News

POST TYPE

HEALTH

Swine flu ဆွိုင်းဖလူး ခေါ် တုပ်ကွေးတစ်မျိုး
25-Jul-2017


ဆရာ ရန်ကုန်မှာ H1N1 တွေ့လို့တဲ့ခင်ဗျ။ ဆောင်ရန်ရှောင်ရန်နှင့် ဘယ်လိုကြောင့်ဖြစ်တယ် ဆိုတာလေး သိချင်ပါတယ်ဆရာ။ အမှားပါရင် ခွင့်လွတ်ပါဆရာ။ ကျေးဇူးတင်ပါတယ်ဆရာ။

ရန်ကုန်မှာဖြစ်နေတဲ့သတင်း သိပ်မသိပါ။ ရောဂါအကြောင်းသာ ရေးပါရစေ။ ဒီစာတင်နေတုန်း တစ်ခုလာပါတယ်။ ဆရာရှင့် ယခု ရန်ကုန်ပြည်သူ့ဆေးရုံကြီးမှာ သံသယဖြစ်ဖွယ် တွေ့ရှိနေတဲ့ H1N1 ဆိုတဲ့ရောဂါအကြောင်း သိချင်လို့ပါဆရာ။ ရောဂါလက္ခဏာက ဘယ်လိုပြသလဲဆရာ။ ဘယ်လိုကြိုတင်ကာကွယ်နိုင်ပါလဲရှင့်။ ကျေးဇူးတင်ပါတယ်ဆရာ။

H1N1 Flu ကို Swine Flu လို့လည်းခေါ်တယ်။ တုပ်ကွေးတစ်မျိုးဖြစ်တယ်။ ဝက်တွေမှာ စဖြစ်တယ်။ လူကို ကူးနိုင်တယ်။ ၂ဝဝ၉ ခုနှစ်တုန်းက ကမ္ဘာမှာ ကပ်ရောဂါလို ပြန့်ခဲ့တယ်။ ကြောက်စရာတော့ မဟုတ်တော့ပါ။ ဥတုအပြောင်းမှာ ဖြစ်တတ်တဲ့ တုပ်ကွေးနဲ့တူတယ်။ ကာကွယ်ဆေး ပေါ်နေပြီ။ တစ်နှစ်တစ်ခါ ထိုးရတယ်။

ကူးစက်ခံရရင် နှာချေမယ်။ ချောင်းဆိုးမယ်။ အဲတာထဲမှာ ဗိုင်းရပ်စ်တွေ ပါနေမယ်။ သူများကို ကူးစက်မယ်။ ကိုယ်လည်း အဲလိုကနေ ကူးလာတာ။ တစ်ရက်နေရင် ရောဂါစခံစားရတယ်။ ၇ ရက်ကနေ ၁ဝ ရက်အထိ ကြာတတ်တယ်။ ကိုယ်ပူမယ်။ လည်ချောင်းနာမယ်။ ခေါင်းကိုက်၊ ကိုယ်လက်တွေနာ၊ ချမ်း၊ အားကုန်နေမယ်။ တချို့မှာ အသက်ရှူခက်မယ်။ အန်မယ်။ ဗိုက်နာမယ်။ ခေါင်းမူးမယ်။ စိတ်မကြည်မလင်ဖြစ်မယ်။ ကံမကောင်းရင် နူမိုးနီးယား ဆက်ဖြစ်တတ်တယ်။ ဆောရီး။ ဆီးချို၊ ပန်းနာအခံရှိသူတွေ ကူးစက်ခံရရင် အခံရောဂါပိုဆိုးတတ်တယ်။ ဝက်သားစားလို့ မကူးပါ။

Swine flu vaccine တုပ်ကွေးကာကွယ်ဆေး အရွေးခက်နေခြင်းစာကို ၂ဝ၁ယ တုန်းက ရေးထားခဲ့ပါတယ်။ ကျနော်တို့မြို့မှာ လာထိုးပေးမယ့် လူတုပ်ကွေး ကာကွယ်ဆေးက ထိုင်ဝမ်နိုင်ငံက လုပ်တာတဲ့။ ဆေးရဲ့ဆိုဒ်အဖက်က ပြင်းထန်တယ်လို့ ကြားတယ်။ ဘယ်လိုလုပ်ရင် ကောင်းမလဲဗျာ။ ဆေးလည်း ထိုးချင်တယ်၊ ထိုးလည်းမထိုးရဲဘူး။

အမေရိကားလိုပဲ တိုင်ဝမ်နိုင်ငံက ဝက်တုတ်ကွေးအရေးမှာ တက်ကြွပါတယ်။ Adimmune Corporation ကုမ္ပဏီက တရားဝင် ကာကွယ်ဆေး ထုတ်ပါတယ်။ ၂ဝဝ၉ ဒီဇင်ဘာ ၁၂ ရက်ကို တစ်နိုင်ငံလုံး ကာကွယ်ဆေးထိုးနေ့အဖြစ် သတ်မှတ်ခဲ့တယ်။ တိုင်ဝမ်မှာ ကာကွယ်ဆေးနဲ့ ဆက်စပ်ပြီး၊ သေဆုံးမှု ရှိခဲ့ပါတယ်။ အာဏာပိုင်တွေက အဲလို သေတယ်လို့ သံသယရှိရင် အားလုံးကို ရင်ခွဲစစ်ဆေးမှု မလုပ်မနေ လုပ်ရမယ်လို့ ထုတ်ပြန်ခဲ့ပါတယ်။ ၈-၁-၂ဝ၁ဝ နေ့ကပဲ Adimmune ကနေ အရင် ဆေးတစ်ပုလင်း လူ ၄ဝ စာ ထုတ်တာကနေ ဆွစ် Novartis ကုမ္ပဏီက ဆေးလိုပဲ၊ ၁ဝ ယောက်စာ ပုလင်း 10 doses per vial တွေ ထုတ်တော့မယ်လို့ ထုတ်ပြန်လာတယ်။

H1N1 နဲ့ Swine Flu လည်း ခေါ်ကြတဲ့ တုပ်ကွေးဗိုင်းရပ်စ် ကာကွယ်ဆေးဟာ ၂ဝဝ၉ ခုနှစ်ထဲမှာ ၂ မျိုး ပေါ်နေပါပြီ။ တစ်ခုက လက်မောင်းမှာ ထိုးရတဲ့ Flu shot ထိုးဆေးနဲ့ နောက်တစ်မျိုးက Nasal Spray Flu Vaccine (LAIV) ရှူဆေးပါ။ ထိုးဆေးကို ဗိုင်းရပ်စ်ပိုး အသေတွေနဲ့ ထုတ်လုပ်ထားပြီး၊ ရှူဆေးကိုတော့ အားနည်းသွားအောင် လုပ်ထားတဲ့ ဗိုင်းရပ်စ်တွေနဲ့ လုပ်ထားပါတယ်။ ကိုယ်ဝန်ဆောင်တွေ အပါအဝင်၊ အသက် ၆ လအထက် သုံးနိုင်တယ်လို့ အခုထိ သတ်မှတ်ပါတယ်။ ရှူဆေးကိုတော့ ကိုယ်ဝန်ဆောင် မပါ၊ ၂ နှစ်ကနေ ၄၉ နှစ်ရှိသူတွေ အတွက်လို့ သတ်မှတ်ပါတယ်။ မနှစ်ကထုတ်တဲ့ ကာကွယ်ဆေးတွေကို ဒီနှစ် ၂ဝ၁ဝ နှစ်ဝက်လောက်အထိ သုံးနိုင်ပါတယ်။ ဘာလို့လဲဆိုတော့ ရောဂါပိုးဆိုတာ ဆေးပြီးတာ၊ ဆေးယဉ်ပါးတာမျိုး ဖြစ်လာတတ်လို့ ဒီဆေးနဲ့မရရင် နောက်ဆေးသစ် ထုတ်ဖို့ လိုချင် လိုမှာမို့ပါ။ မလိုချင်လဲ မလိုဘူး။ ဆေးပေါ်တဲ့နှစ် ၂ဝဝ၉ ကိုယူပြီး၊ ဆေးနာမယ်ကို 2009 H1N1 လို့ လုပ်ထားပါတယ်။

ကြက်ဥနဲ့ မတည့်တဲ့လူတွေ ဒီဆေးနဲ့ မတည့်ဖြစ်တတ်တယ်။ ထိုးဆေးရဲ့ ဘေးထွက် ဆိုးကျိုးတွေကတော့ ဆေးထိုးတဲ့ နေရာမှာ နာတာ၊ နီတာ၊ ရောင်တာတွေ ဖြစ်တတ်တယ်။ နဲနဲဖျားမယ်။ ကိုက်ခဲမယ်။ ၁ ရက် ၂ ရက် လောက်ပါဘဲ။ ရှူဆေးကတော့ နှာရည်ယို၊ ခေါင်းကိုက်၊ အန်ချင်၊ ကိုက်ခဲ၊ ကိုယ်ပူတာတွေ ဖြစ်နိုင်တယ်။ နောက်ပိုင်း ရှူဆေးကို ဆက် မသုံးတော့တာ တွေ့ရတယ်။ သိထားဖို့က ဒီထုတ်ပြန်ချက်တွေဟာ ဆေးကုမ္ပဏီတွေကနေ၊ တွေ့သိသလောက်ကို ပြောတာတွေသာ ဖြစ်တယ်။ မသိနိုင်တာတွေလဲ ရှိနိုင်တာပေါ့။ ဒါပေမဲ့ အကြောက်ကြီး ကြောက်ဖို့တော့ မလိုပါ။

မြန်မာပြည်မှာ ကျန်းမာရေး အသုံးစရိတ်က ၃% သာ သုံးနိုင်နေတယ်။ ၂-၁ဝ-ဝ၉ နေ့က WHO နဲ့ ကျန်းမာရေးဝန်ကြီးဌာန တွဲပြီး၊ Planning Meeting On Pandemic (H1N1) 2009 Vaccine Deployment စီမံကိန်း အစည်းအဝေးတစ်ခု နေပြည်တော်မှာ လုပ်ခဲ့တယ်။ ရလဒ်ကို ၂၁-၁ဝ-ဝ၉ နေ့က SEARO ကို ဆက်တင်ထားတယ်လို့ ဖတ်ရတယ်။ အားရှိကြပါလေ။ SEARO နိုင်ငံတွေထဲမှာ ဘင်္ဂလားဒေ့ရှ်၊ ဘူတန်၊ မြောက်ကိုရီးယား၊ အိန္ဒိယ၊ အင်ဒိုနီးရှား၊ မော်လ်ဒိဖ်၊ မြန်မာ၊ နီပေါလ်၊ သီရိလင်္ကာ၊ ထိုင်း၊ နဲ့ တီမော-လက်စ်တီ တို့ ပါဝင်တယ်။

မြန်မာ့လွတ်လပ်ရေးနေ့ သတင်းအရ တိုင်ဝမ်မှာ လူတိုင်းကနေ ပြည်တွင်းဖြစ်ကိုပဲ ထိုးချင်သလား၊ နိုင်ငံခြားက သွင်းတာကိုဘဲ ထိုးမလား၊ ကိုယ့်ဘာသာကိုယ် ဆုံးဖြတ်နိုင်တယ်တဲ့။ နိုင်ငံခြားဖြစ်ဆိုတာ ဆွစ်ဇလန် Novartis ဆေးကုမ္ပဏီက လုပ်တာကို ပြောတာပါ။ ကျွန်တော်တို့ လူမျိုးတွေအဖို့လဲ ကိုယ့်ဘာသာကိုယ် ဆုံးဖြတ်ခွင့် အပြည့်ရှိကြပါတယ်။

Dr. တင့်ဆွေ

  • VIA