News

POST TYPE

HEALTH

နားလည်ရန်ခက်သည့် ဘာသာစကားဖြင့် ဖော်ပြထားသည့် အလှကုန်များကို မသုံးစွဲရန် FDA အကြံပြု
06-Sep-2016
ရန်ကုန်၊ စက်တင်ဘာ  ၆

ဈေးကွက်အတွင်း နားလည်ရန် ခက်ခဲသည့် ဘာသာစကားဖြင့် ဖော်ပြထားသော အလှကုန်ပစ္စည်းများကို မသုံးစွဲရန် အစားအသောက်နှင့် ဆေးဝါးကွပ်ကဲရေး ဦးစီးဌာန (FDA) ၏ ဒုတိယ ညွှန်ကြားရေးမှူးချုပ် ဒေါက်တာသဇင်ရီလှိုင်က အကြံပြု ပြောကြားသည်။

“ထုတ်လုပ်တဲ့နိုင်ငံ ဘယ်နိုင်ငံ၊ ဘယ်ကုမ္ပဏီဆိုတာ သိရတယ်။ Label တွေမှာ ထိုင်းဘာသာ စကားတွေ၊ တရုတ်ဘာသာ စကားတွေပဲ ပါတယ်။ ဘယ်လို သုံးရမလဲ ဆိုတာတွေ မပါဘူး။ ဒါမျိုးတစ်ခုမှ မပါတဲ့ပစ္စည်းတွေကို ကျွန်မတို့ ပြည်သူတွေ ဘယ်လိုများ သုံးစွဲနေကြသလဲ ဆိုတာ အံ့သြပါတယ်”ဟု ၎င်းက ပြောဆိုသည်။

အလှကုန်ပစ္စည်းများ အပေါ်တွင် ပါဝင်မှု အတိုင်းအတာ ပမာဏ၊ အလှကုန် ပစ္စည်း အမှတ်တံဆိပ်၊ အမည်နှင့် ယင်း၏ စွမ်းဆောင်နိုင်မှု၊ ကုန်ပစ္စည်း ထုတ်လုပ်မှု အမှတ်စဉ်နံပါတ်၊ ရှင်းလင်းစွာ ဖော်ပြထားသော ထုတ်လုပ်သည့် ရက်စွဲ၊ သက်တမ်း ကုန်မည့် ရက်စွဲများ၊ ထုတ်လုပ်သည့် နိုင်ငံ၊ အသုံးပြုပုံ အညွှန်း၊ ပါဝင်ပစ္စည်း စာရင်း အပြည့်အစုံ၊ အထူး သတိပေးချက်များနှင့် အလှကုန်ကို ဈေးကွက်တင် ရောင်းချသည့် ကုမ္ပဏီ (သို့) ပုဂ္ဂိုလ်၏ အမည်နှင့် လိပ်စာ စသည်တို့ကို ဖတ်ရှု အသုံးပြုသင့်ကြောင်း အစားအသောက်နှင့် ဆေးဝါး ကွပ်ကဲရေး ဦးစီးဌာနက တိုက်တွန်းသည်။

အလှကုန် ပစ္စည်းများသည် ယေဘုယျအားဖြင့် အခြားသော ကျန်းမာရေးဆိုင်ရာ ပစ္စည်း(ဆေးဝါးများ၊ တိုင်းရင်းဆေး)များနှင့် နှိုင်းယှဉ်လျှင် ဘေးဥပဒ် အန္တရာယ် ပေးနိုင်ခြေ နည်းပါးသော်လည်း ၎င်းတို့၏ ဘေးအန္တရာယ် ကင်းကြောင်း စိတ်ချရမှုနှင့် အရည်အသွေးများအတွက် လုံးဝ အာမခံချက် မရှိသည့်အတွက် အလှကုန် ပစ္စည်းသုံးစွဲသူများ အနေနှင့် အလှကုန် ပစ္စည်းများကို ဘေးဥပဒ် အန္တရာယ်ကင်းစွာ အသုံးပြုနိုင်ရန် အရေးကြီးကြောင်း အစားအသောက်နှင့် ဆေးဝါး ကွပ်ကဲရေး ဦးစီးဌာန၊ အာဆီယံ အသိပညာပေး လက်စွဲ စာအုပ်ပါ အချက်အလက်များအရ သိရသည်။ 


  • VIA