News

POST TYPE

FOREIGN AFFAIRS

ဒိန်းမတ်တွင် ခေါင်းမြီးခြုံထည် ပိတ်ပင်လိုက်ခြင်းကို လူရာချီ ကန့်ကွက်ဆန္ဒပြ
03-Aug-2018


ကိုပေဟေဂင်၊ ဩဂုတ် ၁

ဒိန်းမတ်နိုင်ငံတွင် ခေါင်းမှခြေအထိ ဖုံးကွယ်ပေးသည့် ခေါင်းမြီးခြုံထည် (ဘူရ်ခါ) ဝတ်ဆင်မှုပိတ်ပင်သည့်ဥပဒေ စတင်အသက်ဝင်သည့် ဗုဒ္ဓဟူးနေ့တွင် မြို့တော် ကိုပေဟေဂင်နှင့် ဒုတိယအကြီးဆုံးမြို့ အာဟတ်စ်၌ ဒိန်းမတ်နိုင်ငံသား ၁၃၀၀ ခန့် ကန့်ကွက်ဆန္ဒပြခဲ့ကြောင်း DW သတင်းဌာနက ဖော်ပြသည်။

ဘူရ်ခါ ဝတ်ဆင်မှုပိတ်ပင်လိုက်ခြင်းမှာ မွတ်ဆလင်များကို မမျှမတပစ်မှတ်ထား တိုက်ခိုက်ခြင်းဖြစ်ပြီး ရွှေ့ပြောင်းအခြေချမှု ဆန့်ကျင်ရေး သဘောထားအမြင်များကို အားပေးအားမြှောက်ပြုရာရောက်သည်ဟု လူ့အခွင့်အရေးလှုပ်ရှားသူအချို့က ဝေဖန်ခဲ့သည်။ လူဦးရေ ၅ ဒသမ ၇ သန်းရှိသော ဒိန်းမတ်တွင် ၅ ရာခိုင်နှုန်းမှာ မွတ်ဆလင်များဖြစ်သည်။ အမျိုးသမီးများ မိမိနှစ်သက်ရာ ယုံကြည်ရာ ဝတ်ဆင်ခွင့်ကို အစိုးရက ချိုးဖောက်နေသည်ဟုလည်း လူ့အခွင့်အရေးသမားအချို့က ဝေဖန်ခဲ့သည်။

ယင်းဥပဒေကို ဒိန်းမတ်လွှတ်တော်တွင် မေလကတည်းက ပြဋ္ဌာန်းနိုင်ခဲ့ခြင်းဖြစ်ပြီး ဩဂုတ်လ ၁ ရက်နေ့တွင်မှ စတင်အာဏာသက်ဝင်ခြင်းဖြစ်သည်။ ဝေဖန်သူများကမူ ယခုပိတ်ပင်မှုသည် ဘာသာရေး ဝတ်စားဆင်ယင်မှုအပေါ် တားမြစ်ရာရောက်သည်ဟု သုံးသပ်မှုများရှိနေသည်။

ကိုပေဟေဂင်မြို့တွင် ဆန္ဒပြသူများသည် ပုံမှန်ဘူရ်ခါခြုံထည်ထက်ပင် ပိုမိုပိတ်ဆို့ထားသည့် မျက်လုံးနှစ်လုံးနေရာသာ ဖွင့်ထားသော နစ်ကတ်ခြုံထည်များဝတ်ဆင်၍ ဆန္ဒပြချီတက်ခဲ့ကြသည်။ 

ဆန္ဒပြချီတက်ပွဲမှာ သုံးနာရီနီးပါး ကြာမြင့်ခဲ့သည်။ ဆန္ဒပြသူများထဲတွင် မွတ်ဆလင်များပါဝင်သလို မွတ်ဆလင်မဟုတ်သည့် ဒိန်းလူမျိုးများလည်းပါဝင်ပြီး “လမ်းပေါ်မှာ လူမျိုးရေးခွဲခြားသူတွေ အလိုမရှိ”၊ “ငါ့ဘဝ ငါရွေးချယ်”ဆိုသော ကြွေးကြော်သံများကို အော်ဟစ်ချီတက်ခဲ့ကြသည်။

အမည်အပြည့်အစုံ မပြောလိုသော နစ်ကတ်ခြုံထည်ဝတ်ထားသည့် အသက် ၂၁ နှစ်အရွယ် ကျောင်းသူ ဆာဘီနာက “ကျွန်မတို့ ဒီလိုခွဲခြားဆက်ဆံမှုကို လက်မခံဘူး။ အထူးသဖြင့် ဘာသာရေးလူနည်းစုအပေါ် အထူးတလည်ပစ်မှတ်ထားတာကို လက်မခံဘူးဆိုတာ အစိုးရသိအောင် ပြလိုက်တာဖြစ်တယ်”ဟု ပြောကြားခဲ့သည်။

ဆာဘီနာသည် ယခုပိတ်ပင်မှုတွင် တိုက်ရိုက်သက်ရောက်သည့် နစ်ကတ် သို့မဟုတ် ဘူရ်ခါခြုံသည့် ဒိန်းမတ်နိုင်ငံနေ မွတ်ဆလင်အမျိုးသမီး ၁၅၀-၂၀၀ ဝန်းကျင်အနက်မှ တစ်ဦးဖြစ်သည်။

ဥပဒေအရဘူရ်ခါ သို့မဟုတ် နစ်ကတ်ခြုံသော အမျိုးသမီးများကိုမျက်နှာ ဖုံးကွယ်ထားမှုဖွင့်ပြရန် သို့မဟုတ် အများပြည်သူသွားလာရာနေရာမှ ထွက်ခွာသွားရန် ရဲက ညွှန်ကြားနိုင်သည်။ ထို့အပြင် ပထမတစ်ကြိမ်တွေ့ရှိပါက ဒိန်းမတ်ငွေကြေး ကရောင်း ၁၀၀၀ ( ဒေါ်လာ ၁၆၀) ဒဏ်ရိုက်ခံရမည်ဖြစ်ပြီး နောက်ထပ် ထပ်တွေ့တိုင်း ဒဏ်ကြေးမြင့်သွားမည်ဖြစ်ကာ လေးကြိမ်မြောက်တွင် ဒဏ်ကြေး ကရောင်း ၁၀၀၀၀ အထိ ပေးဆောင်ရမည်ဖြစ်သည်။

ယခုဆန္ဒပြပွဲတွင် ခေါင်းမြီးခြုံဆန္ဒပြသူများကိုမူ လွတ်လပ်စွာထုတ်ဖော်ခွင့်ကို ကျင့်သုံးမှု၊ ငြိမ်းချမ်းစွာဆန္ဒပြမှု လုပ်ဆောင်ခြင်းဖြစ်သောကြောင့် အရေးယူမည်မဟုတ်ဟု အာဏာပိုင်များက ထုတ်ပြန်ထားသည်။

အပြည်ပြည်ဆိုင်ရာ လွတ်ငြိမ်းချမ်းသာခွင့်အဖွဲ့က ယခုဥပဒေသည် အမျိုးသမီးများ၏ ဝတ်စားဆင်ယင်မှုဆိုင်ရာ ရွေးချယ်မှုကို ပြစ်မှုမြောက်အောင် လုပ်ခြင်းဖြစ်ကြောင်း ဝေဖန်ထားသည်။ 

F-03



  • VIA