News

POST TYPE

LATEST NEWS POST

လောင်းကစားဝိုင်းရှိကြောင်း စစ်ဆေးတွေ့ရှိလျှင် စခန်းမှူးနှင့်နယ်ထိန်းကို အရေးယူမည်
21-May-2019

တောင်ငူ၊ မေ ၂၁

ပဲခူးတိုင်း မြို့နယ်များရှိ ရပ်ကွက်၊ ကျေးရွာများတွင် လောင်းကစားလုပ်နေကြောင်း စစ်ဆေးတွေ့ရှိလျှင် ယင်းနေရာအပိုင် စခန်းမှူးနှင့်နယ်ထိန်းကို ရဲစည်းကမ်းထိန်းသိမ်းရေး ဥပဒေအရ အရေးယူမည်ဖြစ်ကြောင်း ပဲခူးတိုင်းလုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးလှမျိုးရွှေက ပြောကြားသည်။

မေလ ၂၀ ရက်က ပြုလုပ်သည့် ဒုတိယအကြိမ် ပဲခူးတိုင်းလွှတ်တော် ၁၂ ကြိမ်မြောက် ပုံမှန် အစည်းအဝေးတွင် ရွှေတောင်မြို့နယ် အမှတ် ၂ တိုင်းလွှတ်တော်အမတ် ဦးအုန်းသွင်၏ လောင်းကစားဝိုင်းများ လုပ်နေသော ရပ်/ကျေးအုပ်စု အုပ်ချုပ်ရေးမှူးများ၊ နယ်ခံရဲတပ်ဖွဲ့ဝင်များကို မည်သို့အရေးယူကြောင်း မေးခွန်းကို ဝန်ကြီးက ပြန်လည်ဖြေကြားခဲ့ခြင်းဖြစ်သည်။

“နယ်မြေခံရဲစခန်းအလိုက် နယ်ထိန်းတွေ အပိုင်နယ်မြေ သတ်မှတ်ပေးထားတယ်။ လောင်းကစားမှုတွေကိုလည်း သတင်းအရဖြစ်စေ၊ တိုင်ကြားမှုအရဖြစ်စေ ဖမ်းဆီးအရေးယူနေတယ်။ တကယ်လို့ တာဝန်ရှိသူအထက်ဆင့်က ဝင်ဖမ်းရင်၊ တိုင်လို့ဖမ်းမိခဲ့ရင် အပိုင်ရဲစခန်းမှူးနဲ့ နယ်ထိန်းကို ရဲစည်းကမ်းဥပဒေနဲ့ အရေးယူနေတယ်”ဟု လုံနယ်ဝန်ကြီးက ပြောကြားသည်။

အသွင်ကူးပြောင်းရေးကာလတွင် တရားဥပဒေစိုးမိုးရေးလုပ်ငန်းသည် အရေးပါပြီး နယ်ဒေသများတွင် တရားဥပဒေကို စိန်ခေါ်နေသည့် လောင်းကစားလုပ်ငန်းများနှင့်ပတ်သက်ပြီး မေးမြန်းသင့်သည်ဟု ယူဆသဖြင့်သာ မေးမြန်းခဲ့ခြင်း ဖြစ်ကြောင်း ရွှေတောင်မြို့နယ် အမှတ် ၂ တိုင်းလွှတ်တော်အမတ်က ပြောကြားသည်။

ပဲခူးတိုင်းအရှေ့ခြမ်းမြို့နယ်တစ်ခုမှ စခန်းမှူးတစ်ဦးက “ရဲလည်း နတ်မျက်စေ့မှ မရှိတာဗျာ။ သိတာလည်းရှိသလို၊ မသိတာလည်း ရှိတာပေါ့။ ဒီလိုပြဿနာမျိုးက တကယ်တော့ အောက်ခြေမှာ တကယ်လုပ်နေတဲ့ ရဲတွေက ပိုသိပါတယ်။ အပေါ်က ဝင်ဖမ်းလို့ အရေးယူမယ်ဆိုလည်း ခံရုံကလွဲ ဘာတတ်နိုင်မလဲဗျာ”ဟု ပြောကြားသည်။

ပြီးခဲ့သည့်နှစ်အတွင်း အထက်ဌာနက ဝင်ဖမ်းသည့်လောင်းကစားအမှုနှင့်ပတ်သက်၍ ဆိုင်ရာအပိုင်နယ်မြေစခန်းများမှ ရဲအရာရှိအဆင့် ၄ ဦး၊ အခြားအဆင့် ၂ ဦး အရေးယူခံခဲ့ရပြီး အရာရှိ ၃ ဦးကို သတိပေးခဲ့ကြောင်း၊ ယခုနှစ်အတွင်း အရာရှိ ၂ ဦး၊ အခြားအဆင့် ၁ ဦးကို အရေးယူခဲ့ပြီး အရာရှိ ၄ ဦးကို သတိပေးထားကြောင်း တိုင်းလွှတ်တော်မှတ်တမ်းများအရ သိရှိရသည်။

R-15