News

POST TYPE

OPINION

တောင်းစားချင်မိသော သစ္စာတရားများ
01-Oct-2019


စိတ်ဒဏ်ရာများဟူသည် ခံစားချက်များပြားလေ တွန်းကန် ရုန်းထွက်ဖို့ရန်အတွက် ထွက်ပေါက်နေရာများကို အမြဲရှာတတ်လေဖြစ်သည်။ခံစားထိမိသောဒဏ်ရာများနှင့်ဝေးရာသို့ ထွက်ခွာနိုင်ရန် ထွက်ပေါက်ရှာတတ်ကြပေသည်။ ထိခိုက်ခံစားရမှု ဒဏ်ရာဟူသမျှသည် အနာပျောက်သော်လည်း အမာရွတ်များမှာ ကျန်နေတတ်မြဲပင် ဖြစ်သည်။ အမာရွတ်များကို ထိမိစမ်းမိသည့်အချိန်တွေတိုင်းမှာလည်း အမာရွတ်ဖြစ်အောင် ပြုလုပ်သူကို သတိရနေမည်ဖြစ်သည်။

ဒဏ်ရာရရှိမှုတိုင်းသည် အတိတ်၏ဝဋ်ကြွေးဟု ဆိုတတ်ကြပေသည်။ သို့သော် ဒဏ်ရာရရှိမှုတိုင်းသည် အတိတ်၏ဝဋ်ကြွေးတစ်ခုတည်းကြောင့် မဖြစ်နိုင်ပါပေ။ ပစ္စုပ္ပန်တည့်တည့်မှာ လျှောက်လှမ်းမိနေသော အမှားတစ်ခုခုကြောင့်လည်း ဖြစ်တတ်ပါသည်။ ခံစားရရှိသည့်ဒဏ်ရာတိုင်းက အတိတ်ဝဋ်ကြွေးများမဖြစ်နိုင်သလို၊ စံစားရရှိသည့် ချမ်းသာမှုတိုင်းသည်လည်း အတိတ်၏ကောင်းမှုကြောင့်ဟု မဆိုနိုင်ပါပေ။ ကျွန်တော်တို့တစ်တွေ သက်ဝင်လှုပ်ရှားနေသည့် ပစ္စုပ္ပန်တည့်တည့်သည်သာ အခရာအကျဆုံး ဖြစ်ပေသည်။ တစ်နည်းအားဖြင့် ပစ္စုပ္ပန်တွင်ပြုလုပ်နေသည့် ကောင်းခြင်းဆိုးခြင်းများကပဲ ကျွန်တော်တို့၏ဘဝများကို အများဆုံးပြောင်းလဲစေနိုင်ပါသည်။

ကျွန်တော်တို့တစ်တွေသည် မိမိကိုယ်ကိုယ် အထူးလိမ်ညာတတ်ပေသည်။ မိမိကိုယ်ကိုယ် လိမ်ညာခြင်းများဖြင့် စိတ်၏ထွက်ပေါက်ကို ရှာဖွေတတ်ပေသည်။ အတိတ်ကဝဋ်ကြွေးကို ဆပ်နေရမည်မှန်းသိခဲ့ကြလျှင် ကျွန်တော်တို့တစ်တွေသည် အရာရာကိုမသိဘူးဟုသာ ငြင်းကြပေလိမ့်မည်။ ကျွန်တော်တို့တစ်တွေသည် တစ်ဦးနှင့်တစ်ဦးကြားတွင် လိမ်ညာပြောဆိုကြခြင်းများကို ခုံမင်တတ်ကြသည်။ ထို့အပြင် လိမ်ညာနေမှန်းသိသိနှင့်ပင် အမှန်တရားကို ပုံဖော်ဟန်ဆောင်နေကြခြင်းများကို ပို၍သာယာ တတ်ကြပေသည်။

အစစ်မှန်စေတနာမပါသော လောကွတ်အတုများကိုလည်း သဘောကျတတ်ပေသည်။ မဟုတ်မှန်းသိသော်လည်း ဟုတ်နိုးနိုးနှင့် ယုံကြည်မှုများကို အရဲကိုးကာ မျက်စိစုံမှိတ်၍လည်း ယုံကြည်လို့ ပေးတတ်ကြပေသည်။ တိုတောင်းလွန်းသောဘဝထဲမှာမှ ရှင်သန်မှုများကို သက်တမ်းကျုံ့စေမည့် စေတနာမဲ့သောလောကွတ်အတုများကို ကျွန်တော်တို့တစ်တွေ မယုံကြည်သင့်လှပေ။ လောက်ကွတ်အတုများဆိုသည် ဘဝစစ်စစ်၊ စေတနာ စစ်စစ်များနှင့် ရင်ဆိုင်ရသည့်အချိန်မျိုးများတွင် ဆင်းရဲခြင်းဒဏ်ရာများကိုသာ ပေးတတ်ပေသည်။ ထိုသို့ အဆိုးဒဏ်ရာများကို အများဆုံးပေးတတ်သည့် စေတနာအတုများကို ကျွန်တော်တို့တစ်တွေ ရှောင်ကြဉ်နိုင်ရမည် ဖြစ်သည်။

လိမ်ညာမှုများကို အရင်းတည်၍ ပခုံးဖက်ခင်တွယ်ကြသော ချစ်ခြင်းများသည်ကား ချိန်ကိုက်ဗုံးသီးတစ်လုံးနှင့် တူလှပေသည်။ အချိန်မရွေးပေါက်ကွဲနိုင်သော ယမ်းဘီလူးများပြည့်နှက်နေသော ဗုံးသီးတစ်လုံး၏စနစ်တံကို ပါးစပ်ဖျားဖြင့်ပင် ဆွဲနုတ်သွားနိုင်သည့် ပုံပမာပင်ဖြစ်ပေသည်။ လိမ်ညာမှုများကို အရင်းတည်လာတည်းက ခင်တွယ်လာကြသည့် ခင်မင်မှုများဆိုသည် ရေရှည်တည်တံ့နိုင်ဖို့ မရှိပေ။ အချိန်တိုတိုအတွင်းမှာပင် ပျက်စီးသွားကြမည့် ချစ်ခင်မှုသာဖြစ်သည်။ ထို့ကြောင့် ကျွန်တော်တို့တစ်တွေ၏ ချစ်ခင်တွယ်တာခြင်းများတွင် အတုယောင်မဖြစ်ဖို့ အရေးကြီးခြင်းဖြစ်သည်။

ထိုနည်းအတူပင် ဒဏ်ရာများဖြင့်ပေးဆပ်လိုက်ရသော နှလုံးသားများသည် လမ်းမှားကို ဦးတည်တတ်ပေသည်။ မိမိ၏ရည်မှန်းချက်ပန်းတိုင်နှင့် ဝေးရာဆီသို့ မှားယွင်းစွာ ခေါ်ဆောင်တတ်ပေသည်။ နာကြည်းချက်တည်းဟူသော အမုန်းဝင်္ကပါထဲတွင် ဝဲလည်၍ထွက်ပေါက်ရှာမရ ဖြစ်တတ်ပါသည်။ မစစ်မှန်သည့်ချစ်ခြင်းများဖြင့် ဘဝဟူသောဝင်္ကပါထဲမှ ရုန်းထွက်နိုင်ရန်ကား မဖြစ်နိုင်ပါပေ။ စစ်မှန်တည်ကြည်သည့် တွဲလက်များဖြင့်သာ ဘဝဟူသောဝင်္ကပါထဲက ရုန်းထွက်ကြဖို့ ပြင်ဆင်ကြရမည်ဖြစ်သည်။

ကျွန်တော်တို့တစ်တွေသည် မသိဘူးဟူသော ငြင်းဆန်ခြင်း သင်္ကေတများအားကိုးဖြင့် အမှန်တရားကို ရှာဖွေတတ်ကြပေသည်။ တာဝန်ယူခြင်း၊ တာဝန်ခံခြင်းဟူသော နွေးထွေးသည့်အပေါင်းသင်္ကေတများဖြင့် အမှန်တရားကိုရှာဖွေဖို့ရန် တွန့်ဆုတ်နေတတ်ကြပေသည်။ ခံရပါများလာခဲ့သော စိတ်ဒဏ်ရာများကို စာနာနားလည်ပေးကြရင်း ဖေးမကူညီကြရမည့်အစား ဝဋ်ကြွေးဟူသော စကားလုံးအောက်သို့သာ တွန်းပို့နေတတ်ကြပေသည်။တစ်နည်းအားဖြင့် အမှားကိုအမှားနှင့်ပေါင်းပြီး သံသရာရှည်အောင် ဆွဲဆန့်ကြခြင်းတစ်မျိုးဖြစ်ပေသည်။

ကျွန်တော်တို့တစ်တွေသည် မိမိတို့ ဆင်းရဲစွာ ခံစားခဲ့ရသော ဒဏ်ရာများကို အရင်းတည်၍ ပစ္စုပ္ပန်ကိုပြုပြင်ကြရမည့်အစား သူလည်း ငါ့လိုခံစားစေဆိုသည့် စိတ်မည်းညစ်မျိုးများကိုသာ များသောအားဖြင့် အားထုတ်တတ်ကြပေသည်။ တစ်နည်းအားဖြင့် ကျွန်တော်တို့တစ်တွေသည် မိမိတို့ကိုယ်တိုင်ခံစားခဲ့ရသည့် ခက်ခဲကြမ်းတမ်းမှုများကို တစ်ပါးသူတို့မခံစားရလေအောင် ကူညီဆောင်ရွက်ပေးနိုင်မှုမှာ အားနည်းလွန်းကြပေသည်။ မိမိတို့ခံစားခဲ့ရသည့်အချိန်များတွင် ဘုရားတရင်း သစ္စာဆိုခဲ့ကြမည့် ကောင်းသောဆုတောင်းခြင်းများကိုပင် မေ့လျော့စွာ အမိုက်တရားဘက်ကို ပို့တတ်ကြပါသည်။ ခံစားရသမျှသော ဒဏ်ရာမှန်သမျှကို ဝဋ်နာကံနာသဘောထားမျိုး ပြောဆိုတတ်ကြပေသည်။

အမှန်တရားအားနည်းသော ဘဝဟူသည် သံသရာကို ပို၍ရှည် ကြာစေမည်ဖြစ်သည်။ အမှန်တရားများ အားနည်းလာသည့်အလျောက် အမှားများသည်လည်း ရောထွေးစွာ ပူးကပ်နေမည်ဖြစ်သည်။ အမှားများဖြင့် တွဲကပ်နေသောဘဝများစွာတွင် အမှန်ရှိရာသို့ လျှောက်လှမ်းနိုင်ဖို့ရန် ခက်ခဲနေမည်ဖြစ်သည်။ ထို့အတူစွာပင် အမှန်နည်းသောအရပ်၌ အမှန်တရားများကို တောင်းစားဖို့ရန် ခက်ခဲလွန်းပေမည်။ ခေါင်းညိတ်ခေါင်းခါ လုပ်တတ်ရုံဖြင့် အမှန်တရားကို လုံးဝရှာဖွေလို့ မရရှိနိုင်ပါပေ။

ခေါင်းညိတ်ရုံသက်သက်ဖြင့် ဘဝကိုရှေ့ဆက်နေရသော ရှင်သန်ခြင်းများဟူသည် တောက်ပြောင်မှု အားနည်းနေနိုင်သည်။ ခံစားချက် ဒဏ်ရာဆိုးများဖြင့် အိပ်စက်နေရသည့်ဘဝများဆိုလျှင် ပေါက်ကွဲအားပြင်းထန်သော ဗုံးတစ်လုံးကို ဖက်တွယ်အိပ်စက်ရသည်နှင့် တူလှသည်။ ပေါက်ကွဲထွက်ပေါ်လာလျှင် ထိန်းသိမ်းနိုင်ဖို့ ခက်ခဲနေမည်ဖြစ်သည်။ လုံးဝထိန်းချုပ်မရသည်လည်း ဖြစ်သွားနိုင်ပေသည်။

ကျွန်တော်တို့တစ်တွေသည် အဆိုးများနှင့်ကြုံတွေ့ကြလေ အကောင်းများကို ပြန်လည်လုပ်ဆောင်ချင်လေဖြစ်သည်။ အဆိုးများကို ကျော်လွှားနိုင်ဖို့ရန် ကျွန်တော်တို့တစ်တွေသည် အမေ့နို့ဖိုးများကစပြီး သစ္စာပြုတိုင်တည်တတ်ကြပေမည်။ မိမိတို့ဆိုးခဲ့သမျှကို သစ္စာဆိုရင်း သင်ပုန်းချေလိုတတ်ကြပေသည်။ ကျွန်တော်တို့တစ်တွေ စဉ်းစားတတ်ဖို့လိုပါသည်။ မိမိတို့အလှည့်ရောက်ခါမှ မိုက်ပစ်တွေအတွက် သစ္စာများဆို တိုင်တည်၍ ချေဖျက်ပစ်ရန် ဆုတောင်းခြင်းများသည်ကား ရှက်စရာကောင်းလွန်းလှပေသည်။ ထို့ကြောင့် ဒဏ်ရာရရှိမှုတိုင်းသည် ဝဋ်နာကံနာကြောင့်ဟု မဆိုသာပေ။ အကောင်းဖြင့် တုံ့ပြန်မှု အားနည်းလွန်းသောကြောင့်သာ ဖြစ်တတ်ပါသည်။

ဒဏ်ရာများကို ပွေ့ဖက်၍ ရှေ့ဆက်နေသောသူအချို့၌ အမှန်တရားကိုပိုမို၍ မြတ်နိုးတောင်းခံတတ်ကြပါသည်။ ကျွန်တော်တို့အားလုံးသည် လိမ်ညာဖူးကြပေမည်။ ကျွန်တော်တို့တစ်တွေက လိမ်ညာခဲ့သောအချိန်များတွင် ကျေနပ်အပြုံးတို့ဖြင့် ကျေနပ်နေမည်ဖြစ်သည်။ သို့သော် ကျွန်တော် တို့တစ်တွေကိုယ်တိုင် ပြန်လည်အလိမ်ညာခံရသော အချိန်များတွင်မူ နာကျင်ဒေါသထွက်မှုသည် ကြီးထွားလွန်းမည်ဖြစ်သည်။ မိမိတို့ခံစားရသည့်အလှည့်သို့ ရောက်ရှိသောအချိန်များတွင် လိမ်ညာမှု၏ဆိုးကွက်များကို ကောင်းကောင်းသိမြင်နိုင်ပါသည်။ ရှက်တတ်သော စိတ်ထားလေးများရှိကြမည်ဆိုလျှင် လိမ်ညာခြင်းများကို ဆင်ခြင်နိုင်ရန်လိုပေသည်။ လိမ်ညာဟန်ဆောင်ခြင်း၏ အပုပ်နံ့များဟူသည် အနံ့ထွက်လွယ်လွန်းလှပါသည်။

ယနေ့ ကျွန်တော်တို့နိုင်ငံ၏ ဖြစ်ပျက်နေမှုများနှင့် ယှဉ်ထိုး၍လည်း သုံးသပ်ကြည့်လို့ရပေသည်။ အမှန်တရားအားနည်းနေသည်ဟု ဆိုအပ်သည့် ဥပဒေပြင်ပလုပ်ရပ်မှန်သမျှ၏ ဆိုးကျိုးများကို ပြည်သူများသာ အဓိက ခံစားလို့နေရပေသည်။ ဥပမာအားဖြင့် တိုက်ပွဲများကြားတွင် ဖျက်ဆီးခံနေရသော ပြည်သူများ၏ဘဝတွင် အမှန်တရားရှိပါ၏လော။ မည်သည့်ဘက်ကတာဝန်ယူ၍ ပြင်ဆင်လို့ပေးကြမည်နည်း။ ဝမ်းရေးမလွယ်ကူကြသည့်ကြားက အသက်စွန့်လုပ်ကိုင်စားသောက်နေရသည့် ပြည်သူများအနေနှင့် ခိုကိုးရာ အထူးလိုအပ်ပါသည်။ အားကိုးရာ အားထားရာ ရှာဖွေမရသောပြည်သူများ၏ဘဝဟူသည် အမှန်တရားငတ်ခြင်းမျိုးဖြစ်ပေသည်။

တစ်နည်းအားဖြင့် ထပ်ဆင့်ဆိုရသော် အမှန်တရားရှိရာကို ရှာမတွေ့ကြရ၍ ရင်ဖွင့်တိုင်တန်းစရာ မရှိကြခြင်းများသာဖြစ်ပေသည်။ မိမိတို့ချွေးနှဲစာတို့ဖြင့် ရှာဖွေတည်ဆောက်ထားရသည့် ပစ္စည်းများဆုံးရှုံးရခြင်းများသည် ခေတ်အခြေအနေအရ ပြန်လည်ထူထောင်ကြဖို့ ခက်လှပေသည်။ မည်သည့်ဘက်ကမှလည်း အမှန်တရားများကို တောင်းစားလို့ ရနိုင်သည့် တာဝန်ယူခြင်း၊ တာဝန်ခံခြင်းမျိုးများ မရှိကြပါပေ။ စိတ်ဒဏ်ရာအထပ်ထပ်ရနေသည်မှအပ အမှန်တရားကို တည့်တည့်မတ်မတ်သုံးစွဲ သူများထံမှနေ၍ အမှန်တရားများကို တောင်းစားရန်ကား ခက်ခဲနေဆဲသာလျှင်ဖြစ်ပေသည်။

ကျွန်တော်တို့တစ်တွေ၏ ခံစားထိရှမိသောဒဏ်ရာများကို သက်သာရာသက်သာကြောင်းအဖြစ် အမှန်တရားများကို မြတ်နိုးတတ်ဖို့လိုပေသည်။ မသိခြင်းတည်းဟူသောဝင်္ကပါထဲမှ အမှားကို အမှားနဲ့ထပ်ပေါင်းပြီး သံသရာကိုရှည်ခိုင်းချင်တတ်သည့် မိုက်ပြစ်များအတွက် ရှက်တတ်ဖို့လည်း လိုအပ်ပေသည်။ ဆိုးခဲ့သမျှသော အရာရာတိုင်းအတွက် သစ္စာအတုတွေဆိုပြီး အမှန်တရားများကို မတောင်းတစေလိုပေ။ မသိဘူးဟူသော ငြင်းပယ်ခြင်းသင်္ကေတမျိုးများထက်စာလျှင်၊ တာဝန်ယူခြင်း၊ တာဝန်ခံခြင်းတည်းဟူသော သစ္စာတရားများကိုသာ တောင်းစားတတ်ပါစေကြောင်း ရေးသားတိုက်တွန်းလိုက်ရပေသည်။

ခိုင်မြင့်ဝေ