News

POST TYPE

EDITORIAL

ပေးသလောက် ပြန်ရသည့် ကြားဖြတ်ရွေးကောက်ပွဲ(Daily, Vol-5/No-3)
04-Apr-2017
လစ်လပ်သွားသော လွှတ်တော်ကိုယ်စားလှယ် ၁၉ နေရာအတွက်သာ ကျင်းပသည့် ဧပြီလ ၁ ရက် ကြားဖြတ် ရွေးကောက်ပွဲ ရလဒ်များကို တစ်ရက်အကြာ ဧပြီလ ၂ ရက်နေ့ ညနေပိုင်းတွင် ထုတ်ပြန်ကြေညာခဲ့ရာ NLD ပါတီက စုစုပေါင်း ၄၇ ရာခိုင်နှုန်းခန့်သာ အနိုင်ရရှိခဲ့ခြင်းမှာ အာဏာရပါတီတစ်ခုအတွက် များစွာ သတိပြုဖွယ်ရလဒ်ဖြစ်သော်ငြား လောကနိယာမ သဘောအရ မိမိပေးသည့်အတိုင်း မိမိပြန်ရခြင်းဟုလည်း ဆိုနိုင်သည်။

ရွေးကောက်ပွဲ မကျင်းပမီကပင် ပြည်နယ်ဒေသများ အထူးသဖြင့် ရခိုင်ပြည်နယ်နှင့် မွန်ပြည်နယ်တို့တွင် NLD ပါတီ ရှုံးနိမ့်နိုင်ကြောင်း ကြိုတင် သုံးသပ်ခန့်မှန်းမှုများ ရှိနေသော်လည်း အာဏာရပါတီ အနေနှင့် ယင်းအခြေအနေအတွက် ကြိုတင်ပြင်ဆင်မှု အားနည်းခဲ့သည်။

ရခိုင်အမျိုးသားပါတီ ဥက္ကဋ္ဌ ဒေါက်တာအေးမောင် ဝင်ရောက် ယှဉ်ပြိုင်သော ရခိုင်ပြည်နယ် အမ်းမဲဆန္ဒနယ်မြေတွင် NLD ပါတီရှုံးနိမ့်နိုင်ကြောင်း မူလကပင် တွက်ဆမိခဲ့ကြသော်လည်း ၂၀၁၅ ရွေးကောက်ပွဲက NLD ပါတီ အနိုင်ရရှိထားသော မွန်ပြည်နယ် ချောင်းဆုံမဲဆန္ဒနယ်မြေတွင် NLD ပါတီရော မွန်ဒေသခံပါတီတို့ပါ အနိုင်မရဘဲ ကြံ့ခိုင်ရေးပါတီက အနိုင်ရရှိသွားခြင်းမှာ မည်သို့မျှ မျှော်လင့်မထားသော ရလဒ်ဖြစ်သည်။

အထူးသဖြင့် တံတားအမည်ပေးသည့် ပြဿနာကြောင့် ချောင်းဆုံ မဲဆန္ဒနယ်မြေတွင် NLD ပါတီ ရှုံးနိမ့်ကာ ဒေသခံ မွန်ပါတီတစ်ခုသာ အနိုင်ရနိုင်ကြောင်း တွက်ဆထားကြသော်လည်း အများအမြင်နှင့် များစွာ ကွဲလွဲကာ ကြံ့ခိုင်ရေးပါတီက အနိုင်ရရှိသွားခဲ့ခြင်းမှာ NLD ပါတီအတွက်ရော မွန် နှစ်ပါတီအတွက်ပါ ကြီးစွာသော ဆုံးရှုံးမှုဖြစ်သွားခဲ့သည်။

သို့သော် ကြံ့ခိုင်ရေးပါတီ ကိုယ်စားပြု ဝင်ရောက် ယှဉ်ပြိုင်သူမှာ ချောင်းဆုံ ဇာတိ မွန်တစ်ဦးဖြစ်သည့်အတွက် ချောင်းဆုံဒေသခံများသည် ပါတီကို မကြည့်ဘဲ လူကို ကြည့်၍ မဲပေးသည့် အဆင့်မျိုး ရောက်သည်အထိ နိုင်ငံရေး ရင့်ကျက်မှု ရှိနေသည့်သဘောဟု မှတ်ယူနိုင်သည်။

အခြားတစ်ဖက်တွင်မူ မွန်ပြည်နယ်ရှိ လူမျိုးတူ၊ ဓလေ့ထုံးတမ်းတူ၊ ယဉ်ကျေးမှုတူ၊ မွေးဇာတိ ဒေသတူ၊ မွန်ပါတီ နှစ်ခုစလုံး ကြံ့ခိုင်ရေးပါတီကို ရှုံးနိမ့်သွားခြင်းမှာ မွန်ပါတီနှစ်ခုနှင့် NLD ပါတီတို့ အထူးသိက္ခာကျစရာ ဖြစ်သွားခဲ့သည်။

NLD ပါတီနှင့် ယင်းပါတီကို အလွန်အကျွံ ထောက်ခံအားပေးသူများ အထင်အမြင်သေးစွာ ရယ်သွမ်းသွေး၊ နှိမ်ချ၊ တိုက်ခိုက်နေသော ကြံ့ခိုင်ရေး ပါတီအတွက်မူ ချောင်းဆုံတွင် အနိုင် ရရှိသည့်အပြင် ရှမ်းပြည်နယ် ကျိုင်းတုံ မဲဆန္ဒနယ်တွင်လည်း အနိုင် ရရှိသွားခြင်းကြောင့် နိုင်ငံရေးအရ အထူးအမြတ် ထွက်သွားခဲ့သည်။

စင်စစ်အားဖြင့် NLD ပါတီ စတင် ထူထောင်သူများအနက် တစ်ဦး အပါအဝင်ဖြစ်ပြီး ယနေ့ လွှတ်တော်နှင့်အစိုးရ နှစ်ဖွဲ့စလုံးကို နောက်ကွယ်မှ ကြပ်မတ်၊ ထိန်းကျောင်းနေရုံသာမက ပါတီဝင် အားလုံးက ကြောက်ရွံ့ဝပ်တွား နေရသူ ဦးဝင်းထိန်၏ ဇာတိ မိတ္ထီလာ၌ ကြံ့ခိုင်ရေးပါတီအား ၂၀၁၅ ရွေးကောက်ပွဲတွင် ရှုံးနိမ့်ခဲ့ခြင်းကို သင်ခန်းစာ ယူခဲ့လျှင်ပင် ကြားဖြတ်ရွေးကောက်ပွဲ ရလဒ် ဤမျှ နည်းပါးဖွယ် မရှိပေ။

ရွေးကောက်ပွဲတွင် အနိုင်ရခြင်း၊ ရှုံးနိမ့်ခြင်းတို့မှာ သက်ဆိုင်ရာ နိုင်ငံရေး ပါတီတစ်ခုချင်းစီ သို့မဟုတ် အာဏာရပါတီ၊ အတိုက်အခံ ပါတီတို့၏ ရွေးကောက်ပွဲအပေါ် အာရုံစူးစိုက်မှု၊ အားထည့် စည်းရုံးမှု၊ ကုန်ဆုံးသွားသည့် တစ်နှစ်တာ သို့မဟုတ် သက်တမ်းငါးနှစ် ကာလအတွင်း ပြည်သူများအပေါ် ထားရှိသည့် ပါတီ၏စေတနာ၊ ရွေးကောက်ပွဲ မတိုင်ခင်က ပေးအပ်ထားသော ကတိကဝတ်များ၊ ပါတီ၏ ရည်မှန်းချက် ဆောင်ပုဒ်များအတိုင်း ဆောင်ရွက် ဖြည့်ဆည်းနိုင်မှု၊ ယင်းကာလအတွင်း အရည်အချင်း၊ စွမ်းဆောင်ရည်တို့နှင့် တိုက်ရိုက် အချိုးကျသည်။

ကြားဖြတ်ရွေးကောက်ပွဲတွင် ထင်ထားသည့် ရလဒ်မျိုး မရရှိခြင်းမှာ ပြည်သူများ မဲမပေးကြခြင်းကြောင့် ရှုံးနိမ့်ရခြင်းဖြစ်ကြောင်း  မှတ်ချက် မျိုးပေးခြင်းမှာ ပါတီ၏ ထိပ်ပိုင်းဦးဆောင်သူများသည် အောက်ခြေတွင် ဖြစ်ပေါ်နေသော အခြေအနေမှန်ကို မသိရှိသည့်သဘော သက်ရောက်သည့်အပြင် ရည်ရွယ်သည်ဖြစ်စေ၊ မရည်ရွယ်သည်ဖြစ်စေ ပါတီ၏ အားနည်းချက်ကို ဖုံးကွယ်ကာ ပြည်သူကို သွယ်ဝိုက်၍ အပြစ်တင်သည့်သဘော သက်ရောက် သွားနိုင်ကြောင်း သတိပေး ထောက်ပြလိုရင်း ဖြစ်သည်။

အယ်ဒီတာ (၃-၄-၂၀၁၇)


  • VIA