုင်တဲ့ အခက်အခဲတွေကို ပြောတာဖြစ်ပါတယ်။ ကျွန်တော်တို့နိုင်ငံမှာ ပြီးခဲ့တဲ့အပြောင်းအလဲ အဖြစ်အပျက်တွေကို ပြန်ကြည့်ရင် အစိုးရအာဏာပိုင်တွေက အမိန့်တွေ၊ ကြေညာချက်တွေ၊ ဥပဒေတွေထုတ်ပြန်ပြီး အပြောင်းအလဲတွေကို ရှေ့ကလုပ်သွားတယ်။ နောက်က ပြည်သူက အဲဒီအပြောင်းအလဲကို လိုက်လုပ်ဖို့ လိုအပ်တဲ့ အသိပညာ နည်းနာနိဿယကအစ ကိုယ့်ဘာသာရှာဖွေပြီး ဖြေရှင်းရင်း အဆင်ပြေသလို ရင်ဆိုင်လိုက်ကြရတာတွေချည်းပဲဖြစ်ပါတယ်။ အဆိုးဆုံးကတော့ ကိုယ့်နောက်ကနေ လိုက်လုပ်ပေးရမယ့်အပြောင်းအလဲရဲ့ အကျိုးတရား၊ ကောင်းကျိုးချမ်းသာကို ပြည်သူအများစုက ဂဃနဏ နားမလည်ဘဲ ယောင်တောင်တောင်နဲ့ နောက်ကလိုက်လုပ်ကြရတာပဲ ဖြစ်ပါတယ်။ 

အခု ယူနီကုဒ်အပြောင်းအလဲဆိုရင် ပြည်သူအများက လေးစားကြည်ညိုတဲ့ နိုင်ငံတော်အတိုင်ပင်ခံကိုယ်တိုင် ဗီဒီယိုသတင်းစကား ထုတ်လွှင့်ပြီး ယူနီကုဒ်စာလုံးစနစ်ကို အများပြည်သူအနေနဲ့ လိုက်နာကျင့်သုံးဖို့ တိုက်တွန်းလာတဲ့အထိ အားစိုက်လှုံ့ဆော်တာကို တွေ့ရပါတယ်။ သို့သော်လည်း လောလောဆယ် ပြည်သူအများစုအနေနဲ့ နားလည်လိုက်တာကတော့ ယူနီကုဒ်ပြောင်းတဲ့ကိစ္စဟာ နိုင်ငံရေးအရ အစိုးရရဲ့ ပြုပြင်ပြောင်းလဲ ရေးလုပ်ငန်းတစ်ခုကို ထောက်ခံကူညီတဲ့အနေနဲ့ ဝိုင်းပြီးပြောင်းလိုက်ကြ မလားဆိုတဲ့သဘောပဲ ဖြစ်နေပါတယ်။ ဒီအချိန်မှာ အစိုးရကို သဘောမကျဖြစ်နေတဲ့ ပြည်သူတွေက ဘာရယ် ညာရယ် မစဉ်းစားပဲ ငါတို့ကတော့ မပြောင်းနိုင်ဘူးဟေ့ ဆိုတဲ့ အသံတွေ ကြွေးကြော်ကြပြန်ပါတယ်။ တကယ်တော့ ဒီပြဿနာတွေရဲ့ အရင်းခံဟာ အခုလို အပြောင်းအလဲလုပ်ခြင်းဟာ တိုင်းပြည်အတွက်ရော ပြည်သူတစ်ယောက်ချင်းစီအတွက်ရော ဘာကြောင့် လိုအပ်တယ်၊ ဘယ်လိုအကျိုးထူးတွေ ရနိုင်တယ်ဆိုတဲ့ အသိတရားကို မပေးနိုင်လို့ဖြစ်ရတဲ့ ပြဿနာပဲဖြစ်ပါတယ်။ တကယ်တော့ ဒီလို စာတတ်တဲ့လူတိုင်း အသိပညာအဆင့်အတန်းမရွေး နားလည်သဘောပေါက်နိုင်တဲ့နည်းလမ်းပေါင်းစုံနဲ့ ပညာရေးဝန်ကြီးဌာနကရော ပြန်ကြားရေးဝန်ကြီး ဌာနကပါ ရိုးရှင်းထိရောက်စွာ အသိပေး၊ ပညာပေးအစီအစဉ်တွေ ချမှတ်လုပ်ဆောင်နေရမှာက ယူနီကုဒ်စနစ်ပြောင်းခြင်းရဲ့ အရေးပါတဲ့ ရှေ့ပြေးလုပ်ငန်းစဉ်တစ်ခုပဲဖြစ်ပါတယ်။ အခုလည်း ပညာပေးလှုံ့ဆော်မှုတွေ ဆောင်းပါးအဖြစ်နဲ့ ဖော်ပြနေသော်လည်း ရေးသားတဲ့ နည်းပညာဆိုင်ရာ အသုံးအနှုန်းတွေများလွန်းပြီး အများစုဖြစ်သော သာမန်ပြည်သူတွေ ရှင်းရှင်းလင်းလင်းနားလည်နိုင်တဲ့ အကြောင်းပြချက် ဥပမာတွေနဲ့ ထိရောက် စွာရှင်းပြနိုင်တဲ့ အသိပေးလှုံ့ဆော်မှုတွေတော့ မဖြစ်သေးဘူးလို့ ပြောရပါလိမ့်မယ်။ ဒီကနေ့ အစိုးရက နေပြည်တော်မှာကျင်းပတဲ့ ယူနီကုဒ် တရားဝင်စတင်သုံးစွဲခြင်း အခမ်းအနားမှာ နိုင်ငံတော်အတိုင်ပင်ခံရှင်းပြသွားတဲ့ အချက်တွေဟာအတော်လေးရိုးရှင်းပြီး ပြည့်စုံကောင်းမွန်ပါတယ်။ သတင်းနည်းပညာခေတ်၊ အင်တာနက်အွန်လိုင်းခေတ်ကြီးမှာ စံအဖြစ်သုံးတဲ့ အများသုံးစာလုံး သတ်မှတ်သုံးစွဲနိုင်ခြင်းမရှိလို့ သူများနိုင်ငံတွေနဲ့ ယှဉ်ရင် ဘာတွေဆုံးရှုံးနေတယ်၊ ဘာတွေမလုပ်နိုင်ဘူး၊ အခုလို ယူနီကုဒ်ကို စံထားသုံးစွဲလိုက်ရင် ဘာတွေအကျိုးရှိမယ်၊ ဘာတွေသုံးစွဲနိုင်မယ်ဆိုတာကို ထည့်သွင်းရှင်းပြသွားတာဖြစ်ပါတယ်။ အမှန်တော့ ယူနီကုဒ်သုံးဖို့ တိုက်တွန်းတဲ့သီချင်းတွေ၊ ဗီဒီယိုစကားပြော တိုက်တွန်းချက်တွေအစား ဒီလိုအချက် မျိုးတွေကိုသာ လိုတိုရှင်း ထုတ်လွှင့်ပေးသင့်တာဖြစ်ပါတယ်
။ ဒီအချက်မျိုးတွေကိုပဲ အစကတည်းက တိုတိုနဲ့ရှင်းရှင်း ကြိမ်ဖန်များစွာပြောပြီး နှိုးဆော်လာဖို့ လိုတာပဲဖြစ်ပါတယ်။ အမှန်တော့ ယူနီကုဒ်စာလုံးပြောင်းသုံး တဲ့ကိစ္စဟာ လူညီဖို့ပဲလိုတာဖြစ်ပါတယ်။ အားလုံး တစ်ချိန်တည်း၊ တညီ တညွတ်တည်းပြောင်းသုံးလိုက်ရင် အောင်မြင်သွားမှာ အသေအချာပဲဖြစ်ပါတယ်။
အဓိကအားဖြင့် အစိုးရအနေနဲ့ စနစ်တစ်ခုပြောင်းဖို့ ကြိုးစားတိုင်း တွေ့ရတဲ့အားနည်းချက်၂ ခုကို ပြင်ဆင်နိုင်ရင် ယူနီကုဒ်ပြောင်းလဲ သုံးစွဲရေးဟာ ပိုပြီး အချိန်တိုတွင်းအောင်မြင်နိုင်မှာ ဖြစ်ပါတယ်။ ပထမတစ်ချက်က အထက်မှာ ကျွန်တော်တင်ပြခဲ့တဲ့ အသိပေးလှုံ့ဆော်မှုဖြစ်ပါတယ်။ ဒုတိယတစ်ချက်ကတော့ အစိုးရစကားကိုနားထောင်ပြီး လိုက်ပြောင်းချင်နေတဲ့ သူတွေတောင် စိတ်ညစ်နေကြရတဲ့ပြဿနာပဲဖြစ်ပါတယ်။ အဲဒါကတော့ ယူနီကုဒ်ပြောင်းလို့ ဖြစ်ပေါ်လာတဲ့ နည်းပညာဆိုင်ရာ ပြဿနာတွေအဆင် မပြေမှုတွေပါပဲ။ တစ်ယောက်ရေးထားတာတွေ နောက်တစ်ယောက်က ဖတ်မရတာ၊ ဇော်ဂျီလိုအခြားစာလုံးနဲ့ အရင်က ရေးထားတဲ့ မှတ်စုတွေ၊ စာတွေ၊ ဖုန်း လိပ်စာတွေ ဖတ်မရတာ၊ ဒါတွေကို ဖြေရှင်းနိုင်ဖို့ နည်းပညာ ကူညီထောက်ပံ့ရေးအစီအစဉ်တွေ ပြင်ဆင်ထားဖို့လိုပါတယ်။ စက်ထဲမှာ ရှိပြီးသား မှတ်တမ်း၊ မှတ်စ၊ု လိပ်စာတွေကို အလိုအလျောက် ယူနီကုဒ်ပြောင်းပေးနိုင်တဲ့ နည်းစနစ် Converter တွေကို ကြိုတင်ဖန်တီးပေးထားရမှာ ဖြစ်ပါတယ်။ 

ဒါဟာ အစိုးရဘက်က လုပ်ကိုလုပ်ပေးရမယ့်ကိစ္စ ဖြစ်ပါတယ်။ အပြောင်းအလဲတစ်ခုလုပ်တိုင်း လူတွေက ဘုမသိဘမသိ ပါဝင်လာရတာမျိုးမဟုတ်ပဲ နားလည်သဘောပေါက်မှုအပြည့်နဲ့ ပါဝင်လာတဲ့ အသိပေးလှုံ့ဆော်မှုမျိုးတွေ ပိုလုပ်ဖို့လိုပါတယ်။ အပြောင်းအလဲကို တကယ်လုပ်ချိန်မှာ ပြည်သူတွေ သေချာပေါက် ကြုံတွေ့လာရနိုင်တဲ့ အခက်အခဲတွေ၊ စိန်ခေါ်မှုတွေကို ကြိုတင်တွက်ချက်ထားပြီး ကူညီပံ့ပိုးနိုင်ဖို့ ပြင်ဆင်ထားပေးပါလို့ အစိုးရကို တိုက်တွန်းချင်ပါတယ်။ အဲဒီလိုမဟုတ်ရင်တော့ ရှေ့လာမယ့်အပြောင်းအလဲ လုပ်ငန်းစဉ်တွေ အကောင်အထည်ဖော်ရာမှာ ကောင်းတဲ့လမ်းမှန်တဲ့လမ်းကိုသွားမယ့် အပြောင်းအလဲဖြစ်ပေမယ့် မလိုအပ်ပဲ ရုန်းကန်မှုတွေ တွန်းလှန်မှုတွေနဲ့ အားကုန်ပြီး မှန်ကန်တဲ့လမ်းကနေ သွေဖည်သွားတဲ့ ဆုံးရှုံးမှုမျိုးတွေ ဖြစ်သွားနိုင်ကြောင်း သတိပေးလိုက်ပါတယ်။ 

သီဟသွေး