News

POST TYPE

INTERVIEW

ပိုင်တံခွန်နဲ့ တွေ့ဆုံခြင်း
22-Jul-2019

“အနုပညာကြေးကတော့ ဒီမှာထက် ဆယ်ဆရတယ်”



မော်ဒယ်လ်သရုပ်ဆောင် ပိုင်တံခွန်နဲ့ တွေ့ဆုံခိုက် ထိုင်းမှာ နာမည်ကြီး ရေပန်းစားနေတဲ့အကြောင်း၊ ထိုင်းမှာ ကြော်ငြာသွားရောက်ရိုက်ကူးမယ့်အကြောင်း၊ ရုပ်ရှင်ရိုက်ဖို့လည်း ကမ်းလှမ်းထားတယ်ဆိုတဲ့အကြောင်းတွေကို မေးမြန်းထားပါတယ်။

Voice : ထိုင်းမှာ ရေပန်းစားတယ်နော်။ အဲဒီအကြောင်းလေး အရင်ပြောပေးပါဦး။
PTG : ထိုင်းမှာက အဓိက ကျွန်တော့်ရဲ့ဓာတ်ပုံတွေ သူတို့နိုင်ငံမှာ တင်တယ်။ သူတို့ ထိုင်းနိုင်ငံရဲ့ နာမည်ကြီးမီဒီယာတွေ၊ ချန်နယ်တွေကတစ်ဆင့်၊ ဓာတ်ပုံတွေကတစ်ဆင့် တင်ကြတော့ ထိုင်းက ကုမ္ပဏီအကြီးတွေကနေပြီးတော့ Mr ခန့်တာတို့၊ ကြော်ငြာရိုက်တာတို့ သူတို့နိုင်ငံက ပရိသတ်တွေနဲ့ တွေ့ဆုံဖို့ ကျွန်တော့်ကို တောက်လျှောက်ကမ်းလှမ်းလာတယ်။ ပွဲကတော့ အမှန်တိုင်းပြောရင် အကုန်လုံးလက်ခံချင်တယ်။ ကျွန်တော် သူတို့နိုင်ငံမှာ သွားလုပ်ရမှာ ပျော်လည်း ပျော်တယ်။ အရမ်းကြီးလည်း သွားမလုပ်ရဲဘူး။ ဒါကတော့ အပွင့်လင်းဆုံးပြောတာ Fan Meeting ဆိုလည်း တစ်နှစ်မှာ တစ်ပွဲပဲ လက်ခံပေးပါတယ်။ ကြော်ငြာအတွက်ဆို ဩဂုတ်လ တစ်ရက်နေ့ သွားရမယ်။ ၁၀ ရက်၊ ၁၁ ရက်လောက် ဘန်ကောက်မှာနေရမယ်။ ကြော်ငြာတွေ တောက်လျှောက်ရိုက်ရမယ်။ သူတို့ နိုင်ငံက ရုပ်ရှင်တွေလည်း ကမ်းလှမ်းထားတာရှိတယ်။ အဲဒါတွေ စကားပြောပြီးလို့ရှိရင် အခွင့်အရေးတွေတော့ အများကြီးရခဲ့တယ်။ ဝမ်းသာစရာကိစ္စတွေလည်း အများကြီးရှိခဲ့ပါတယ်။ 

Voice : Fan Meeting အတွက် လက်မှတ်ဈေးနှုန်းတွေလည်း ထွက်လာတယ်နော်။ ဘယ်လိုညှိနှိုင်းရတာမျိုးရှိလဲ။
PTG : ကျွန်တော့်ကို သတ်မှတ်ထားပေးတဲ့ဈေးကတော့ အမှန်တိုင်းပြောရင် ပရိသတ်တွေ အရမ်း Fair ဖြစ်တဲ့ကြေး Fan Meeting တက်ဖူးတဲ့သူတွေ သိပါတယ်။ ဒါတွေ ထိုင်းဘက်ကလူတွေပဲ အကုန်သတ်မှတ်ထားတာပါ။ ကျွန်တော် လုပ်ထားတာတော့ မဟုတ်ဘူး။

Voice : ပိုင်တံခွန် ချေသွားပြီလို့လည်း ပြောနေကြတယ်။ ဘာပြောချင်တာများရှိလဲ။
PTG : မချေပါဘူး။ အရင်ကတည်းကလည်း ကျွန်တော် ဒီအတိုင်းပဲနေတယ်။ ဟိုးအရင်ကတည်းက ဒီနေ့ချိန်ထိ တစ်ခါမှ ပြောင်းလဲတာမျိုးမရှိဘူး။ အရင်ကထက်တော့ ကိုယ်ပိုင်အချိန်တော့ ပိုပြီးတော့ လျော့နည်းလာတယ်။ တစ်ချိန်လုံး အဆဲခံရတယ်။ ဒီဘက်မှာလည်း အလုပ်များတယ်။ ပရိသတ်တွေနဲ့ ဖေ့စ်ဘွတ်ခ်မှာတော့ ကောင်းကောင်းစကားမပြောဖြစ်တော့ဘူး။ ဒီလောက်ပါပဲ။ 

Voice : ထိုင်းဘက်ကသူတွေနဲ့ အလုပ်လုပ်ရတာ ကိုယ့်အတွက်ငွေကြေးပဲဖြစ်ဖြစ်၊ အနုပညာပဲဖြစ်ဖြစ် ဘာတွေအကျိုးရှိလာနိုင်မလဲ။
PTG : အနုပညာကြေးကတော့ ဒီမှာထက် ဆယ်ဆရတယ်။ ကျွန်တော်က မြန်မာနိုင်ငံကဖြစ်တဲ့အတွက် မြန်မာနိုင်ငံက အနုပညာရှင်က ကြေးနည်းနည်းပဲရတာမျိုး ဘယ်တော့မှ အဖြစ်မခံဘူး။ အဲတော့ အမှန်တိုင်းပြောရရင် ရန်ကုန်မှာ တောင်းတာထက် ဆယ်ဆလောက်၊ ဆယ့်ငါးဆလောက်ရတယ်။ 

Voice : အနုပညာဝမ်းစာတွေရော ဘာတွေထပ်ဖြည့်ဦးမလဲ။
PTG : အရင်ကထက်တော့ ကိုယ့်ကို တိုးတက်အောင် ပိုပြီးတော့ အင်တာနေရှင်နယ်တန်းကို ဝင်နိုင်အောင် ကြိုးစားရတယ်။ အဲဒီကြိုးစားချိန်မှာလည်း အင်တာနေရှင်နယ်ကို သွားချင်တယ်ဆိုရင် အင်္ဂလိပ်စာ လေ့လာရတယ်။ ကျွန်တော်က အင်္ဂလိပ်စာ အရမ်းအားနည်းတယ်။ စကားပြန်နဲ့ဆိုတော့ ကျွန်တော့်အတွက် အဆင်မပြေဘူး။ ကိုယ်တိုင်ရတဲ့ချိန်လေးကို ကြိုးစားပြီး လေ့လာနေတယ်။ အင်္ဂလိပ်စာကတော့ အရင်ကထက် ပိုလေ့လာဖြစ်တယ်။ 

ခင်ညိုညိုသိမ့်