News

POST TYPE

LOCAL

မြစ်ဆုံစီမံကိန်း ဒေါ်အောင်ဆန်းစုကြည် ဦးဆောင်ဖြေရှင်းမည်
26-Jul-2016

ရန်ကုန်၊ ဇူလိုင် ၂၅

မြစ်ဆုံစီမံကိန်းကို အဘက်ဘက်မှ ချင့်ချိန်ပြီး နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဦးဆောင်မှုနှင့် သင့်လျော်သော အဖြေရှာသွားမည် ဖြစ်ကြောင်း NLD ပါတီ ပြောရေးဆိုခွင့်ရှိသူ ဦးဝင်းထိန်က ပြောဆိုသည်။

အလားတူ မြစ်ဆုံစီမံကိန်း အပြီးတိုင် ရပ်ဆိုင်းရန် ဇူလိုင် ၂၄ ရက်နေ့ထုတ် ကြေးမုံသတင်းစာ အာဘော်တွင် ရေးသားဖော်ပြခဲ့ခြင်းများ ပြုခဲ့သည်။

သို့သော် မြစ်ဆုံစီမံကိန်း အပါအဝင် အခြားစီမံကိန်းများကို နိုင်ငံတော်အတိုင်ပင်ခံ ခေါင်းဆောင်မှုဖြင့် ဖြေရှင်းသွားမည် ဖြစ်ကြောင်း NLD ပါတီ ပြောရေးဆိုခွင့်ရှိသူ ဦးဝင်းထိန်က ဆိုသည်။
“အရင်အစိုးရ လုပ်သွားတဲ့ အရာတွေကို ကျွန်တော်တို့က လုံးဝပစ်ပယ်တယ်ဆိုတဲ့ သဘောလည်း မရှိဘူး။ အဘက်ဘက်က ချင့်ချိန်ပြီးတော့ ဒေါ်အောင်ဆန်းစုကြည် ခေါင်းဆောင်မှုနဲ့ သင့်လျော်တဲ့ အဖြေရှာသွားမယ်” ဟု NLD ပါတီ ပြောရေးဆိုခွင့်ရှိသူ ဦးဝင်းထိန်က ပြောကြားသည်။

ကချင်ပြည်နယ် မြစ်ဆုံ၌ ရေကာတာ တည်ဆောက်ပြီး ရေအားလျှပ်စစ် ထုတ်ယူမည့် မြစ်ဆုံစီမံကိန်းကို ပညာရှင်များနှင့် ပြည်သူများ ဝိုင်းဝန်းကန့်ကွက်ခဲ့ခြင်းကြောင့် သမ္မတ ဦးသိန်းစိန်က အစိုးရ လက်ထက်တွင် စီမံကိန်းကို ရပ်ဆိုင်းထားရန် ၂၀၁၁ ခုနှစ်တွင် လွှတ်တော်သို့ သဝဏ်လွှာ ပေးပို့ခဲ့သည်။

မြစ်ဆုံစီမံကိန်း တည်ဆောက်သော ကုမ္ပဏီသည် တရုတ်နိုင်ငံသားများ ပိုင်ဆိုင်သော်လည်း တရုတ်ကုမ္ပဏီ၏ နောက်တွင် တရုတ်အစိုးရ ရှိနေခြင်းကြောင့် ပြောဆိုရန် ခက်ခဲနိုင်ကြောင်း ဦးဝင်းထိန်က ဆိုသည်။
“တစ်ဖက်က တရုတ်ကုမ္ပဏီ ဆိုသော်လည်းပဲ သူ့နောက်မှာက တရုတ်အစိုးရ ရှိသေးတယ်။ ယတိပြတ်ပြောဖို့ ခက်တယ်” ဟု ဦးဝင်းထိန်က ဆက်လက်ပြောကြားသည်။

အဆိုပါ စီမံကိန်းကို ၂၀၀၆ ခုနှစ်တွင် တရုတ်နှင့် မြန်မာ သဘောတူစာချုပ် ချုပ်ဆိုခဲ့ပြီး ၂၀၀၉ ခုနှစ်တွင် ဆောက်လုပ်ရေး လုပ်ငန်းများအား တရုတ်အစိုးရပိုင် CPI ကုမ္ပဏီက ဦးဆောင်၍ စတင်တည်ဆောက်ခဲ့သည်။ 

မြစ်ဆုံဆည် စီမံကိန်းအတွက် ဒေါ်လာ ၃ ဒသမ ၆ ဘီလီယံ အကုန်အကျခံ တည်ဆောက်ရန် စီစဉ်ခဲ့ပြီး မေခ၊ မလိခ မြစ်များပေါ်ရှိ ရေကာတာ စီမံကိန်းများအတွက် တရုတ်နိုင်ငံက ဒေါ်လာ ဘီလီယံ ၂၀ အထိ ရင်းနှီးမြှုပ်နှံထားကြောင်း၊ အဆိုပါ စီမံကိန်းမှ ရေအားလျှပ်စစ် မဂ္ဂါဝပ် ၆၀၀၀ ထွက်ရှိမည်ဖြစ်ကာ အများစုကို တရုတ်နိုင်ငံက ရယူမည်ဖြစ်ကြောင်း ယခင်ထုတ်ပြန်ထားသော မှတ်တမ်းများအရ သိရသည်။