News

POST TYPE

ENTERTAINMENT

“အစိုးရ တစ်ရပ်အနေနဲ့ အခုချိန်ထိ ရုပ်ရှင်ဆိုတာ နိုင်ငံရဲ့ စီးပွားရေးတစ်ခုလို့ မသတ်မှတ်သေးသရွေ့ ကျွန်တော်တို့တွေက မအောင်မြင်နိုင်ဘူး။”
29-Jul-2016

မကြာခင် ရုံတင်ပြသတော့မယ့် ‘ရိုက်လိုက်ပါဦး ဒုန်းဒုန်းဒုန်း’ ဇာတ်ကားကိုလက်ခံဖြစ်ပုံ၊ အခုလက်ရှိ ရိုက်ကူးနေတဲ့ ဇာတ်ကားထဲက မိုက်ကယ်ဂျက်ဆင် ဇာတ်ရုပ်အတွက် ပြင်ဆင်ဖြစ်ပုံတွေနဲ့ နောက်ထပ်ပါဝင် ရိုက်ကူးမယ့် ရုပ်ရှင်ဇာတ်ကားတွေ အကယ်ဒမီရင်ခုန်သံတွေကို The Voice က သရုပ်ဆောင်ခင်လှိုင်နဲ့ တွေ့ဆုံပြီး မေးမြန်းထားတာဖြစ်ပါတယ်။

Voice : ရိုက်လိုက်ပါဦး ဒုန်းဒုန်းဒုန်း ဇာတ်ကားကို လက်ခံဖြစ်ပုံနဲ့ ဇာတ်ကားထဲမှာ ဘယ်လိုဇာတ်ရုပ်မျိုး သရုပ်ဆောင်ရမယ် ဆိုတာ ပြောပြပေးပါ။

KH : ကာရိုက်တာက လမ်းပေါ်က ခါးပိုက်နှိုက်တစ်ယောက်ပေါ့။ မျက်စိရှေ့မှာ အမြင်မတော်တာ တွေ့ရင်လည်း ပေါက်ကရတွေ လုပ်တတ်သူပေါ့။ ဟာသလုပ်တယ်၊  အတည်နဲ့လုပ်တယ်ပေါ့။ ဒီဇာတ်ကားကို လက်ခံဖြစ်တာက ဇာတ်အရ လုပ်ကွက်များတယ်။ ကိုခန့်နဲ့ တောက်လျှောက်အတွဲ  ဖြစ်နေတယ်။ နောက်တစ်ချက်က ကိုယ်လုပ်ချင်နေတဲ့ ကာရိုက်တာလေး ပါးပါးလေးပါ တယ်။ ကိုယ်က အတည်နဲ့သွားရတဲ့ ဟာသမျိုးကို ပိုကြိုက်တယ်။ ပြူးပြပြဲပြလုပ်ရတဲ့ ဟာသတွေထက်စာရင်။ အဲဒါကြောင့် လက်ခံဖြစ်တာ။

Voice : အခုနောက်ပိုင်း အက်ရှင်ကားတွေ အရိုက်များလာတာဆိုတော့ ပုံမှန်သွားနေတဲ့ ဟာသလိုင်းမဟုတ်ဘဲနဲ့ လမ်းကြောင်းတစ်ခု ပြောင်းချင်တာလား။

KH : လုံးဝကြီးကို ဟာသမလုပ်တော့ဘဲနဲ့ အက်ရှင်ဘက်ကို သွားမှာတော့ မဟုတ်ဘူး။ ဒါပေမဲ့ ကိုယ်လုပ်နိုင်တာ လုပ်တတ်တာလေးကို လုပ်ပြခွင့်ရတုန်းမှာ လုပ်ပြချင်တာနဲ့  အခုနောက်ပိုင်းမှာလည်း အဲဒီလိုကားမျိုးတွေက ခေတ်စားလာတော့ တော်တော်များများက ကိုယ့်ကိုလာငှားကြတော့ ကိုယ်လည်း ကြိုက်တော့ လက်ခံဖြစ်နေတာပါ။ ပုံသဏ္ဌာန် တူရင်တော့ လက်မခံပါဘူး။ အော်ရဂျင်နယ် ဂိုဏ်းစတားနဲ့ ခိုးဆိုးလုနှိုက်ဆိုရင် Trend လုံးဝမတူဘူး။ အခုတော့ ဟာသတွေရိုက်ဖြစ်ပါတယ်။ ကိုယ့်ဇာတ်လမ်းမှာ ကိုယ်သာ ဇာတ်လိုက်ဆိုရင် မိုက်ကယ်ဂျက်ဆင်ရူး နေတဲ့ လူတစ်ယောက်ပေါ့။ တစ်ကားလုံး  မိုက်ကယ်ဂျက်ဆင်လို ကတယ်။ သူ့လိုပဲနေတယ်။ အကြမ်းနဲ့ ဟာသများနေမှာပါ။

Voice : မိုက်ကယ်ဂျက်ဆင်လို သရုပ်ဆောင်မှာဆိုတော့ သူနဲ့တူအောင် ဘယ်လိုမျိုးတွေ လေ့လာဖြစ်လဲ။

KH : မိုက်ကယ်ဂျက်ဆင်အခွေတွေ ပြန်ကြည့်တယ်။ ပြန်ကြည့်ပြီးတော့ သူ့ရဲ့ နေပုံထိုင်ပုံတွေ၊ ဝတ်စားဆင်ယင်ပုံတွေ၊ ဒီကားမှာ နည်းနည်းခက်တာက ရှေ့ပိုင်းမှာ သူက ပိုက်ဆံမရှိဘူး။ ပိုက်ဆံမရှိတော့ အဆင်ပြေသလိုနဲ့ တူအောင်ဝတ်ရတော့ နည်းနည်းခက်တယ်။ မိုက်ကယ်ဂျက်ဆင် အစစ်လို ဝတ်ရတာ နည်းနည်းတော်သေးတယ်။ နောက်ပိုင်း ပိုက်ဆံတွေ ရသွားတဲ့ အချိန်ကျတော့ တကယ်အစစ်လို့  ဝတ်စားပုံစံ ပြောင်းလိုက်တယ်။ အဝတ်အစားက သေချာလေး ပြင်ဆင်သွားတယ်။  သားက Dancer ဆရာဆိုတော့ အကလေး  သူ့ဆီမှာ ပြန်နွှေးသွားတယ်။ အဓိကတော့ သူရဲ့လက်ဟန်တွေကို အတူဆုံး အနီးစပ်ဆုံး ဖြစ်အောင်လုပ်တယ်။ ဆံပင်တုနဲ့ ဦးထုပ်ကတော့ နေတိုးက စီစဉ်ပေးတယ်။ မိုက်ကယ်ဂျက်ဆင်နဲ့တူတဲ့ မိတ်ကပ်ကို သူကိုယ်တိုင်ပဲ  လိမ်းပေးတယ်။ ဒါပေမဲ့ အိုဗာတော့ လုပ်ရတာပေါ့နော်။ မိုက်ကယ်ဂျက်ဆင်နေရာမှာ နေတိုးလုပ်မယ်လို့ ထင်ထားကြတယ်။ နေတိုးက ကိုယ့်ကိုလုပ်စေချင်လို့ အဲဒီဝတ္ထုကိုရိုက်တာ။ သူက ကိုယ်ဆိုတာထက် ရယ်စရာလုပ်တဲ့သူတွေ လုပ်တာ ရယ်ချင်လို့ လက်ခံဖြစ်တဲ့ကား ဖြစ်နေတာ။

Voice : ဟာသနဲ့ အက်ရှင်တွေဆို ဘယ်ကာရိုက်တာကို သရုပ်ဆောင်ရတာ ပိုကြိုက်လဲ။

KH : ကိုယ်ကတော့ သရုပ်ဆောင်ရင် ဘယ်လိုပဲဖြစ်ဖြစ်ကြိုက်တယ်။ ဘယ်သူပဲခိုင်းခိုင်း အပီပြင်ဆုံး လုပ်သွားမယ်။

Voice : ဟာသအပိုင်းနဲ့က ပရိသတ်က လက်ခံပြီးသား အက်ရှင်ပိုင်းနဲ့ကျတော့   ကာရိုက်တာတွေနဲ့ အံဝင်ခွင်ကျဖြစ်အောင် ဘယ်လိုမျိုးတွေ ကြိုတင်ပြင်ဆင်ဖြစ်လဲ။ 

KH : သရုပ်ဆောင်ဆိုတာ အဓိက စိတ်ကိုသင်ယူတာပဲ။ ဆရာဝန်ဆိုရင် ဘယ်လိုမျိုး စိတ်နေစိတ်ထားရှိတဲ့ ဆရာဝန်မျိုးလဲ စသဖြင့်ပေါ့။ အခြောက်ဆိုရင် ဒီလိုပဲ အခြောက်ထဲမှာ ကာလာမျိုးစုံကွဲတာပဲ။ နတ်ကတော်နေတဲ့ Class က တစ်မျိုး၊ ရှောက်သီးဆေးပြားရောင်းတဲ့ Class က တစ်မျိုး၊ မိတ်ကပ်  Artist နေတဲ့ထိုင်တဲ့ Class က တစ်မျိုး။ သူတို့ရဲ့စိတ်တွေကို ဝင်စားရမယ်၊ နေမှုထိုင်မှု ပုံသဏ္ဌာန်တွေကို လေ့လာပြီး စိတ်ဝင်တစားလုပ်ရင် သူ့ဘာသာပါသွားတာပဲ။

Voice : ရိုက်စားဆိုရင် ပရိသတ်လက်ခံပြီးသား ဇာတ်ကား ဆိုတော့ အဲဒီထဲက ကွမ်းသီးကာရိုက်တာက ကိုယ့်အတွက် ဘယ်လောက် တာဝန်ကြီးသွားတာလဲ။

KH : သိပ်တာဝန်ကြီးတယ်။ ကိုကွမ်းသီးက ကိုယ့်ရဲ့ Idol ဖြစ်တယ်။ အရမ်းလည်းလေးစားတယ်။ ကိုကွမ်းသီးကျတော့  လုပ်ယူစရာ မလိုဘဲနဲ့ ဘာလုပ်လုပ်နေလိုက် တာနဲ့ သူ့ပုံစံက ရယ်စရာကောင်းတယ်။  ကိုယ်က ရယ်စရာဖြစ်အောင် နည်းနည်း လုပ်ယူရသေးတယ်။ သူ့နေရာမှာ ဝင်လုပ်ရမှာ  ဖြစ်တဲ့အတွက် တာဝန်တော်တော်ကြီးပါတယ်။ သူ့ပုံစံနဲ့တူအောင်တော့ လုပ်မှာ မဟုတ်ဘူး။ ကိုယ့်ပုံစံနဲ့ ကိုယ်လုပ်မှာ။  ဒါပေမဲ့ လုပ်ရမယ့်ဟာတွေ အကုန်လုံးက  သူလုပ်ခဲ့တဲ့ဟာတွေ ပြန်လုပ်ရမှာ။ ဒါပေမဲ့ Plot တွေတော့ မတူတော့ဘူး။ ဒီဘက်ခေတ်ကို အရမ်းပြောင်းလိုက်ပြီ။ ဇာတ်လမ်းလည်း မတူတော့ပါဘူး။ နာမည်ပဲတူတယ်။  

Voice : အခုရုံတင်ပြသနေတဲ့ ခိုးဆိုးလုနှိုက် ဇာတ်ကားဆိုရင် ပရိသတ်အားပေးမှု  များပြားတာ ဘာကြောင့်လို့ ထင်မိလဲ။

KH : အဓိက စိတ်ဓာတ်ပဲ။ ပထမဦးဆုံး ဒီဇာတ်ကားကို ရိုက်ဖို့စပြီးစီစဉ်တဲ့အချိန်က ကုမ္ပဏီကတစ်ခု၊ မိုး မဟုတ်ဘူး။ အကြောင်းကြောင်းကြောင့် မရိုက်ဖြစ်ဘူး။ ကိုစတီးလ် ရင်ထဲမှာ သူ့ကိုမန်နေဂျာလုပ်ခဲ့တဲ့ တောက်တိုမယ်ရ တစ်ယောက်မို့ အထင်မကြီးဘူးလို့  စိတ်ခံစားရတယ်။ အဲဒီအချိန်မှာ အကုန်လုံး  ကိုယ့်ဘာသာ ရိုက်မလို့ပြင်ဆင်ချိန်မှာ မိုးက ရိုက်တယ်။ ကိုယ်တို့ကျတော့ ကိုယ်လို ဇာတ်ပို့၊ ဇာတ်ရံဟာသတစ်ယောက်ကို လိုင်းတစ်ခုကို ချိန်းပြီး ရုပ်ရှင်ကားကြီးမှာ ရိုက်ရဲတဲ့ ကုမ္ပဏီ၊ ဒါရိုက်တာရော လေးစားတယ်။ အဲဒီအတွက် ကိုယ်အကောင်းဆုံး  ပြင်ဆင်တယ်။ အကောင်းဆုံးကြိုးစားတယ်။ နောက်တစ်ခုက ဒီကားထဲမှာပါတဲ့ လေးယောက်က စသိကတည်းက ညီအစ်ကိုရင်းလို ချစ်ချစ်ခင်ခင် နေကြတယ်။ အဲဒီတော့ ဒီဇာတ်ကားထဲမှာ တစ်ယောက်နဲ့ တစ်ယောက်ကြည့်တဲ့  မျက်လုံးတွေကအစ တကယ်ရင်ထဲကလာတဲ့  သံယောဇဉ်အကြည့်တွေ ဖြစ်တယ်။ အဲဒီ စိတ်ဓာတ်နဲ့ပဲ ကြိုးစားခဲ့ကြတယ်။ အဲဒီ ကြိုးစားမှုကြောင့် အရာထင်တယ်လို့ပဲ မြင်တယ်။ 

Voice : ရုပ်ရှင်ရုံ ၁၀၀ စီမံကိန်းတွေ လာတော့မှာဆိုရင် အခုလက်ရှိ ရုံတွေနည်းလို့ ဇာတ်ကားတွေမပြနိုင်တဲ့ ပြဿနာတွေ ဖြေရှင်းနိုင်မယ်လို့ထင်လား။

KH : အများကြီးကောင်းသွားနိုင်မယ်။ ဘာဖြစ်လို့လဲဆိုတော့ အပြိုင်အဆိုင် ဖြစ်လာတယ်။ အပြိုင်အဆိုင်ဖြစ်လာရင်  ကြိုးစားရတော့မယ်။ ဒီအမျိုးအစား တစ်ခုတည်းကိုပဲ ဆိုင်တွေအများကြီး ဖွင့်ထားမယ်ဆိုရင် ကောင်းတဲ့ဆိုင်ကိုပဲ ဝင်စားကြမှာလေ။ အဲဒီတော့ လောကသားတွေ ကြိုးစား ဖို့အများကြီးလိုလာပြီ။ နောက်တစ်ချက်က ဒါဆိုရင် အများကြီးရိုက်တော့မယ်။ အခု ဆိုရင် ကားတစ်ကား ရိုက်ပြီးသွားရင်း အကြာကြီး စောင့်ရတယ်။ ရုံတွေများလာရင်  အကြာကြီးစောင့်စရာ မလိုတော့ဘူး။  နောက်တစ်ချက်က ဆိုးသွားနိုင်တာက  ရိုက်တာများလာရင် ဗုန်းပေါလအောတွေ လည်းဖြစ်သွားနိုင်တယ်။ အဲဒါတော့ ထိန်းရမယ်။ 

Voice : ခိုးဆိုးလုနှိုက်ဇာတ်ကားက  ပရိသတ်သဘောကျတဲ့ ကားတစ်ကား ဆိုတော့ အဲဒီကားနဲ့ အကယ်ဒမီ ရင်ခုန်တာမျိုး ရှိလား။

KH : အကယ်ဒမီနဲ့ပတ်သက်လို့ ကျွန်တော်မခံစားပါဘူး။ ပရိသတ်ပေးတဲ့ အကယ်ဒမီတွေ အိမ်မှာအများကြီး။ အကယ်ဒမီကတော့ ရင်မခုန်တော့ပါဘူး။ ဒီကားမှာ  မြင့်မြတ်ရစေချင်တယ်။ ထွန်းထွန်းလည်း ရစေချင်တယ်။ နောက်တစ်ချက်က အသံ ရစေချင်တယ်။ ရုပ်ရှင်ဓာတ်ပုံလည်း ရစေချင်တာပေါ့။ ကျွန်တော် မမျှော်လင့်ပါဘူး။  အကယ်ဒမီပွဲလည်း တက်မှာမဟုတ်ဘူး။

Voice : ဗီဒီယိုလောကကျဆင်းနေတာ ဆင်ဆာ၊ နည်းပညာကြောင့်တွေလို့ ပြောနေကြတယ်။ အခုလက်ရှိ ကျဆင်းနေတာ ဘာကြောင့်လို့ မြင်မိလဲ။

KH : အဖက်ဖက်က အများကြီးပဲ။   အခွေတစ်ခွေငှားရင် တစ်ရက်မှ ၂၀၀ ရတယ်။ အခွေရဲ့ကွာလတီက လိုတယ်။ အခွေ ငှားသွားတယ်၊ နောက်နေ့ ပြန်လာအပ်တော့ အခွေက ထစ်နေတယ်။  အဲဒီတော့ အခွေရဲ့အရင်းရဖို့ သူတို့ပြန်ရအောင် လုပ်ရဦးမယ်။ ကြာတော့ မမြတ်တော့ သူတို့တွေ ခိုးလာကြတယ်။ ခိုးတာကို  ကျွန်တော်တို့က မတားဆီးနိုင်ဘူး။ ခိုးတဲ့လူတွေကြောင့် ဗီဒီယိုလောက ဆုတ်ယုတ်သွားတယ်။ သူတို့ကလည်း မခိုးလို့မရဘူး။ အရင်း မကျေနိုင်လို့။ အဲဒီတော့ နှစ်ဖက်ကြားမှာ  အဆင်မပြေနိုင်တော့ဘူး။ နောက်တစ်ခုက  နယ်မြေကျဉ်းမြောင်းမှု၊ ကျွန်တော်တို့မှာ  ရိုက်စရာနေရာမရှိဘူး။ စတူဒီယိုမရှိတဲ့ အတွက် ပန်းခြံထဲမှာ သွားရိုက်မယ်။ ပန်းခြံထဲမှာ ဂစ်တာတီးတဲ့သူတွေ ရှိမယ်။ ကျွန်တော်တို့က ကားရိုက်နေလို့ ခဏငြိမ်ပေးပါလို့ ပြောလို့မရဘူး။ အများပြည်သူပိုင်တဲ့ ပန်းခြံ။  စတူဒီယို ကြီးကြီးမားမားရှိခဲ့မယ်ဆိုရင် ဒါတွေကို အတုလုပ်ပြီး ရိုက်လို့ရမယ်။ အစိုးရ တစ်ရပ်အနေနဲ့ အခုချိန်ထိ ရုပ်ရှင်ဆိုတာ နိုင်ငံရဲ့စီးပွားရေးတစ်ခုလို့ မသတ်မှတ်သေးသရွေ့ ကျွန်တော်တို့တွေက မအောင်မြင်နိုင်ဘူး။ 

Voice : အခု Copy Right ဥပဒေတွေ  ရေးဆွဲနေကြပြီဆိုတော့ ဒါတွေသာ တကယ်တမ်း အသက်ဝင်လာမယ်ဆိုရင် ရုပ်ရှင်လောက အတွက် ဘယ်လောက်ထိ ပြောင်းလဲသွားမယ်လို့ ထင်မိလဲ။

KH : Copy Right က နိုင်ငံတကာမှာ ဒီလိုပဲသုံးစွဲနေကြတာ။ ကျွန်တော်တို့  နိုင်ငံခြားကားတွေ မှီငြမ်းမယ်ဆိုရင် ဘယ်နိုင်ငံမှ ကျွန်တော်တို့ သွားပြလို့မရဘူး။ တကယ်လို့ ရုပ်ရှင်က အာရှလောက်ကို ထိုးဖောက်မယ်ဆိုရင် အကုန်လုံးကော်ပီ တွေဖြစ်နေရင်။ ဥပမာ - ကျွန်တော်တို့က  ဇာတ်တွေကို တရားဝင်ဝယ်ပြီး ရိုက်မယ်ဆိုရင် ကြိုက်တဲ့နိုင်ငံမှာ  မြန်မာကားပြရင်  အင်္ဂလိပ်စာတမ်းထိုးပြီး ပြသွားလို့ရမယ်။  သီချင်းကလည်း ကော်ပီဖြစ်နေတော့ အဲဒီ သီချင်းကို ဒီကားထဲမှာ ထည့်သုံးလို့မရဘူး။  အကုန်လုံးက မူပိုင်ခွင့်ဆိုတာ တကယ်ကြီးမားပါတယ်။ တကယ်ရပ်တည်ရမယ်။ မူပိုင်ခွင့်မရှိလို့ ကျွန်တော်တို့ဆီမှာ ဇာတ်ကားတစ်ကား ရိုက်တဲ့အခွေက တောက်လျှောက် ပြန့်နေတယ်။ မိုက်ကယ်ဂျက်ဆင် အယ်လ်ဘမ် တစ်ခုက နှစ်စဉ်ရောင်းရငွေက သူ့အတွက် Income ဖြစ်နေရမယ်။ အဲဒီဆိုရင် သူက အေးဆေးပဲ။ ကျွန်တော်တို့က ဇာတ်ကား တစ်ကားရိုက်ပြီးရင် ဘာမှ လုပ်စားလို့မရတော့ဘူး။ ကိုယ့်နဲ့လည်း ဘာမှမဆိုင်တော့ဘူး။ 

ဆုအိနြေ္ဒဦး


ABOUT AUTHOR

(ဆုအိနြေ္ဒဦး)