POST TYPE

FOREIGN AFFAIRS

ပြင်သစ် လွှတ်တော်ရွေးကောက်ပွဲ ပထမအကျော့တွင် သမ္မတမက်ခရွန်၏ ပါတီသစ် မဲအများဆုံးရ၊ ဒုတိယအကျော့တွင် သောင်ပြိုကမ်းပြို အနိုင်ရမည်ဟု ခန့်မှန်း
13-Jun-2017 tagged as ပြင်သစ်

ပဲရစ်၊ ဇွန် ၁၂

ပြင်သစ်သမ္မတသစ် အီမန်နျူရယ်လ် မက်ခရွန်၏ ဗဟိုဝါဒီ ပါတီသစ်သည် လွှတ်တော်ရွေးကောက်ပွဲ ပထမအကျော့တွင် မဲအများဆုံးရခဲ့ပြီး အခြေအနေ ကောင်းခဲ့သောကြောင့် အဆုံးအဖြတ်ဖြစ်မည့် ဒုတိယအကျော့တွင် သောင်ပြိုင်ကမ်းပြို အနိုင်ရနိုင်ဖွယ် ရှိကြောင်း BBC သတင်းဌာနက သုံးသပ်ဖော်ပြသည်။

ဇွန်လ ၁၁ ရက်နေ့တွင် ကျင်းပသော လွှတ်တော်ရွေးကောက်ပွဲ ပထမအကျော့ရလဒ်ကို အခြေခံပြီး ခန့်မှန်းတွက်ချက်မှုအရ လာမည့် ဇွန်လ ၁၈ ရက်နေ့တွင် ကျင်းပမည့် ဒုတိယအကျော့တွင် မက်ခရွန်၏ La Repubique en Marche- LREM (သမ္မတနိုင်ငံ ရှေ့သို့ချီ) ပါတီနှင့် မဟာမိတ် MoDem (ဒီမိုကရက်တစ် လှုပ်ရှားမှု) ပါတီတို့သည် အမတ်နေရာ ၅၇၇ နေရာ ရှိသော အောက်လွှတ်တော်တွင် ၄၄၅ နေရာအထိ အနိုင်ရနိုင်သည်ဟု သိရသည်။

အာဏာရပါတီဟောင်း ဆိုရှယ်လစ်ပါတီမှာ အမတ်နေရာ ၂၀၀ ခန့်အထိ ဆုံးရှုံးဖွယ် ရှိနေသည်။

ပင်မနိုင်ငံရေး ရေစီးကြောင်းမှ ပါတီကြီးများက ဒုတိယအကျော့တွင်  LREM နှင့် ပြိုင်ဘက်ဖြစ်သည့် ကိုယ်စားလှယ်များကို မဲပေးခြင်းဖြင့် သမ္မတ မက်ခရွန် အာဏာအလုံးစုံ မချုပ်ကိုင်နိုင်ရေးအတွက် ဟန့်တားကြရန် နှိုးဆော်ထားသည်။

မက်ခရွန်၏ LREM ကို တည်ထောင်သည်မှာ တစ်နှစ်ကျော်သာ ရှိသေးပြီး ကိုယ်စားလှယ်လောင်း အများစုမှာလည်း နိုင်ငံရေး အတွေ့အကြုံ နည်းသူများနှင့် လုံးဝ အတွေ့အကြုံ မရှိသူများ ဖြစ်သည်။ 

မဲအားလုံး ရေတွက်ပြီးချိန်တွင် မက်ခရွန်၏ LREM နှင့် မဟာမိတ် MoDem တို့သည် မဲ ၃၂ ဒသမ ၃ ရာခိုင်နှုန်း ရရှိခဲ့သည်။ ဗဟိုလက်ယာယိမ်း ရီပတ်ဘလစ်ကန်ပါတီက ၂၁ ဒသမ ၅ ရာခိုင်နှုန်း၊ လက်ယာစွန်း အမျိုးသားတပ်ဦး (FN) က ၁၃ ဒသမ ၂ ရာခိုင်နှုန်း ရရှိခဲ့ပြီး လက်ဝဲစွန်း La France Insoumise (ပြင်သစ် အနိုင်မခံ) ပါတီက ၁၁ ရာခိုင်နှုန်း ရရှိခဲ့သည်။ 

အာဏာရပါတီဖြစ်ခဲ့သော ဆိုရှယ်လစ်တို့မှာ ၁၀ ရာခိုင်နှုန်းကျော်သာ ရရှိခဲ့ပြီး အကြီးအကျယ် အရေးနိမ့်ခဲ့သည်။

ပြင်သစ်လွှတ်တော် ရွေးကောက်ပွဲပုံစံအရ ပထအကျော့တွင် မဲဆန္ဒနယ် တစ်ခုချင်းစီ၌ မဲထက်ဝက်ကျော် ရသူကိုသာ အနိုင်ရသူအဖြစ် သတ်မှတ်ရာ အမတ်နေရာ လေးနေရာသာ အပြီးသတ်ရလဒ် ထွက်ခဲ့သည်။ ကျန်နေရာများတွင် မဲဆန္ဒနယ်တစ်ခုချင်းစီအလိုက် မဲအများဆုံးရသူ နှစ်ဦးနှင့် မဲပေးခွင့်ရှိသူ အရေအတွက်၏ အနည်းဆုံး ၁၂ ဒသမ ၅ ရာခိုင်နှုန်း၏ ထောက်ခံမှု ရရှိသူများမှာ ဒုတိယအကျော့ ဆက်ပြိုင်ခွင့်ရမည် ဖြစ်သည်။ 

ဆိုလိုသည်မှာ ဒုတိယအကျော့တွင် ပုံမှန်အားဖြင့် မဲအများဆုံးရသူ နှစ်ယောက်စီသာ ပြိုင်ရလေ့ရှိပြီး အချို့နယ်များတွင်သာ သုံးယောက်၊ လေးယောက်အထိ ဖြစ်နိုင်သည်။

ဇွန်လ ၁၈ ရက်နေ့ ဒုတိယအကျော့အပြီးတွင်မှ မည်သည့်ပါတီက အမတ်ဘယ်ရွေ့ဘယ်မျှ ရသည်ဆိုခြင်းကို အတိအကျ ပြောနိုင်မည် ဖြစ်သော်လည်း ဒုတိယအကျော့ ပြိုင်ခွင့်ရသူများသည် ပါတီ၊ မဲအများဆုံးဖြင့် ပထမအကျော့ကို ဖြတ်ကျော်နိုင်ခဲ့သည့်ပါတီမှာ ဒုတိယအကျော့တွင် အမတ်နေရာ အများစု ရရှိတော့မည်ဟု ကျိန်းသေပေါက် ပြောနိုင်သည့် အခြေအနေ ရှိသည်။ 

မက်ခရွန်၏ LREM ဘက်မှ ဒုတိယအကျော့ တက်သူများထဲတွင် နွားရိုင်းသတ် သမ္မတဟောင်း မာရီဆာရာ၊ ရဝမ်ဒါဒုက္ခသည်မှ နိုင်ငံသားအမတ်လောင်း ဖြစ်လာသူ ဟာဗေးဘာဗီးလ်၊ သင်္ချာပညာရှင် စီးဒရစ် ဗီလာနီတို့ အပါအဝင်ဖြစ်ပြီး ရီပတ်ဘလစ်ကန်ပါတီမှ ပြိုင်ဘက်များနှင့် အဓိက ယှဉ်ရမည် ဖြစ်သည်။ ပါတီကြီးများမှ ဝါရင့်နိုင်ငံရေးသမား အများစုမှာလည်း အမှတ်မထင် အရေးနိမ့်ခဲ့ပြီး ပထမအကျော့ကိုပင် မကျော်နိုင်ခဲ့ကြပေ။

အကြမ်းဖက်မှု အန္တရာယ်များ ဆက်တိုက်ကြုံခဲ့ရသောကြောင့် ရွေးကောက်ပွဲကို လုံခြုံရေး အထူးတင်းကျပ်ထားခဲ့သည်။

အသက် ၃၉  နှစ်သာ ရှိသေးသည့် မက်ခရွန်သည် ပြီးခဲ့သည့်လက ကျင်းပခဲ့သော သမ္မတရွေးကောက်ပွဲ ဒုတိယအကျော့တွင် အမျိုးသားတပ်ဦးပါတီမှ မာရင်းလာပန်းကို အနိုင်ရခဲ့ပြီး သမ္မတ ဖြစ်လာခဲ့သူ ဖြစ်သည်။

နိုင်ငံရေး အတွေ့အကြုံ နည်းပါးပြီး ယခင်က ရွေးကောက်ပွဲ တစ်ကြိမ်မျှ မဝင်ခဲ့ဖူးဘဲ စီးပွားရေးဝန်ကြီး တာဝန်သာ ယာယီထမ်းဆောင်ဖူးသူ မက်ခရွန်သည် သမ္မတရွေးကောက်ပွဲ အနိုင်ရခဲ့သော်လည်း လွှတ်တော်ရွေးကောက်ပွဲတွင် ယခုမှ စထူထောင်သည့် ပါတီသစ်ဖြင့် အခြေမလှနိုင်ဟု ယူဆခဲ့ကြသည်။ မက်ခရွန်၏ မဲဆွယ်ကာလ ကတိများအတိုင်း အကောင်အထည်ဖော်ရန်မှာ လွှတ်တော်တွင်း လူများစု ထောက်ခံမှုရှိရန် လိုအပ်ရာ ခက်ခဲသည့် စိန်ခေါ်မှုဟု ကျွမ်းကျင်သူများက ခန့်မှန်းခဲ့ကြသည်။

သို့သော်လည်း သမ္မတရွေးကောက်ပွဲတွင် အံ့အားသင့်စရာ အောင်ပွဲယူနိုင်ခဲ့သည့် နည်းတူ လွှတ်တော်ရွေးကောက်ပွဲတွင်လည်း မျက်နှာသစ် ကိုယ်စားလှယ်များဖြင့် အခြေအနေကောင်းအောင် စွမ်းဆောင်နိုင်ခဲ့ခြင်း ဖြစ်သည်။

သမ္မတသစ် မက်ခရွန်သည် ရာသီဥတု ပြောင်းလဲလာမှု ကိစ္စကဲ့သို့သော နိုင်ငံတကာရေးရာများတွင် အမေရိကန်သမ္မတ ဒေါ်နယ်ထရမ့်နှင့် ထိပ်တိုက်ရင်ဆိုင်ခြင်း အပါအဝင် ငယ်ရွယ်ရဲရင့်သည့် လုပ်ဆောင်ချက်များကြောင့် ကမ္ဘာ့နိုင်ငံရေးဇာတ်ခုံပေါ်တွင် ထင်ရှားလာသူ ဖြစ်သည်။

ယခုလွှတ်တော် ရွေးကောက်ပွဲသည် ပြင်သစ်ပြည်သူတို့က မက်ခရွန် မူဝါဒအတိုင်း အကောင်အထည်ဖော်နိုင်ရန် ထောက်ခံပေးလိုက်ခြင်းဟု ဖွင့်ဆို၍ ရနိုင်သော်လည်း မဲလာပေးသူ အရေအတွက် နည်းပါးခြင်းမှာ စိုးရိမ်ဖွယ်ရာ ဖြစ်သည်ဟု သုံးသပ်မှုများ ရှိနေသည်။      

F-03