News

POST TYPE

EDITORIAL

ပြဿနာရှိလျှင် အဖြေရှိသည် (Daily, Vol-5/No-5)
05-Apr-2017
အစိုးရသစ်အဖြစ် တာဝန်ယူပြီးနောက် နိုင်ငံအတွင်း အချိန်မရွေး ထ၍ ပေါက်ကွဲနိုင်သည့် လောင်စာပုံ သို့မဟုတ် ယမ်းပုံကဲ့သို့ ပြဿနာ ဖြစ်ပေါ်နိုင်သော အခြေအနေများ ပေါ်ပေါက်လာခြင်းကို သတိကြီးကြီး ထား၍ ကိုင်တွယ်ဖြေရှင်းရန် လိုအပ်မည်ဖြစ်သည်။

ရခိုင်ပြည်နယ် အရေးကိစ္စများနှင့် ရှမ်းပြည်နယ်တွင် မြန်မာ့တပ်မတော်နှင့် တိုင်းရင်းသား လက်နက်ကိုင် အချို့အကြား ဖြစ်ပွားနေသော တိုက်ပွဲများ၊ ဘာသာရေး ဆက်နွှယ် တင်းမာမှုများမှာလည်း အစိုးရသစ်ကို သွေးတိုးစမ်းနေသည့် စိန်ခေါ်မှုများဖြစ်သည်။

ထို့အပြင် မြေပေါ်၊ မြေအောက် သဘာဝ သယံဇာတ ပစ္စည်းများကို ပြီးခဲ့သည့် ဆယ်စုနှစ် နှစ်ခုကျော်အတွင်း အဆင်အခြင်မဲ့၊ အထိန်းအကွပ်မဲ့၊ အရမ်းကာရော၊ လောဘတကြီး ထုတ်ယူ သုံးစွဲခဲ့ခြင်း၏ အကျိုးဆက်အဖြစ် ရာသီဥတုများ ဖောက်ပြန်ပြောင်းလဲခြင်း၊ သဘာဝ ဘေးအန္တရာယ်များ ကျရောက်ခြင်း၊ လတ်တလော လေပြင်းနှင့် မိုးသီးများ ကျရောက်ခြင်းနှင့် စိုက်ခင်း၊ ဥယျာဉ်ခြံများ ပျက်စီးခြင်းတို့ကလည်း အထူးခေါင်းခဲစရာ ပြဿနာတစ်ရပ်အဖြစ် ရှိနေပေသည်။

ဆိုခဲ့ပါ ပြဿနာများအနက် ဘာသာရေး အခြေပြု တင်းမာမှုမှာ လတ်တလော အချိန်မဆိုင်း ဖြေရှင်းရမည့် ပြဿနာဖြစ်ပြီး ပြည်တွင်းစစ်နှင့် သဘာဝ ဘေးအန္တရာယ် ပြဿနာတို့မှာမူ ရေရှည် အချိန်ယူ၍ ဖြေရှင်းရမည့် ပြဿနာများဖြစ်သည်။ 

ဘာသာရေး အရေခြုံထားသော ခွဲခြားဆက်ဆံမှု၊ အကြမ်းဖက်မှုများသည် ယခင်ဦးသိန်းစိန် အစိုးရလက်ထက်တွင် အမြင့်ဆုံးအဆင့်သို့ ရောက်ရှိသွားခဲ့ခြင်းက နိုင်ငံတစ်ဝန်းရှိ နိုင်ငံသား လူနည်းစု ဘာသာခြားများအား စိုးရိမ်ကြောင့်ကြစိတ်နှင့် ပို၍ ၎င်းတို့ဘာသာ သီးခြား တံတိုင်းကာနေလိုစိတ်တို့ကို မီးထိုးပေးလိုက်သကဲ့သို့ ဖြစ်သွားခဲ့သည်။
 
အထူးသဖြင့် ဗုဒ္ဓဘာသာ အမည်ခံထားသော အဖွဲ့အစည်း အချို့နှင့် ရဟန်းအချို့၏ ဗုဒ္ဓအဆုံးအမနှင့် မလျော်ညီသော ဟောပြော၊ လှုပ်ရှားမှုများကို နိုင်ငံတော်အဆင့် သံဃာ့ အဖွဲ့အစည်းများနှင့် ဩဇာကြီး၊ နာမည်ကျော် မထေရ်ကြီးများကပင် ဆောလျင်စွာ သတိပေး ထိန်းသိမ်းမှု မရှိခဲ့သည့်အပြင် ပြည်ထဲရေးနှင့် သာသနာရေး ဝန်ကြီးဌာနတို့ကဲ့သို့ သက်ဆိုင်ရာ အုပ်ချုပ်ရေး နယ်ပယ်ကပင် တမင် လွှတ်ပေးထားသကဲ့သို့ ဖြစ်ခဲ့ခြင်းက ပြဿနာများ ပိုကြီးထွားသွားစေခဲ့ကြောင်း ဝေဖန်ထောက်ပြမှုများ ရှိခဲ့သည်။

သို့သော် ယခင်အစိုးရ လက်ထက်က အခြေအနေများနှင့် ပတ်သက်၍ မည်သို့ပင် မေးခွန်း ထုတ်စရာများ ရှိနေစေကာမူ လက်ရှိ ဖြစ်ပေါ်နေသော ပြဿနာများကို လက်တွေ့ ဦးဆောင် ဖြေရှင်းရမည်မှာ လက်ရှိအစိုးရနှင့် နယ်ပယ် အသီးသီးရှိ သက်ဆိုင်ရာ အဖွဲ့အစည်း အသီးသီးအပေါ်  ဩဇာလွှမ်းမိုးနိုင်သူ လူပုဂ္ဂိုလ်၊ ရဟန်းပုဂ္ဂိုလ်များ ဖြစ်သည်။

စင်စစ်အားဖြင့် ယနေ့ ဖြစ်ပေါ်နေသော ပြဿနာများသည် သက်ဆိုင်ရာ နယ်ပယ်အလိုက် ရှိနေသော ဥပဒေ၊ စည်းမျဉ်း၊ စည်းကမ်းများနှင့် ယင်းတို့ကို ဥပဒေနှင့်အညီ ထိန်းသိမ်း ကြီးကြပ်ရမည့် အဖွဲ့အစည်းများ၊ အုပ်ချုပ်ရေး တာဝန်ရှိသူများ၏ လျော့ရဲပေါ့ဆမှု၊ တာဝန်မဲ့မှုများကြောင့်ဟု ကောက်ချက်ဆွဲနိုင်သောကြောင့် ရှိနေသော ဥပဒေ၊ စည်းမျဉ်း၊ စည်းကမ်းများကို ဥပဒေအတိုင်း ကိုင်တွယ် ထိန်းသိမ်းလျှင်ပင် ပြဿနာအချို့ ပြေလည်နိုင်ကြောင်း အကြံပြု တိုက်တွန်းအပ်ပေသည်။ 

အယ်ဒီတာ (၅-၄-၂၀၁၇)

(လက်ရှိ ဖြစ်ပေါ်နေသော အခြေအနေနှင့် ကိုက်ညီနေသောကြောင့် ၂၅-၄-၂၀၁၆ နေ့ထုတ် The Voice Daily သတင်းစာတွင် ဖော်ပြခဲ့ပြီးသော အယ်ဒီတာ့ အာဘော်ကို အနည်းငယ် ပြင်ဆင်၍ ပြန်လည်ဖော်ပြခြင်း ဖြစ်ပါသည်။)


  • VIA