News

POST TYPE

EDITORIAL

သန်းခုနစ်ထောင့်ငါးရာ ပြဿနာနှင့် နိုင်ငံရေး အရှုံးအမြတ်(Vol-5/No-14)
27-Apr-2017
ယခင်အစိုးရလက်ထက်က မကွေးတိုင်းဒေသကြီး အစိုးရအဖွဲ့ ဝန်ကြီးချုပ် ဦးဘုန်းမော်ရွှေ ကျပ်သန်း ခုနစ်ထောင့်ငါးရာကျော် အလွဲသုံးစား ပြုထားခြင်းနှင့် ယင်းငွေကြေးများအနက် အချို့ကို ကြံ့ခိုင်ရေးပါတီက ရယူထားကြောင်း သတင်းမှာ YBS သတင်းပြီးလျှင် ယခုရက်ပိုင်းအတွင်း ဒုတိယမြောက် ဝေဖန်ပြောဆိုမှု အများဆုံး သတင်းတစ်ပုဒ်ဖြစ်သည်။

ယခင်အစိုးရလက်ထက်က နိုင်ငံပိုင် သို့မဟုတ် ပြည်သူပိုင် ဘဏ္ဍာငွေနှင့် အခြေပစ္စည်းများကို အလွဲသုံးစားပြုမှု အများအပြား ရှိခဲ့ကြောင်း သတင်းမျိုးစုံ ထွက်ပေါ်ခဲ့သော်လည်း ယခုကဲ့သို့ ဝန်ကြီးချုပ်တစ်ဦးတည်း နာမည်ဖြင့် လုပ်ငန်းရှင်များထံမှ ကောက်ယူထားသည့် ဤမျှ များပြားသော ငွေကြေး အလွဲသုံးစားမှု ဖြစ်ပေါ်ကြောင်း တရားဝင် ထုတ်ပြန်ခြင်းမှာ ထူးခြားသည်။

မကွေးတိုင်းဒေသကြီးအတွင်းရှိ တစ်ပိုင်တစ်နိုင် တူးဖော်နေကြသော ရေနံလက်ယက်တွင်း လုပ်ငန်းများထံမှ တိုင်းဒေသကြီး ဖွံ့ဖြိုးရေး ရန်ပုံငွေအတွက်ဟုဆိုကာ ကောက်ခံထားသော ငွေကြေးများ ဖြစ်သည့်အတွက် စာရင်းအင်းနှင့်တကွ အတိအကျ တရားဝင် ထွက်ပေါ်လာခြင်းကြောင့်လည်း လူသိများကာ ဝေဖန်မှု များပြားသွားခြင်းဖြစ်သည်။

မကွေးတိုင်းအတွင်းတွင် ထိုသို့ စာရင်းအင်းဖြင့် အတိအကျ မဟုတ်သော်ငြား အလားတူ အဖြစ်အပျက် များစွာ ရှိခဲ့ကြောင်း ဒေသခံပြည်သူလူထုအပြင် နေပြည်တော် ပြည်ထောင်စု အစိုးရအထိပါ သတင်းပေါက်ကြား နာမည်ကြီးခဲ့သော်လည်း ပြည်ထောင်စုအစိုးရက အနိမ့်ဆုံးအဆင့် သတိပေးခြင်းပင် မရှိခဲ့ပေ။

ထို့အတူ အခြားသော ပြည်နယ်နှင့် တိုင်းဒေသကြီး အသီးသီးတွင်လည်း မကွေးတိုင်းကဲ့သို့ပင် စာရင်းရှိသော၊ စာရင်းမပြနိုင်သော အလွဲသုံးစားမှုများ၊ ဒေသဘဏ္ဍာငွေနှင့် ရန်ပုံငွေများ အစိုးရသစ်ထံ မလွှဲအပ်ခြင်းများ ရှိခဲ့ကြောင်း သတင်းထွက်ပေါ်ခဲ့သော်လည်း ယခင်က နာမည်ဆိုးဖြင့် အကျော်ကြားဆုံး မကွေးတိုင်းဒေသကြီး၏  လက်ရှိ အစိုးရအဖွဲ့ကသာ ယခုကဲ့သို့ တရားဝင် တောင်းဆို ထုတ်ပြန်ခဲ့သည်။

ထိုသို့ ထုတ်ပြန်ရာတွင် ယခင်အာဏာရ ကြံ့ခိုင်ရေးပါတီကပါ ငွေကြေးနှင့် ပစ္စည်းများ ရယူထားကြောင်း ဖော်ပြထားခြင်းကို ကြံ့ခိုင်ရေးပါတီ ပြောခွင့်ရ ပုဂ္ဂိုလ်ကလည်း မဟုတ်မှန်ကြောင်း ငြင်းဆိုထားရာ ယင်းပြဿနာ၏ အဓိက ကာယကံရှင်ဖြစ်သူ ဦးဘုန်းမော်ရွှေက တရားဝင် ပြောဆိုရန် လိုအပ်နေပြီဖြစ်သည်။

စင်စစ်အားဖြင့် စီးပွားရေးအရ မကွေးတိုင်းထက် ပို၍ အချက်အချာကျပြီး နိုင်ငံလုံး အတိုင်းအတာအရပင် လုပ်ငန်း၊ နယ်ပယ်ကြီးမားသော စီးပွားရေး လုပ်ငန်းများစွာ အခြေစိုက်ထားသည့် ရန်ကုန်တိုင်းဒေသကြီး အစိုးရနှင့် ဝန်ကြီးချုပ်တို့၏ နိုင်ငံပိုင် မြေ၊ နေရာ၊ အဆောက်အအုံများ၊ မြို့တော် စည်ပင်သာယာရေး ကော်မတီက စီမံခန့်ခွဲနေသည့် အများပြည်သူနှင့်ဆိုင်သော အပန်းဖြေနားနေစရာ ပန်းခြံနှင့် ကစားကွင်းများ၊ မြို့သစ် စီမံကိန်းများ၊ စက်မှုဇုန်များ၊ ဆိပ်ကမ်းများ၊ လေဆိပ်များကို တိကျစွာ စုံစမ်း၊ စစ်ဆေး ဖော်ထုတ်လိုက်ပါက မကွေးတိုင်းထက် အဆပေါင်းများစွာ ကြီးမားသည့် အလွဲသုံးစားမှုများ ထွက်ပေါ်လာနိုင်ပေသည်။

ထို့အတူ ပြည်ထောင်စု အစိုးရအဖွဲ့အတွင်းရှိ နာမည်ကျော် ဝန်ကြီးဌာန အချို့ အပါအဝင် ဝန်ကြီးဌာန အားလုံးကိုလည်း တိကျမှန်ကန်စွာ စာရင်းအင်းနှင့်တကွ ဖော်ထုတ် စစ်ဆေးလိုက်လျှင်လည်း ကျပ်ငွေ ဘီလီယံများစွာချီသော လေလွင့်ဆုံးရှုံးမှုများ၊ အလွဲသုံးစားမှုများ တန်းစီထွက်ပေါ်လာဖွယ်ရှိသည်။

မည်သို့ပင်ဖြစ်စေ မကွေးတိုင်းသည် ကနဦး ကြိုးစတစ်စဖြစ်ပါက ယင်းကြိုးစကို ဆွဲပြီးပါက အလားတူ ကြိုးစပေါင်း များစွာ ထွက်ပေါ်မည်လော၊ ယခင်အစိုးရများနှင့် မဖြစ်မနေ ချိတ်ဆက်နေသည့် ကြံ့ခိုင်ရေး ပါတီအနေနှင့် မပြေးသော်လည်း ကန်ရာရှိနေသော လက်ရှိပြဿနာကို ယတိပြတ် ငြင်းဆိုမည်လော၊ တစ်စိတ်တစ်ပိုင်း ဝန်ခံကာ တာဝန်ရှိသူ အဆင့်ဆင့်ကို တာဝန်ခံ စေမည်လော ဆိုသည်မှာ များစွာ စိတ်ဝင်စားဖွယ် ကောင်းပေသည်။

မကွေးပြဿနာအပေါ် လက်ရှိအာဏာရပါတီ၏ ကိုင်တွယ် ဖြေရှင်းမှုသည် ဒေသခံပြည်သူများနှင့် ယခင် အာဏာရှင်စနစ်၏ အလွဲသုံးစားမှု များစွာကို စိတ်ပျက်လက်ပျက် ဖြစ်နေကြသော ပြည်သူအများစုက သြဘာပေး ထောက်ခံကြမည်ဖြစ်ပြီး ကြံ့ခိုင်ရေးပါတီ အနေနှင့်မူ ယင်းပြဿနာအား တုံ့ပြန်မှုကို မူတည်ကာ နိုင်ငံရေးအရ အမြတ် ထွက်နိုင်မည်လော၊ အရှုံးကြီး ရှုံးမည်လော ဆိုခြင်းကို မီးမောင်းထိုးပြမည့် အခြေအနေဖြစ်ကြောင်း သိစေလိုရင်းဖြစ်သည်။

အယ်ဒီတာ (၂၇-၄-၂၀၁၇)


  • VIA