News

POST TYPE

NEWS

ဒေါ်အောင်ဆန်းစုကြည်နှင့် ကရင်နီလူငယ်များတွေ့ဆုံမှု ပြေလည်မှုရ၊ လက်တွေ့ အကောင်အထည်ဖော်ခြင်းမရှိက ထူးခြားမည်မဟုတ်ဟုဆို
16-Jan-2020


တောင်ငူ၊ ဇန်နဝါရီ ၁၆

ကယားပြည်နယ်နေ့ အခမ်းနားတက်ရောက်ခဲ့သော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဦးဆောင်သည့် ပြည်ထောင်စုအစိုးရအဖွဲ့ တာဝန်ဝန်ရှိသူများနှင့် ကရင်နီလူငယ်များ နှစ်ဖက်တွေ့ဆုံညှိနှိုင်းမှုမှာ အဆင်ပြေသည်ဟု ဆိုရမည်ဖြစ်သော်လည်း လက်တွေ့အကောင်အထည်ဖော်ဆောင်နိုင်ခြင်းမရှိပါက ထူးခြားမည်မဟုတ်ကြောင်း ကရင်နီလူငယ်များထံမှ သိရှိရသည်။

ဗိုလ်ချုပ်ကြေးရုပ်ကိစ္စက မိသားစုဝင်ဖြစ်နေလို့ ကြားဝင်ဖြေရှင်းပေမဲ့လူကို တာဝန်ပေးမယ်။ တောင်သူတွေဖမ်းခံရတဲ့ပြသနာက ပြည်ထောင်စုဝန်ကြီးနဲ့ရှေ့နေချုပ်ရုံးကို တာဝန်ပေးပြီး ကယားလူငယ်စင်တာအတွက်လည်း အဆင်ပြေတယ်ဟု ကရင်နီလူငယ်အဖွဲ့မှ ခွန်သောမက်က ပြောကြားသည်။

၆၈ ကြိမ်မြောက် ကယားပြည်နယ်နေ့အခမ်းနားကို ဇန်နဝါရီလ ၁၅ ရက်နေ့ နံနက်တွင် လွိုင်ကော်မြို့နယ် ထေးငှားလျားကျေးရွာအနီး ကယား၊ ဒေးပွဲတော်ကွင်းတွင် စည်ကားသိုက်မြိုက်စွာဖြင့် ကျင်းပနေပြီး ကရင်နီလူငယ်များက နိုင်ငံတော်၏အတိုင်ပင်ခံပုဂ္ဂိုလ်နှင့် တွေ့ခွင့်ပေးရန် ယခုလ ၁၀ ရက် နေ့က စာရေးသားပေးပို့ခဲ့ပြီးနောက် ဇန်နဝါရီလ ၁၆ ရက်၌ ပြည်နယ်ဧည့်ရိပ်သာတွင် တံခါးပိတ်တွေ့ဆုံခဲ့ကြခြင်းဖြစ်သည်။

နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် ကယားပြည်နယ်အစိုးရ အဖွဲ့ဝင်အချို့နှင့် ကရင်နီလူငယ်ခေါင်းဆောင်များဖြစ်သောခူး ရီးရယ်(ခ)ခူးရီးဒူဦးဆောင်သည့် လူ ငယ် ၇ ဦးတွေ့ဆုံခဲ့ကြခြင်းဖြစ်ပြီးနှစ်ဖက်တွေ့ဆုံမှုအပြီးတွင် ကရင်နီလူင်ယ်ခေါင်းဆောင်အချို့က ဆွေးနွေးပွဲနှင့်ပတ်သက်ပြီး အများပြည်သူကိုထုတ်ပြန်ပြောဆိုခဲ့သည်။

ကယားပြည်နယ်အတွင်း NLD အစိုးရလက်ထက် ဗိုလ်ချုပ်အောင်ဆန်းကြေးရုပ်တုပြသနာနှင့်ပတ်သက်ပြီး
ပြည်နယ်အစိုးရနှင့် ကရင်နီလူငယ်များကြား ပြသနာများ အကြိမ်ကြိမ်ဖြစ်ပေါ်ခဲ့ပြီး လူငယ် ၆ ဦး ထောင်သွင်း အကျဉ်းချခံရသည့်အပြင် မြေယာပြဿနာများနှင့် ကရင်နီတောင်သူ ၄၁ ယောက် တရားစွဲဆိုခံထားရသည်။

လက်ရှိ ပြည်နယ်ဝန်ကြီးချုပ်ဦးအယ်ဖောင်ရှိုသည် ကရင်နီတိုင်းရင်းသားများ၏ ခံစားချက်နှင့် ပြဿနာများကို ပြေလည်အောင် ဖြေရှင်းပေးနိုင်ခြင်းမရှိသည့်အပြင် သမိုင်းကိုလည်း နားလည်တန်ဖိုးမထားကြောင်း ဒေသခံ ကရင်နီတိုင်းရင်းသားအချို့က ဆိုသည်။

R-15