POST TYPE

NEWS

မှာထားသောစားစရာ မြန်မြန်ဆန်ဆန် မရ၍ဆိုကာ ပြင်သစ်တွင် စားသုံးသူက စားပွဲထိုးကို ပစ်သတ်
18-Aug-2019


ပဲရစ်၊ ဩဂုတ် ၁၈

ပြင်သစ်နိုင်ငံ ပဲရစ်မြို့ရှိစားသောက် ဆိုင်တစ်ဆိုင်တွင် စားသုံးသူတစ်ဦးက ၎င်းမှာထားသော အသားညှပ်ပေါင်မုန့် မြန်မြန်ဆန်ဆန်မရ၍ဟုဆိုကာ စားပွဲထိုးကို သေနတ်ဖြင့်ပစ်သတ်ခဲ့ကြောင်း BBC သတင်းတွင် ဖော်ပြထားသည်။

ယင်းဖြစ်စဉ်မှာ သောကြာနေ့ ညနေပိုင်းက ပဲရစ်မြို့အရှေ့ပိုင်းရှိ ဆင်ခြေဖုံးတစ်ခုတွင် ဖြစ်ပွားခဲ့ခြင်းဖြစ်ပြီး ယခုအခါ လူသတ်မှုဖြင့် အမှုဖွင့်စစ်ဆေးလျက်ရှိကြောင်း ရဲတပ်ဖွဲ့က ထုတ်ပြန်ထားသည်။

စားပွဲထိုးအား သေနတ်ဖြင့်ပစ်ခတ်ခဲ့သူဟု သံသယရှိသူသည် အခင်းဖြစ်ပွားရာ နေရာမှထွက်ပြေးသွားခဲ့ပြီး လက်ရှိအချိန်ထိ ဖမ်းဆီးရမိခြင်း မရှိသေးချေ။

အရေးပေါ်ဆေးရုံကားဝန်ထမ်းများက ပခုံးနားတစ်ဝိုက်ကို ပစ်ခတ်ခံခဲ့ရသော အသက် ၂၈ နှစ်အရွယ် စားပွဲထိုးအား ကယ်တင်နိုင်ရန် ကြိုးစားခဲ့သေးသော်လည်း မကယ်တင်နိုင်ခဲ့ဘဲ အခင်းဖြစ်ရာနေရာ၌ပင် သေဆုံးသွားခဲ့သည်။

သေနတ်ဖြင့်ပစ်ခတ်ခဲ့သောစားသုံးသူသည် အခင်းဖြစ်ပွားရာ ပီဇာနှင့်အသား ညှပ်ပေါင်မုန့် ရောင်းချသော စားသောက်ဆိုင်၌ ၎င်းမှာကြားထားသောစားစရာ ရရှိရန် စောင့်ဆိုင်းရသော ကြာမြင့်ချိန်ကြောင့် ဒေါသထွက်လျက်ရှိသည်ဟု သေဆုံးသွားသော စားပွဲထိုး၏ လုပ်ဖော်ကိုင်ဖက်များက ရဲများကိုပြောပြခဲ့သည်။

ယခုပစ်ခတ်သတ်ဖြတ်မှုမှာ အဆိုပါပတ်ဝန်းကျင်တွင် နေထိုင်သူများနှင့် ဆိုင်ရှင်များကို အံ့ဩထိတ်လန့်စေခဲ့သည်။

“စိတ်မကောင်းစရာပါပဲ။ အဲဒီဆိုင်လေးက ဘာပြဿနာမှမရှိဘဲ ဆိတ်ငြိမ်တဲ့ဆိုင်လေးပါ။ ဖွင့်တာလည်း လပိုင်းလောက်ပဲ ရှိသေးတာပါ”ဟု အသက် ၂၉ နှစ်အရွယ် အမျိုးသမီးတစ်ဦးက ပြင်သစ်မီဒီယာသို့ ပြောကြားသည်။

သို့သော်လည်း ယင်းပတ်ဝန်းကျင်တွင် နေထိုင်သူအချို့ကမူ ထိုဒေသတွင် မူးယစ်ဆေးရောင်းဝယ်မှုများနှင့် လမ်းမများပေါ်တွင် မူးယစ်နေသူများ တိုးပွားလာလျက်ရှိခြင်းနှင့်အတူ မှုခင်းများ တစ်ရှိန်ထိုး မြင့်တက်လာလျက်ရှိသည်ဟု ပြောကြားခဲ့သည်။

F-06