News

POST TYPE

EDITORIAL

အထက်ဖား၊ အောက်ဖိ အမွေဆိုး(Daily, Vol-4/No-292)
17-Mar-2017
အာဏာရှင်စနစ် ကျင့်သုံးခဲ့သော ကာလတစ်လျှောက်လုံး မြန်မာနိုင်ငံရှိ အုပ်ချုပ်ရေးနှင့် အစိုးရဌာနဆိုင်ရာ အသီးသီးတွင် ခေါက်ရိုးကျိုးလာခဲ့သော အပြုအမူ၊ ဓလေ့စရိုက် များစွာအနက် အထက်ဖား၊ အောက်ဖိ ဆက်ဆံရေးမှာ အထင်ရှားဆုံး ဖြစ်သည်။

မိမိအထက်အရာရှိဆိုပါက ပြောသမျှ ခေါင်းညိတ်၊ ထောက်ခံ၊ အကြိုက် လိုက်ပြော၊ ခိုင်းသမျှ ဆောင်ရွက်ပေး၊ ခေါ်လျှင် အပြေးသွား၊ ခံမပြောဘဲနေ၊ ကြိုက်တတ်သည့် လက်ဆောင်ပေးဆိုသည့် ပုံစံမျိုးကို တစ်လုံးတည်းဖြင့် “ဖား”သည်ဟု ခေါ်ဝေါ်သုံးနှုန်းသည်။

လက်အောက်ဝန်ထမ်းဆိုပါက နည်းလမ်း အမျိုးမျိုးဖြင့် ပညာပြ၊ ခေါင်း မဖော်နိုင်စေရန် ခိုင်းစေ၊ မနိုင်ဝန်ထမ်းခိုင်း၊ အပြစ်ရှိပါက လွှဲချ၊ ရုံးစည်းကမ်း ဘောင်အတွင်းမှ ညစ်ကျယ်ကျယ် ပညာပေး၊ မထင်လျှင် မထင်သလို ဆူပူ၊ ငေါက်ငမ်း၊ ဆဲဆို၊ ဖိအားပေး၊ နှိပ်ကွပ်ခြင်းကိုလည်း အတိုကောက်အားဖြင့် “ဖိ”သည်ဟု ဆိုကြသည်။
 
ဆိုခဲ့ပါ အာဏာရှင်စနစ်၏ ဆိုးမွေဖြစ်သော “အထက်ဖား၊ အောက်ဖိ” ပုံစံသည် အာဏာရှင် အုပ်ချုပ်ရေးစနစ်နှင့် အရပ်သားတစ်ပိုင်း အာဏာရှင်တစ်ပိုင်း အုပ်ချုပ်ရေး ယန္တရားတို့တွင် နှစ်များစွာ အရိုးစွဲလာခဲ့ခြင်းကြောင့် ထိုအစိုးရ အဆက်ဆက်နှင့် တွဲဖက် အလုပ်လုပ်ခဲ့သော ပုဂ္ဂလိက ကုမ္ပဏီများနှင့် လူမှုရေး အသင်းအဖွဲ့များအထိပါ မသိမသာတစ်မျိုး၊ သိသိသာသာတစ်မျိုး တွေ့မြင်နေရပေသည်။

ဒီမိုကရေစီဆိုသော စကားလုံးကို သောသောညံညံ ပြောဆိုကာ ဒီမိုကရေစီ အရေးအတွက် တောင်းဆို၊ တိုက်ပွဲဝင်၊ စွန့်လွှတ်၊ အနစ်နာခံလာခဲ့ခြင်းကြောင့် ပြည်သူလူထု၏ လေးစား၊ ချစ်ခင်၊ အားကိုး၊ ယုံကြည်ခြင်း ခံရသော အရပ်သား အများစု ပါဝင်သည့် အရွေးကောက်ခံ အစိုးရလက်ထက်တွင်မူ အထက်ဆိုခဲ့ပါ အထက်ဖား၊ အောက်ဖိ အစဉ်အလာများကို တိုက်ဖျက်သွားနိုင်ဖွယ် ရှိမည်ဟု ပြည်သူလူထုက မျှော်လင့်ခဲ့ကြသည်။

ယနေ့အချိန်အထိ အာဏာရှင်စနစ်နှင့် ယဉ်ပါးခဲ့ပြီး တစ်သွေး၊ တစ်သံ၊ တစ်မိန့် စနစ်ဖြင့် လေ့ကျင့်ထားသူများက အဓိကကျသော အမှုဆောင်ရာထူး နေရာများတွင် ရှိနေသည့် အုပ်ချုပ်ရေး ယန္တရားတွင် အထက်ဖား၊ အောက်ဖိ စီမံခန့်ခွဲမှုများ ရှိနေခြင်းမှာ သဘောတူ လက်ခံပေးရန် ခက်ခဲသော်ငြား နားလည်ပေး၍ ရနိုင်သေးသည်။

သို့သော် အာဏာရှင်စနစ်ကို အတူတကွ အန်တုရင်ဆိုင်ကာ၊ အာဏာရှင်များ၏ ဖိနှိပ်၊ ရက်စက်မှုများကို အတူတကွ ခါးစည်း ခံစားလာရသူများ အချင်းချင်း၊ ဒီမိုကရေစီ အရေးအတွက် အတူတကွ လှုပ်ရှား၊ တောင်းဆို၊ တိုက်ပွဲဝင်လာခဲ့သူများ အချင်းချင်း အကြားတွင်ပင် အထက်ဖား၊ အောက်ဖိ ဆက်ဆံရေးနှင့် စီမံခန့်ခွဲမှုများ ရှိနေသေးလျှင်မူ သဘောတူ လက်ခံပေးရန် မဆိုထားနှင့် နားလည်ပေးရန်ပင် မဖြစ်နိုင်ပေ။

အထူးသဖြင့် နိုင်ငံတော်၏ ကုန်လုပ်စွမ်းအား၊ ကုန်ထုတ်စွမ်းအားနှင့် ပြည်သူ့ရေးရာ ဝန်ဆောင်မှုများကို ဖြည့်ဆည်း ထမ်းဆောင်ပေးရမည့် နိုင်ငံ့ဝန်ထမ်းများ၊ ပြည်သူ့ဝန်ထမ်းများကို အဆင့်ဆင့်အလိုက် စီမံခန့်ခွဲရာတွင် ဖိနှိပ်မှုများ၊ ခွဲခြားဆက်ဆံမှုများ၊ အခွင့်အရေး ပိတ်ပင်မှုများ၊ ကတိကဝတ် ဖောက်ဖျက်မှုများ၊ စာချုပ် ချိုးဖောက်မှုများ ရှိနေခြင်းမှာ များစွာ ဝမ်းနည်းဖွယ် ကောင်းပေသည်။

ယမန်နေ့က သူနာပြုတက္ကသိုလ်တွင် တက်ရောက်နေကြသော သင်တန်းသား၊ သင်တန်းသူများ အပါအဝင် လက်ရှိ အလုပ်ခွင်တွင် ရှိနေသော သူနာပြုအချို့ပါ အင်အားဖြည့် ပါဝင်ခဲ့သော ဆန္ဒပြပွဲတွင် လိုက်ပါဆန္ဒပြခဲ့သူများကို သက်ဆိုင်ရာ သင်တန်းကျောင်းနှင့် အလုပ်ခွင်များက ဖိအားပေးမှုများ ရှိနေကြောင်း သတင်းများ ထွက်ပေါ်လာခြင်းမှာလည်း များစွာ အရုပ်ဆိုးလှသည်။

၈၈ အရေးတော်ပုံ ကာလမှလွဲ၍ မည်သည့်အခါကမျှ ဤသို့ ဆန္ဒ ဖော်ထုတ် တောင်းဆိုခဲ့ခြင်းမျိုး မရှိခဲ့သည့်အပြင် သဘာဝအရ မကျန်းမာသော လူနာများကို ကရုဏာရှေ့ထား စောင့်ရှောက်ပေးရန်၊ မေတ္တာစိတ်ဖြင့် လူအများကို ဆက်ဆံရန် လေ့ကျင့်သင်ကြား ပေးခံရသူများ ဖြစ်သောကြောင့် အခြေခံအားဖြင့် စိတ်နှလုံး နူးညံ့သိမ်မွေ့သူများဖြစ်ကြသည့် သူနာပြုများက ယခုကဲ့သို့ ဆန္ဒဖော်ထုတ်လာခြင်းမှာ များစွာ ထူးခြားသည်။

ထိုအခြေအနေကို ဒီမိုကရေစီ အစိုးရတစ်ရပ်၏ ဂုဏ်အင်္ဂါများနှင့်အညီ စေ့စပ်ညှိနှိုင်း ဆွေးနွေး၊ အပေးအယူ၊ အလျှော့အတင်း လုပ်ယူခြင်း နည်းလမ်းမျိုးဖြင့် ဖြေရှင်းရန် မကြိုးစားဘဲ ယခင် အာဏာရှင်အစိုးရများ၏ ခေါက်ရိုးကျိုး နည်းနာအတိုင်း အထက်စီးမှကြည့်ကာ ဖိအားပေး၊ အကျပ်ကိုင်သည့် နည်းလမ်းများဖြင့်သာ ဖြေရှင်းပါက အမှားကို အမှားဆင့်စေသည့် “အထက်ဖား၊ အောက်ဖိ” သံသရာလည်ကာ ဒီမိုကရေစီကို အိုးမဲသုတ်သကဲ့သို့ ဖြစ်သွားစေနိုင်ကြောင်း သတိပေးလိုရင်း ဖြစ်သည်။

အယ်ဒီတာ (၁၆-၃-၂၀၁၇)


  • VIA