ဂျာမနီတွင် မွတ်ဆလင်များ ဝတ်ပြုသည့်နေရာများနှင့် ဗလီများကို ပိုမိုကာကွယ်ပေးရန် တူရကီ အစ္စလာမ်အုပ်စု DITIB က ဂျာမန်အာဏာပိုင်များကို တောင်းဆိုလိုက်သည်ဟု DW သတင်းတွင် ဖော်ပြထားသည်။

ရုရှားနိုင်ငံ ဆိုချီမြို့၌ ၂၀၁၄ ခုနှစ် ဆောင်းရာသီ အိုလံပစ်အားကစားပွဲဖွင့်ပွဲ အခမ်းအနားကို ပစ်မှတ်ထားသော ဗုံးပါလာသည်ဆိုသော ခရီးသည်တင် လေယာဉ်တစ်စင်းကို ပစ်ချရန် မိမိအမိန့်ပေးခဲ့ဖူးကြောင်း ရုရှားသမ္မတ ဗလာဒီမာပူတင်က ယခုမှ ထုတ်ပြောခဲ့ကြောင်း Reuters သတင်းဌာနက ဖော်ပြသည်။

ပဋိပက္ခများ ကြုံတွေ့နေရသော အရှေ့အလယ်ပိုင်းနိုင်ငံများ၏ လက်နက်တင်သွင်းမှုသည် ပြီးခဲ့သောငါးနှစ်အတွင်း ၁၀၃ ရာခိုင်နှုန်း ခုန်တက်လာခဲ့သည်ဟု စတော့ဟုမ်း နိုင်ငံတကာ ငြိမ်းချမ်းရေး သုတေသန အင်စတီကျု SIPRI အစီရင်ခံစာတွင် တင်ပြထားကြောင်း DW သတင်းတွင် ဖော်ပြထားသည်။

၂၀၁၆ အမေရိကန်သမ္မတ ရွေးပွဲတွင် ကြားဝင်စွက်ဖက်သူသည် ယူကရိန်းများ၊ တာတာများနှင့် ဂျူးများဖြစ်နိုင်ခြေရှိပြီး ကရင်မလင်မဟုတ်ဟု ရုရှားသမ္မတ ပူတင်က အမေရိကန်ရုပ်သံနှင့် အင်တာဗျူးတွင် ပြောဆိုလိုက်ကြောင်း AFP သတင်းတွင် ဖော်ပြထားသည်။

အမေရိကန် သမ္မတဒေါ်နယ်ထရမ့်က မြောက်ကိုရီးယားသည် ဒုံးကျည်စမ်းသပ်မှုများ ဆိုင်းငံ့ထားမည့် ကတိကဝတ်ကို စောင့်ထိန်းလိမ့်မည်ဟု ယူဆကြောင်း ပင်ဆယ်ဗေးနီးယား ဆွေးနွေးပွဲတွင် ပြောကြားလိုက်သည်ဟု DW သတင်းတွင် ဖော်ပြထားသည်။

ယနေ့ကာလတွင် ပင်လယ်ပြင်၌ ပြာကိုရေမျှောသြင်္ဂိုဟ်ခြင်းကို သဘောကျသည့် ဂျာမန်များ ပိုများလာသည်ဟု ဂျာမနီ သုဘရာဇာအသင်းက ပြောကြားကြောင်း DW သတင်းတွင် ဖော်ပြထားသည်။

တရုတ်ပြည်သူ့သမ္မတနိုင်ငံကို စီးပွားရေးနှင့် စစ်ရေးဆူပါပါဝါဖြစ်စေရေး ရည်မှန်းချက်ဖြင့် အကြွင်းမဲ့အာဏာကို တရုတ်သမ္မတ ရှီကျင့်ဖျင်လက်ထဲသို့ ထည့်နိုင်ရေးအတွက် သမ္မတသက်တမ်းသတ်မှတ်ချက် ပယ်ဖျက်ခြင်းကို တရုတ်ပါလီမန်အမတ်များက ဆောင်ရွက်ပေးလိုက်ပြီဖြစ်ကြောင်း AFP သတင်းက ဖော်ပြထားသည်။

စီးပွားရေးလုပ်ငန်းများကို ပြည်သူပိုင်သိမ်းမည်မဟုတ်၊ နိုင်ငံကို ကြွေးနွံတွင်းသို့ မောင်းသွင်းမည်မဟုတ်ဟု ကတိပြုလိုက်ပြီး စိုးရိမ်စိတ်ဝင်နေသည့် ဘဏ်လုပ်ငန်းရှင်များကို မက္ကဆီကို လက်ဝဲယိမ်း သမ္မတလောင်း အန်ဒရတ်မန်နျူယန်လိုပတ် အိုဘရာဒါက အာမခံလိုက်ကြောင်း Reuters သတင်းတွင် ဖော်ပြထားသည်။

အမေရိကန်သမ္မတဒေါ်နယ်ထရမ့် အဆိုပြုထားသောသံမဏိနှင့် အလူမီနီယမ် တင်သွင်းမှုအပေါ် အခွန်စည်းကြပ်ခြင်းမှ အချို့နိုင်ငံများကို ကင်းလွတ်ခွင့် ပေးထား ဦးမည်ဖြစ်ကြောင်း အိမ်ဖြူတော် က ထုတ်ပြန်ကြေညာခဲ့ကြောင်း DW သတင်းဌာနက ဖော်ပြသည်။

ဗြိတိန်တွင် ခိုလှုံနေသော ရုရှားနှစ်ဖက်ချွန် သူလျှိုဟောင်းနှင့် အတူအဆိပ်ခတ်ခံခဲ့ရသော သမီးဖြစ်သူမှာ ပစ်မှတ်ထား သတ်ဖြတ်ရလောက်အောင် မည်သည့်အရာမှ လုပ်ခဲ့သူမဟုတ်ကြောင်း မိတ်ဆွေတစ်ဦးက BBC သတင်းဌာနသို့ ပြောကြားသည်။

ဆော်ဒီအာရေဗျက ယီမင်နိုင်ငံအတွင်း ဝင်ရောက် တိုက်ခိုက်နေခြင်းများကြောင့် ဝေဖန်မှုများ ရှိနေသည့်တိုင် ဗြိတိန်ထံမှ Eurofighter Typhoon တိုက်လေယာဉ် ၄၈ စင်းဝယ်ယူရန် စတာလင်ပေါင် ဘီလီယံနှင့်ချီကာ တန်ဖိုးရှိသည့် စာချုပ်တစ်ရပ်ကို မတ်လ ၉ ရက်နေ့က ချုပ်ဆိုနိုင်ခဲ့ကြောင်း DW သတင်းဌာနက ရေးသားဖော်ပြသည်။

အမေရိကန်သမ္မတများထဲတွင် ပထမဆုံးအဖြစ် ဒေါ်နယ်ထရမ့်က မြောက်ကိုရီးယားခေါင်းဆောင် ကင်ဂျုံအန်းနှင့် တွေ့ဆုံရန် သဘောတူညီခဲ့သည်။

ပါပူဝါနယူးဂီနီ တောင်ပေါ်ဒေသတွင် လွန်ခဲ့သောဆယ်ရက်ကျော်က လှုပ်ခဲ့သော အင်အားပြင်းငလျင်ကြောင့် သေဆုံးသူအရေအတွက် ၁၀၀ ကျော်ရှိလာခဲ့ပြီဟု ယုံကြည်ရပြီး ပြန်လည်ထူထောင်ရန် အချိန်ယူရမည့် အခြေအနေနှင့် ရင်ဆိုင်နေရသည်ဟု Reuters သတင်းတွင် ဖော်ပြထားသည်။

သီရိလင်္ကာနိုင်ငံ အလယ်ပိုင်း ကန္ဒီခရိုင်တွင် မွတ်ဆလင်များ၏ စီးပွားရေးများ၊ ဆိုင်များကို လူအုပ်ကြီးများက လိုက်လံဖျက်ဆီး မီးရှို့နေခြင်းများကို အကာအကွယ်ပေးရန် အစိုးရက တပ်များကို ပိုမိုစေလွှတ်ထားသော်လည်း အခြေအနေကို မထိန်းနိုင်သေးခြင်း မရှိကြောင်း BBC သတင်းတစ်ရပ်က ဖော်ပြထားသည်။

ကားသုံးဆင့်တိုက်မှု တစ်ခုတွင် ဆယ်ကျော်သက် နှစ်ဦးသေဆုံးခဲ့သည်ဟု ရဲဌာနက ထုတ်ပြန်ထားသည်ကို BBC သတင်းဌာနတွင် ဖော်ပြသည်။