News

POST TYPE

NEWS

ဗြိတိန်ခွဲရေး စိတ်အေးရစေရန် ဂျာမနီရောက် ထရီဇာမေ ကြိုးပမ်း မရေမရာ အချိန်မကြာစေသင့်ဟု မာကယ်လ် သတိပေး
22-Jul-2016

ဘာလင်၊ ဇူလိုင် ၂ဝ

ဥရောပသမဂ္ဂမှ ဗြိတိန်ခွဲထွက်ရန် မဲပေးခဲ့မှုနှင့် ပတ်သက်ပြီး စိတ်အေးရစေရန် ဇူလိုင်လ ၂ဝ ရက်နေ့က ဂျာမနီသို့ ရောက်ရှိနေသည့် ဗြိတိဝန်ကြီးချုပ် ထရီဇာမေက ကြိုးပမ်းခဲ့ပြီး အိမ်နီးချင်း နိုင်ငံများနှင့် နက်ရှိုင်းသော ဆက်ဆံရေး ဆက်လက်ရှိစေလိုကြောင်း ပြောကြားခဲ့သည်။

သမဂ္ဂမှ တရားဝင်ခွဲထွက်မှု မပြုလုပ်မီ တွေ့ဆုံညှိနှိုင်းရန်အတွက် ဗြိတိန်တွင် အချိန်လိုအပ်သည် ဆိုသော အချက်ကို ဂျာမနီ အဓိပတိ အင်ဂလာမာကယ်လ်က သဘောတူသော်လည်း မည်သူကမျှ ‘မရေမရာ ကာလရှည်ကြီး’ ကို မလိုလားကြောင်း သတိပေးခဲ့သည်။

ခွဲရေး မဲနိုင်ပြီးနောက် ဒေးဗစ်ကင်မရွန်းနေရာ ဆက်ဆံခဲ့သည့် မေက မျှော်မှန်းမထားခဲ့သော ရှုပ်ထွေးသည့် ညှိနှိုင်းမှုများ အကောင်းဆုံး ပြုလုပ်နိုင်ရေး အချိန်ပေးရန် မေတ္တာရပ်ခံခဲ့သော်လည်း သမဂ္ဂအတွင်းရှိ အခြားနိုင်ငံ့ခေါင်းဆောင်များကပါ  ခွဲထွက်မည့် ဗြိတိန်အတွက် လွယ်ကူချောမွေ့စေရေး ကူညီရန် ဆန္ဒမရှိ ဖြစ်နေသည်။

ဂျာမနီ ခရီးစဉ်ပြီးနောက် ပြင်သစ်သို့ ဆက်သွားမည့် မေက အီးယူ၏ အဓိက ခေါင်းဆောင်နှစ်ဦး ဖြစ်သော မာကယ်လ်နှင့် ပြင်သစ်သမ္မတ ဖရန်ဆွာဟော်လန်တို့နှင့်  ဆက်ဆံရေး ကောင်းမွန်စေရန် ကြိုးပမ်းနေသည်။

“အခုခရီးစဉ်ဟာ အားကောင်းခိုင်မာတဲ့ မိတ်ဖက်ဖြစ်မှုကို ဆောင်ကြဉ်းဖို့ ကျွန်မရဲ့သန္နိဋ္ဌာန်ကို ဖော်ပြနေပါတယ်။ ဂျာမနီက ပြည်သူတွေနဲ့ ဗြိတိန်က ပြည်သူတွေရဲ့ အကျိုးစီးပွားအတွက် အလုပ်ဖြစ်မယ့် မိတ်ဖက်ဖြစ်မှုမျိုးပါ” ဟု မေက မာကယ်လ်နှင့်အတူ သတင်းစာရှင်းလင်းပွဲ လုပ်ရာတွင် ပြောကြားခဲ့သည်။

“ဒီကနေ့နဲ့ နောက်ရက်သတ္တတစ်ပတ်တွေထဲမှာ ဥရောပတစ်လွှားက ရှင်းရှင်းလင်းလင်း သိအောင် ပြောချင်တာက ကျွန်မတို့ဟာ ဥရောပ မိတ်ဆွေတွေနဲ့ ဝေးရာကို ထွက်သွားမှာ မဟုတ်ဘူး ဆိုတာပါ” ဟု မေက ပြောကြားခဲ့သည်။

လန်ဒန်အစိုးရက အီးယူ၏ လစ်စဘွန်း သဘောတူစာချုပ် ပုဒ်မ ၅ဝ ပါ ခွဲထွက်ခွင့်ကို တရားဝင် စတင်တောင်းဆိုမှု မပြုမချင်း ခွဲထွက်ရေး လုပ်ငန်းစဉ်များ တရားဝင် စတင်ဦးမည် မဟုတ်သေးကြောင်းကိုမူ  မာကယ်လ်က ထပ်လောင်းပြောကြားခဲ့ကာ အချိန်အကြာကြီး မဆွဲရန်လည်း မေကို တိုက်တွန်းခဲ့သေးသည်။

“ဘယ်သူမှ မရေမရာ ကာလရှည်ကြီးကို မလိုချင်ပါဘူး။ ဗြိတိန်ပြည်သူတွေရော ဥရောပအဖွဲ့ဝင် နိုင်ငံတွေရော ဘယ်သူမှ မလိုချင်ပါဘူး” ဟု မာကယ်လ်က ပြောကြားသည်။

“ပြင်ဆင်မှုတွေကို ကျယ်ကျယ်ပြန့်ပြန့် လုပ်ဖို့က အားလုံးရဲ့ အကျိုးစီးပွားနဲ့ ဆိုင်တယ်ဆိုတဲ့ ရပ်တည်ချက်ကတော့ ရှင်းလင်းပါတယ်။ ဒီအတွက် ဗြိတိန်ဟာ အချိန်ပမာဏ တစ်ခုတော့ လိုအပ်တယ် ဆိုတာလည်း လုံးဝနားလည်နိုင်တယ်လို့  ထင်ပါတယ်” ဟု မာကဲလ်က ပြောကြားခဲ့သည်။

ယခုနှစ်အတွင်း ပုဒ်မ ၅ဝ ကို အသုံးပြုဦးမည် မဟုတ်သေးကြောင်း မေက ပြောကြားထားသည်။

ဗြိတိန်ခေါင်းဆောင်သစ်ကို ဂျာမနီက ဂုဏ်ပြုတပ်ခွဲဖြင့် ကြိုဆိုခဲ့ပြီး ညစာအဖြစ် တူနာငါးဟင်းကို သရက်ချတ္တနီး၊ မှိုနှင့် နွားကလေးသားတို့ဖြင့် မာကဲလ်က ဧည့်ခံခဲ့သည်။

မေနှင့် မာကဲလ်တို့အကြား တူညီသည့် နောက်ခံများစွာ ရှိနေပြီး နှစ်ဦးစလုံးမှာ သင်းအုပ်ဆရာ သမီးများ ဖြစ်သလို အဓိပ္ပာယ် မရှိသည်ကို မလုပ်သည့် လက်တွေ့ပဓာနဝါဒီများ အဖြစ် ထင်ရှားသူများ ဖြစ်သလို အမျိုးသားများသာ လွှမ်းမိုးသည့် ကွန်ဆာဗေးတစ်ဝါဒီ ပါတီများကို ဦးဆောင်နိုင်ခြင်းကလည်း တူညီမှု ရှိနေသည်။

နှစ်ဦးဆက်ဆံရေးနှင့် ပတ်သက်ပြီး မေက “ဒီမှာ အမျိုးသမီးနှစ်ယောက်က အလုပ်ဖြစ်အောင် လုပ်နေကြတယ်လို့ပဲ ပြောရမှာပါပဲ။ နှစ်ဦးစလုံးက ဗြိတိန်နဲ့ ဂျာမနီ ပြည်သူတွေအတွက် အဖြစ်နိုင်ဆုံး၊ အကောင်းဆုံးရလဒ်ကို လိုချင်ကြတာပါ” ဟု မှတ်ချက်ပေးခဲ့သည်။

ခေါင်းဆောင်နှစ်ဦးစလုံးသည် ဗြိတိန်ခွဲထွက်ရေးနှင့် ပတ်သက်ပြီး ဆွေးနွေးရန် အဘယ်မျှ ခက်ခဲမည်ကိုမူ နားလည်ထားကြပြီး ဖြစ်သည်။

ခွဲရေးမဲဆန္ဒရှင်များ၏ လိုလားချက် ဖြစ်သော သမဂ္ဂအဖွဲ့ဝင် ၂၇ နိုင်ငံမှ ပြည်သူအများ ဗြိတိန်သို့ ဝင်ရောက်မှု လျှော့ချရေးနှင့် အီးယူ၏ အကျိုးအမြတ်ရှိသော တစ်ခုတည်းသော ဘုံဈေးကွက်တွင် ဗြိတိန်စီးပွားရေး ဆက်လုပ်ခွင့်ရရေး နှစ်ခုစလုံး ပြေလည်စေရန်မှာ မေအတွက် ခက်ခဲသောကိစ္စ ဖြစ်နေသည်။

ဥရောပသမဂ္ဂ၏ လွတ်လပ်စွာ အခြေချ ရွှေ့ပြောင်းခွင့်ကို လက်မခံလိုသော်လည်း ဥရောပ ဘုံဈေးကွက်ကိုမူ ထိတွေ့ခွင့်ရရေးမှာ မဖြစ်နိုင်သောကိစ္စ ဖြစ်သည်ဟု ဥရောပ ခေါင်းဆောင်များက ပြောကြားထားသည်။

မေသည် ဇူလိုင်လ ၂၁ ရက်နေ့တွင် ပြင်သစ်သို့ ရောက်ရှိချိန်၌လည်း အီးယူ စည်းမျဉ်းများကို လိုက်နာမည်လော၊ သို့တည်းမဟုတ် အခွင့်အရေးများကို လက်လွှတ်မည်လော ဆိုသည်ကို ပြင်သစ်သမ္မတ ဖရန်ဆွာဟော်လန်၏ တောင်းဆိုမှုနှင့် ရင်ဆိုင်ရမည် ဖြစ်သည်။

ပြီးခဲ့သည့်အပတ်က နိစ်မြို့တွင် ကုန်ကားဖြင့် အကြမ်းဖက် တိုက်ခိုက်ခံရမှုကြောင့်  ပြည်တွင်းဖိအားများဖြင့် ရင်ဆိုင်နေရသော ဟော်လန်သည် ဗြိတိန်အရေးတွင် ပြတ်ပြတ်သားသား ရပ်တည်ရန် လိုအပ်နေသည်။

ပြင်သစ်ကိုလည်း ဥရောပသမဂ္ဂမှ ခွဲထွက်စေလိုသော ဖရိတ်စစ် (Frexit) လိုလားသည့် လက်ယာစွန်းပါတီ အမျိုးသားတပ်ဦးနှင့် ယင်းပါတီခေါင်းဆောင် အမျိုးသမီး မာရီနီလီပင်းတို့ လူကြိုက်များနေမှုကြောင့် ဟော်လန်မှာလည်း အခက်ကြုံနေရသည်။