News

POST TYPE

CRIME & ACCIDENT

မိမိနေအိမ်ကို မီးရှို့ပြီး ထွက်ပြေးတိမ်းရှောင်ခဲ့သည့် အမျိုးသားကို ဖမ်းမိ
15-Sep-2017
ကျိုင်းတုံ၊ စက်တင်ဘာ ၁၅

ရှမ်းပြည်နယ် (အရှေ့ပိုင်း) ကျိုင်းတုံမြို့ အမှတ် (၂) ရပ်ကွက်တွင် စက်တင်ဘာလ ၁၄ ရက်နေ့ မွန်းလွဲပိုင်းက မိမိနေအိမ်ကို မီးရှို့ပြီး ထွက်ပြေးတိမ်းရှောင်နေသည့် အမျိုးသားကို နာရီပိုင်းအတွင်း ဖမ်းဆီးရမိကြောင်း ကျိုင်းတုံမြို့မ ရဲစခန်းထံမှ သိရသည်။

အဆိုပါနေ့ရက် မွန်းလွဲ ၂ နာရီခန့်က အသက် ၃၁ နှစ်အရွယ် ဦးစိုင်းဝန်းတစ်သည် မိမိနေအိမ်အောက်ထပ်ရှိ သစ်သားဘီဒိုကို မီးရှို့ပြီး မော်တော်ယာဉ်ဖြင့် ထွက်ပြေးတိမ်းရှောင်ခဲ့၍ ပိတ်ဆို့ရှာဖွေခဲ့ရာ ယင်းနေ့ည ၆ နာရီခန့်တွင် ကျိုင်းတုံ-တာချီလိတ် ပြည်ထောင်စုလမ်းမကြီး ယန်းခတံတားတွင် ဖမ်းဆီးရမိကြောင်း ယင်းရဲစခန်းမှ ဒုစခန်းမှူး ရဲအုပ်မောင်မောင်သင်းက ပြောကြားသည်။

“သူ့အိမ်အောက်ထပ်က ဘီဒိုတွေ မီးလောင်ခဲ့ပေမယ့် အိမ်ကတော့ မီးမလောင်ဘူး။ အပေါ်ထပ်မှာ ရှိတဲ့ ဂက်စ်အိုးသာ ကူးစက်လောင်ကျွမ်းပြီး ပေါက်ကွဲခဲ့ရင်တော့ မလွယ်ဘူး။ အရက်ကြောင်တာလား ဆေးကြောင်တာလားတော့ မသိဘူး”

ယင်းဖြစ်စဉ်နှင့် ပတ်သက်၍ အသက် ၃၁ နှစ်အရွယ် ဦးစိုင်းဝန်းတစ်ကို (ပ) ၁၆၅/၂၀၁၇၊ ရာဇသတ်ကြီးပုဒ်မ ၄၃၆ အရ အရေးယူထားကြောင်း ကျိုင်းတုံမြို့မ ရဲစခန်းထံမှ သိရသည်။

R-16