News

POST TYPE

EDITORIAL

လူထုခေါင်းဆောင်များ၏ လုံခြုံရေး (Daily, Vol-6/No-262)
11-Feb-2019

ပြီးခဲ့သည့် သီတင်းပတ်က နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်မှာ ရှမ်းပြည်နယ်ခရီးစဉ်တွင် ၎င်းစီးနင်းသည့် ရဟတ်ယာဉ် ဟိုက်ဒရောလစ်ဆီယိုသောကြောင့် အခြားရဟတ်ယာဉ်တစ်စင်း ပြောင်းလဲစီးနင်းခဲ့ရသည်ဟု သိရပါသည်။ မိုင်းတုံမြို့မှ မိုင်းဆတ်သို့ ရဟတ်ယာဉ်ဖြင့် သွားရောက်စဉ် မိုင်းတုံရဟတ်ယာဉ် ကွင်းမှတက်ပြီး ငါးမိနစ်ခန့်အကြာ၌ ယင်းသို့ဆီယိုသောကြောင့် အခြားရဟတ်ယာဉ် တစ်စင်းဖြင့် ချက်ချင်းအစားထိုးကာ ခရီးဆက်ခဲ့ရခြင်းဖြစ်သည်ဟု သတင်းများက ဆိုပါသည်။ 

နိုင်ငံတော်အတိုင်ပင်ခံပုဂ္ဂိုလ် ရဟတ်ယာဉ်ချို့ယွင်းမှုနှင့် ကြုံတွေ့ခဲ့ရသည့် ကိစ္စမှာ ပြည်သူများအကြား စိတ်ပူပန်စရာဖြစ်စေသည့် သတင်းတစ်ပုဒ်ဖြစ်ခဲ့သလို အစိုးရအဖွဲ့အတွက်လည်း ရှေ့လျှောက် ဒေါ်အောင်ဆန်းစုကြည်သာမက နိုင်ငံတော်အဆင့် ခေါင်းဆောင်များ စီးနင်းသည့် “ယာဉ်” များလုံခြုံစိတ်ချမှုရှိရေးနှင့်ပတ်သက်၍လည်း အရေးတကြီးစဉ်းစားစရာများကို ဖြစ်စေခဲ့လိမ့်မည်ဟု ထင်ပါသည်။ ဘယ်လိုပဲရှိခဲ့သည်ဖြစ်စေ ဟိုက်ဒရောလစ်ဆီယိုနေသည့်ကိစ္စကို ပေါ့ပေါ့တန်တန်သဘောမထားဘဲ ရဟတ်ယာဉ်ပြောင်းလဲစီးနင်းရေးအတွက် ကွင်းသို့ ချက်ချင်းပြန်ဆင်းရန် ဆုံးဖြတ်ခဲ့သည့် ပိုင်းလော့ကို အထူးပင်ကျေးဇူးတင်ရမည်ဖြစ်ပါသည်။ 

ဒေါ်အောင်ဆန်းစုကြည်၏ လုံခြုံရေးကိစ္စမှာ လွန်ခဲ့သည့် ၂ နှစ်ခန့်လောက်ကတည်းက NLD အစိုးရအပေါ် ဩဇာလွှမ်းမိုးမှုရှိခဲ့သူ ဦးဝင်းထိန်က အထူးပင် စိုးရိမ်ရသည့် အနေအထားတွင်ရှိသည်ဟု ထုတ်ဖော်အသိပေးခဲ့သည်။ စစ်ဘက်အရာရှိဟောင်းတစ်ဦးလည်းဖြစ်ပြီး ဒေါ်အောင်ဆန်းစုကြည် နိုင်ငံတော်အတိုင်ပင်ခံပုဂ္ဂိုလ် ဖြစ်မလာခင်အချိန်ကတည်းက သူမ၏ လုံခြုံရေးကို နှစ်ပေါင်းများစွာတာဝန်ယူခဲ့ဖူးသူ ဦးဝင်းထိန်၏ သတိပေးပြောစကားကို သက်ဆိုင်သူများက မည်မျှအတိုင်းအတာအထိ အလေးအနက်ထားခဲ့သလဲဟူသည်ကိုတော့ မသိနိုင်ပေ။ 

သို့တိုင်အောင် ယနေ့အချိန်အထိ ဒေါ်အောင်ဆန်းစုကြည်အပါအဝင် အခြားနိုင်ငံတော်အဆင့် ခေါင်းဆောင်များ၊ အထူးသဖြင့် အရပ်ဘက်ခေါင်းဆောင်များ၏ လုံခြုံရေးနှင့်ပတ်သက်၍ ဆိုးဆိုးရွားရွားပြဿနာမရှိခဲ့သည်ကို ကြည့်လျှင် သက်ဆိုင်ရာ တာဝန်ရှိသူများ အထူးအလေးထားဆောင်ရွက်လျက်ရှိသည်ဟု ဆိုနိုင်ပေသည်။ မည်သည့်နိုင်ငံတွင်မဆို နိုင်ငံခေါင်းဆောင်များ၏ လုံခြုံရေးကို နိုင်ငံတစ်နိုင်ငံ၏ လုံခြုံရေးအဖြစ်သတ်မှတ်ကာ သက်ဆိုင်ရာ အစိုးရနှင့် လက်နက်ကိုင်အဖွဲ့အစည်းများက တင်းတင်းကျပ်ကျပ် တာဝန်ယူစမြဲဖြစ်သည်။ 

အထူးသဖြင့် အကြမ်းဖက်ဝါဒ၏ ခြိမ်းခြောက်မှုများ မြင့်တက်လာသည့် ကမ္ဘာတွင် နိုင်ငံခေါင်းဆောင်များ၏ လုံခြုံရေးကို ငွေအား၊ လူအားသာမက နည်းပညာ အားပါအသုံးပြု၍ အကာအကွယ်ပေးလာကြသည်ကို တွေ့နိုင်ပါလိမ့်မည်။ ပြည်သူလူထုက တင်မြှောက်ထားသည့် အစိုးရဖြစ်စေ၊ အာဏာရှင်အစိုးရဖြစ်စေ နိုင်ငံ့ခေါင်းဆောင်များ အသက်အန္တရာယ်ကင်းစင်ရေးကိစ္စကို နိုင်ငံတော်၏ အရေးအကြီးဆုံး လုပ်ငန်းစဉ်တစ်ခုအဖြစ် သတ်မှတ်ကာ အလေးထားလုပ်ဆောင်ကြပေသည်။ ပို၍ဆိုရလျှင် ဒီမိုကရေစီနည်းလမ်းအရ ပြည်သူလူထု၏ တင်မြှောက်ခြင်းခံရသော နိုင်ငံခေါင်းဆောင်များဖြစ်စေ၊ အာဏာရှင်စနစ်ကျင့်သုံးသော နိုင်ငံခေါင်းဆောင်များဖြစ်စေ ဆန့်ကျင်ဘက်ရန်သူမှာ ပြည်တွင်းရန်နှင့် ပြည်ပရန် ပုံစံနှစ်မျိုးဖြင့် ရှိစမြဲ ဖြစ်ရာ ၎င်းတို့အပေါ် အန္တရာယ်မကျရောက်မီ ဟာကွက်များနှင့် ဖြစ်လာနိုင်ခြေရှိသည့်အန္တရာယ်များကို ကြိုတင်ဟန့်တားခြင်း၊ ပိတ်ဆို့ခြင်း စသည်တို့သည်သာလျှင် အကောင်းဆုံးသော လုံခြုံရေးအစီအမံဖြစ်ပေမည်။ 

သမိုင်းကြောင်းနှင့်ချီသော နိုင်ငံရေးရှုပ်ထွေးမှုများ၊ စစ်မက်ပဋိပက္ခများသာမက အခြားပြဿနာများစွာနှင့် ရင်ဆိုင်နေရသည့် မြန်မာနိုင်ငံမှ လူထုခေါင်းဆောင်များ၏ ယနေ့ခေတ်ကာလ လုံခြုံရေးဟူသည် ပေါ့ပေါ့တန်တန်သဘောထားရမည့် ကိစ္စမဟုတ်သည်ကို သတိချပ်စေလိုရင်းဖြစ်ပေသည်။ 

အယ်ဒီတာ (၁၀-၂-၂၀၁၉)