News

POST TYPE

NEWS

ပုံညာတောင် ကျောက်မီးသွေးတူးဖော်ရေး ဒေသခံများ ကန့်ကွက်
24-Sep-2018

ကလေး၊ စက်တင်ဘာ ၂၃ 

မကွေးတိုင်းဒေသကြီး၊ ထီးလင်း မြို့နယ်အတွင်းရှိ ပုံညာတောင်တန်းပေါ်တွင် ကျောက်မီးသွေးတူးဖော်ရန် ကုမ္ပဏီတစ်ခုက စီစဉ်နေသည့်အပေါ် ဒေသခံများက လက်မှတ်များရေးထိုးကာ ကန့်ကွက်လျက်ရှိကြောင်း လက်မှတ်ကောက်ခံသည့် လှုပ်ရှားမှုတွင် ပါဝင်သည့် ထီးလင်းမြို့နေ ဦးမိုးနေ (အနာဂတ်အလင်း) က ပြောကြားသည်။ 

စက်တင်ဘာလ ၁ ရက်နေ့က မင်းရာဇာအောင်ကုမ္ပဏီမှ တာဝန်ရှိသူများသည် ပုံညာတောင်ကြိုးဝိုင်း၊ ကြိုးပြင်ကာကွယ် တောအကွက်အမှတ် (၄၉) ရှိ ဧက ၅၀၂ ဧကတွင် ကျောက်မီးသွေး စမ်းသပ်တူးဖော်နိုင်ရန် ယင်းအနီးဝန်းကျင်ရှိ ကျေးရွာများထံ ကွင်းဆင်းခဲ့သည်။ 

အဆိုပါ တူးဖော်မည့်နေရာသည် ထီးလင်းမြို့နယ်အတွင်းရှိ အထက်ကျော်၊ အောက်ကျော်၊ ပလိန်ကိုင်း၊ ကျင်းစံပြ၊ ဒန့်ဒီးရွာ၊ ရဲဒူးကျောက်ထု၊ နတ်အင်း၊ အညာဝါးဘင်းနှင့် ဆင်ထိုးရွာ ၉ ရွာမှ ဒေသခံများ၏ အဓိကလယ်ရေရရှိရေးနှင့် သောက်သုံးရေ ရရှိရေးအတွက် အသုံးပြုသည့် သဗျက်ချောင်းထိပ်တွင် တူးဖော်မည်ကိုသိရှိကြရာမှ သဘာဝပတ်ဝန်းကျင်ပျက်စီးပြီး ပြည်သူအကျိုးစီးပွား ထိခိုက်လာနိုင်သည့်အတွက် ကန့်ကွက်ကြခြင်းဖြစ်ကြောင်း ဦးမိုးနေက ရှင်းပြသည်။

“အပေါ်မှာ ပြီးစီးကြောင်း သူတို့လုပ်တော့မယ်ဆိုတဲ့ အကြောင်းကို ရွာကို အကြောင်းလာကြားသွားတယ်။ ဒါပေမဲ့ သေသေချာချာ ချိတ်ဆက်လိုက်တဲ့အခါမှာတော့ သူတို့က ဘယ်မှ မဝင်ရသေးဘူး။ သူတို့လုပ်မယ်ဆိုရင် ချောင်းအောက်မှာရှိတဲ့ ကျေးရွာတွေမှာ ရေပြတ်တောက်မယ်။ အဆိပ်သင့်မယ်။ သဘာဝပတ်ဝန်းကျင်ပျက်စီးမှုတွေ အများကြီးလာမယ်”ဟု ၎င်းက ဆိုသည်။ 

ယင်းကြောင့် ကျေးရွာ ၉ ရွာမှ ဒေသခံများ၏ သဘောထားများကို လိုက်လံကောက်ခံခဲ့ရာ ကျောက်မီးသွေးတူးဖော်မှုကို သဘောမတူကြောင်း ထိုးထားသည့် လက်မှတ်ပေါင်း ၅၀၀၀ ကျော်ရရှိခဲ့ပြီး ရရှိထားသည့်လက်မှတ်များနှင့် ကန့်ကွက်စာများကို သက်ဆိုင်ရာ ပြည်ထောင်စုဝန်ကြီးဌာနထံ ပေးပို့မည်ဖြစ်ကြောင်း၊ အွန်လိုင်းကန့်ကွက်မှု အနေနှင့်လည်း ပုံတောင်ပုံညာသည် ရောင်းရန်မဟုတ်ပါဆိုသည့် ပရိုဖိုင်များချိန်းကာ ကန့်ကွက်မှုများပြုလုပ်လျက်ရှိကြောင်း စီစဉ်ဆောင်ရွက်သူများထံမှ သိရသည်။ 

ကျောက်မီးသွေးတူးဖော်ရန် ယခင် အစိုးရလက်ထက်တွင် ကုမ္ပဏီက စမ်းသပ်တူးဖော်ခွင့်တောင်းခဲ့ပြီး မအောင်ခဲ့သဖြင့် ယခုအစိုးရလက်ထက်တွင် ထပ်မံတောင်းခံခြင်းဖြစ်ကြောင်း၊ ယင်းအပေါ်တူးဖော် လုပ်ကိုင်ခွင့်ကို တိုင်းဒေသကြီးအစိုးရ အဖွဲ့အနေနှင့်ပေးမည် မပေးမည် မဆုံးဖြတ်ရသေးဘဲ တူးဖော်ခွင့်လျှောက်ထားသည့်အပေါ် ဂန့်ဂေါခရိုင်၊ အုပ်ချုပ်ရေးဌာန တာဝန်ရှိသူများ၊ သစ်တောဌာန တာဝန်ရှိသူများ၊ သတ္တုတွင်းဦးစီးဌာနမှ တာဝန်ရှိသူများနှင့် ပတ်ဝန်းကျင်ထိန်းသိမ်းရေးဦးစီးဌာနကိုလည်း ကွင်းဆင်းစစ်ဆေးရန် ညွန်ကြားထားပြီး ရရှိလာသည့် အချက်များကို စုစည်းကာ တိုင်းဒေသကြီးအစိုးရအဖွဲ့ သဘောထားမှတ်ချက်ဖြင့် ပြည်ထောင်စု အစိုးရအဖွဲ့ထံတင်ပြရမည်ဖြစ်ပြီး ယခုအချိန်ထိ တိုင်းဒေသကြီးအစိုးရအဖွဲ့အနေနှင့် မည်သည့်သဘောထားမှတ်ချက်မှ မပေးရသေးကြောင်း မကွေးတိုင်းဒေသကြီး၊ သယံဇာတနှင့် သဘာဝပတ်ဝန်းကျင်၊ လျှပ်စစ်နှင့် စွမ်းအင်ဝန်ကြီးဌာန ဝန်ကြီး ဦးမြင့်ဇော်က ပြောကြားသည်။

“ကျွန်တော့် တစ်ယောက်တည်းရဲ့ သဘောထားမှတ်ချက်ပေးရရင်တော့ မြန်မာပြည်ကျောက်မီးသွေးဟာ သက်တမ်းနုပါသေးတယ်။ နုသေးတဲ့အတွက် ဖြစ်နိုင်ရင်တော့ ကျွန်တော်တို့နိုင်ငံ အနာဂတ်စွမ်းအင်အတွက် ထားသင့်တာပေါ့။ ကျွန်တော် တစ်ဦးတည်းရဲ့ ကိုယ်ပိုင်အယူအဆက ဖြစ်နိုင်ရင်တော့ အနာဂတ်မျိုးဆက်တွေအတွက် နိုင်ငံရဲ့ အရန်စွမ်းအင်ထားသင့်တာပေါ့ဗျာ”ဟု ၎င်းက ပြောဆိုသည်။

R-20