News

POST TYPE

NEWS

ကျောင်းတက်ရက်တိုးမြှင့်မှုကို ကန့်ကွက်ရန် လူထုလက်မှတ် စတင်ကောက်ခံ
16-Jan-2020
ရန်ကုန်၊ ဇန်နဝါရီ ၁၆

ကျောင်းတက်ရက်များတိုးမြှင့်မှုအား ကန့်ကွက်ရန် အများပြည်သူ၏ လက်မှတ်များစတင်ကောက်ခံနေရာ ပထမနေ့တွင် လူဦးရေ ၂၀၀ နီးပါး လက်မှတ်ရေးထိုးခဲ့ကြောင်း အခြေခံပညာ ပညာရေးလုပ်သားများ သမဂ္ဂဖြစ်မြောက်ရေးကော်မတီထံမှ သိရသည်။

ကျောင်းသားအဖွဲ့အစည်းများနှင့် ဆရာအဖွဲ့အစည်းများက ကန့်ကွက်နေကြသော်လည်း ပညာရေးဝန်ကြီးဌာနမှ ဆက်လက်အကောင်အထည်ဖော်မည့် အခြေခံပညာအတန်းများ၏ ကျောင်းတက်ရက်တိုးမြှင့်မှုအပေါ် ဆက်လက်ကန့်ကွက်မှုများပြုလုပ်ရန်အတွက် ရန်ကုန်မြို့လူစည်ကားရာနေရာတစ်ခုဖြစ်သည့် လှည်းတန်းစင်တာရှေ့တွင် ကျောင်းပိတ်ရက်တိုးမြှင့်မှုအပေါ် ကန့်ကွက်လိုပါက လက်မှတ်ရေးထိုးပါဝင်နိုင်သည့် လှုပ်ရှားမှုတစ်ခုကို ဇန်နဝါရီလ ၁၅ ရက်နေ့မှစတင်ပြုလုပ်နေပြီး ၂၄ ရက်နေ့အထိ ကောက်ခံသွားမည်ဖြစ်သည်ဟု အဆိုပါ သမဂ္ဂထံမှ သိရသည်။

“လက်မှတ်ကောက်ခံပြီးရင် ပညာရေးဝန်ကြီးဌာကိုတင်မှာပါ။ ဆရာ၊ ကျောင်းသား၊ မိဘ ကန့်ကွက်နေတာတွေကို သိအောင်ပါ”ဟု အခြေခံပညာ ပညာရေးလုပ်သားများ သမဂ္ဂဖြစ်မြောက်ရေးကော်မတီမှ ဗဟိုကော်မတီဝင် ကိုဖြိုးဝေအောင်က ပြောသည်။

ပညာရေးဆိုင်ရာ အဖွဲ့အစည်းများနှင့် ပညာရေးတက္ကသိုလ်၊ ကောလိပ်များမှ ကျောင်းသားသမဂ္ဂများမှလည်း ဖဲကြိုးစိမ်းလှုပ်ရှားမှုများပြုလုပ်ပြီး ကန့်ကွက်နေကြသော်လည်း ပညာရေးဝန်ကြီးဌာနအနေဖြင့် ကျောင်းတက်ရက်တိုးမြှင့်မှုကို ပြင်ဆင်မည်မဟုတ်ပဲ ဆက်လက်အကောင်အထည်ဖော်ရန်အတွက် လုပ်ငန်းအစီအစဉ်အသေးစိတ်ကိုလည်း ထုတ်ပြန်ထားပြီးဖြစ်သည်။

ကျောင်းတက်ရက်တိုးမြှင့်မှု အစီအစဉ်အရ စတုတ္ထတန်းနှင့်အဌမတန်းတို့သည် အခြားအတန်းများထက် နွေရာသီကျောင်းပိတ်ရက်ကို သုံးလခံစားရမည်ဖြစ်ပြီး အခြားအတန်းများသည် နှစ်လသာခံစားရမည်ဖြစ်သည်။
 
အောင်သက်ကို