Covid-19 ကူးစက်မှုများပြားလာသည့် ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်မှ အတည်ပြုလူနာတစ်ဦး ထပ်မံသေဆုံးခဲ့သည့်အတွက် မြန်မာနိုင်ငံတွင် Covid-19 ကြောင့် သေဆုံးသူ ၈ ဦးအထိရှိလာပြီကြောင်း ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်အရ သိရသည်။

ရန်ကုန်မြို့ တက္ကသိုလ်ရိပ်သာလမ်းတွင်ရှိသည့် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ နေအိမ်ခြံဝန်းအတွင်း အစောင့်အဖြစ်နေထိုင်သူ ၂ ဦးတွင် ကိုဗစ်-၁၉ ရောဂါပိုးတွေ့ရှိခဲ့ရပြီး အဆိုပါ ဒေါ်အောင်ဆန်းစုကြည်နေအိမ်ကို အသွားအလာကန့်သတ်လိုက်ပြီဖြစ်ကြောင်း NLD ပါတီထံမှ သိရသည်။

အင်းစိန်မြို့နယ်မှ ခြောက်ဦးမြောက် ပိုးတွေ့လူနာမှာ အငှားယာဉ်မောင်းဖြစ် ရန်ကုန်၊ စက်တင်ဘာ ၃ အင်းစိန်မြို့နယ်မှ ခြောက်ဦးမြောက် Covid-19 လူနာအသစ်မှာ အငှားယာဉ်မောင်းအမျိုးသားဖြစ်ပြီး ပြင်ပဆေးခန်းတစ်ခုတွင် သွားရောက်ပြသခဲ့ရာမှ အင်းစိန်ဆေးရုံသို့ လွှဲပြောင်းကုသမှုခံယူကာ Swab ယူ စစ်ဆေးခဲ့ခြင်းဖြစ်ကြောင်း တိုင်းဒေသကြီးလွှတ်တော် ကိုယ်စားလှယ် ဦးဝေဖြိုးဟန်က ပြောကြားသည်။ စက်တင်ဘာလ ၃ ရက်နေ့ နံနက် ၈ နာရီအချိန် ကျန်းမာရေးနှင့် အားကစားဝန်ကြီးဌာနက စက်တင်ဘာလ ၂ ရက်နေ့အတွက် Covid-19 ရောဂါ ဓာတ်ခွဲစစ်ဆေးရာတွင် အမျိုးသားကျန်းမာရေး ဓာတ်ခွဲမှုဆိုင်ရာဌာန (ရန်ကုန်) (NHL) မှ (ဒုတိယအသုတ်) ဓာတ်ခွဲနမူနာ ၅၁၀ ခု၊ ဆေးသုတေသနဦးစီးဌာန (DMR) မှ ဓာတ်ခွဲနမူနာ ၃၇၁ ခု၊ ပြည်သူ့ကျန်းမာရေး ဓာတ်ခွဲမှုဆိုင်ရာဌာန (မန္တလေး) မှ (ဒုတိယအသုတ်) ဓာတ်ခွဲနမူနာ ၄၁ ခု၊ ရန်ကုန်မြို့၊ အမှတ် ၁ တပ်မတော်ဆေးရုံကြီး ခုတင် ၁,ဝ၀၀ မှ ဓာတ်ခွဲနမူနာ ၂၁၅ ခုနှင့် နေပြည်တော်၊ အမှတ် (၂) တပ်မတော်ဆေးရုံကြီး ခုတင် ၁,ဝ၀၀ မှ ဓာတ်ခွဲနမူနာ ၇ ခု စုစုပေါင်း ၁,၁၄၄ ခု အား စစ်ဆေးပြီးစီးခဲ့ရာ Covid-19 ရောဂါ ဓာတ်ခွဲအတည်ပြုလူနာသစ် ၆၃ ဦး တွေ့ရှိရကြောင်း ကြေညာခဲ့သည်။ ယင်းလူနာသစ် ၆၃ဦး အနက် ၃၆ ဦးမှာ ရန်ကုန်တိုင်းဒေသကြီးရှိမြို့နယ် ၁၅ ခုမှ ဖြစ်ပြီး အင်းစိန်မြို့နယ်မှ တစ်ဦးအပါအဝင်လည်းဖြစ်ရာ ၎င်းသည် အင်းစိန်မြို့နယ်၊ ကြို့ကုန်းအရှေ့ရပ်ကွက်၊ ၁ လမ်း (မြောက်) တွင်နေထိုင်သူ ၃၂ နှစ်အရွယ် Taxi ယာဉ်မောင်းအမျိုးသားဖြစ်ကြောင်း ဦးဝေဖြိုးဟန်က ဖေ့စ်ဘွတ်ခ်စာမျက်နှာမှတစ်ဆင့် ပြောကြားခဲ့သည်။ အင်းစိန်မြို့နယ်သည် ယခင်လများက ပိုးတွေ့လူနာအရေအတွက် ၄၅ ဦးရှိခဲ့ပြီး သြဂုတ်လမှစတင်ကာ တစ်ကျော့ပြန် ပိုးတွေ့လူနာများ တွေ့ရှိလာသည့်အထဲတွင် အင်းစိန်မြို့နယ်လည်း ပါဝင်လာရသည့်အတွက် Stay at Home အစီအစဉ်ကို ဒုတိယအကြိမ် ထပ်မံလိုက်နာရန်အတွက် ကြေညာထားပြီးဖြစ်သည်။ မြန်မာနိုင်ငံတွင် စက်တင်ဘာလ ၃ ရက်နေ့ နံနက် ၈ နာရီအချိန်အထိ Covid-19 ရောဂါဓာတ်ခွဲအတည်ပြုလူနာ ၁ယဝ၅၈ ဦးရှိပြီး ယခုနောက်ပိုင်းတွေ့ရှိလာရသည့် ပိုးတွေ့လူနာ ၇၀ ရာခိုင်နှုန်းသည် ရောဂါလက္ခာမပြသူများဖြစ်ကြောင်း ကျန်းမာရေးနှင့် အားကစားဝန်ကြီးဌာနက ကြေညာထားသည်။ S-09

Covid-19 နှင့်ဆက်စပ်ပြီး လက်ရှိတွင် အသွားအလာကန့်သတ်ရာနေရာ ၂,၄၀၀ ကျော်တွင် လူဦးရေ ၂၂,ဝ၀၀ ကျော်အား အသွားအလာကန့်သတ်ထားရှိကြောင်း ဗဟိုကူးစက်ရောဂါ တိုက်ဖျက်ရေးဌာနခွဲမှ ညွှန်ကြားရေးမှူး ဒေါက်တာတိုးသီရိအောင်က ပြောကြားသည်။

ဒဂုံမြို့သစ်မြောက်ပိုင်းမြို့နယ်ရှိ Capital Supermarket ရှိ ဈေးဝယ်စင်တာဝန်ထမ်းတစ်ဦးတွင် Covid-19 ရောဂါပိုး စစ်ဆေးတွေ့ရှိခဲ့သည့်အတွက် ယင်းစင်တာတွင် ဈေးဝယ်ယူခဲ့သူများကိုလိုက်လံစုံစမ်းလျက်ရှိကြောင်း ဒဂုံမြို့သစ်မြောက်ပိုင်းမြို့နယ် မဲဆန္ဒနယ်မှ ရန်ကုန်တိုင်းဒေသကြီးလွှတ်တော်ကိုယ်စားလှယ် ဦးတင်ထွန်းနိုင်က ပြောကြားသည်။

ကိုဗစ်-၁၉ ကူးစက်ရောဂါ ပြန့်ပွားနေသည့် ကာလအတွင်း လူမှုကွန်ရက်စာမျက်နှာပေါ်တွင် သတင်းအမှားများဖြန့်ဝေသည့် လူမှုကွန်ရက် အကောင့်များ၊ စာမျက်နှာများကို ဖယ်ရှားပစ်ခဲ့ကြောင်း ပြည်ထဲရေးဝန်ကြီးဌာ ဒုတိယဝန်ကြီး ဗိုလ်ချုပ်စိုးတင့်နိုင်က စက်တင်ဘာလ ၂ ရက်နေ့ကပြုလုပ်သည့် အွန်လိုင်းဆွေးနွေးပွဲတွင်ပြောကြားသည်။

ရခိုင်ပြည်နယ်မှ လေကြောင်းခရီးဖြင့် ရန်ကုန်တိုင်းဒေသကြီးသို့ ပြန်လည်ရောက်ရှိလာသူများအနက် ထက်ဝက်ကျော်ဖြစ်သည့် လူပေါင်း ၁,၅၀၀ ကျော်မှာ ဖုန်းကိုင်သော်လည်း အချက်အလက်ပြန်မပြောသူများဖြစ်ကြောင်း ကျန်းမာရေးနှင့် အားကစားဝန်ကြီးဌာနက ထုတ်ပြန်သည်။

တရုတ်နိုင်ငံက ကိုဗစ်-၁၉ ကပ်ရောဂါ ကာကွယ်ဆေး စတင်ဖြန့်ဝေသည့်အချိန်တွင် မြန်မာနိုင်ငံသို့ ထောက်ပံ့သွားရေးနှင့် ရခိုင်ပြည်နယ်ရှိ ပြည်သူများ၏ လူမှုစီးပွားဘဝများ ဖွံဖြိုးတိုးတက်ရေးအတွက် ထောက်ပံ့ငွေအဖြစ် မြန်မာအစိုးရသို့ တရုတ်ယွမ်သန်း ၂၀၀ ပေးအပ်မည်ဖြစ်ကြောင်း တရုတ်ပြည်သူ့သမ္မတနိုင်ငံ တရုတ်ကွန်မြူနစ်ပါတီ၊ ဗဟိုကော်မတီ နိုင်ငံရေးဗျူရိုအဖွဲ့ဝင် မစ္စတာ ရန်ကျဲ့ချိက ပြောကြားသည်။

မန္တလေးတိုင်းအတွင်းသို့ ပြည်ပ နိုင်ငံများမှ ပြန်လည်ရောက်ရှိသူများနှင့် ကိုဗစ်-၁၉ ရောဂါပိုး ကူးစက်ပြန့်ပွားမှုများသည့် မြို့နယ်များမှ ပြန်လည်ရောက်ရှိသူများအားလုံး Quarantine ဝင်ရမည်ဟု မန္တလေးတိုင်းအစိုးရအဖွဲ့က စက်တင်ဘာလ ၁ ရက်နေ့တွင် ထုတ်ပြန်လိုက်သည်။

အသက်ရှူလမ်းကြောင်းဆိုင်ရာ ရောဂါကူးစက်ပြန့်ပွားမှု မရှိစေရေးအတွက် လူစုလူဝေးဖြင့် ပြုလုပ်ဖွင့်လှစ်ရသည့် ကိစ္စများကို စက်တင်ဘာလ ၃၀ ရက်နေ့အထိ သက်တမ်းတိုးမြှင့်ကြောင်း နေပြည်တော်ကောင်စီက ထုတ်ပြန်ကြေညာသည်။

မကွေးတိုင်းအတွင်း စတုတ္ထမြောက်ပိုးတွေ့လူနာအမျိုးသားမှာ ပထမအကြိမ်ဆေးစစ်စဉ်က Negative (ပိုးမတွေ့)အဖြေထွက်ခဲ့သော်လည်း ဒုတိယအကြိမ် ဆေးစစ်ရာတွင် Positive (ပိုးတွေ့) အဖြေထွက်ခဲ့သည်ဟု မကွေးတိုင်း ပြည်သူ့ ကျန်းမာရေးဦးစီးဌာနနှင့် မြို့နယ်အထွေ ထွေအုပ်ချုပ်ရေးဦးစီးဌာနတို့မှ တာဝန်ရှိသူများက ပြောဆိုသည်။

ဘိုကလေးမြို့နယ် ခွန်နှစ်ဆင်ကူမြစ်ကြောင်း ကြပ်ပြေးအဝတွင် ဖမ်းမိခဲ့သည့် ဘင်္ဂါလီ ၄၂ ဦးအနက်တစ်ဦးတွင် ကိုဗစ်-၁၉ ပိုးတွေ့ရှိကြောင်း ဧရာဝတီတိုင်း ကျန်းမာရေးဦးစီးဌာနထံမှ သိရသည်။

ရခိုင်ပြည်နယ်မှ ရန်ကုန်မြို့သို့ လေကြောင်းခရီးစဉ်ဖြင့် ခရီးသွားလာခဲ့သူများစာရင်းကို ထုတ်ပြန်ကြေညာလိုက်ပြီး သတင်းပို့ရန် ပျက်ကွက်သူများကို သဘာဝဘေးအန္တရာယ် စီမံခန့်ခွဲမှုဥပဒေနှင့် အရေးယူမည်ဖြစ်ကြောင်း ကျန်းမာရေးနှင့်အားကစားဝန်ကြီးဌာနက သတိပေးနှိုးဆော်ထားသည်။

စစ်တွေမြို့မှ တောင်ငူမြို့နယ်အတွင်းသို့လာရောက်လည်ပတ်သည့် ပိုးတွေ့လူနာအမှတ် 606 နှင့် ထိတွေ့ခဲ့သူ ၃၄ ဦးတွင် ကိုဗစ်-၁၉ ပိုးမတွေ့ အဖြေထွက်ခဲ့ကြောင်း တောင်ငူမြို့နယ် ပြည်သူ့ကျန်းမာရေး ဦးစီးဌာနမှ သိရသည်။

ရခိုင်ပြည်နယ် စစ်တွေမြို့တွင် COVID-19 လူနာများ ပိုမိုတွေ့ရှိလာရသည့်အတွက် စစ်တွေတက္ကသိုလ်ကို ယာယီဆေးရုံ ထပ်မံပြုလုပ်ရန်စီစဉ်နေပြီး လိုအပ်ပါက ရခိုင်ပြည်နယ် လွှတ်တော်အဆောက်အအုံကိုလည်း ယာယီဆေးရုံအဖြစ် အသုံးပြုနိုင်ရန် လျာထားကြောင်း ကျန်းမာရေးနှင့် အားကစားဝန်ကြီးဌာနထံမှ သိရသည်။