News

POST TYPE

NEWS

ရထား၊ ကားနှင့် သင်္ဘော သုံးမျိုးချိတ်ဆက်နိုင်ရန် ကြည့်မြင်တိုင်ဘူတာကို အဆင့်မြှင့်တင်နေဟု ဝန်ကြီးချုပ်ဆို
16-Jan-2020
ရန်ကုန်၊ ဇန်နဝါရီ ၁၆

ရန်ကုန်မြို့ သယ်ယူပို့ဆောင်ရေးစနစ်ဖွံဖြိုးတိုးတက်ရန်အတွက် မီးရထား၊ YBS ဘတ်စ်ကားနှင့် သင်္ဘော (ရေလမ်းခရီး) သုံးမျိုးကို ချိတ်ဆက်နိုင်မည့် ကြည့်မြင်တိုင်ဘူတာရုံကို အဆင်မြှင့်တင်နေပြီး ယခုနှစ်အတွင်းပြီးစီးရန် ဆောင်ရွက်နေကြောင်း ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းမှ ပြောသည်။

ကြည့်မြင်တိုင်ဘူတာရုံသည် ကားလမ်းများ၊ ရထားလမ်းများနှင့် ရေကြောင်းလမ်းများဆုံသည့်နေရာ ဖြစ်ခြင်းကြောင့် ပိုမိုဖွံဖြိုးတိုးတက်အောင် အဆင့်မြှင့်တင်ခြင်းဖြစ်ကြောင်း ၎င်းက ဇန်နဝါရီ ၁၆ ရက်က ကျင်းပပြုလုပ်ခဲ့သည့် YRTA ၃ နှစ်ပြည့် အခမ်းအနားတွင်ပြောသည်။ 

“ရထားလမ်းတွေကတော့ ကျွန်တော်တို့ အဆင့်မြှင့်တင်ဆောင်ရွက်နေပြီ ဖြစ်ပါတယ်။ ရထားလမ်းဆုံရာ ကားလမ်းတွေ ရေကြောင်းလမ်းတွေ ဆုံတဲ့နေရာကို အဆင့်မြှင့်တင်ဖို့ပြင်ဆင်နေပါတယ်။ ”ဟု ဦးဖြိုးမင်းသိန်းက ဆိုသည်။

မီးရထား၊ YBS ဘတ်စ်ကားနှင့် ရေလမ်းခရီး သုံးခုချိတ်ဆက်နိုင်မည့် သုံးမျိုးဆုံသည့် ကြည့်မြင်တိုင်အပြင် ပုဇွန်တောင်ဘူတာနှင့် အခြားသောဘူတာကြီးများကိုလည်း အဆင့်မြှင့်တင်သည့်လုပ်ငန်းများကို ဆောင်ရွက်သွား မည်ဖြစ်ကြောင်း YRTA ထံမှ သိရသည်။

ရန်ကုန်မြို့၏ အများပြည်သူသယ်ယူပို့ဆောင်ရေး ဘတ်စ်ကားအဆင့်မြှင့်တင်သည့် စီမံကိန်းဖြစ်သည့် မီးရထားနှင့် YBS ယာဉ်လိုင်း ချိတ်ဆက်ပြေးဆွဲမှုကို သမိုင်းဘူတာရုံမှတ်တိုင်တွင် ပထမဆုံးအကြိမ် Pilot Project အဖြစ် ၂၀၁၉ ခုနှစ်၊ ဒီဇင်ဘာ ၂ ရက်နေ့တွင် စတင်ဆောင်ရွက်ခဲ့ကြောင်း YRTA ထံမှ သိရသည်။

ရထားလမ်းအဆင့်မြှင့်တင်သည့် စီမံကိန်းမစတင်ခင်အချိန်က တစ်နေ့လျှင်ရထားစီးသည့် ခရီးသည်ဦးရေမှာ ရှစ်သောင်းခွဲမှ ကိုးသောင်းအထိရှိပြီး ရထားလမ်းပြုပြင်ချိန်တွင် တစ်လမ်းပိတ်တစ်လမ်းသွားစနစ်ကြောင့် အခက်အခဲအချို့ရှိပြီး အချိန်မှန်မှုအားနည်းခြင်း၊ ရထားတစ်စင်းလာချိန်တွင် အခြားတစ်စင်းက စောင့်နေရခြင်းကြောင့် ခရီးသည် ငါးသောင်းနီးပါးကျဆင်းသွားကြောင်း မြန်မာ့မီးရထားထံမှ သိရသည်။ 

မို့မို့အေး