News

POST TYPE

EDITORIAL

သြင်္ကန် ပိတ်ရက် ကိစ္စ (Daily,Vol-4/No-289)
14-Mar-2017
လက်ရှိအစိုးရလက်ထက်တွင် မြန်မာနှစ်သစ်ကူး မဟာသြင်္ကန်ပွဲတော် ကာလ တရားဝင် ရုံးပိတ်ရက်ကို ယခင် တပ်မတော် အစိုးရလက်ထက်က သတ်မှတ်ထားခဲ့သော ပိတ်ရက် ၁၀ ရက်အစား ငါးရက်သို့ ပြင်ဆင်သတ်မှတ်လိုက်သည့်အပေါ် ဝေဖန်၊ ထောက်ပြ၊ ပြောဆိုမှုများ မြင့်တက်သွားခဲ့သည်။ 

ထုံးစံအတိုင်း လက်ရှိအစိုးရ လုပ်သမျှ ထောက်ခံ သဘောတူသူများက တစ်ဖက်၊ အစိုးရ လုပ်သမျှ အပြစ်ရှာ ကန့်ကွက်သူများကတစ်ဖက် အပြန်အလှန် ငြင်းခုံမှုများဖြင့် အွန်လိုင်း လူမှုရေး ကွန်ရက်ပေါ်တွင် ပွဲဆူသွားခဲ့သည်။

အထူးသဖြင့် ပိတ်ရက် ပြင်ဆင်သတ်မှတ်မှုကို အချိန်နီးကပ်မှ ထုတ်ပြန် ကြေညာခြင်း၊ ဝေဖန်၊ ကန့်ကွက်မှုများ၊ အကြံပြုချက်များ ကြီးစွာ ထွက်ပေါ်လာသည့်အခါမှ ပိတ်ရက် ၅ ရက် မနစ်နာစေရန် စီစဉ်ထားကြောင်း ထပ်မံ ကြေညာချက် ထုတ်ပြန်ရခြင်း၊ ပုဂ္ဂလိက လုပ်ငန်းများကိုမူ ဆယ်ရက် ပိတ်ပေးရန် အကြောင်းကြားခြင်းတို့နှင့် ပတ်သက်ပြီး ထပ်ဆင့် ဝေဖန်သံများ ပို၍ ကျယ်လောင်စွာ ထွက်ပေါ်ခဲ့သည်။

ဤနေရာတွင် သြင်္ကန်ပိတ်ရက် ပြင်ဆင် သတ်မှတ်လိုက်ခြင်းနှင့် ပတ်သက်၍ သဘောတူခြင်း၊ မတူခြင်းထက် ပြင်ဆင် သတ်မှတ်သည့် လုပ်ငန်းစဉ်၊ လုပ်ထုံး၊ လုပ်နည်း၊ စီမံခန့်ခွဲမှုနှင့် ဝေဖန် ကန့်ကွက်မှုများအပေါ် အစိုးရ၏ တုံ့ပြန်ဆောင်ရွက်မှုတို့ကို ဆန်းစစ် သုံးသပ်ခြင်းကိုသာ အထူးပြု လိုပေသည်။

ဖွဲ့စည်းပုံ အခြေခံဥပဒေ အခန်း (၁၅)၊ ပုဒ်မ ၉၆ နှင့် ဇယား(၁) တို့အရ အလုပ်လုပ်ချိန်၊ နားချိန်၊ အလုပ် ပိတ်ရက်များနှင့် ပတ်သက်၍ ပြင်ဆင်ပြောင်းလဲလိုပါက ပြည်ထောင်စုလွှတ်တော်သို့ တင်ပြ၍ ဥပဒေပြုရမည် သို့မဟုတ် ပြည်ထောင်စုလွှတ်တော်ထံ တင်ပြ၍ ခွင့်ပြုချက် ရယူရမည်ဟု အနက်ကောက်နိုင်သည်။

ထိုအချက်အရ အစိုးရတစ်ရပ် အနေနှင့် မူလရှိနေသော အလုပ် ပိတ်ရက်များကို ပြင်ဆင် သတ်မှတ်လိုပါက အဆင့်လိုက် ဆောင်ရွက်ရမည့် နည်းလမ်းနှင့် လုပ်ငန်းစဉ်များကို ကောင်းစွာ သိရှိ နားလည်ခြင်း မရှိ၍ပေလော၊ သို့တည်းမဟုတ် တစ်စုံတစ်ဦး၏ နှုတ်ဖြင့် မှတ်ချက်ပေး ပြောဆိုခြင်းကို ဥပဒေနှင့် လုပ်ထုံး၊ လုပ်နည်းများ မလေ့လာဘဲ ဆောင်ရွက်လိုက်ပါမည်ဟု ခေါင်းညိတ် အဖြေပေးကာ ဖုတ်ပူမီးတိုက် စီစဉ်ဆောင်ရွက်ခြင်းပေလောဟု မေးခွန်း ထုတ်စရာ ရှိပေသည်။

ယခင် အာဏာရှင်အစိုးရများနှင့် အရပ်သားတစ်ပိုင်း အစိုးရများ လက်ထက်တွင်မူ ပြည်သူလူထုနှင့် နိုင်ငံ့ဝန်ထမ်းများ၏ တောင်းဆိုချက်၊ ကန့်ကွက်မှုများကို ထည့်တွက်ခြင်း၊ ဂရုစိုက်ခြင်းမရှိဘဲ ၎င်းတို့ အလိုကျ စိတ်ကြိုက် ဆောင်ရွက်ခဲ့သော်လည်း ယခု အစိုးရလက်ထက်တွင်မှ ပြည်သူနှင့် ဝန်ထမ်းများ၏ သဘောမတူကြောင်း တုံ့ပြန်မှုများကို အလေးထားသည့်အနေနှင့် အဆင်ပြေမည့် နည်းလမ်းများ ရှာကြံခြင်း၊ ကြေညာချက်များ ထုတ်ပြန် ရှင်းလင်းခြင်းမှာ အသိအမှတ် ပြုရမည့်ကိစ္စဖြစ်သည်။

အခြားတစ်ဖက်တွင်မူ ပြိုင်ဆိုင်မှု ပြင်းထန်လှသော မျက်မှောက် ကမ္ဘာကြီးတွင် အစစ အရာရာ ခေတ်နောက်ကျနေသော မြန်မာနိုင်ငံအတွက် လွန်ခဲ့သော အနှစ် ၇၀ ခန့်က ဗိုလ်ချုပ်အောင်ဆန်း ပြောခဲ့သည့် သူများနိုင်ငံက ခြေလှမ်းတစ်လှမ်း လှမ်းပါက မြန်မာနိုင်ငံက ဆယ်လှမ်းခန့် လှမ်းနိုင်မှ တော်ကာ ကျမည်ဆိုခြင်းထက် အဆများစွာ ကွာခြားသွားသော အခြေအနေ ဖြစ်သောကြောင့် အစိုးရ၏ ရုံးပိတ်ရက် ပြောင်းလဲခြင်းမှာ နောက်ကျသည်ဟုပင် ဆိုနိုင်သည်။

ထို့ကြောင့် သြင်္ကန်ပိတ်ရက်များ ပြင်ဆင် သတ်မှတ်လိုက်ခြင်းသည် အလုပ်အချိန်များအတိုင်း တိကျစွာ မခိုမကပ် အားသွန်ခွန်စိုက် အလုပ်လုပ်မည့် နိုင်ငံ့ဝန်ထမ်းများ၊ နိုင်ငံသားများ ဖြစ်မည်ဆိုပါက နောက်ကျနေသော နိုင်ငံကို အချိန်တိုအတွင်း အတိုင်းအတာတစ်ခုအထိ မြှင့်တင်ခြင်း၊ ရှေ့တွင် ရောက်နေသော နိုင်ငံများနှင့် ပခုံးချင်းယှဉ်နိုင်ခြင်းကဲ့သို့ အကျိုးရလဒ်များ မြင်တွေ့ရနိုင်ပေသည်။

ထို့ကြောင့် အစိုးရတစ်ရပ်အနေနှင့် လိုအပ်၍ ထုတ်ပြန်သော ကြေညာချက်များ၊ လုပ်ကိုင် ဆောင်ရွက်သည့် စီမံကိန်း စီမံချက်များသည် နိုင်ငံတော်နှင့် နိုင်ငံသားများအတွက် ရေရှည်တွင် အကျိုး ဖြစ်ထွန်းသည်ဆိုပါက ဝေဖန်၊ ကန့်ကွက်မှုများ ရှိစေကာမူ ပြည်သူလူထုအား ကျိုးကြောင်းကျ ခိုင်လုံစွာ ရှင်းပြကာ မမှိတ်မသုန် ရှေ့တိုး ဆောင်ရွက်ရမည်ဖြစ်သည်။

ထိုသို့ ဆောင်ရွက်ရမည့် ကိစ္စရပ်များကိုလည်း အားနည်းချက် နည်းနိုင်သမျှ နည်းစေရန် မထုတ်ပြန်၊ မကြေညာခင် လုံလောက်သော အချိန်တစ်ခုယူ၍ စနစ်တကျ လေ့လာ၊ သုံးသပ်၊ ဆန်းစစ်ပြီး ကြိုတင် ပြင်ဆင်ထားရန်နှင့် လုပ်ကိုင် ဆောင်ရွက်သမျှ ဥပဒေနှင့်အညီ ဖြစ်စေရန် အထူး လိုအပ်လှကြောင်း အကြံပြု ထောက်ပြလိုရင်း ဖြစ်သည်။

အယ်ဒီတာ (၁၃-၃-၂၀၁၇)


  • VIA