တူရကီနိုင်ငံ အေဂျင်ကမ်းရိုးတမ်းတစ်လျှောက်နှင့် ဂရိကမ်းခြေ ဆာမို့စ်တောင်ပိုင်းသို့ အားပြင်းသော ငလျင်ဝင်ရောက်ခဲ့သဖြင့် သေဆုံးသူဦးရေ ၂၂ဦး ထက်မနည်းရှိခဲ့ပြီး အိမ်များစွာပျက်စီးခဲ့သည် BBC သတင်းဌာနတွင် ဖော်ပြထားသည်။

အမေရိကန်နိုင်ငံတွင် ကိုရိုနာဗိုင်းရပ်စ်ပိုးတွေ့လူနာ ကိုးသန်းကျော်ရှိလာပြီဖြစ်သည်ဟု John Hopkins တက္ကသိုလ်က ထုတ်ပြန်ခဲ့ကြောင်းကို CNA သတင်းဌာနတွင် ဖော်ပြသည်။

ဆောင်းမဝင်မီ ဥရောပတစ်လွှား ကိုဗစ်ဒုတိယလှိုင်းအားကောင်းလာချိန် ပြင်သစ်သမ္မတ အီမန်နျူရယ်မက်ခရွန်နှင့် ဂျာမန်အဓိပတိ အင်ဂလာမာကဲလ်တို့က ၎င်းတို့ နိုင်ငံအသီးသီးကို အောက်တိုဘာလ ၂၈ ရက်နေ့တွင် လော့ခ်ဒေါင်းပြန်ချလိုက်ကြောင်း Reuters သတင်းဌာနက ဖော်ပြသည်။

အမေရိကန်သမ္မတ ဒေါ်နယ်ထရမ့် က ပြည်နယ်အစိုးရအာဏာပိုင်များအနေဖြင့် ကိုဗစ်ကူးစက်ပျံ့နှံ့မှုကာကွယ်ရန် လော့ခ်ဒေါင်းချခြင်းမျိုး မလုပ်ရန် တိုက် တွန်းလိုက်ကြောင်း BBC သတင်းဌာန ကဖော်ပြသည်။

ကမ္ဘာပေါ်တွင် လူသွားလူလာ (လူသူအရောက်အပေါက်)နည်းသည့်နေရာများတွင် တစ်ခုအပါအဝင်ဖြစ်သော မာရှယ်ကျွန်းစုများတွင် ကိုရိုနာဗိုင်းရပ်စ် ပေါ့စတစ် လူနာနှစ်ဦး ပထမဆုံးစတင်တွေ့ရှိခဲ့ကြောင်း BBC သတင်းဌာနကရေးသားဖော်ပြသည်။

အတိုက်အခံအင်အားစုများက ဝန်ကြီးချုပ်ရာထူးမှ နုတ်ထွက်ပေးရန် ဖိအားပေးတောင်းဆိုမှုများ မည်သို့ပင်ရှိစေကာမူ ယင်းရာထူးတာဝန်များကို ဆက်လက်လုပ်ဆောင်သွားမည်သာဖြစ်သည်ဟု ထိုင်းဝန်ကြီးချုပ် ဗိုလ်ချုပ်ကြီးဟောင်း ပရာရွတ်ချန်အိုချာက ပြောကြားလိုက်သည်။

ရုရှား နိုင်ငံထုတ် Covid 19 ကာကွယ်ဆေး Sputnik V ကို အရေးပေါ်အသုံးပြုနိုင်သည့် ဖြေဆေးအဖြစ် လက်ခံပေးကြရန် Russia Direct Investment Fund (RDIF) က ကမ္ဘာ့ကျန်းမာရေးအဖွဲ့ (WHO) ကို တင်ပြလျှောက်ထားခဲ့သည်ဟု CNA သတင်းဌာနတွင် ဖော်ပြသည်။

ကိုရိုနာဗိုင်းရပ်စ်ကပ်ရောဂါ ကမ္ဘာအနှံ့ပျံ့နှံ့ပြီးနောက်ပိုင်း ကမ္ဘာပေါ်တွင် မဲပေးသူအများဆုံးရွေးကောက်ပွဲအဖြစ် အိန္ဒိယနိုင်ငံ ဘီဟာရ်ပြည်နယ် ရွေးကောက်ပွဲများကျင်းပလျက်ရှိရာ လူသန်းချီ လာရောက်မဲပေးကြကြောင်း AFP သတင်းဌာနက ဖော်ပြသည်။

အမေရိကန်တရားရုံးချုပ် တရားသူကြီးအဖြစ် အေမီကွန်နေးဘာရက်ကို အထက်လွှတ်တော်က အတည်ပြုခန့်အပ်လိုက်ရာ အမေရိကန်သမ္မတ ရွေးကောက်ပွဲမကျင်းပမီ တစ်ပတ်အလိုတွင် သမ္မတဒေါ်နယ်ထရမ့်အတွက် အောင်ပွဲတစ်ရပ်ဖြစ်လာခဲ့ကြောင်း BBC သတင်းဌာနက ဖော်ပြသည်။

အီတလီနိုင်ငံတွင် Covid 19 ဒုတိယလှိုင်းအားထိန်းချုပ်ရန် ထုတ်ပြန်လိုက်သော စည်မျဉ်းသစ်များကို မကျေနပ်ကြသဖြင့် အောက်တိုဘာလ ၂၆ ရက်နေ့တွင် ဆန္ဒပြမှုများဖြစ်ခဲ့သည်ဟု BBC သတင်းဌာနတွင် ဖော်ပြသည်။

ဝန်ကြီးချုပ် ပရာယုချန်အိုချာ နုတ်ထွက်ပေးရန် လွှတ်တော်အထူးအစည်းအဝေးတွင် အတိုက်အခံခေါင်းဆောင် ဆွမ်ပေါင်အမွန်ဝီဝပ် (Sompong Amornwiwat) က တောင်းဆိုလိုက်ချိန်တွင် အစိုးရဆန့်ကျင် ဆန္ဒပြသူများကလည်း ဂျာမန်သံရုံးသို့ ဦးတည်ချီတက်ရန် စီစဉ်ထားကြကြောင်း Bangkok Post သတင်းစာက ဖော်ပြသည်။

Covid 19 ကပ်ရောဂါကို အမေရိကန်ထိန်းချုပ်နိုင်ခြင်းမရှိတော့ဟု အမေရိကန်သမ္မတ ဒေါ်နယ်ထရမ့်၏ ရုံးအဖွဲ့မှူးက ပြောကြားခဲ့ကြောင်း BBC သတင်းဌာန တွင်ဖော်ပြသည်။

တရုတ်နိုင်ငံ ရှင်ကျန်းပြည်နယ်ရှိ မြို့တစ်မြို့တွင် ကိုရိုနာဗိုင်းရပ်စ်ကူးစက်ခံရသူတစ်ဦးတွေ့ရှိခဲ့ပြီးနောက် တစ်မြို့လုံးတွင်နေထိုင်သူအားလုံးကို ပိုးရှိ၊ မရှိ စမ်းသပ်စစ်ဆေးလျက်ရှိကြောင်း BBC သတင်းဌာနက ရေးသားဖော်ပြသည်။

နိုက်ဂျီးရီးယားနိုင်ငံတွင် လမ်းမပေါ် ဆူပူအုံကြွမှုများသာမက လုယက်ဖျက်ဆီးမှုများပါ ဆိုးဆိုးရွားရွားဖြစ်ပေါ်နေသည့်အတွက် ရဲချုပ်က ရဲတပ်ဖွဲ့ဝင်များအားလုံးကို အရေးပေါ်စုရုံးထားရန် အမိန့်ထုတ်ပြန်လိုက်ကြောင်း BBC သတင်းဌာနက ရေးသားဖော်ပြသည်။

အမေရိကန်နိုင်ငံတွင် ဆောင်းဦးဝင်လာပြီဖြစ်ချိန်၌ ကိုဗစ်-၁၉ ကူးစက်မှု မြင့်တက်လာနေပြီး အောက်တိုဘာလ ၂၄ ရက်နေ့တွင် ကူးစက်မှုအသစ် ၈၃,၇၁၈ ဦး ရှိခဲ့သည်ဟု စီအင်န်အင်န်သတင်းတွင် ဖော်ပြထားသည်။