News

POST TYPE

EDITORIAL

မြန်မာ့နိုင်ငံရေး ပန်းထိမ်ဆရာကြီးများနှင့် လက်ဆင့်မကမ်းအပ်သည့် ရွှေခိုးနည်း (Daily,Vol-6/No-269)
19-Feb-2019

ပန်းထိမ်ပညာကို ကျွမ်းကျင်စွာ တတ်မြောက်ခြင်းမရှိသေးဘဲ မိမိအတွက်ရွှေ ရွေးများများ ကျန်ရှိနိုင်မည့် နည်းလမ်းတတ်မြောက်ရန် ကြိုးပမ်းသူများကိုအစွဲပြုပြီး “ပန်းထိမ်မတတ်ခင် ရွှေခိုးသင်”ဟူသော နာမည်ကျော် မြန်မာ့ဆိုရိုးစကားတစ်ခွန်း ရှိပေသည်။ တစ်မျိုးဆိုပါက တတ်မြောက်သင့် တတ်မြောက်အပ်သည့်ပညာကို တတ်ကျွမ်းသည့်အဆင့်မရှိသေးဘဲ ယင်းပညာကိုအခြေခံပြီး အမြတ်ထုတ်ရန် ကြိုးပမ်းသူကိုဆိုလိုခြင်းပင်။

ထိုနေရာတွင် ဆရာဖြစ်သူ၊ တစ်နည်းအားဖြင့် အတွေ့အကြုံနှင့် ပညာနှစ်ရပ်လုံးရှိသူ၏ သွန်သင်ဆုံးမမှုမှာ လွန်စွာ အရေးကြီးပေသည်။ ရှေ့ကသွားသည့် ဆရာဖြစ်သူ က နောက်လိုက်များ (တပည့်ဖြစ်သူ) ကို နည်းမှန်လမ်းမှန် ဖြောင့်ဖြောင့်တန်းတန်း လက်ဆင့်ကမ်းတတ်မှသာ မိမိအဖွဲ့အစည်းနှင့် လူ့အသိုင်းအဝိုင်းကအစ တိုင်းပြည်အဆင့်အထိ အစစအရာရာ ဖြောင့်ဖြောင့်ဖြစ်နိုင်ပေမည်။

ထိုသို့မဟုတ်ဘဲ ဆရာဖြစ်သူက အမှားကို အမှန်ဖြစ်အောင် လုပ်ယူထားသည်ကို အမှန်သဘောမျိုး သတ်မှတ်ပြီး လက်ဆင့်ကမ်းမိပြီဆိုလျှင်၊ သို့မဟုတ် အဂတိတရား (ဒုစရိုက်တရား) ကို သုစရိုက်တရားဖြစ်အောင် ဖန်တီးထားသည့် အစဉ်အလာတစ်ရပ်အား လက်ဆင့်ကမ်းမိပြီဆိုလျှင် တိုင်းပြည်အတွက် အမြော်အမြင်ရှိသည့် မျိုးဆက်သစ်ခေါင်းဆောင်များ မွေးထုတ်ရေးမဆိုထားနှင့်၊ ကဖျက်ယဖျက် လုပ်မည့်သူများ အင်အားမကောင်းလာအောင်ပင် မနည်းကြိုးပမ်းရပေလိမ့်မည်။

ထို့ထက်ပိုဆိုးသည်မှာ ဆရာဖြစ်သူကိုယ်တိုင်ကိုက ပန်းထိမ်အတတ်ပညာထက် ရွှေခိုးသည့်အတတ်ပညာကိုသာ လက်ဆင့်ကမ်းခံခဲ့ရသူဆိုပါက တပည့်ဖြစ်သူမှာ မည်သို့မျှ ပန်းထိမ်ဆရာကောင်းတစ်ဦး ဖြစ်လာစရာအကြောင်း မရှိတော့ပေ။ မိမိအဖွဲ့အစည်း၊ လူ့အသိုင်းအဝိုင်းနှင့် နိုင်ငံအပေါ် အလိုအလျောက် ဒုက္ခပေးတတ်သည့် ပန်းထိမ်ရွှေခိုးသမားမျိုးသာ ဖြစ်လာစရာရှိတော့သည်။

“လူယုတ်မာများနှင့် ပေါင်းသင်းရန်မဆိုထားနှင့်၊ ၎င်းတို့နှင့် ထိတွေ့ဆက်ဆံရုံမျှဖြင့် ၎င်းတို့၏ ယုတ်မာမှုခံရလေအောင် မိမိပါယုတ်မာသည့်နည်းလမ်းများကို လိုက်လံစဉ်းစားမိတတ်သည်”ဆိုသော သတိပေးစကားမှာ လွန်စွာတန်ဖိုးရှိလှသည်။ သူခိုးကိုဆရာတင်မိလျှင် ကိုယ်တိုင်သူခိုးမဖြစ်သော်မှ၊ သူခိုးတပည့်တော့ဖြစ်မည်မှာ သေချာသွားသည်။

ဒီမိုကရေစီဖော်ဆောင်ရေးတွင် အခက်အခဲမျိုးစုံနှင့် ရင်ဆိုင်နေရသည့် မြန်မာနိုင်ငံတွင် လှပသေသပ်သည့် အနာဂတ်တစ်ရပ်ကို ထုဆစ်ပေးနိုင်မည့် ပန်းထိမ်ဆရာ နိုင်ငံရေးသမားကောင်းများ အထူးလိုအပ်နေသည်မှာ ထွေထွေထူးထူးပင် ရှင်းပြစရာလိုမည်မထင်ပေ။

မြန်မာ့နိုင်ငံရေးနှင့်ပတ်သက်သည့် သက်ဆိုင်ရာ အင်စတီကျူးရှင်းကြီးတိုင်း၊ အဖွဲ့အစည်းတိုင်းတွင်ရှိသော အမှုထမ်း အရာထမ်းများအနေနှင့်လည်းကောင်း၊ အတွေ့အကြုံကိုယ်စီရှိလာကြသည့် နိုင်ငံရေးသမားများအနေနှင့်လည်းကောင်း မိမိကိုယ်မိမိ ပန်းထိမ်ဆရာကောင်းဖြစ် မဖြစ်ဆန်းစစ်သင့်သလို နောင်မျိုးဆက်သစ်များကိုလည်း ရွှေခိုးနည်းမသင်ပေးမိစေရန် နိုင်ငံ့အရေးမျှော်တွေးကာ သတိချပ်သင့်ပါကြောင်း မေတ္တာရပ်ခံလိုရင်းဖြစ်ပေသည်။

အယ်ဒီတာ (၁၈-၂-၂၀၁၉)