News

POST TYPE

ARTICLE

အမေရိကန်-အီရန် စစ်မီးနောက်ကွယ်က ဖြစ်ရပ်များ
08-Jan-2020

သန့်ဇင်စိုး စုစည်းဖော်ပြသည်

နာကြည်းခံစားမှုများစွာနဲ့ အီရန်အရေး

အီရန်နိုင်ငံမှာ သြဇာအကြီးမားဆုံးထဲကတစ်ဦးဖြစ်ပြီး လူထုထောက်ခံမှုမြင့်မားတဲ့ စစ်ခေါင်းဆောင် ဗိုလ်ချုပ်ကြီးဆိုလီမာနီကို အမေရိကန်သမ္မတရဲ့ အမိန့်နဲ့ အီရတ်နိုင်ငံဘဂ္ဂဒက်လေဆိပ်မှာ မောင်းသူမဲ့လေယာဉ်သုံးပြီး လုပ်ကြံသုတ်သင်လိုက်ရာက အရှေ့အလယ်ပိုင်းပါရှားဒေသမှာ စစ်မီးထတောက်မယ့် အနေအထားတွေကြုံနေရတာဖြစ်ပါတယ်။ 

ဗိုလ်ချုပ်ကြီးဆိုလီမာနီဟာ အမေရိကန်သံတမန်တွေ၊ အမေရိကန် တပ်မတော်သားတွေ အီရတ်နဲ့ကမ္ဘာတစ်ဝန်းမှာ လုပ်ကြံသတ်ဖြတ်ဖို့အတွက် နောက်ကွယ်ကနေ စီမံအခါတော်ပေးနေတယ်လို့ ထရမ့်က အကြောင်းပြချက်ပေးခဲ့ပါတယ်။ အီရတ်မှာရှိနေတဲ့ ကာတစ်ဟစ်ဇ်ဘိုလာအပါအဝင် အီရန်က ထောက်ခံတဲ့ ရှီးယိုက်ပြည်သူ့စစ်တွေဟာ အမေရိကန်စစ်စခန်းတွေနဲ့ အခြားအမေရိကန်ပိုင်တွေကို ပစ်မှတ်ထားတိုက်ခိုက်နေပြီးတော့ နောက်ကွယ်မှာ အီရန်ဗိုလ်ချုပ်ကြီး ဆိုလီမာနီရှိတယ်လို့ အမေရိကန်အစိုးရက ပြောနေပါတယ်။ အီရန်ဘက်မှာရော ဘာတွေဖြစ်နေလဲ။ 

အမေရိကန်ဆန့်ကျင်ရေးစိတ်ဓာတ်တွေနဲ့ တစ်သားတည်းဖြစ်နေတဲ့ အီရန်ခုဆိုရင် အီရန်နိုင်ငံတစ်ဝန်းမှာ “အမေရိက သေပါစေ။ Death to America” ဆိုပြီး နေရာအနှံ့ ကြွေးကြော်နေကြပါတယ်။ အီရတ်ကသံရုံး ရှေ့မှာ အီရန်လိုလားသူတွေ ဆန္ဒပြကြတော့လည်း အမေရိကန်သေပါစေ အော်ပါတယ်။ ဗိုလ်ချုပ်ကြီးရဲ့ နာရေးအခမ်းအနားမှာလည်း အမေရိက သေပါစေလို့ အော်ပါတယ်။ နောက်ဆုံး အီရန်လွှတ်တော်ပါလီမန်ရဲ့ အမတ်တွေလည်း လွှတ်တော်ထဲမှာ မိနစ်အနည်းငယ်ကြာအောင် အမေရိက သေပါစေလို့ အော်နေကြတာဖြစ်ပါတယ်။ 

“အီရန်လွှတ်တော်ဥက္ကဋ္ဌ အလီလာရီဂျာနီက ထရမ့်ရေဒါဟာ အီရန်တစ်မျိုးသားလုံးရဲ့ အသံပဲ”လို့ ပြောလိုက်ပါတယ်။ အမေရိကန် ခရီးသွားဧည့်သည်တွေ လေယာဉ်လက်မှတ်ဈေးသက်သာလာတယ်ဆိုပြီး ယောင်ယမ်းလို့ အီရန်သွားမိလို့ မဖြစ်ပါဘူး။ လေထုထဲမှာ အမေရိကန် အမုန်းတရားက မြင့်တက်နေပါပြီ။ ဗိုလ်ချုပ်ကြီး ဆိုလီမာနီရဲ့ မွေးရပ်ဇာတိ အီရန်အရှေ့တောင်ပိုင်း ကာမန်ကို ရုပ်အလောင်းက ပြန်ရောက်လာပါပြီ။ သိန်းပေါင်းများစွာသော အီရန်ပြည်သူများဟာ အဆိုပါ မြို့ကိုရောက်လာကြပြီးတော့ သူတို့ရဲ့ အာဇာနည်ခေါင်းဆောင်ကြီးဖြစ်တဲ့ ဗိုလ်ချုပ်ကို လာရောက်ဂါရဝပြု နှုတ်ဆက်နေကြပါတယ်။ အီရန်အစိုးရကတော့ နျူကလီးယားသဘောတူညီချက် အီရတ်မှာ သြဇာညောင်းလာတဲ့ အီရန်ပြည်သူ့စစ်များအရေး၊ ISIS ဆွန်နီအစွန်းရောက်စစ်သွေးြွကတွေ အီရတ်မှာ သောင်းကျန်းစဉ်က အီရတ်ဟာ အဓိကအင်အားစုကြီးနှစ်ခုကို အားကိုးခဲ့ရပါတယ်။ ဒါကတော့ အမေရိကန်ဦးဆောင်တဲ့ နိုင်ငံစုံမဟာ မိတ်တွေဖြစ်ပြီး တစ်ဖက်က အိမ်နီးချင်း အီရန်ဖြစ်ပါတယ်။ အီရန်ဟာ ဆွန်နီဂျီဟတ် ISIS တွေကို တိုက်ခိုက်တဲ့ အီရတ်ရှီးယိုက် ပြည်သူ့စစ်တွေကို ထောက်ပံ့ကူညီခဲ့ပါတယ်။ IS ချေမှုန်းရေးမှာ  ရှီးယိုက်ပြည်သူ့စစ် ကာတစ်ဟစ်ဇ်ဘိုလာတွေရဲ့ အခန်းကဏ္ဍကလည်း အင်မတန်အရေးပါခဲ့ပါတယ်။ IS လည်းပြေးရော ဟစ်ဇ်ဘိုလာများဟာ အီရတ်မှာ သြဇာညောင်းလာခဲ့ပါတယ်။ အီရန်နဲ့ အမေရိကန်တို့ စစ်ရေးအရတင်းမာရင်း တင်းမာရင်းနဲ့ ခုလို ပါရှန်းစစ်ပွဲကြီး ချောက်နှုတ်ခမ်းကို ရောက်လာတာဖြစ်ပါတယ်။ ပြီးတော့ အီရတ်မှာ ခြေကုပ်ကောင်းကောင်းရနေပြီး အင်အားလည်းကြီးထွားနေတဲ့ အီရန်က မွေးပေးထားတဲ့ (ဆိုလီမာနီကြီးကပျိုးထောင်ထားတယ်လို့ ပြောလို့ရတဲ့) ရှီးယိုက်ပြည်သူ့စစ်တွေဟာ အမေရိကန်စစ်စခန်းတွေကို လိုက်ဆော်နေခဲ့ပါတယ်။ အဲဒီရှီးယိုက်ပြည်သူ့စစ် ကာတစ်ဟစ်ဇ်ဘိုလာက အီရတ်မှာရှိတဲ့ အမေရိကန်စစ်စခန်းတစ်ခုကို တိုက်ခိုက်လိုက်ရင်းနဲ့ အမေရိကန်စစ်ဘက်ဆိုင်ရာ ကန်ထရိုက်တာတစ်ဦး သေဆုံးသွားခဲ့ပါတယ်။ အမေရိကန်ဟာ အဆိုပါ တိုက်ခိုက်ခံရမှုအတွက် ရှီးယိုက်ပြည်သူ့စစ် ကာတစ်ဟစ်ဇ်ဘိုလာကို ပြန်ပြီးဗုံးကြဲခဲ့ပါတယ်။ အဲဒီမှာလည်း ပြည်သူ့စစ်တွေ တော်တော်များများ ပြန်သေသွားပါတယ်။ အီရတ်မှာရှိတဲ့ အဆိုပါ ပြည်သူ့စစ်ကို ထောက်ခံသူတွေဟာ ဒီလုပ်ရပ်ကြောင့် ဒေါသထွက်သွားခဲ့ပါတယ်။ သူတို့ဟာ အီရတ်မြို့တော် ဘဂ္ဂဒက်မှာရှိတဲ့ အမေရိကန် သံရုံးကို ဝိုင်းဆန္ဒပြ၊ မီးရှို့လုပ်ကြပါတယ်။

အီရတ်အစိုးရဟာ ဒီဖြစ်ရပ်ကြောင့် ကြားက တော်တော်စိတ်ညစ်ရပုံပေါ်ပါတယ်။ အီရတ်ကို ခင်ဗျားတို့ ၂ နိုင်ငံ ဖြစ်တဲ့စစ်မှာ မြေစာပင်ဖြစ်အောင်လုပ်တာလား၊ အီရတ်က သဘောမတူဘဲ သူ့မြေပေါ်က ပြည်သူ့စစ်ကို ဗုံးလာကြဲတာ မခန့်တာဘဲဆိုပြီး ပြန်တုံ့ပြန်ခဲ့ပါတယ်။ အမေရိကန်သံရုံးကို လူအုပ်နဲ့ ဝိုင်းပြီးမီးရှို့၊ ခဲနဲ့ထုစတာတွေ လုပ်ခံရတော့ ထရမ့်အစိုးရအနေနဲ့ တစ်ခုခုပြန်လုပ်မယ်လို့ဆိုပါတယ်။ လုပ်မယ့်လုပ်တော့လည်း အီရန်က လူအချစ်ဆုံး စစ်ခေါင်းဆောင်ကြီး အီရတ်လာတုန်း လေဆိပ်မှာလုပ်ကြံလိုက်တာပါပဲ။ မောင်းသူမဲ့လေယာဉ်လွှတ်လိုက်ပြီး ဒုံးကျည်နဲ့ ပစ်သတ်လိုက်တာဖြစ်ပါတယ်။ အီရန်ဗိုလ်ချုပ်ကြီးအပြင် အီရတ်က ရှီးယိုက်ပြည်သူ့စစ် ကာတစ်ဟစ်ဇ်ဘိုလာရဲ့ ခေါင်းဆောင်လည်း တစ်ခါတည်းသေဆုံးသွားခဲ့ပါတယ်။ 

အမေရိကန်အစိုးရရဲ့ ပြည်တွင်းပြည်ပ ဖိအားများ

အမေရိကန်ဘက်မှာတော့ ဘာတွေ ဖြစ်နေမှန်းမသိဘူးလို့တောင် ပြောရလောက်အောင် အခြေအနေတွေက မြားမြောင်လှပါတယ်။ အီရန်က အမေရိကန်နိုင်ငံသားတွေ၊ အမေရိကန်မဟာမိတ်တွေ၊ အမေရိကန် ပိုင်ဆိုင်မှုတွေကို အီရန်ကလက်စားချေတိုက်ခိုက်လာမယ်ဆိုရင် အမေရိကန်ဘက်ကလည်း အီရန်ရဲ့အရေးပါတဲ့ ယဉ်ကျေးမှုဆိုင်ရာ နေရာများ ၅၂ နေရာကို ချက်ချင်း ပြင်းပြင်းထန်ထန် တိုက်ခိုက်ဖို့ အဆင်သင့်ပဲလို့ အမေရိကန်သမ္မတက twitter ပေါ်ကနေ ပြောကြားလိုက်ပါတယ်။ တကယ်တော့ စစ်ပွဲတစ်ခုမှာ ယဉ်ကျေးမှုဆိုင်ရာနေရာတွေကို တိုက်ခိုက်တာ၊ ပစ်မှတ်ထားတာဟာ စစ်ရာဇဝတ်မှုကျူးလွန်တာပါ။ အမေရိကန်သာ အီရန်ရဲ့ ယဉ်ကျေးမှုအမွေတွေကို ဒုံးကျည်နဲ့ထုမယ်ဆိုရင် သူဟာ ပထမဆုံးလုပ်တဲ့သူတွေ မဟုတ်သေးပါဘူး။ သူ့ရှေ့မှာလုပ်ပြသွားသူတွေ ရှိပါတယ်။ ဒါကတော့ အာဖဂန်မှာ ဗုဒ္ဓရုပ်ပွားတော်ကြီးကို ဖျက်ဆီးတဲ့ တာလီဘန်များနဲ့ ဆီးရီးယားမှာ ရှေးဟောင်းဘေဘီလုံလက်ရာတွေကို ရိုက်ချိုးဖျက်ဆီးကြတဲ့ ISIS တွေ ဖြစ်ပါတယ်။ ခြိမ်းခြောက်ခဲ့ပေမယ့် ဒါမျိုးမလုပ်ပါဘူးလို့ အမေရိကန်ဟာ လက်မှတ်ထိုးထားတဲ့ နိုင်ငံဖြစ်ပါတယ်။ UNESCO အပါအဝင် အဖွဲ့အစည်းများ၊ နိုင်ငံ့ခေါင်းဆောင်များက အမေရိကန်ရဲ့ အဆိုပါပြောဆိုချက်ကို ဝိုင်းဝန်းပြီး ဝေဖန်ကန့်ကွက်ကြပါတယ်။ အမေရိကန်တပ်မတော်ကတောင် စစ်ဖြစ်လာရင် စစ်ရာဇဝတ်မှုကို သူတို့ ကျူးလွန်မှာ မဟုတ်ပါဘူးလို့ ပြောလာရပါတယ်။ ဒီတော့ ထရမ့် အစိုးရက လေသံပြောင်းသွားပြန်ပါတယ်။ ဒီလိုဆိုလိုတာမဟုတ်ပါဘူး၊ အမေရိကန်က နိုင်ငံတကာဥပဒေအတိုင်းလုပ်မှာပါလို့ နိုင်ငံခြားရေးဝန်ကြီး မိုက်ပွန်ပီယိုကိုယ်တိုင် ထွက်ရှင်းပါတယ်။ ထရမ့်က စွတ်ပြောစွတ်လုပ်တာကြောင့် မဖြစ်သေးဘူးရှင်းနေရတဲ့ သဘောပါပဲ။ ထရမ့်အစိုးရရဲ့ ယခုလိုတိုက်ခိုက်မှုဟာ ပြည်ပမှာရှိတဲ့ အမေရိကန်သံတမန်များ၊ နိုင်ငံသားများ၊ မဟာမိတ်များရဲ့ လုံခြုံရေးကို မစဉ်းစားဘဲ လုပ်ရာကျနေတယ်လို့ အီရန်စစ်ဗိုလ်ချုပ်ကြီးကို လုပ်ကြံလိုက်တဲ့ လုပ်ရပ်နဲ့ပတ်သက်ပြီး နိုင်ငံတကာကလည်း အမေရိကန်ကိုဝိုင်းဝန်း ပြစ်တင်နေကြပါတယ်။ 

ပြင်သစ်သမ္မတဟာ အီရတ်ဝန်ကြီးချုပ်ကို တယ်လီဖုန်းခေါ်ဆိုခဲ့ပြီး အီရတ်ရဲ့အချုပ်အခြာအာဏာဘက်ကထောက်ခံပါကြောင်းပြောကြားခဲ့သည်။ မဟာမိတ်များရဲ့ အလားတူမလိုလားကြောင်း ကန့်ကွက်မှုကို ကြုံရသလို၊ အီရတ်မှာလည်း အမေရိကန်များကို နှင်ထုတ်ဖို့ လွှတ်တော် ထဲမှာတောင် မဲခွဲခဲ့ကြပါတယ်။ အမေရိကန်တပ်ဖွဲ့ဝင်များကိုတိုင်းပြည် အတွင်းလက်မခံဘဲ နှင်ထုတ်ရန်အဆိုဟာ မဲခွဲပြီးတော့ အနိုင်ရရှိသွားခဲ့ပါတယ်။ ထရမ့်အစိုးရက ဘာပြန်လုပ်တယ်ထင်ပါသလဲ။ အီရတ်ဟာ အမေရိကန်တပ်တွေကို ပြန်ပြီးနှင်ထုတ်မယ်ဆိုရင် စီးပွားရေးပိတ်ဆို့ အရေးယူမယ်လို့ ပြောပါတယ်။ 

“အီရတ်မှာ အရမ်းကိုဈေးကြီးတဲ့ လေတပ်စခန်းတွေ ဆောက်ထားရပါတယ်။ ဒါတွေကိုတည်ဆောက်ဖို့အတွက် ဘီလီယံဒေါ်လာများစွာ ကုန်ကျပါတယ်။ ဒီအတွက် ပြန်မပေးမချင်း ကျွန်တော်တို့ ပြန်မထွက်ပါဘူး” လို့ ထရမ့်က ပြောတာပါ။ ဆိုလိုတာက ဒါတွေဆောက်ရတာဈေးကြီးတယ်၊ တန်အောင်နေဦးမယ်ဆိုပြီး အကြောင်းပြချက်ပေးတာပါ။ 

ဒီကြားထဲ အမေရိကန်တပ်တွေ အီရတ်ကပြန်ထွက်တော့မယ်ဆိုတဲ့ စာတစ်စောင်က စစ်တပ်လောကကနေ ထွက်လာပါသေးတယ်။ အီရတ်မှာရှိတဲ့ အမေရိကန်တပ်မှူးကြီးဗိုလ်ချုပ် မာ့ခ်မီလီရေးသားထားတဲ့ စာထဲမှာ အီရတ်က အမေရိကန်တပ်တွေ ဆုတ်ခွာမယ်ဆိုတာပါခဲ့ပါတယ်။ စာထဲမှာ အီရတ်အစိုးရနဲ့ ပါလီမန်ရဲ့ လိုလားချက်အရ အမေရိကန်တပ်တွေ ဆုတ်ခွာတော့မှာဖြစ်ပြီး၊ အန္တရာယ်ကင်းထိရောက်စွာဆုတ်ခွာ နိုင်စေရေးအတွက် ပြင်ဆင်ကြဖို့ ရေးသားထားတာဖြစ်ပါတယ်။ ဒီသတင်းက မဟုတ်ပါကြောင်း၊ အဆိုပါအရေးကိစ္စနဲ့ပတ်သက်ပြီး အီရတ်သက်ဆိုင်ရာများနဲ့ ချိတ်ဆက်ညှိနှိုင်းနေပါကြောင်း အမေရိကန် ကာကွယ်ရေးဝန်ကြီးမာ့ခ်အက်စ်ပါက ထွက်ရှင်းရပြန်ပါတယ်။ အီရတ်မှာ အမေရိကန် တပ်အင်အား ၅၀၀၀ ကျော် ရှိပါတယ်။ 

အမေရိကန်အနေနဲ့ နောက်ထပ်ပြောစရာဖြစ်တဲ့ လုပ်ရပ်တစ်ခုကို လုပ်ခဲ့ပါသေးတယ်။ အီရန်နိုင်ငံခြားရေးဝန်ကြီးက အမေရိကန်ရဲ့ တိုက်ခိုက်မှုအကြောင်းကို ကုလသမဂ္ဂလုံခြုံရေးကောင်စီကို လာရောက်ရှင်းလင်းမယ့် ခရီးစဉ်ကိုလည်း အမေရိကန်က ပြည်ဝင်ခွင့် ဗီဇာထုတ်မပေးခဲ့ပါဘူး။ ကုလသမဂ္ဂရုံးချုပ်ဟာ အမေရိကန် နယူးယောက်မှာ ရှိတာဖြစ်ပါတယ်။ ကုလသမဂ္ဂရုံးချုပ် သဘောတူညီချက်အရ အမေရိကန် အနေနဲ့ သူနဲ့ တည့်တည့် မတည့်တည့် ဗီဇာထုတ်ပေးရမယ့် တာဝန်ရှိပါ တယ်။ အီရန်နိုင်ငံခြားရေးဝန်ကြီး ဂျာဗတ်ဇာရစ်ဖ် ကုလသမဂ္ဂလုံခြုံရေး ကောင်စီကို လာမယ့်ခရီးစဉ်ကို ဗီဇာထုတ်ပေးဖို့ အမေရိကန်မှာ တာဝန်ရှိတယ်လို့ ကုလသမဂ္ဂကလူကြီးတွေ ဝင်ပြောရတဲ့အထိ ဖြစ်ခဲ့ပါတယ်။ 

စစ်ပွဲကို ကျော်လွှားမယ့် မျှော်လင့်ချက်

ခုလိုမျိုး အကြောင်းအရာများစွာက စစ်ပွဲတစ်ခုဖြစ်ဖို့ အဘက်ဘက်က တွန်းအားဖြစ်လို့နေပါတယ်။ အီရန်ဘက်မှာ အမေရိကန်ဆန့်ကျင်ရေး စိတ်ဓာတ်က အမြင့်ဆုံးကိုတက်နေပြီး နာကြည်းဒေါသထွက်နေကြပါပြီ။ အမေရိကန်ဟာ ငွေကြေးနဲ့ အမေရိကန်အသက် အကုန်အကျများစွာ ခံပြီးတော့ တည်ထားရတဲ့ အီရတ်ကစစ်ရေးတည်ရှိမှုတွေကို လွယ်လွယ်နဲ့ ဆုတ်ပေးမှာ မဟုတ်ပါဘူး။ ဘာတွေဆက်ဖြစ်မယ်ဆိုတာက ဘယ်ဘက်က ဘာတွေလုပ်ပြီး၊ တုံ့ပြန်လာမယ်ဆိုတဲ့အပေါ် မူတည်ပါတယ်။ အီရန် - အမေရိကန်စစ်ပွဲ ဖြစ်မယ်ဆိုရင် အနီးအနားနိုင်ငံတွေ အထိနာမှာအသေအချာပါပဲ။ အထူးသဖြင့် အီရတ်ဖြစ်ပါတယ်။ ဆီးရီးယား၊ ယီမင်စတဲ့ အီရန်နဲ့ ပတ်သက်နေတဲ့နိုင်ငံတွေကိုလည်း သက်ရောက်မှုရှိမှာ မလွဲပါဘဲ။ အမေရိကန်ဆိုတာကလည်း တစ်ကမ္ဘာလုံးက မလိုလားတဲ့ ဒီစစ်ပွဲကို နိုင်ငံရေးအရ ငွေရေးကြေးရေးအရ အရှုံးခံပြီးဝင်တိုက်ပါ့မလား။ ပြောလို့တော့မရဘူး။ ထရမ့်အစိုးရလေ။ မနက်ဖြန်ဘာဖြစ်မယ်ဆိုတာ ဘယ်သူက သိနိုင်မလဲ။ 

အီရန်ဗိုလ်ချုပ်ကြီးကာဆင်ဆိုလီမာနီဆိုတာ ဘယ်သူလဲ



အီရန်မှာ ဆင်းရဲတဲ့ မိသားစုက မွေးဖွားကြီးပြင်းလာပြီး၊ ကျောင်းလည်း ကောင်းကောင်းမတက်ခဲ့ရတဲ့ ဗိုလ်ချုပ်ကြီးဆိုလီမာနီဟာ အီရန်ခေါင်းဆောင်ကြီးပြီးရင် ဒုတိယပါဝါအကြီးဆုံးခေါင်းဆောင် ဖြစ်ပါတယ်။ အရှေ့အလယ်ပိုင်း အီရန်စစ်ရေးလှုပ်ရှားမှုများရဲ့ နောက်ကွယ်က ဦးဆောင် နေသူဖြစ်ပြီး စစ်ရေး၊ ငြိမ်းချမ်းရေး စတဲ့ကိစ္စတွေကို ရောက်လာရင် သူကမှ တကယ့်နိုင်ငံခြားရေးဝန်ကြီးသဖွယ် ဖြစ်နေသူပါ။ ဆီးရီးယား အစိုးရရဲ့ သူပုန်များကိုနှိမ်နင်းတဲ့စစ်၊ အီရတ်မှာ အီရန်ကိုလိုလားတဲ့ ရှီးယိုက်ပြည်သူ့စစ်တွေ အင်အားကောင်း ဖြန့်ကြက်လာမှု၊ ISIS ကို ချေမှုန်းတဲ့စစ်ပွဲ စတဲ့နာမည်ကျော်စစ်ရေးကိစ္စတွေများစွာရဲ့ ဗိသုကာကြီး ဖြစ်ပါတယ်။ အရှေ့အလယ်ပိုင်းတစ်ခွင် အီရန်ကိုထောက်ခံတဲ့ ပြည်သူ့စစ်များကိုမွေးမြူခြင်း၊ မဟာမိတ်များကို လက်နက်ထောက်ပံ့ခြင်း စတာတွေရဲ့ နောက်မှာ သူရှိပါတယ်။ အီရန်မှာ လူချစ်လူခင်လည်းများသလို သူဘာလုပ်မယ်ဆိုတာကို မှန်းရခက်လှတဲ့ ဆံဖြူဖြူနဲ့ စစ်သားကြီးလည်း ဖြစ်ပါတယ်။ သူ့အကြောင်း မှတ်တမ်းရုပ်ရှင်တွေသာမက၊ Pop သီချင်းတွေပါ ထွက်ခဲ့ဖူးပါတယ်။ သူဟာ အရှေ့အလယ်ပိုင်းမှာ အင်အားအကြီးဆုံး တစ်ယောက်တည်းသော ဆရာကြီးဂိုဏ်းချုပ်ဖြစ်ပါတယ်လို့ CIA အရာရှိ တစ်ဦးက ပြောခဲ့ဖူးပါတယ်။ အမေရိကန်အစိုးရကတော့ သူဦးဆောင်နေတဲ့ အီရန်ရဲ့ တော်လှန်ရေးတပ်ဖွဲ့နဲ့ ကွတ်စ်တပ်ဖွဲ့တွေကို အကြမ်းဖက်အဖွဲ့အစည်းတွေအဖြစ် ကြေညာထားပါတယ်။

သန့်စင်စိုး