News

POST TYPE

EDITORIAL

ဦးဝီရသူ၊ ကိုဆွေဝင်းနှင့် ဒုက္ခပေးသော ပုဒ်မ ၆၆ (ဃ)ပြဿနာ ((Daily, Vol-4/No-285)
09-Mar-2017
အင်းဝ အပ်ချုပ်ဆိုင် မိသားစုအမှုကို စုံစမ်း ဖော်ထုတ်ပေးခဲ့သော သတင်းထောက် ကိုဆွေဝင်းအား မ.ဘ.သ ဦးဆောင် ဆရာတော်တစ်ပါးဖြစ်သူ ဦးဝီရသူ၏ စေခိုင်းချက်အရ ဒါယကာတစ်ဦးက မန္တလေးမြို့တွင် ဆက်သွယ်ရေး ဥပဒေပုဒ်မ ၆၆(ဃ)ဖြင့် အမှုဖွင့် တိုင်ကြားလိုက်ခြင်းမှာ လတ်တလော ဝေဖန်ပြောဆိုမှု အများဆုံးသတင်း ဖြစ်သွားခဲ့သည်။

ထိုသို့ အမှုဖွင့်ရခြင်းမှာ ကိုဆွေဝင်း၏ Ba Kaung အမည်ဖြင့် သုံးစွဲနေသော Facebook အွန်လိုင်း လူမှုရေးကွန်ရက်မှတစ်ဆင့် ဦးဝီရသူသည် ရဟန်းဘဝ ကုန်ဆုံးသွားသူ တစ်ဦးဖြစ်ကြောင်း ပြောဆိုထားခြင်းကို ဦးဝီရသူက ၇ ရက်အတွင်း တောင်းပန်ရန်၊ မတောင်းပန်ပါက အမှုဖွင့် ဆောင်ရွက်သွားမည်ဟုပြောဆိုရာ ကိုဆွေဝင်းက မတောင်းပန်သဖြင့် ဦးဝီရသူ၏ စေခိုင်းချက်အရ အဆိုပါ ဒါယကာက အမှုဖွင့်ရခြင်းဖြစ်ကြောင်း အမှတ် ၇ ရဲစခန်းသို့ တိုင်တန်းချက်တွင် ဖော်ပြထားသည်။

အဆိုပါ ပြဿနာတွင် ပြီးခဲ့သော ရက်ပိုင်းအတွင်း ဦးကိုနီ လုပ်ကြံခံရခြင်းနှင့်ပတ်သက်၍ ဦးဝီရသူ၏ မှတ်ချက်စကားများမှာ ဗုဒ္ဓ၏ အဆုံးအမ၊ ဗုဒ္ဓဘာသာ ရဟန်းတစ်ပါး၏ ကျင့်ဝတ်သိက္ခာများနှင့် နှိုင်းချိန်ကြည့်ပါက များစွာ ဆန့်ကျင်ဘက် ဖြစ်နေကြောင်း ဝေဖန်ပြောဆိုမှုများ ရှိနေပြီး Ba Kaung ခေါ် ကိုဆွေဝင်းမှာ ထိုသို့ ဝေဖန် မှတ်ချက်ပေးသူများအနက် ထင်ရှားသူတစ်ဦးဖြစ်သည်။

အခြားတစ်ဖက်တွင်လည်း ဦးဝီရသူ၏ ထိုသို့ မနှစ်မြို့ဖွယ် မှတ်ချက်စကား ပြောဆိုမှုသည် ရဟန်းဘဝ ကုန်ဆုံးသွားစေသော ပါရာဇိကဟူသော ကံမြောက်၊ မမြောက်ဆိုသော ငြင်းခုံမှုကလည်း ရှိနေသောကြောင့် ရဟန်းသံဃာတော်များ၏ ဝိနည်း သိက္ခာပုဒ် တစ်ခုချင်းစီ၏ တိုက်ရိုက်အနက်၊ ဆင့်ပွားအနက်များကို သေချာစွာ ဖွင့်ဆိုရှင်းလင်းပေးရန် လိုအပ်မည် ဖြစ်သည်။

ဦးဝီရသူနှင့် ကိုဆွေဝင်းတို့အကြား ယခုလတ်တလော ဖြစ်ပေါ်နေသော ထိပ်တိုက် တွေ့မှုသည် သာမန်အားဖြင့် ကြည့်ပါက ရဟန်းတစ်ပါးနှင့် လူပုဂ္ဂိုလ်တစ်ဦးအကြား ပဋိပက္ခဟု ဆိုနိုင်သော်လည်း နောက်ကွယ်တွင် ထိုထက်မက နက်နဲသော အကြံအစည်နှင့် အင်အားကောင်းသော ပါဝင်ပတ်သက်မှုတို့ ထုထည်ကြီးကြီး ရှိနေနိုင်ကြောင်း ဝေဖန်သုံးသပ်မှုများလည်း ထွက်ပေါ်လာသည်။

ဆိုလိုသည်မှာ ကြားဖြတ်ရွေးကောက်ပွဲ နီးကပ်လာချိန်မှ စတင်ကာ ဦးကိုနီ လုပ်ကြံခံရမှု၊ ယင်းလုပ်ကြံခံရမှု နောက်ကွယ်မှ ပါဝင်ပတ်သက်နေသော ကွင်းဆက်များ၊ ကိုဆွေဝင်း တာဝန် ထမ်းဆောင်နေသော Myanmar Now အွန်လိုင်း သတင်းဌာန၏ အမှုနှင့် သက်ဆိုင်သော ကွင်းဆက်အချို့ကို စုံစမ်းဖော်ထုတ် မေးမြန်းမှုများ၊ သတင်းစာ ရှင်းလင်းပွဲမှတစ်ဆင့် ထွက်ပေါ်လာသော စောကြောဆန်းစစ်ဖွယ် အသုံးအနှုန်းသစ်များတွင် ပျော်ဝင်နေနိုင်ဖွယ်ရှိမည့် အဓိပ္ပာယ်များ စသဖြင့် မသင်္ကာဖွယ်၊ သံသယဖြစ်ဖွယ် ချိတ်ဆက်မှုများက အတွေးပွားစရာ ဖြစ်နေခြင်းကို ဆိုလိုသည်။

အခြားတစ်ဖက်တွင်မူ Ba Kaung ခေါ် ကိုဆွေဝင်းအနေနှင့် သတင်းသမား ရှုထောင့်မှကြည့်ပါက မိမိဘက်က ပြောဆိုလိုသော အကြောင်းအရာ၊ ကိစ္စရပ်နှင့်ပတ်သက်၍ သဘော သဘာဝနှင့်တကွ၊ သမိုင်းကြောင်းနှင့်တကွ ခြေခြေမြစ်မြစ်၊ တိတိကျကျ၊ အထောက်အထား ခိုင်ခိုင်လုံလုံ၊ အဓိပ္ပာယ် ဖွင့်ဆိုချက် ရှင်းရှင်းလင်းလင်း ရှိနေစေရန် ဦးစွာ ပြင်ဆင်ထားပြီးမှ သို့မဟုတ် မိမိဘက်မှ ရှေ့သို့ ကျွံသွားစေခြင်းမျိုး မဖြစ်စေရန် အချို့ အသုံးအနှုန်းများကို သုံးစွဲသင့်ကြောင်း ထောက်ပြမှုများလည်းရှိသည်။

ပြဿနာကို ပို၍ ဆိုးရွားရှုပ်ထွေး သွားစေနိုင်သည့်အရာမှာ စွပ်စွဲသူ တရားလိုနှင့် အစွပ်စွဲခံရသူ လူပုဂ္ဂိုလ်၊ အဖွဲ့အစည်း၊ စွဲဆိုသည့် အကြောင်းအရာတို့ကို မူတည်ကာ ချက်ချင်း ဖမ်းဆီးခြင်း၊ မဖမ်းဆီးခြင်း၊ အာမခံပေးခြင်း၊ မပေးခြင်းတို့ကို လိုသလို ဆောင်ရွက်နိုင်ခြင်းကြောင့် ပြီးခဲ့သည့် အစိုးရလက်ထက်မှသည် လက်ရှိ အစိုးရလက်ထက်အထိ နာမည်ဆိုးဖြင့် ကျော်ကြားလှသော ဆက်သွယ်ရေးဥပဒေ ပုဒ်မ ၆၆(ဃ)ဖြစ်သည်။

ထို့အပြင် ယခင်က ဖြစ်ပွားခဲ့သော ဘာသာရေး အရေခြုံ အကြမ်းဖက်၊ တိုက်ခိုက်၊ သတ်ဖြတ်၊ မီးရှို့မှုများ၊ လူထု ပရိသတ် ရှေ့မှောက်တွင်ပင် ဘာသာတရား၏ အဆုံးအမနှင့် ဖီလာပြုကာ၊ ကျင့်ဝတ်သိက္ခာများနှင့် ဆန့်ကျင်နေသော ဖရုသဝါစာ မှတ်ချက်စကားများ၊ လူပုဂ္ဂိုလ်များ၊ အဖွဲ့အစည်းများ၊ မီဒီယာများအပေါ် ကြိမ်းမောင်းခြိမ်းခြောက် စကားများ၊ ယနေ့အချိန်အထိ အွန်လိုင်းလူမှုရေး ကွန်ရက်ပေါ်မှတစ်ဆင့် နိုင်ငံတော်၏ ငြိမ်းချမ်းစွာ အတူယှဉ်တွဲ နေထိုင်မှု အစဉ်အလာနှင့် ဆန့်ကျင်သော ရုန့်ရင်းကြမ်းတမ်း၊ အစွန်းရောက် မှတ်ချက်စကားများ အထိန်းအကွပ်မဲ့ ပြောဆို လှုံ့ဆော်နေကြသူများ ယနေ့အချိန်အထိ အရေးယူ ဟန့်တားခြင်း မခံရသေးဘဲ ကိုဆွေဝင်းကဲ့သို့ အမှန်တရားကို ရဲဝံ့စွာ ဖော်ထုတ်တင်ပြခဲ့သူမျိုး အမှုဖွင့်ခံရခြင်းမှာ ယဉ်ကျေးသော လူ့အဖွဲ့အစည်းတစ်ရပ်အတွက် များစွာ ရှက်စရာ ကောင်းလှသည်။

ထို့အတူ ပုဒ်မ ၆၆(ဃ)ဖြင့် အမှုဖွင့်လိုသူ သို့မဟုတ် နစ်နာသူသည် နိုင်ငံတော်၏ အရေးပါသော လုပ်ငန်းများ ဆောင်ရွက်နေသူမဟုတ်ပါက ကိုယ်စား အမှုဖွင့်၍ မရဘဲ ကိုယ်တိုင်ရဲစခန်း သွားရောက်တိုင်ကြား အမှုဖွင့်ရမည်ဟု ဆိုထားသည့်အတွက် ဦးဝီရသူကိုယ်စား မ.ဘ. သ အဖွဲ့ဝင် ဒါယကာတစ်ဦးက အမှုဖွင့်ခွင့် ရှိ၊ မရှိ၊ အမှုဖွင့်ခြင်းကို ရဲစခန်းက လက်ခံ၍ ရ၊ မရ ဆိုသည့်အပေါ်တွင်လည်း ဝေဖန်သုံးသပ်မှုများ ရှိနေပေသည်။

ထိုအခြေအနေများကို မူတည်ကာ ကြားဖြတ်ရွေးကောက်ပွဲ မတိုင်မီ ပြဿနာ ဖန်တီးရန် ပြဿနာမီးစများကိုရှာကြံကာ တစ်ဆိတ်ကိုတစ်အိတ်လုပ်၍ ပုံကြီးချဲ့၊ သွေးထိုး၊ လှုံ့ဆော်၊ ရန်တိုက်လာမည့် တောကြောင်များ၊ အဖျက်သမားများ၊ အစွန်း ရောက်ရယ်ဒီကယ်များ၊ ပတ်မကြီး ထိုးဖောက်ရန် အမြဲ ကြံစည်ချောင်းမြောင်းနေသူများ၏ အန္တရာယ်ကို ဆင်ခြင်ဉာဏ်ဖြင့် သတိချပ်ကြစေလိုကြောင်း ပြောလိုရင်း ဖြစ်သည်။

အယ်ဒီတာ (၈-၃-၂၀၁၇)



  • VIA