News

POST TYPE

ENTERTAINMENT

မြင့်မြတ်နဲ့တွေ့ဆုံခြင်း
13-Jul-2018 tagged as အနုပညာ



“သားလေးရတော့မှာဆိုတော့ ကျွန်တော်တို့ လင်မယားနှစ်ယောက်စလုံး အရမ်းကို ပျော်နေပါတယ်”

နာမည်ကျော် သရုပ်ဆောင်မြင့်မြတ်နဲ့ တွေ့ဆုံပြီး လက်ရှိရိုက်ကူးနေတဲ့ “အချစ်ဆုံး” ရုပ်ရှင်ဇာတ်ကားမှာ သရုပ်ဆောင်ထားတဲ့ ဇာတ်ကောင်စရိုက်အကြောင်း၊ ဇူလိုင်လ ၁၃ ရက်နေ့မှာ ရုံတင်ပြသတော့မယ့် “ဘော်ဘော်ကထှော်” ရုပ်ရှင်ဇာတ်ကားအကြောင်း၊ သားဦးလေးရတော့မယ့်အပေါ် ခံစားမှုတို့ကို The Voice က မေးမြန်းဖော်ပြထားပါတယ်။ 

Voice : မြင့်မြတ် လက်ရှိရိုက်ကူးနေတဲ့ “အချစ်ဆုံး” ရုပ်ရှင်ဇာတ်ကား အကြောင်းကနေစပြီး ပြောပြပေးပါဦး။
MM : ဒီဇာတ်ကားကို ဒါရိုက်တာ ကိုအောင်ဇော်လင်းရိုက်ကူးပြီး သရုပ်ဆောင်တွေက ကျွန်တော်ရယ်၊ သင်ဇာဝင့်ကျော်၊ အိချောပို၊ မေမြင့်မိုရ်တို့ ပါပါတယ်။ ဇာတ်လမ်းလေးကတော့ အချစ်၊ ဟာသအပျော် ဇာတ်လေးပါပဲ။ ကျွန်တော့်ကာရိုက်တာကတော့ စော်ပတ်ရှုပ်တဲ့ လူငယ်တစ်ယောက်ပေါ့နော်။ မေမြင့်မိုရ်ကို ကျတော့ နိုင်တယ်၊ အိချောပိုကိုကျတော့ နည်းနည်းလန့်တယ်၊ သင်ဇာကကျတော့ ကျွန်တော့်ကို တစ်ဖက်သတ်ကြိုက်တယ်။ စော်ကြည်ဘဲပေါ့ဗျာ။

Voice : မြင့်မြတ်ကို ဒီလိုအချစ်ဇာတ်လမ်းအနုအရွတွေမှာ မတွေ့ရတာ ကြာပြီနော်။ 
MM : အမှန်အတိုင်းပြောရရင် ဒီလိုဇာတ်လမ်းမျိုးက ကျွန်တော်နဲ့ သိပ်မလိုက်ပါဘူးဗျာ။ ကျွန်တော်က ဒရာမာဇာတ်လမ်းနဲ့  ဟာသဇာတ်လမ်းတွေ ရိုက်တာများတာဆိုတော့လေ။ ကျွန်တော် ရိုက်လေ့ရိုက်ထလည်း သိပ်မရှိဘူး။ ပရိသတ်အမြင်မှာတော့ မတူညီတဲ့ ပုံစံတစ်ခုတော့ ထွက်မှာပေါ့လေ။ ကျွန်တော် ရိုက်ခဲတဲ့ ဇာတ်လမ်းမျိုး ဆိုတော့လေ။ စော်တွေနဲ့  ပတ်ရှုပ်နေတဲ့ ပုံစံမျိုးဆိုတော့၊ အမြင်တစ်မျိုး တော့ ပြောင်းသွားမှာပါ။

Voice : ဒီတစ်ပတ်ထဲမှာ ရုံတင်မယ့် “ဘော်ဘော်ကထှော်” ရုပ်ရှင်ကတော့ မြင့်မြတ်ပရိသတ်တွေကြိုက်တဲ့ ဟာသဇာတ်ကားပဲပေါ့။ သရုပ်ဆောင်ထားတဲ့ ကာရိုက်တာနဲ့ ရိုက်ကွင်းနောက်ကွယ်က အမှတ်တရတွေကို ပြောပြပေးပါဦး။
MM : ဒီဇာတ်ကားထဲက ကာရိုက်တာအတွက် ကျွန်တော့် ကိုယ်ပေါ်မှာရှိတဲ့ တက်တူးတွေကိုဖျောက်ပြီး ရိုက်ခဲ့ရပါတယ်။ ပထမတော့ မိတ်ကပ်ကို ဆီဆေးနဲ့လိမ်းပြီး တက်တူးတွေ ဖျောက်တာပေါ့နော်။ အဲ့ဒီလို လုပ်တာက သုံးရက်လောက်တော့ ခံတယ်။ ဒါပေမဲ့ အဆင်မပြေဘူး။ နေအရမ်းပူတဲ့အချိန်မှာ ချွေးတစ်စက်မှ မထွက်ဘူး။ ချွေးပေါက်တွေ အကုန်ပိတ်လာတာပေါ့။ နှစ်ရက်၊ သုံးရက်လောက် ရိုက်ပြီးတဲ့ အချိန်မှာ လူလည်း ဖျားချင်သလိုတွေဖြစ်ပြီး အဆင်မပြေတော့ဘူး။ ကိုခင်လှိုင်ဆို ဖျားတောင်ဖျားတယ်။ နောက်ပိုင်းမှာ ရေဆေးမိတ်ကပ်နဲ့ လုပ်လိုက်မှ အဆင်ပြေသွားတယ်။

Voice : ဒီဇာတ်ကားထဲမှာ တင်ပါးပေါ်အောင် ခါးတောင်းကျိုက်ပြီးပြေးရတဲ့ ဇာတ်ဝင်ခန်းတွေလည်းပါတယ်နော်။ လူတွေကြားထဲမှာ ရိုက်ရတာဆိုတော့ ဘယ်လိုခံစားမှုရှိလဲ။
MM : ဒီကားရိုက်တဲ့အခါမှာ ဇာတ်လမ်းရဲ့ လိုအပ်ချက်အရ အဲ့ဒီဇာတ်ဝင်ခန်းတွေက ပါနေတယ်ပေါ့နော်။ ဖင်တုံးလုံးနဲ့  လူတွေကြားထဲမှာ လျှောက်ပြေးရတဲ့ အခန်းမှာတော့ ရှက်လည်းရှက်ပါတယ်။ ပရိသတ်တွေ ကြည့်နေတဲ့ကြားထဲမှာ ရိုက်ရတာဆိုတော့ မျက်နှာပူတယ်လေ။ အရမ်းလည်းရှက်တယ်။ ကိုယ့်အဖွဲ့သားတွေချည်းပဲ Indoor မှာ ရိုက်ရရင်တော့ ကိစ္စမရှိဘူးပေါ့နော်။ Outdoor လည်းဖြစ်တယ်၊ တကယ့်စည်ကားတဲ့ ရပ်ကွက်ဈေးလိုနေရာမျိုးမှာ ရိုက်ခဲ့ရတော့ တော်တော်ရှက်ပါတယ်။

Voice : အခုတစ်လော မြင့်မြတ်ပါတဲ့ ရုပ်ရှင်ဇာတ်ကားတွေ ဆက်တိုက် ရုံတင်ဖြစ်နေတယ်နော်။ တစ်လောက ရုံတင်တဲ့ “ငဒူ” ကတော့ မြင့်မြတ်အတွက် အကယ်ဒမီ နောက်တစ်ဆုမျှော်လင့်လို့ ရမယ့်ကားလို့  ပြောနေကြတယ်။
MM : ငဒူရုပ်ရှင်မှာ ကျွန်တော်သရုပ်ဆောင်ရတဲ့ ကာရိုက်တာလေးကတော့ ဆန်းတာပေါ့နော်။ ဒါပေမဲ့ အကယ်ဒမီကတော့ မသေချာပါဘူး။ ရရမရရအေးဆေးပါပဲ။ ငဒူရုပ်ရှင်ဇာတ်ကား အောင်မြင်သွားတဲ့အတွက်တော့ အရမ်းဝမ်းသာပါတယ်။ ကြည်လည်းကြည်နူးတယ်။ ဒီကားက ဟာသသီးသန့်မဟုတ်ဘဲ နောက်ပိုင်းမှာ ဒရာမာချိုးထားတာလေးတွေလည်း ပါတယ်။ ဒရာမာဇာတ်ကို အားပေးတဲ့အတွက် ပိုပြီးတော့ ဝမ်းသာပါတယ်။

Voice : နောက်လထဲမှာ ကိုယ့်အတွက် သားဦးလေးလည်းရတော့မှာဆိုတော့ ဖခင်လောင်းတစ်ယောက်ရဲ့ ခံစားချက်က ဘယ်လိုရှိလဲ။
MM : နောက်လထဲမှာ သားလေးရတော့မှာဆိုတော့ ကျွန်တော်တို့ လင်မယားနှစ်ယောက်စလုံး အရမ်းကိုပျော်နေပါတယ်။ ကြည်လည်း ကြည်နူးပါတယ်။ သားလေးရဲ့ ဘဝတစ်လျှောက်လုံးမှာလည်း အကောင်းဆုံးဖြစ်အောင် အစစအရာရာ ပံ့ပိုးပေးသွားမှာပါ။ ကျွန်တော်တို့ ဖြစ်ချင်တာဆိုတာထက်ကို သူဘာဖြစ်ချင်လဲ၊ ဘာလုပ်ချင်လဲဆိုတဲ့ အပေါ်မှာပဲ အကောင်းဆုံးပံ့ပိုးပေးသွားမှာပါ။ သားလေးဖြစ်တဲ့အတွက် ကျွန်တော်နဲ့အတူ ဘယ်နေရာမဆို လိုက်လို့ရမှာပေါ့။ ကျွန်တော်နဲ့ အဖော်ရမှာပါ။ 

သန့်ဇင်ဦး