News

POST TYPE

NEWS

ဆယ်တန်းဖြေဆိုဖူးရုံဖြင့် လျှပ်စစ်သက်မွေးမှုသင်တန်းကျောင်း တက်ရောက်နိုင်မည်
01-Sep-2019

ရန်ကုန်၊ စက်တင်ဘာ ၁

တက္ကသိုလ်ဝင်တန်းစာမေးပွဲတစ် ကြိမ်ဖြေဖူးသည့် ကျောင်းသားများ သက်မွေးပညာရပ်အတွက် အခက်အခဲမရှိစေရန် ဂျပန်အထောက်အပံ့ဖြင့် AGTI ကျောင်းသားဟောင်းများအသင်းက ဖွင့်ထားသည့် လျှပ်စစ်ကျွမ်းကျင်မှုသင်တန်းသို့ တက်ရောက်နိုင်ကြောင်း ဆာကူရာ အသက်မွေးမှုသင်တန်းကျောင်းထံမှ သိရသည်။

ပညာရေးဝန်ကြီးဌာန (နည်းပညာ၊ သက်မွေးပညာနှင့် လေ့ကျင့်ရေးဦးစီးဌာန)နှင့် ဂျီတီအိုင် ကျောင်းသားဟောင်းများအသင်းတို့ပူးပေါင်းပြီး ၇ လတစ်ကြိမ် (သင်တန်းကာလ ၇ လ)ဖွင့်သည့် Sakura- Insein Technical Course ကို တက္ကသိုလ်ဝင်တန်း ဖြေဆိုဖူးသည့်ကျောင်းသားများမှစ၍ B.E ဘွဲ့ရကျောင်းသားအထိ တက်ရောက်နိုင်မည်ဖြစ်သည်။

ယင်းသင်တန်းကျောင်း အုပ်ချုပ်ရေးမှူး ဦးသန်းဇော်မြင့်က “ပထမတုန်းက GTI ကျောင်းဆင်းတွေကို ပေါလစ်တင်တယ်ပေါ့။ လက်တွေ့လုပ်နိုင်အောင် ရည်ရွယ်ဖွင့်ပေးလိုက်တာ ဖြစ်တယ်။ ဒါပေမဲ့ နောက်ကျတော့ နိုင်ငံတော်လိုအပ်ချက်အရ ဆယ်တန်းမအောင်တဲ့ကလေးတွေက အနာဂတ်ပျောက်သွားတယ်။ အလုပ်အကိုင် အခွင့်အလမ်းတွေ ရှားပါးသွားလို့ အဲ့ဒါကို အဓိကထားပြီး သူတို့ဘဝတွေ ရပ်တည်နိုင်အောင် ဒီကနေ သက်မွေးသင်တန်းကျောင်း လုပ်ပေးတာဖြစ်တယ်”ဟု ပြောကြားသည်။

သင်တန်းတွင် မီတာဘောက်မှ အိမ်တွင်း၊ စက်ရုံတွင်း လျှပ်စစ်မီးသွယ်တန်းခြင်း၊ PLC ပိုင်း၊ မော်တာထိန်းချုပ်မှုတို့ကို သင်ပေးမည့် Commercial Electrical Wiring Course နှင့် မီတာဘောက်အပြင်ဘက် ဓာတ်တိုင်ထူခြင်း၊ ထရန်စဖော်မာ ထိုင်ခြင်းကို သင်ပေးမည့် Electrical Power Distribution Line Course ဟူ၍ အတန်းနှစ်ခုကို သင်ကြားနိုင်မည်ဖြစ်သည်။

သင်တန်းတက်လိုသူများအနေနှင့် ဝင်ခွင့်ဖြေဆိုရမည်ဖြစ်ပြီး ဝင်ခွင့်အောင်မြင်ပါက သင်တန်းကြေး ပထမအရစ် ကျပ် ၇ သိန်းပေးသွင်းကာ သင်တန်းကာလ သုံးလအကြာတွင် ကျန်ရှိသည့် သင်တန်းကြေး ဒုတိယအရစ်အနေနှင့် သင်တန်းကြေး စုစုပေါင်း ကျပ် ၁၄ သိန်း ပေးသွင်းရမည်ဖြစ်သည်။

သင်တန်းတွင် သင်ကြားရေးသင်ရိုးကို လက်တွေ့ပိုင်း ၇၀ ရာခိုင်နှုန်း၊ ၃၀ ရာခိုင်နှုန်း သီအိုရီပိုင်းနှင့် On Job Training ပါ ပေးသွားမည်ဖြစ်ပြီး သင်တန်းကို မြန်မာနိုင်ငံ လုပ်သားများကျွမ်းကျင်မှု “စံ”သတ်မှတ်ပြဋ္ဌာန်းရေးအဖွဲ့ (NSSA) ၏ လျှပ်စစ်ပိုင်းကျွမ်းကျင်မှုအဆင့် ၁ ကို ဝင်ရောက်ဖြေဆိုနိုင်ရေး ချိတ်ဆက်ထားကြောင်း အဆိုပါသင်တန်းအဖွဲ့ထံမှ သိရသည်။ 

“NSSA နဲ့ချိတ်တယ်ဆိုတာက လျှပ်စစ်နဲ့ပတ်သက်တဲ့ အဆင့် ၁ ပေါ့နော်။ ဖြေနိုင်အောင် လေ့ကျင့်ပေးတယ်။ ဒီကနေ အသိအမှတ်ပြုလက်မှတ်ရမယ်။ NSSA ကနေ လက်မှတ်ရမယ်။ နောက် NSSA ကနေ ကျောင်းကိုလက်ခံတယ်။ နောက် Assessment Center ဖွင့်ဖို့ ကြိုးပမ်းနေတယ်။ Transmission and Distri-bution ကို စစ်ဆေးနိုင်ဖို့ လုပ်နေတာရှိတယ်”ဟု ဦးသန်းဇော်မြင့်က ပြောကြားသည်။

သင်တန်းအတန်းတစ်တန်းလျှင် ကျောင်းသား ၄၀ ဦး လေ့ကျင့်သင်ကြားသဖြင့် လက်ရှိအချိန်အထိ သင်တန်းအောင်မြင်ပြီးသူ သင်တန်းသား ၂၅၀ ဦးထိရှိပြီး ၎င်းတို့ထဲမှ ၈၀ ရာခိုင်နှုန်းခန့်မှာ ပြည်တွင်းပြည်ပရှိ လျှပ်စစ်ပိုင်းဆိုင်ရာ ကုမ္ပဏီများတွင် သင်ကြားနေကြပြီး ကျန် ၂၀ ရာခိုင်နှုန်းခန့်မှာ အတန်းပညာ ဆက်လက်သင်ယူနေကြကြောင်း ဆိုသည်။ 

စိုင်းဟန်